مسيكم بالخير الجميع .

في احد فصول الصيف طلعت مشوار براة الديره مع صديقي الشايب ابو مرزوق على ظهور الخيل
وتوخرنا وظلينا ذيك الليله براة الديره ورجعنا ثاني يوم حين طلع النهار وحنا راجعين
للديره وبدا الجو يزيد حراره
قلت لابو مرزوق : الخيل عطشانه وانا بعد عطشان .
رد علي : حين نوصل هناك عند اشجار الزيتون نشرب ونرتاح ونسقي الخيل .
وصلنا عند اشجار الزيتون نزلنا عن الخيول ورحنا على بير المويه وقفت على باب البير
امسكت الركوه ورميتها في البير واطلعتها مليانه مويه وسكبتها في الحوض سويتها
مره ثانيه وتركنا الخيل تشرب لين ارتوت بعدها عطيت الركوه لابو مرزوق فشرب
وشربت انا وجلست على حجر جنب البير
لاحظت ابو مرزوق يتفحص الارض
فقال : عذ بالله من الشيطان الرجيم وش رجعك علينا بعد هالسنين الطويله .
وقفت على ارجولي فاشر لي بيده الحقني مشيت وراه مسافه حوالي 300 متر ناظرني
وقال : خلنا نرجع للديره بعجل الامر ما يتحمل الانتظار الله يستر من تاليها .
سألته : ويش السالفه يا رفيقي ؟
جاوبني بقوله : حين نصل الديره تعرف السالفه .
ركبنا خيولنا وطردنا فيها كنا مثل اللي يتسابقون ورغم انه ابو مرزوق تجاوز عمره 60
لكنه كانه مثل شاب في بداية مرحلة الشباب وهو يطرد بفرسه المزيونه وصلنا
بيت خالي ابو حاتم دخلنا حوش بيت خالي
وجلسنا في الديوان صبيت فنجال القهوه لابو مرزوق ولخالي
خالي قال لابو مرزوق : بوجهك كلام يا رفيقي .
قال ابو مرزوق : يا ابو حاتم بعد غياب 20 سنه رجع الوحش عذ بالله من الشيطان
الرجيم الخوف ما هو عليك انت واخوانك وعيالكم عرفت على من الخوف يا رفيقي ؟
ناظروني الاثنين وهز خالي راسه وصار يشد قبضات ايدينه ويرخيها .
سألتهم : ويش السالفه ومن هاذ الوحش ورجعنا بسرعه من عند بير المويه ؟
جاوبني خالي : يا ولدي هاذ شخص لقبه الوحش لانه وحش ما عنده رحمه ولا شفقه .
يقتل ولا يهمه الامر قبل 20 سنه جا على الديره كنت انت صغير عمرك 7 سنين .
وصارت مشكله بينه وبين ابو نعمان الله يرحمه واموات المسلمين .
الوحش شتم ابو نعمان صفعته على وجهه قدام الرجال وطردته من الديره .
قالي الوحش : اردها لك بعدين يا ابو حاتم هاذ وعد مني ما تعودت اخلف وعدي .
وإذا وده يآذيني يآذيني فيك انت لنك ولد اختي ويصيب عصفورين بحجر واحد
يآذيني ويآذي والدتك لكن يخسى يخسى هالردي ويخسى شاربه .
قالي خالي : نادي اخوالك يجون الحين بالحال رحت ناديت اخوالي وعيالهم معهم
فقال لهم خالي : الوحش رجع للديره ولزوم نطب عليه واللي معه الحين قبل ما يسوون
اي شيئ تجهزو وخلنا نروح عليهم .
قال ابو مرزوق : مو الحين يا ابو حاتم الحين الوقت الظهر والحراره قويه
خلهم لين يقيلون و عند العصر نطب عليهم نحصرهم ونضربهم قبل ما يفيقون
من غفلتهم
وأيده خالي ابو محمد وخالي ابو اسماعيل .
تجهزنا وقبل العصر طلعنا من البيت وتوجهنا صوبهم وحين وصلنا منطقه .
قال خالي : حاتم انت واخوانك تروحون من هنا وتجيونهم من خلفهم .
حين تصيرون خلفهم تعطونا اشاره انكم خلفهم لاجل ما ينحاشون .
مشعل وصالح وحميد وانت يا اسماعيل وعلي تروحون من هنا وتحصروهم من الغرب
وخالد وسلمان وحميدي ومتعب وفارس تظلون هنا .
ابو محمد وابو اسماعيل وابو مرزوق وحمود تعالو معي
وصلنا منطقه نزلنا عن خيولنا وناظرناهم
كان الوحش وخوياه على بعد حوالي 400 متر صار خالي يناظر اولاده شاف حاتم وهو يأشر بيده
فقال خالي : توكلنا على الله لكن ما ودنا نقتل احد ندافع عن نفسنا
صوب سلاحه وصار يضرب على الوحش وربعه كان معه
2 من خوياه وصار الوحش واللي معه يردون علينا بضرب الرصاص صرنا نضرب
عليهم من الجهات الاربع وهم يردون علينا لين خلص الرصاص اللي معاهم كنا نضرب
كل منا رصاصه وحده وهم يضربون رشقات كامله بهاذ الطريقه خلص رصاصهم
وحنا نضرب عليهم وهم ما يردون ايقنت انه رصاصهم خلص فتقدمت بسرعه كنت اخذ
طريق ملتويه اتعرج يمين وشمال واكمن خلف حجر واضرب عليهم رصاص
لحقني خالي والربع اللي معي حين وصلناهم خالي طلب من الوحش واللي معاه يرمون سلاحهم
على الارض
وصار خالي ينادي على باقي الربع تجمعو باقي ربعنا .
قال خالي ابو حاتم : ويش رجعك علينا يا الوحش بعد 20 سنه؟
رد عليه الوحش : لي دين عندك ودي استرده والا نسيت الدين ؟
قاله خالي : تخسى يا الهامل هاذ بعيده عن شاربك هاذ مو هو دين هاذ تأديب لك .
قدمت عليه وقلت له ولربعه : اجلسو على الارض وحطو ايدينكم على روسكم .
جلسو على الارض شفت واحد منهم يمسك حجر بيده
صرخت فيه : اترك الحجر والا اخليها تطلع من راسك .
فترك الحجر وهو يناظرني بغضب وصار يعض على شفته وهجم علي
فعاجلته برصاصه صابته في رجله فوقع وهو يصارخ من الوجع
لكنها كانت سطحيه .
فقلت له اذا سويتها مره ثانيه اخليك طول عمرك على كرسي مدولب تفهم ؟
قال الوحش : من هاذ العيل يا ابو حاتم .
رد عليه خالي : هاذ وليدي وانصحك نصيحه لا تستفزه .
قال الوحش : قصدك انه ولد اختك كبر العيل اليتيم وصار رجال
وكاد انك تعبت عليه لين صار رجال اليوم سداد الدين يا ابو حاتم .

لاحظت انه يسحب من جيب ثوبه سكين فقمت عاجلته بضربه بمؤخر سلاحي في بطنه فانثنى لقدام
عاجلته مره ثانيه وضربته بين كتوفه بمؤخر سلاحي فوقع على الارض على وجهه .
مديت يدي على جيبه وطلت السكين كانت سكين طولها حوالي 30 سنتمتر
رفيعه مقبضها من البلاستيك الناعم ومزركش و راسها مدبب مثل راس المثلث
ومشحوذه بعنايه وعليها آثار زيت وهاذ يمنعها انها تصدأ .
وهي صناعه يابانيه حيث كان مكتوب صنع في اليابان .
امسكت الوحش من يده ولويتها وانسدحت على ظهري وحطيتها بين ارجولي
رجل كانت تحت ابطه والثانيه فوق وامسكت كف يده وثنيته بالعكس .
ومع انها رجلي كانت تحت ابطه صرت اشد يده وادفع تحت ابطه برجلي
فصار يصارخ حاول خالي يبعدني عنه شعرت انه شيء انكسر في ذراعه دفعته برجولي
وقفت على ارجولي وصرت انفض التراب اللي علق على هدومي سمعته يقول .
ما احد كسر ذراعي إلا انت يا اليتيم .
هاذ الحركه اذا نفذها شخص بحرفيه وقوه كافيه يكسر الذراع في عدة اماكن .
من عند المعصم لانه مثني بعكس الذراع وعند المرفق بسبب الشد القوي والذراع
ملتوي وبامكانه كسر اضلاع الصدر بسبب دفع الارجل وشد الذراع تنكسر اضلاع الصدر
ربطناه وربعه اللي معه واخذناهم معنا على الديره .
اكتشفت اني كسرت ساعده من عند المرفق .
سبقنا اخوي حاتم على الديره واتصل على الشرطه حين وصلنا كان وصل قبلنا لبيت خالي سيارتين شرطه .
ضيفنا الشرطه قهوه وشاي في بيت خالي بعدها اخذو الوحش وربعه لمركز الشرطه
اللي عرفناه بعدين انه الوحش كان في السجن مدة 12 سنه وظل يدخل ويطلع من
السجن لين قضى اخر محكوميه له وحين طلع خلال مدة 3 سنوات صار عليه حوالي
9 تهم سرقه وتهديد واستخدام سلاح في سرقات بعدها جا على ديرتنا مثل ما سولفت لكم
بعد فتره حوالي سنه من توقيفه .
تم الحكم عليه 15 سنه اشغال شاقه خلال تواجده هناك اصيب بالتهاب رئوي حاد
وصار عنده سكري وضغط وروماتيزم كفانا الله شر الامراض الحين قضى مدة عقوبته
في السجن اما ربعه الاثنين اللي كانو معه تم الحكم على كل واحد منهم 3 سنوات .
في اخر شهر 10 السنه الماضيه في سوق الخيل شفت الوحش وتوكدت منه
لكنه كان انسان يرثى لحاله ما يقدر يوقف على ارجوله اللهم لا شماته
كان يتكأ على عكاز ويمشي بصعوبه ناهيكم عن الامراض اللي ذكرتها
حيث انه احد ابناء الديره يشتغل ضابط في السجن اللي كان فيه الوحش
وذكر لنا انه الوحش صار ما يختلط مع باقي السجناء منعزل عنهم برغبته الشخصيه
ابو مرزوق قصاص اثر متمرس اخذ هاذ المهنه عن والده ووالده اخذها عن جده
بالوراثه حين شاف اثر الوحش اول مره حفظه حين شاف المره الثانيه ما خفاه الاثر
ابو مرزوق خدم في العسكريه مدة 22 سنه قصاص اثر ووصل رتبة ملازم اول .


وسلامتكم يالربع .