الشكاك والبخيل لا تعطيه

[راعي الصقلاوي]

السلام عليكم ورحمة الله وبركاته .

ذات يوم اخذت اجازه من وظيفتي العسكريه مدتها 10 ايام بعد فتره دوام بلغت 100 يوم لظروف حصلت معي في ذاك الوقت كان عمري 25 سنه
في اول يوم لي في اجازتي رحت لبيت خالي لقيت عنده ناس من الديره رجال ومعاه اثنين من اولاده علاقتي معاهم من بعيد .
طرحت السلام عليهم وصافحتهم وقبل لا اجلس
قال الرجال : طيب يا ابو حاتم نستأذن وننتظر منك جواب .
قالهم خالي : ان شاء الله توكلوا على الله . بعد ما طلعوا من بيت خالي
سألت خالي : ويش الجواب اللي ينتظروه .
قالي : يبه الربع ذول يطلبون بنتي اللي خلصت الثانويه العامه زوجه لولده زاهر .
قلت له : يبه بعد اذنك واعذرني اني تدخلت بهاذ الشيء لا تعطيه باكر اذا عطيته ما تخلص معاه .
قاطعني خالي وقال : ليش يبه في شيء ما اعرفه وبعد ما سألت عن زاهر .
قلت له : يبه هاذ الولد شكاك يشك بنفسه يتشكك بالشيء بشكل مو طبيعي اذا عطيته يشوفني باكر هنا في البيت ما يسألك انت
يسال البنت : ويش يسوي هنا ؟ ويش جابه هنا ؟ كل يوم يجي عندكم ؟ يطول عندكم هنا ؟ ليش تتكلمي معاه ؟ ليش تناظريه ؟
وبناتك خواتي اللي تربيت معاهم هنا مصلحتهم تهمني على كل حال اسال خلف سايق باص طلاب الجامعه عن زاهر ابن خالته .
هز راسه انه موافق .
دقيت على خلف وقلت له : يا خلف خالي ابو حاتم يطلبك ضروري الحين لا تونى علينا حين جا خلف وطرح السلام وجلس صبيت له الفنجال
خالي قال : انشدك يا خلف وما انشدك عن ذنوبك إن شاء الله وتصدقني بجوابك ويش طباع زاهرولد خالتك ؟
رد خلف : يا ابو حاتم ولد خالتي طبعه السيء انه شكاك يتشكك ولاجل كذا ابوي رفض يزوجه اختي . انصحك نصيحه لوجه الله تعالى لا تعطيه يا ابو حاتم
تعب معاه والله انت ما تعرفه مثلي
بعد صلاة المغرب ذاك اليوم لفانا صديقنا ابو مرزوق يزور بنته زوجة ولد خالي فسولف معاه خالي عن هاذ الولد
ابو مرزوق قال : يا صديق عمري يا ابو حاتم البشر عندهم خصلتين سيأآت الشك والبخل البخيل يحرم نفسه واهل بيته يموت جوع
يقطع من لحمه ولا يصرف قرش احمر على اهل بيته بداعي التوفير وتقليل المصاريف .
والشكاك يعيش اهل بيته بجحيم من ظنونه وهواجيسه وخاصه من طرف الحريم يصيبه الوهم اذا شاف شخص بشرفة بيته لحاله يصيبه الهواجيس
وكاد هالشخص يناظر حريم بيتي ويصير يسأل اهل بيته اسأله ما عندهم جواب عليها
الشكاك والبخيل لا تعطيه .
بعد ما تعشينا وابومرزوق راح لبيته جلسنا جميع اهل البيت الحريم والرجال .
قالت زوجة خالي : يا ابو حاتم الحرمه اللي كانت عندي ترغب تكون البنت زوجه لولدها حسب ما قالت ولدها يشتغل و له بيت لحاله .
بنت خالي قالت يبه : ما ودي اتزوج الحين ودي اكمل دراستي الجامعيه وبعدها يفرجها الله
رد خالي : ماله نصيب عندنا يشوف نصيبه عند غيري ما عندي بنات للزواج .
بعد 3 ايام رد خالي الجواب للربع : ما لكم عندنا نصيب البنت ما لها رغبه بالزواج .
بعد يومين لفانا مجموعه من شيبان الديره لاجل يقنعون خالي يزوج بنته كان رد خالي بحزم ما في نصيب .
ومن ما قال : يالربع بنتي رافضه الزواج وهاذ الامر ما اغصبها عليه لانه الامر يهمها وهاذ حياتها تقضي حياتها مع شخص مغصوبه عليه ؟
ومرت الايام والسنين بعد مرور 5 سنوات خلصت دراستها الجامعيه والتحقت بسلك العسكريه
برتبة رقيب اول جامعي .

وجاها نصيبها تزوجت شخص من اصدقاء الطفوله والمراحل الدراسيه من الابتدائي حتى المرحله الثانويه لكني ما درست ثانويه عامه ( التوجيهي )
كان شرطها الوحيد ما يجبرها انها تترك شغلها الا بارادتها وحين انهت خدمتها كانت برتبة وكيل اول
( شرطتين على الكتف ) .
وعندها الحين من فضل الله تعالى 3 اولاد وبنت اكبرهم عمره 22 سنه
الله يطول اعمارنا في طاعته .

وسلامتكم يالربع