اللي يعرف الاثر يفيدنا

[سيف العادل]

الصور لكم عليها لان الارض اللي كنا فيها يادوب ترمي الاثر .هذا جانا الفجر وحنا نسوي بنشر ونسولف وسيارتنا شغاله وجاي صامل لكن الله فكنا منه.طبعا خوي لنا معه كشاف وبالصدفه رفعه وشافه وهو مقبل علينا وركضه ماتحس فيه ويوم انتبه له خوينا ماعاد امداه يقرب وصاح علينا وقمنا ورجع ونور الكشاف ضعيف لك عليه ماوكدنا وشهو لكن زوله على كلام خوينا لانه اقرب له ضخخخخم وعيونه كبار ووساع واعطن لون على خضار وابعد عنا شوي ثم وقف والتفت عليناوماطول وراح.انا مامر علي هالسطاوة هذي .وابي اعرف هو سبع ولاضبعه ولا وشهو

[سيف العادل]

معقوله مافي احد من اهل الخبره بالاثر يفيدنا

[سيف العادل]

بالنسبه للصور بالجوال اوضح من كذا ويوم نزلت الموضوع وحملت الصور رفض تحميلهم الا اسوي لهم تصغير بالحجم لجل يضافوا بالموقع لجل كذا ماهم واضحين بعد التصغير .ابي احد يرسل لي رقمه وارسل له الصور وهو ينزلهم بالمنتدى لاهنتم

[راعي الصقلاوي]

مسيك بالخير اخوي سيف .
اذا حددت وين ديرتك احتمال نقدر نعرف اللي تتكلم عنه
حسب وصفك ضخم عيونه كبار ووساع .
ما في اضخم من الضبع في البراري .
لكن اللون الاخضر ينفي هالشيء .
الاحتمال انه يكون النمر العربي لانه الذيب اصغر حجم من الضبع
النمر العربي يقارب الضبع بالحجم لكن اللون الاخضر
هاذ اللي يحير بالامر
ان شاء الله اكون افدتك
تقبل مروري .

[سيف العادل]

هلا اخوي راعي الصقلاوي من اجمل المرابط الصقلاويات ماشاء الله ذكرتني بايام الخيل الله يسعدك . موقعي ياطويل العمر غرب تبوك المنطقة اللي انا كنت فيها معروفه عند اهلها بالصيد وكذلك الذيابه وحيوان يقولوا له السعر ولا اعلم عنه شي سوى انه مثل الذيب ولكن عاى اكبر حجم وفي شايب من اهل هالديره يسولف زمان لعياله وقال لهم انه شاف النمر العربي بعيونه طبعا الكلام هذا قديم قبل ١٠ او ١٥ سنه والشايب توفاه الله. ومن المستحيل يكون ذيب لان عيونه على الكشاف خضر وكبار والذيب معروف باللون الاحمر وممكن انه مايعطي اللون الاحمر في بعض الحالات يكون عينه ع زاويه ويصير يصور وحصلت معي كثير ولكن اذا حرك راسه وناظر ثاني مره وتغيرت زاويه العين لابد انه يعطي اللون الاحمر. الكلام كله على الجره او الاثر هو اللي يحدد وشو هالحيوان .بعدين الضبعه ماتوقع تسوي السوات اللي صار تهجم علينا وحنا صاحين ونصلح بنشرنا واصواتنا ماليه المكان وسيارتنا شغاله ويوم جاء هالمفترس جاء من ورى وجهه السيارة واكتشفت بعدين انه كان يمشي على جرت سيارتنا

[راعي الصقلاوي]

صبحك بالخير اخوي سيف .
الله يحفظك ويخليك .
الذيب معروف بحجمه لكن السعر هاذ ما اعرف عنه شيء
الضبع يخاف البشر والاصوات والاضواء
يتبقى النمر العربي وهاذ هو اللي ارجحه .
رغم انه تواجد النمر العربي لم يتم تأكيده بشكل رسمي في منطقة تبوك
يتبقى امر واحد احتمال انه حيوان وصل بطريقه ما لمنطقة تبوك .
من مناطق جنوب المملكه الاردنيه الهاشميه .
اتمنى اني ساعدتك ولو بقدر بسيط
تقبل مروري .

[مغامر جده]

النمر العربي كان موجود في جنوب منطقة تبوك ويوجد صخرة سميت بصخرة النمر لانهم شافوه بجنبها في محافظة الشبحة وهي منطقة جبلية ترتفع اكثر من 1000 متر عن سطح البحر

[مغامر جده]

والضبع موجود شفت مقطع في المرامية او منطقه حولها لا اذكر صايدين ضبع
والصور ماهي واضحه حقت الاثر

[الحربي حاتم]

الأثر ماهو واضح ، ليتك رشيت عليه ماء رش خفيف اللي يبين الأثر ولا يغيره .