السلام عليكم ورحمة الله وبركاته
وبعد:
تعقدون العزم أنت وربعك على كشتة أو رحلة إلى مكان ما، الكل يبدي استعداده وحماسته إلا ذاك البارد: والله مدري أنا ما اضمن ظروفي لكن ابرد عليكم [ثم يتوارى في الظلام يراقب ترتيباتكم وجدالكم في تحديد الوجهة وحصر المقاضي والنواقص انا دافوري ماخذه اخوي ولا ادري متى بيرده؟ فيجيب اخر الدافور عندي ابشروا به بس نبي قدر ضغط وذراية امرها متيسر عندي القدر والذراية ومعهن رواق وتوانكي الماء عندي فيتبرع اخر اللحمة عندي ابتعنى لها في الدريهمية ابشروا والمقاضي من خبز ونواشف وسمط عندي
وهكذا من كل لحية شعرة تتضافر الجهود والمنافسة على خفة النفس وخدمة الاخوان وتصبحون على خير وتصبح على خير ويتفرقون على موعد اتفقوا عليه بعد صلاة الفجر من اليوم الفلاني اصبحنا على اليوم الفلاني واذا بخوينا البارد القابع في الظلام يتصل : هاااااه اجيب معي شي وانا جاي
وش رايكم في هالفصيلة من البشر اللي هذي عاداتهم يعني ليست مرة أو مرتين انما في كل مرة فهو يبي يجي براسه وفراشه فقط ...