مواجهه مع الثعبان في القنيص

[راعي الصقلاوي]

صبحكم الله بالخير الجميع .


ذات يوم كنت في بيت خالي ابو حاتم وكان يسولف لي عن خدمته في العسكريه حيث انهى .
خدمته وكان برتبه وكيل اول ( شرطتين على الكتف ) كانت مدة خدمته 18 سنه .
فقالي : يابو ظاري متى آخر مره طلعت للقنيص ؟
قلت له : زمااان يبه لكن ابشر باللي يجيب لك لحم صيد إن شاء الله .
في اليوم الثاني بعد صلاة الفجر تجهزت وجهزت حصاني قبل طلوع الشمس طلعت من البيت .
وبديت ادور صيد في ذاك اليوم كانت الحراره قويه تقريبا 33 مئويه .
وصلت مكان كان هناك 3 شجرات سرو ناظرت شفت طير الدجاج الحبشي كان واقف .
على حجر وضربته ظل مكانه على الحجر رحت جبته وتابعت طريقي وصلت مكان شفت حمام .
جول كبير طار الحمام صرت اضرب عليه في الهوا اوقعت 8 حمامات حصيله كبيره الحمدلله
حملتهم وتابعت طريقي قررت اروح بير مويه اسقي حصاني حين قربت من البير
وقفت حصاني ومشيت قدامه بركاده لاني سمعت صوت طيور الشنار كان بير المويه بعيد عني
بالتقريب حوالي 60 متر وحوله اشجار الزيتون قربت من البير بركاده واذا 4 طيور شنار جنب حوض البير بسملت وصوبت عليهم وضربت
3 طيور اصبتها والرابع انحاش جريح مدري وين تخبى دورت عليه ما لقيته رحت على بير المويه
اسقيت حصاني وشربت وتريحت شوي في ظلال الشجر البير موجود في راس الجبل
هناك طريق واضحه تنزل من راس الجبل للوادي في اسفل الجبل من طرف سفح الجبل للواد
ارض منبسطه يزرعونها قمح او شعير او عدس .
في طريقي للوادي شفت ارنب تحت شجرة خروب ضربته طلقه ظل مكانه
حملته معي ومشيت حين نزلت من الجبل وصرت في ارض منبسطه توقف حصاني ونصب اذانه .
ناظرت حولي ما في صوت او اي انسان لكزت حصاني برجولي رفض يمشي لاحظت
ارنب قفز تحت شجرة زيتون صوبت عليه وضربته ظل مكانه سويت فيه مثل اخوه
كملت طريقي للبيت شفت ارنبين بكل ركاده جلست جنب حجر كبير وصوبت .
على ارنب منهم بدا الحصان يحمم ويهمهم شديت لجامه لاجل ما تنحاش الارانب .
من صوته لكنه عاد حمحم وصهل بصوت قوي وشد اللجام من يدي ورجع للخلف .
حينها ادركت انه في شيء سبب خوف شديد للحصان ابتعد عني الحصان مسافه .
ناظرت جنبي ناحية اليمين سمعت صوت هسهسه وشيء اشبه بالصفير لحظات .
اذا هو ثعبان ثخين لونه اصفر وعلى ظهره بقع كبيره لونها اسود وداخلها دائره لونها
احمر ناظرته كان لسانه يطلع ويدخل بفمه وله صوت
اشبه بالصفير كنت ممسك بالبندقيه بيدي اليمين وهي قريبه من رجلي اليمين .
بدا الثعبان يمد راسه تجاهي كانت المسافه بيني وبينه قدرتها حوالي 70 سنت متر
خلال لحظات فتح فمه تلقائيا حذفته بالبندقيه بعيد عني حوالي 2 متر
وقلت في نفسي خلص الحين يروح في حال سبيله الا انه التف على نفسه وصار بوضع
هجومي صوبت عليه بالمسدس وهو رافع راسه ضربته طلقه صابته تحت راسه فطار راسه
بفعل الرصاصه دورت راسه لين لقيته حملت حجر كبير وبديت ادق راسه لين اني طحنته
كان موقف مخيف رحت لحصاني كان بعيد عني حوالي 5 امتار ركبته ومشيت مسافه حوالي 600 متر شفت ارنب جنب حجر
صوبت عليه وضربته فوقع مكانه حملته
وكملت طريقي لين صرت بعيد عن الديره حوالي 4 كلم شفت طير شنار وخويه على حجر
صوبت عليهم وضربتهم ظلوا مكانهم حملتهم ومشيت حين صرت بطرف الديره اقرب بيت لي حوالي 700 متر شفت ارنب
لونه ابيض ضربته طلقه ظل مكانه حملته وكملت طريقي
لبيت خالي بفضل الله تعالى كان صيد وافي


الحصيله كانت 4 ارانب و 8 طيور حمام و6 شنارات ودجاجه حبشيه الحمدلله خلال نص نهار
حصيلة صيد وافره بفضل الله تعالى وزنت الارانب بعد سلخها وتنظيفها 6 كيلوجرام .
ناهيكم عن الحمام والشنارات والدجاجه الحبشيه نظفنا حصلية الصيد وشبيت النار
حريمنا كان دورهم شوي الصيد وقسمت حصتهم قبل ما نتغدى .
فقالي خالي : يبه سألتك امس من متى ما طلعت للقنيص قمت انت الله يرضى عليك
في هالجو الحار والهجير تطلع تقنص لي ؟
رديت عليه : يبه اول شيئ صار لي زمان ما قنصت طلعت والحمدلله وفقني بالصيد
الشيء الثاني انت تحب لحم الصيد ما احب افشلك واقولك خلها لبعدين
بعد الغدا لفانا صديقي الشايب ابو مرزوق .
فسولفت لخالي ولصديقي عن الثعبان الاصفر .
فقالي ابو مرزوق : وصفلي الثعبان بالتفصيل الممل .
قلت له : هو ثعبان ثخين لونه اصفر وعلى ظهره بقع كبيره لونها اسود وداخلها دائره
لونها احمر راسه اشبه بالمثلث وعنقه رفيعه اقدر طوله حوالي 160 سنت متر .
فقالي ابو مرزوق : يا ابن آخي هاذ الثعبان سام جدا حسب وصفك
الحمدلله انك قتلته دايما خلك حذر في القنيص
مسا ذاك اليوم عرفت انه احد اهل الديره يربي ارانب قريب
من مكان اخر ارنب قنصته نشدته اذا فقد احد ارانبه
قالي : يا ابن اخي فقدت ارنب لونه ابيض الله يعوضني فيه خير
قلت له : اني قنصت هالارنب وما كنت ادري انه لك كم ثمنه ؟
قالي : يا ابو ضاري صحتين وعافيه وقفت على هالارنب؟
بعد هالحادثه بحوالي شهرين
مريت من ذاك المكان وكان معي صديقي ابو مرزوق توقفت ونزلت عن ظهر حصاني
فقالي ابو مرزوق : ويش فيك نزلت عن الحصان ؟
قلت له : هنا قتلت الثعبان الاصفر .
فقالي : يا وليدي اياك ثم اياك انك تجلس هنا في هاذ المنطقه الصخريه وخاصه المغاره
اللي فوق هناااااك مليانه ثعابين سامه .
صرت اتحاشى اروح ذيك المنطقه لكن اذا اضطرتني الظروف امر منها يكون مروري سريع


صورة طير الشنار ( تعبيريه ) .








صورة الدجاج الحبشي ( تعبيريه )







وسلامتكم يا الربع .