السلام عليكم ورحمة الله وبركاته
مسيكم بالخير الجميع .
في من الايام والدتي شفاها الله وعافاها عجنت الطحين وحطته في ماعون وراحت لبيت خالي لاجل تخبزه مع خالاتي وزوجة خالي وبعض الحريم الكبيرات في السن
ظليت في البيت بعد فتره سمعت صوت جوالي يرن رديت كانت ( بنت خالتي اختي بالرضاعه )
قالت لي : امي ودها تقولك تعال شب النار لاجل نخبز العجين
رحت جمعت الحطب وشبيت النار الله يكافينا شرها اختي بالرضاعه جابت المواعين اللي فيها العجين كنت اغني بعض الاغاني سمعتني خالتي
قالت لي : يا ولد متى تتزوج وتريح والدتك اللي من دورك تزوجو وعندهم اولاد وبنات ؟
رديت عليها : ما لي هوا بالزواج .
قالت لي : وانت الصادق ام عيون خضرا سبتك بعيونها
قلت بصوت خافت : جينا للكلام اللي ماله طعم وكاد الحين يصير موشح .
تجمعت الحريم وبدين يرقون العجين بالايدي ويرمنه من يد ليد حين يكبر الرغيف ترميه فوق الحجاره الحاره جدا بعد فتره بسيطه تقلبه على الوجه الثاني
حين يستوي ترفعه وتحطه على جنب وهكذا دواليك . كنت ودي اروح وقفتني خالتي وامي الله يحفظها ويشافيها ويعافيها
قالت لي خالتي : ويش رايك في بنت فلان
قلت : ما تواتيني .
قالت : بنت علان
قلت : ما اعرفها
قالت طيب : بنات خالك ابو اسماعيل
رديت علها : بنات خالي اكبر مني .
قالت : بنات خالتك ام متعب
قلت : اولاد اعمامهم تحرون البنات .
قالت : بنات خالك ابوحاتم
رديت عليها : ذول خواتي تربيت معاهم في بيت واحد ما اتصور بنت خالي تكون زوجه لي
قالت لي بغضب : ما خليت بنت في الديره الا اطلعت فيها عذروب لولا انك رضيعي لكنت زوجتك وحده من بناتي اذ ماهو برضاك غصب عنك
اسمع زين بنت ابو فارس تناسبك ما شاء الله ادب واخلاق وحشمه وفوق هاذ خلصت دراسه بالجامعه الحين بعد ما نخلص الخبيز نكلم خالك يخطبها لك
قمت سحبت نفسي اسرجت حصاني وركبته وانطلقت خارج الديره لقيت حاتم ولد خالي
قلت له : اسمع تقول لخالي ما ودي ارجع للديره لين عمتك تلغي فكرة الزواج من راسها
وانطلقت خارج الديره وصلت مكان جلست تريحت فتره قمت شبيت نار وسويت شاي حين استوى صبيت اول كاسه ما لحقت اشرب اول رشفه حصاني صار يهمهم
قلت : حيا الله يا ابومرزوق تعال اشرب شاي .
جا وجلس جنبي وقالي : وكاد عرفتني لانه حصانك صار يهمهم وهاذ المكان دوم تحب تجلس فيه
بعيد عن الناس .قم خلنا نرجع للديره
قلت له : ما ودي ارجع للديره لين والدتي تلغي فكرة الزواج هو الزواج بالغصب ؟
قلي : ارسلني لك خالك ابو حاتم وما يصير إلا اللي بخاطرك مير قم ولا تزعلني ولا تزعل امك ولا تزعل خوالك يلا .
قمت ركبنا خيولنا ورجعنا للديره وحنا بالطريق استفضنا بالكلام عن الزواج لكني ظليت مصمم على رايي حين وصلنا بيت خالي
طرحت السلام على حريمنا وكل ما حاولت احب على يد حرمه منهم تسحب يدها وعيونهم كلها غضب .
جلست جنب خالي ناظرني وخوالي يتهامسون خالاتي وامي وزوجة خالي يتهامسون ويناظروني بشزر .
قلت لهم : ويش فيه تهامسون كانه في شي مهم خلنا ندخل في الموضوع .
قلي خالي : ويش سويت مع امك كذا تخليها تزعل منك وخالاتك وحريم العائله ؟
قلت له : يبه هو الزواج بالغصب ؟ ما لي هوا بالزواج ودهم يربطوني من الحين بالمسؤوليه ؟
قالت لي خالتي : طبعا ضيعت البنت من يدك البنت هاذ ما تلاقي مثلها في الديره حريم العائله ايدوها بكلامها
خالي قال : خلص يا حريم خلو حمود على هواه لين وده يتزوج يصير خير إن شاء الله .
خالتي قالت : يا ابو حاتم بصراحه ما عدت اقدر اكتم هالكلمتين هاذ حمود ما في خاطره إلا ام عيون خضر
حين تيجي مع اهلها وتشوفه هنا
تصير تسبل له بعيونها ومدري ويش ترطن له بالانجليزي وهو يرد عليها بالانجليزي ويصيرون يتضاحكو وقامت مسكت بنت خالي من يدها
قالت لها : اسمعي حين كانو اهل البنت ام عيون خضر عندنا ويش كانت ترطن لحمود بالانجليزي .
قالت بنت خالي بالانجليزي : يو ار ان ماي هارت .
ردت عليها : ويش يعني .
قلت : يعني تقولي انت بقلبي .
قالت : سمعت يعني البنت تريده وتحبه اسمع ترى اذا وده يتزوجها ماني حاضره له عرس ولا يقولي يمه .
دقني خالي يعني لا تهتم بكلامها .
قمت رحت على جنب وصرت اغني اغنية يا ناس احبه واحب اسمع سواليفه .
لين وصلت للشطرات اللي يقول فيها .
ظل ظليل ٍ عليّ وغصونه مريفه
شمعة زماني عسى الله ما يطفيها
لامن ضحك لي خذت قلبي تواصيفه
ولامن زعل عفت انا الدنيا ومافيها
صارت خالتي تتمتم بكلمات ما فهمتها جلست يومين وبعدها رحت لوظيفتي العسكريه غبت عن الديره 4 شهور لاجل ما حد من محارمنا يراجعني بموضوع الزواج
تزوجت وكان عمري تقريبا 28 سنه والحمدلله توفقت بزواجي وعندي بنتين و3 اولاد والحمدلله على نعمته وفضله
بالنسبه لصاحبة العيون الخضراء فهي بنت اهلها يشتغلون بتجارة الزيت ولهم مكتب استيراد وتصدير وديانتهم النصرانيه واسم البنت سمانثا
البنت هاذ كانت تميل لي فظنت محارمنا اني اميل لها ولي رغبه بالزواج منها الحين هي تشتغل مديرة فرع لاحد البنوك تمت خطبتها لاحد الاشخاص
مضى حوالي 3 اسابيع تفاجأت بخبر فسخها للخطبه لامور ما اعرفها ولا احب ان اعرفها ولغاية الان لم تتزوج هاذ البنت
اخر زياره لها عندنا كانت قبل حوالي شهر جلست عندنا 3 ايام .
وسلامتكم يالربع .
رد مع اقتباس
