السلام عليكم ورحمة الله وبركاته
مسيكم بالخير الجميع .
في احد فصول الصيف صديقي ابومرزوق عزب بالشياه والنعاج في منطقه تبعد عن ديرتنا حوالي 5 كليومتر وكنت في اجازه من العسكريه مدتها 6 ايام رحت عنده ورافقني صديق طفولتي زوج اختي بالرضاعه
قلي ابو مرزوق : نخيتك يا ابو ظاري .
قلت له : ابشر وانا اخو وضحى .
قال ابومرزوق : تظل هنا الليله عند الحلال عندي موضوع ودي اخلص منه .
قلت له : ابشر واذا ودك اسرح بالشياه باكر اسرح فيها .
قال : ما تقصر باكر الصبح اكون عندك ونسرح بالشياه مع بعض
ودعنا ابومرزوق وراح للديره ظليت مع حميدي صديق طفولتي عند الحلال سهرنا فتره
قلي حميدي : نام يا ابو ظاري وانا اسهر لين اشعر بالنعس اصحيك
تمددت على فراشي وقريت وردي واغمضت عيوني غرقت في النوم صحاني حميدي ناظرت ساعة يدي كانت الساعه 1 بعد الليل جلست مكانه مر وقت صار حصاني
يصهل بصوت خافت ناظرت صوب حصاني شفت ولد صغير قرب صوب النعاج امسك طلي وربطه بحبل وسحبه معاه صحيت حميدي رحت صوب حصاني ركبته ولحقت الولد حين وصلته
قلي : بوجهك وجه ابوك ماني حرامي ولا سارق .
قلت له : وصلت وصرت بوجه ابوي الله يرحمه واموات المسلمين دام انت مو سارق
ولا حرامي ليش اخذت الطلي ؟
قلي : الفقر قتال والجوع كافر .
قلت له : اسمع رجع الطلي واعطيك واحد اكبر منه .الولد فاجأته الصدمه
وقال : طلي اكبر من هاذ ؟
هزيت راسي بمعنى موافق
رجع بالطلي واخذته معي وحطيت قدامه الزاد وقلت له تفضل الزاد وانت جيعان صحيح ؟
هز راسه علامة انه كلامي صحيح رفع راسه وقال واللي في البيت تنظرون اجيب لهم شي يسد رمقهم الجوع كافر وانا اخوك ونزلت الدموع من عيونه
توكدت حينها انه هالولد صادق وخاصه عمره ما يتجاوز 12 سنه جبت كل هالموجود عندنا معلبات حمص وفول وخبز ومعلبات فاصوليا خضرا وفصوليا جافه
وخضار منوعه طماطم وخيار بطاطس كوسا قرنبيط باذنجان عطيته كل هالخضار
قلت له : خذ هاذ كله لك ولاهلك وما نسيت الطلي تعال معي دخلت بين النعاج امسكت طلي وربطته بحبل وسحبته لين اطلعته من بين النعاج
هاذ الطلي كنت اشتريته من ابو مرزوق وخليته يسرح مع حلاله لين يخلص فترة التعزيب اخذه واخليه في مزرعة خالي لين يصير كبش ينفع لتلقيح النعاج
وصيت زوج اختي يتحرص على الحلال لين ارجع سحبت الطلي معي وهو حمل هالاغراض ومشينا مسافه حوالي 3 كليومتر لين وصلنا بيت هالولد دخل وظليت انتظر عالباب
غاب فتره رجع وقالي تفضل دخلت واذا 3 اولاد صغار جالسين وامهم تحط الزاد قدامهم من الجوع ما تركو قطعة خبز وحده
قلت للولد : استودعكم الله
رجعت عند صديقي حميدي وجلست افكر بحال هالولد واهله
قلي حميدي : ويش صارلك يا ابوظاري منت بخواص من رجعت من مشوارك
قلت له : يا ابو دحام هالولد واهله بضيق ما هو طبيعي الجوع ذابحهم الله يكون بعونهم لكن ما اترك هالامر كذا لزوم نساعدهم ما شفت اللي شفته ظليت طار النوم من عيوني
حميدي قلي : موافق وما احد يدري بالموضوع هاذ يظل سر بيني وبينك
ظليت للصبح توضيت وحميدي وصلينا الفجر وجلسنا سوينا شاي وقهوه وحال هالولد ما فارق بالي وعقلي
ما صارت الساعه 6 اذا ابو مرزوق جا ومعه اولاده حين نزل من السياره صار يناظر الارض
قالي : ويش صار يا ابو ظاري ؟
قلت له : ما فهمت عليك ويش صار ؟
قلي : تعال عندي رحت عنده ناظر الحلال مره وحده وصار يناظر الارض اشر بيده على الارض
وقال : هاذ اثر ولد عمره 10_ 11 سنه اخذ الطلي ابن النعجه العبسه انت لحقته على حصانك ورجعتم ناظرني وسألني الطلي اللي اشتريته مني وينه ؟
كمل كلامه سحبت الطلي ومشيت مع الولد الولد كان يحمل اغراض بيديه الثنتين وانت تمشي وراه وتسحب الطلي ويش السالفه يا ابو ظاري ؟
سولفت له السالفه من اولها لتاليها امسك جواله ودق رقم ابعد عنا مسافه وكان يتكلم مع شخص خلص مكالمته
وقلي : اسبقني انت وحميدي لبيت خالك ابو حاتم
ركبنا خيولنا تسابقت مع حميدي هو على ظهر العبيه مزنه وكنت على ظهر حصاني اليحموم
تقدمت عليه مسافه لا تتجاوز 50 سنتمتر وصلنا اول الديره وتركنا خيولنا تمشي على مهلها توجهنا لبيت خالي ابو حاتم لقيته جنبه كرونه يلصقها بلاصق
وكرتونه ثانيه مركونه على صفه من الاسمنت وكانت ملصقه من كل جوانبها بلاصق .
طرحنا عليه السلام وتحية الصباح رد علينا وقلي روح شوف امك
دخلت حوش البيت وناديت ردت علي عمتي ام حاتم وهي بمقام امي ودوم اناديها يمه عطتني شي ملفوف بقطة قماش ابيض كانت ثقيله شوي من ريحتها عرفت انها لحم
وصلنا ابو مرزوق بسيارته بيك اب نوع نيسان تركنا خيولنا في بيت خالي وطلعنا بالسياره سقت السياره وتوجهنا لمكان تعزيب حلال ابو مرزوق
كانن ينتظرنا فلاح ولد ابومرزوق وعنده 5 نعاج مع طليانها حطينا النعجات والطليان بالسياره وتوجهنا لبيت الولد وقفت السياره جنب البيت ونزلنا من السياره
ناديت : يا اهل البيت
طلعت لنا حرمه حين شافتنا التصمت بالايشارب قالت : اهلا وسهلا تفضلوا
خالي ناظرني وحميدي : انزلنا النعاج والطليان والكراتين وقطعة اللحم
خالي قال : مشكوره يا بنت الناس هاذ لك ولاولادك استودعك الله .
الحرمه قالت : ما دخلتوا البيت ولا شربتو شيء من انت يا لاقي خير .
ناظرها خالي وقال : فاعل خير .
قالت : يا لاقيين خير نشدتكم الله الذي لا اله الا هو تشربوا شيء ما لحقتم توصلو.
ابو مرزوق قال لخالي : يا ابو حاتم الحرمه تنشدنا بالله ما تركت لنا مناص .
خالي قال : يا بنت الناس لاجل تبري بيمينك نشرب مويه
قالت : لا والله الا تشربوا شي ساخن
رد عليها خالي : خلص نشرب شاي
دخلنا الحوش كانت ارضيته من الاسمنت واغلبه متشقق وبعض قطعه مقلوعه من مكانها جلسنا شربنا الشاي واولادها يلعبون في الحوش مبسوطين
طلعنا من البيت ورجعنا للديره ثاني يوم ارسلي خالي رحت لقيت اولاده اخواني ناظرت سيارة خالي كان فيها مواد بنا اسمنت وحصى ورمل طلعنا بالسياره وتوجهنا لبيت الحرمه الفقيره
لين وصلنا ناديت يا اهل البيت
طلعت من البيت وقالت تفضلوا ادخلنا مواد البناء وبدينا نشتغل بحوش البيت شي يعزل الارض من الاسمنت المقلوع وشي يجبل ويخلط مواد البناء سوينا ورشة بدينا نسكب المواد المخلوطه
على الارض اخوي حاتم كان يمسك قطعة خشب مسطحه وطويله ويحركها بطريقه معينه فوق مواد البناء بعد خلطها بالمويه لين صار حوش البيت كله على نفس المستوى
خالي قال للحرمه قبل لا نشتغل : يا بنت الناس نشدتك الله لا تسوين زاد خليه لاولادك حنا ما ودنا الزاد نرصف حوش البيت ونرجع لديرتنا
هزت الحرمه راسها انها موافقه خلصنا شغلنا وقبل لا نطلع كانت الحرمه تبكي
سألها خالي : ليش البكا يا بنت الناس ؟
قالت : من اللي انت شايفه بعد وفاة زوجي صابنا الفقر والفاقه والحاجه ومثل منت شايف الله يلطف بينا ما احد مر من هالطريق الا انتم
رجعنا للديره وصمم خالي الا يقوم بامرهم لين يفرجها الله عليهم وهاذ اللي صار رحت معه واخواني جبنا الحرمه واولادها واسكناهم عندنا في ديرتنا وتحسنت احوالهم وللحين هم في ديرتنا .
وسلامتكم يالربع .
رد مع اقتباس
