السلام عليكم ورحمة الله وبركاته .
مسيكم بالخير الجميع .
اذكر في فترة طفولتي وكان عمري حوالي 9 سنوات حادثه حصلت مع جدي والد امي رحمه الله واموات المسلمين
رجال من ديره قريبه من ديرتنا استدان من جدي مبلغ حوالي 800 دينار وكان هاذ المبلغ كبير في ذاك الوقت ورهن فرسه فصيلتها العبيه بشهادة مجموعه من شيبان العشيره
وصار كل فتره يعطي جدي جزء من هالدين وبشهادة شهود من الديره الفرس هاذ لقحت من فحل من نفس فصيلتها لرجال من ديرتنا بمعرفة راعيها والاتفاق معاه اللي تولده الفرس مهر او مهره يكون لجدي
ومضت فترة سنه وانتهى الموعد المحدد لسداد الدين وكان قد دفع هالرجال لجدي مبلغ 350 دينار فقط وولدت الفرس مهره لونها كميت يزين وجهها خط ابيض وتحجيل برجولها الاماميه
احتار جدي ويش السواه الرجال ما سدد كامل الدين ولا حتى نص المبلغ انتهت المهله المحدده للرجال وصار جدي في وضع غير مريح
من طرف ما يقدر يتصرف بالفرس لنه الرجال دفع جزء من هالدين بنفس الوقت ما سدد الدين بكامله
صار جدي يستشير الشيبان اللي عقولهم كبيره وسأل امام المسجد
امام المسجد قال : يا شيخ ذيب خلي الفرس عندك لا تتصرف فيها واجلس مع الرجال وتفاهمو لين توصلون لحل يرضيك ويرضيه .
جا يوم هالرجال ودفع مبلغ كان 200 دينار وصار المبلغ المدفوع 550 دينار وتبقى في ذمته 350 دينار
مضى اكثرمن 7 شهور الرجال ما جا على الديره صبر جدي عدة ايام وقرر انه يروح للرجال ومعه خوالي وبعض شيبان العشيره لاجل يجلسو ويتفاهمو على حل ويخصلوا هالسالفه
في يوم خذاني جدي معاه للمدينه اشترى بعض الاغراض للبيت وبعض الادويه للاغنام كان شخص يسولف عن الرجال اللي عليه الدين انه وضعه صعب جدا ويحاول انه يجمع مبلغ لاجل
يعطيه لجدي حين رجعنا للديره ارسلني جدي ناديت خوالي وازواج خالاتي وبعض شيبان العشيره حين وصلو الربع وجلسو صبيت لهم القهوه
جدي قال : يالربع سمعت خبر عن الرجال اللي عليه الدين وضعه صعب جدا لا يحسد عليه وقررت بعد التوكل على الله اني اسامحه باللي ظل عليه وارد له الفرس ومهرتها تظل عندي
حسب الاتفاق اللي صار بينا بشهادة الشهود
الربع قالوا لجدي : زين انك تسوي هيك ترتاح ويرتاح الرجال وجا الرجال وجدي سامحه باللي ظل بذمته ورد له فرسه بشهادة الشهود من الشيبان الموجودين عندنا في البيت
مضى حوالي شهرين جدي جمع اخوالي وازواج خالاتي وكان يوصي خوالي على امي وخالاتي محدثكم العبد الفقير لله كان جالس ويستمع لكن كنت ودي اطلع اطرد بالمهره
خالي قلي : ويش فيك مثل الدجاجه اللي جالسه على بيوضها ؟
جدي رد عليه : وده يطلع يطرد بالمهره روح يا حمود دير بالك يا جدي
طلعت بسرعه اسرجت المهره وركبتها وطلعت اطرد فيها شفت الرجال يركب فرس ويسحب خلفه فرس ثانيه رجعت للبيت بسرعه ودخلت حوش البيت والمهره تصهل وتقفز
طلعوا الربع على صوت صهيل المهره خالي ابو حاتم امسك المهره من رسنها ونزلت عن ظهرها
قلت لجدي : الرجال جا ويركب الفرس ويسحب خلفه فرس ثانيه .
بعد حوالي 10 دقايق سمعنا صوت الرجال ينادي طلع جدي واخوالي استقبلوه اخذت الخيل اللي معاه علفتها وسقيتها كان واقف على الباب ويسولف مع خوالي وجدي
دخلو البيت دخلت بسرعه وصبيت له الفنجال .الرجال امسك الفنجال ما شربه حطه قدامه
قله جدي : ابشر باللي اقدر عليه مير اشرب فنجالك .
رد عليه الرجال : اذا لبيت اطلبي اشرب فنجالك .
جدي قال : ابشر باللي اقدر عليه مير اشرب فنجالك
الرجال قال : اسمع يا شيخ تاخذ الفرس العبيه اشرب الفنجال
جدي هز راسه انه موافق
قال الرجال : ودي جواب بالكلام مو هز الراس يا شيخ .
جدي قال : توكل على الله اشرب فنجالك .
الرجال شرب الفنجال وقال : يالربع الله سبحانه وتعالى يسرها لي من حيث لا احتسب كنت افتش بالخزانه على مجندي ودي ابيعه لقيت فروه لرحمة والدي
وفيها صره داخلها 35 ليره ذهب وحيث مالي اخوه ولا اخوات اشتريت حلال والحمدلله وحيث انك سامحتب باللي ظل علي من الدراهم اعطيك الدراهم تتصرف فيها
والاجر والثواب لي ولك والفرس ما ودي اياها ترجعلك بيض الله وجهك كفيت ووفيت ما قصرت وصبرت علي اكثر من سنه ونص وما قدرت ارد لك دينك
اللي سويته معي قليل من الرجال يسوونه وهاذ فعول الرجال الغانمه
بعد ما الرجال تغدى عندنا وتقهوى استأذن لاجل يرجع ديرته ودعناه وراح لديرته الفرس جدي عطاها لخالي ابو حاتم والدراهم وزعها على خوالي وازواج خالاتي
وقال : هاذ الدراهم ما تظل في بيتي ولا اصرفها عليهم فرقوها لمستحقينها وقولو جت من باب الكريم وهو اخذ قسم من الدراهم وحطه في صندوق المسجد وشيء وزعه
على بعض المحتاجين من اهل الديره خاصه جارتنا الارمله وعندها 4 اولاد ايتام كان جدي يتعهدهم ومن بعده خالي لين كبرو الاولاد وصاروا رجال
اخر عهدي بالرجال اللي كان عليه الدين صار من ملاك الحلال وتاجر كبير يتاجر بالاغنام والمواشي
وسلامتكم يالربع .
رد مع اقتباس
