السلام عليكم ورحمة الله وبركاته .
صبحكم الله بالخير الجميع .
طلعت مشوار ورافقني ربعي من ايام الدراسه في المرحله المتوسطه كنا 8 اشخاص سوينا الغدا في البر
تشاركنا بكل شيء جمع الحطب وشبة النار
والطبخ وتنظيف مواعين الطبخ حين جلسنا وبسملنا لفانا شخص من الديره عزمنا عليه شاركنا بالغدا والحمدلله
وحنا نشرب القهوه لفانا ولد عم هاذ الشخص اسمه فهاد صبينا له الفنجال وحنا نسولف اللي لفانا وحنا نشرب القهوه
فهاد قال : ويش قنصت يا سعد ؟
رد سعد بقوله : الحمدلله من فضل الله حمام وشنار وارانب
فهاد قال : هاذ بعيده عنك ما ظنيت انك تقنص صوص دجاج .
رد عليه سعد : اللي قنصته دليلي ولا تزود علي بالكلام .
قلت : فهاد قصر الهرج ولد عمك ماهو بالكذوب وتراه عندي .
فهاد قال : سعد خلنا نشوف شطارتك بضرب الرصاص اعطيك هدف تضرب عليه واحط لك قطعة القماش هاذ هناك تخطفها وانت منطلق بفرسك
وتضرب فرع شجرة الصنوبر رصاصه والفرس منطلقه فيك
وراح قشط فرع شجرة الصنوبر
رد عليه سعد : اذا حصلت كل اللي طلبته ويش تسوي ؟
قال فهاد : عليها وجوه الربع اعطيك فرسي زاهيه .
قال سعد : اذا ما نجحت باللي طلبته لك فرسي عذبه . انتدب كفيلك يا فهاد
قال فهاد : كفيلي خالد ابو فوز خالد يكون زوج بنت خالي ابو حاتم
سعد قال : كفيلي ابو ظاري .
سعد صاب الهدف وكان عباره عن حجر على صخره وطال قطعة القماش عن الارض وهو منطلق بالفرس وضرب فرع شجرة الصنوبر واصابه وهو منطلق بالفرس .
قلت لخالد : عطني شرط كفيلي سعد
قام خالد جاب الفرس زاهيه اخذتها وسلمتها لسعد .
قال فهاد : سعد مبروكه عليك زاهيه حافظ عليها تراها كريمه عزيزه .
ما ظنيت انك تحصل كل هاذ يا صوص الدجاج
تلاسن سعد مع فهاد وتشابكو بالايدي فزعنا بينهم وابعدناهم عن بعض فهاد توعد سعد انه وده يضربه قدام الناس
قلت : يا فهاد ترى سعد بوجهي واحذرك من تقطيع الوجه وانت تعرف ويش يصير اذا مديت يدك على سعد اطلبك للحق عند اي قاضي عشائري تختاره .
رجعنا للديره وكان الوقت مغيب الشمس مضى حوالي اسبوع وسعد وفهاد مثل الشحم على النار
تجمع عندي بعض الربع
خالد , فواز , مصطفى , حميدي , محمد , سطام جلسنا في حوش بيتي تحت ظلال شجرة زيتون
سولفنا بوضع فهاد وسعد
اتفق الربع يكلمون الشيبان لاجل يصلحون بين اولاد العم
قلت : يالربع كل شيء نبلش شيبان العشيره فيه ما اقدم نفسي على خوالي وشيبان العشيره لزوم حنا نمشي بالصلح بين اولاد العم باكر نصير شياب
اذا حصل شيء نصير ندور شيبان من خارج الديره لاجل يحلون اي اشكال خلنا نجرب ما نخسر شيئ
ارسلت خالد وكلم فهاد لاجل نصلح بينهم كان رد فهاد موافق .
دقيت على سعد وكلمته بالموضوع نفسه كان رده موافق رحنا جمعنا للمسجد صلينا المغرب
وتوجهنا لبيت سعد ومعنا فهاد
دخلنا وجلسنا في حوش بيت سعد قام سعد صب لي الفنجال حطيته قدامي على الارض .
قلي سعد : توكل على الله اشرب فنجالك يا ابو ظاري وابشر باللي تطلبه . ما اردك انت والربع غاليين عندي وزيارتكم هاذ تسوى الدنيا
قلت له : ودنا تصطلح مع ولد عمك فهاد حينها اشرب الفنجال .
رد علي سعد بقوله : ابشر يا ابو ظاري ما اردك انت والربع مير اشرب فنجالك قبل لا يبرد .
شربت الفنجال والربع نفس الشيء سولفنا بالموضوع وطلبت من سعد يصافح فهاد وفهاد يتعذر لسعد وسعد يقبل اعتذاره لكن من قلب ونيه صافيه
تصافحوا وتعانقوا وتصالحوا ناظرت سعد .
قلي سعد : ما نسيت يا ابوظاري راح جاب فرس فهاد وعطاني رسنها
وقال : اشهدو يالربع الفرس ارجعها لفهاد ولد عمي من اول ما اخذتها ماهي بنفسي وما تلزمني خليتها عندي برسم الامانه ما صابها شيء
اعطيت رسن الفرس لفهاد وطلعنا من عند سعد مع وعدنا له نكون عنده مسا يوم خميس على العشا وهاذ اللي صار
رحت لخالي ابو حاتم بعد صلاة العشا وسولفت له السالفه
قلي : الله يرضى عليك يبه ودنا تظلون كذا تتعلمون منا حنا الشيبان لاجل باكر تصيرون
تحلون الاشكالات اللي تحصل
المثل يقول : اللي ما له كبير ما له تدبير
وسلامتكم يالربع .
رد مع اقتباس
