تقرير وتجربة لخيمة المطلاع

[الرحال2222]

السلام عليكم
من فترة وانا ابحث عن اي موضوع عن هذي الخيمة وللاسف لم اجد بالنت اي تجارب لها وبعد ان شريتها وجربتها لاول مرة حبيت انزل تقرير عنها لتعم الفايدة وتاخذون عنها فكرة
من فترة وانا ابحث عن خيمة بمواصفات تهمني وهي
1- الحجم يكون مناسب للنقل بالسيارة ماتكون عفشة وتاخذ حيز بالنقل والتخزين
2- الوزن يكون معقول عشان الشيل والحط وما تكسر الظهر كل ماحملتها بالسيارة
3- مقاومة للعوامل الجوية من هوا وامطار ورياح
4- السعر ما يقص الظهر يكون بحدود المعقول
5- الخامة تكون قماش يستحمل وليس بلاستيك يجيب الحر ويتشقق لابسط الاسباب
6 تكون سهلة وما تحتاج صيانه عجبتني انواع بس فيابر لو انكسر واحد راحت الخيمة كلها بالفاضي

عجبني اكثر من نوع بس دايم القا له عيوب
مثل البيرق عمود بالنص مثل الشوكة بالحلق غير الوزن والسعر اللي يقص الظهر
الوسم ثقيلة بالشيل وسعرها مرتفع الديسكفري والشقردية حاس لو انكسر شي ما لقيت احد يصلحها
المكشات وهذي اللي فكرت فيها كثير بس صغيرة شوي وجلستها من الجوانب مايلة حاسها تظيق الجلسة
ونفس المشكلة فيابرها الداخلية ممكن تنكسر وسعرها غالي

بعد فترة من البحث وجدت خيمة العقيلات مميزاتها ممتازة لاكن السعر مبالغ فيه 2200 ريال اعمر غرفة مسلح بذا السعر وكنت متردد فيها وبعد فترة وجدت بالنت خيمة نفس مميزاتها
وبسعر اقل من العقيلات الا وهي خيمة المطلاع وجدتها بموقع السنيدي بس بسعر اغلى 1150 ريال الطبقة الواحدة
بحثت عن اسمها بالنت ووجدت موقع تنزا ارخص من السنيدي وكان فية عرض بالموقع 20% على كل المنتجات ووجدت سعرها معقول
احترت في النوعين
مواصفاتها مكتوبة بالموقع ما يحتاج اكتبها

النوع الاول المبطنة سعرها قبل الخصم 1500 ريال وبعد الخصم 1200 ريال شاملة الشحن
http://tanza.sa/index.php/-/m4-3-x-3.html

والثانية خيمة المطلاع طبقة واحدة سعرها قبل الخصم 1020 ريال وبعد التخفيض 816 ريال شاملة الشحن
http://tanza.sa/index.php/-/4-3-x-3.html


الفرق بين الثنتين 400 ريال بعد التفكير اخذت الطبقة الواحدة عن احتياجي انا شخصيا ما عمرنا شكينا من البرد دايم نشكي من الحر اغلب تخييمنا بالساحل
وفرق السعر اخذت فية من نفس الموقع مظلة تنزا الصحراء اعمدة المونيوم 3في4 طلعت بعد الخصم 190 وكم غرض كمان
http://tanza.sa/index.php/-/3x4-216.html


ناتي للزبدة طلبت الخيمة وتجاوب الاخوان بالموقع سريع جدا ويشكرون علية دفعت بالماستركارد يوم الاربعا باليل ويوم السبت بالعصر وشركة الشحن تتصل عليه رحت استلمت الخيمة وعجبني جدا حجمها مطبقة مقسومة بشنطتين واحدة للخيمة وواحدة للاعمدة والاطناب والوزن مناسب جدا


الحجم مريح يمكن وضعها باكثر من وضعية


بعد الترتيب حتى وهي على عزبة الشاهي والفرشات والمظلة لم تتعدا المقعد الخلفي وما زال بالشنطة مكان




مع فراش النوم وعزبة الطبخ واضح انهم اكبر منها بالحجم


الواجهه الامامية للخيمة بمظلة مقاس مترين وعندك خيار اما تفتحها بابين او ناموسيتين او تفتحها بالكامل مثل الصورة




حجمها من الداخل كبيرة وممتازة تركت الصحون والفرشات للتوضيح جلسنا فيها 10 انفار للوجبة بكل اريحية ارضيتها بلاستيك قوي ومخيط بنفس الخيمة ويوجد فتحة بالنص لشبة النار او للتنظيف




فية ادراج شبك صغيرة باكثر من مكان بالخيمة للاغراض الصغيرة من جوال ومحفظة وغيرها


الباب الكبير بسحابات اظافة الى لزاق تشك شك زيادة اظنة للحماية من الامطار لا يدخل الماء


مقارنة لها مع الخيمة العادية 4 في 4 كان الهوا قوي لدرجة انة ميل الخيمة الكبيرة والحمدلله مقاومتها للرياح ممتازة وما لاحظت عليها شي


الجنبين الصغيرة باطراف الخيمة لها مكان للتهوية بناموسية يعيبة انة صغير ليتها بطاقة كبيرة بتكون ميزة ممتازة




البابين الخلفية فية اكثر من خيار اما تتقفل او تقلب ناموسيات او تفتح باب واحد ويبقى الاخر ناموسية












اللي يبحث عن فيديو لها بالنت يكتب في قوقل
Kodiak Canvas Flex Bow Tents
فية اكثر من مقطع لها مع الامطار والرياح وتفاصيل اكثر

الخلاصة الخيمة مع التخفيض كان سعرها ممتاز جدا للي لحق عليه بدون تخفيض سعر مقبول مقارنة مع اسعار بقية الخيام
القماش صح قطن ومقاوم للعوامل الجوية ويستحمل بس احسة اخف من التنزاني تمنيت انة تنزاني ثقيل مثل اللي نعرفة اتوقع يخدم اكثر والله اعلم يبغالي فترة واكثر من خرجة حتى احكم على متانتة
احس الخيمة حارة بالذات اذا كان الهوا مع الجنب لو فية شبابيك جانبية كبيرة مثل العقيلات بتكون ممتازة ومو مشكلة كبيرة ممكن يعدلها عند حقين الخيام
تعليمات التركيب اول مرة حسنا فيها بسبب العمود اللي بالسقف طلع اربع وصلات غير حقت العقيلات بالفيديو وصلتين فقط بس لما عرفناها طلعت سهلة

اما المميزات حجم تخزين صغير مع مساحة اذا فردتها ممتازة وسهلة الفك والتركيب ما تاخذ وقت ممكن شخص واحد يشيلها و ينصبها ويفكها بكل راحة
كلها عمودين مع الجنب وهي راكبة لا عمود بالنص يغثك ولا اربعه اعمدة بالجوانب تكسر ظهرك بالشيل والحط والفك
سعرها ممتاز من الداخل جلستها مريحة بالجوانب ومرتاح لها وحسب احتياجي كفت ووفت ولم اندم على اقتنائها

ولا تنسوني ووالدي من الدعاء اخوكم ابو ناصر

[قوافي ( أم نهار )]

وعليكم السلام ورحمة الله وبركاته
ماشاء الله
افادك الله وفيت وكفيت
جزيل الشكر
تحياتي وتقديري واحترامي

[منتعش]

عافاك الله اخوي الغالي : الرحال 2222
على التقرير والشرح المدعم بالصور
فبيض الله وجهك وما قصرت
والله يوفقك ويحفظك
ولا تحرمنا من جديدك .

[خيال الغلبا]

الله يعطيك العافيه

كم سعرها

[Snatch]

وعليكم السلام ورحمة الله وبركاته
بارك الله فيك اخوي الرحال
لي فترة ابحث عن تقرير عن خيمة المطلاع والحمدلله اني شفت تقريرك
سلمت يمناك

[Abu-U-Sef]

تقرير مميز ومجهود تشكر عليه

الله يعطيك العافية و لا تحرمنا من مشاركاتك