السلام عليكم ورحمة الله وبركاته
مسيكم بالخير الجميع


يوم الاحد الماضي كان 3 شباب من شباب العشيره جنب بيتي يتكلمون وهم يمشون في الشارع واحد منهم اهوج ومندفع ما يروز كلامه ( ما يحسب عواقب كلامه ) .
طلعت من البيت سمعت هاذ الاهوج
يقول : ويش ساوا الشيخ ابو حاتم شيخ العشيره ما ساوا شيء شيخ علينا كذا .
يرد عليه صديق له : حاذر يسمعك ابو ضاري .
قال الاهوج لو سمعني ابو ضاري ما يساوي شي انا اعرفه اكثر منكم
قله صديقه : عيب عليك تتكلم عن شيخ العشيره انه ما ساوا شي ولا تجيب طاري ولد اخته تراه ابنه لكنه ما هو من صلبه رباه بعد وفاة والده رحمه الله واموات المسلمين
جيت على هاذ الاهوج من خلفه وحطيت يدي على كتفه وقلت له : ابوحاتم ما ساوا شي ؟
حين التفت علي وشافني ارتعب وتغيرت ملامحه وصار وجهه لونه اصفر
كملت كلامي له يا حيف على اللي ما يحشم ولا يحترم شيخ عشيرته لكن هاذ الكلام له عواقبه انحاش الاهوج وما دريت وين راح رحت لخالي وسولفت له السالفه


خالي قلي :نرسل لجده والد ابوه ونجلس ونتفاهم والد هاذ الاهوج متوفي رحمه الله واموات المسلمين
بعد فتره بسيطه جا صديقي ابو مرزوق وهو بنفس الوقت صديق خالي وبينهم مصاهره بنت ابومرزوق تكون زوجة ولد خالي
جلس ابومرزوق وصبيت له الفنجال شربه
وقال : يا ابو حاتم جاني الولد الاهوج ودخل بوجهي واللي ودك اياه عندي .
خالي هز راسه وقال : قبلت وجهك يا رفيقي توكل على الله نجلس اليوم بعد صلاة العصر في بيت ابو سلمان تراه اكبر شيبان العشيره وحصيف ورايه صويب
راح خالي لابو سلمان وبلغه انه بعد صلاة العصر ودهم يجلسون عنده لاجل يتكلمون في الموضوع ويحلون هالاشكال وافق ابو سلمان
بعد صلاة العصر ذاك اليوم توجهنا لبيت ابو سلمان استقبلنا في مجلس الرجال وجلسنا
قال ابو سلمان : بعد التوكل على الله والصلاة والسلام على رسول الله صلى الله عليه وسلم
كل منكم ينتدب كفيله
خالي قال : كفيلي ابو سيف
ابو مرزوق رد عليه قبلته عالراس والعين
ابومرزوق كفيل الاهوج لانه الاهوج دخل بوجهه
ابو سلمان قال للاهوج :انت قلت ويش ساوا الشيخ ابو حاتم شيخ العشيره ما ساوا شيء شيخ علينا كذا . صح
ودي اعد لك ويش ساوا الشيخ ابوحاتم حين صارت توسعة المسجد جنب المسجد قطعة ارض مساحتها 200 متر تبرع فيها لصالح المسجد ودفع مبلغ لاجل توسعة المسجد
وكان يشتغل مع العمال في بناء توسعة المسجد ومدرسة الذكور تكاليف بناء وتشطيب اخر 3 غرف من جيبه الخاص بعد وفاة سراح ديونه سددها ابوحاتم لابو سالم عن اولاد سراح
مهر زوجة رداد دفعها ابو حاتم قدام الربع ويوم المضاربه والمشكله اللي عصفت بالديره ابوحاتم واخوانه
دفعو مبلغ 27000 الف دينار نصيب ابو حاتم 15000 الف دفعها من جيبه الخاص
هاذ بعض اللي ساواه الشيخ ابو حاتم انت ويش سويت ؟
انت معروف عنك في الديره اهوج ومندفع وما تروز كلامك ما تحسب عواقب كلماتك صح ؟
عليك 2 من الشهود حيث انك قلت كلام ما يصير انك تقوله بحق شيخ عشيرتك وفوق هاذ تقول عن ابو ظاري انه ما يساوي شي حين يسمع هالكلام عن خاله شيخ العشيره
الحين عندك شي تقوله تدافع فيه عن نفسك الجميع هنا يسمعك.
قال الاهوج : ما كان قصدي اني احط من قدر ابو حاتم
هاذ اللي قاله وما ظل شي يزيد فيه او يدافع عن نفسه
رد عليه ابو سلمان : قلت لك انك ما تروز كلامك وقعت نفسك بمشكله عويصه لولا انه ابو حاتم رجال حصيف ورايه نحل هالاشكال بدون صياح وطق رماح لكان اجلسك عند قاضي عشائري
اسمع لزوم تدفع لابو حاتم 15000 دينار رد اعتبار وترفع رايه بيضا على بيته ورايه بيضا بوسط الديره وتبيض وجهه في الديره كلها باكر بعد صلاة الظهر
خالي قال : اشهدو يالربع اني سامحته بالدراهم كلها ما ودي منها شيء لكنه بياض الوجه ودي اياه كامل
ثاني يوم كان يوم الاثنين بعد صلاة الظهر تجمعو اهل الديره وجا الاهوج وحمل عصا طويله وربط عليها رايه بيضا ورفعها وصار يمشي بالديره ويقول بيض الله وجه الشيخ ابو حاتم
رافقه 4 شباب من العشيره اختارهم خالي ورافقهم ابومرزوق لين الاهوج طاف الديره كلها
بعد هاذ تقدم ابومرزوق وقال : يا ابو حاتم يا رفيق العمر وصلك حقك وافي ؟
رد عليه خالي : وصلني حقي وافي و كامل غير منقوص كفيت ووفيت بيض الله وجهك كافي ووافي يا رفيقي .
جلسوا الشيبان والموجودين وجا جد هاذ الاهوج وصافح خالي وتعذر منه وحب على راسه وعانقه بدينا نصب الفنجالين للشيبان الكبار وبعدها للشباب والموجودين
خالي قال لجد هاذ الاهوج : تحرص عليه لا يقول كلام ما هو بموقعه المره هاذ جت سليمه لكن اذا جت مع شخص غيري الله يستر من تاليها إن شاء الله انها ما تصير مره ثانيه.
الشايب هز راسه وقال : توكل على الله يا ابو حاتم إن شاء الله ما نوصل لهاذ الامر .
وسلامتكم يالربع