في سرحة الغنم والاثر القديم

[راعي الصقلاوي]

السلام عليكم ورحمة الله وبركاته
مسيكم بالخير الجميع .

في فترة طفولتي وكنت في عمر 9 الى 10 سنوات في فصل الصيف بعد ما خلصنا الاختبارات النهائيه
طلعت مع اخوالي وجدي وصديقي ابو مرزوق واولاده
عزبنا بالشياه وكان معي اولاد خالي ابو حاتم وصديق طفولتي حميدي ( زوج اختي بالرضاعه / بنت خالتي )
كل يوم الصبح جدي يجي ومعه جدتي وحريم العائله وام مرزوق وبناتها يحلبون الشياه وياخذون الحليب في مواعين يحطونها على بهيم وانتم بكرامه ويرجعون للديره
كان جدي متسلح ببندقية M 1 وصديقي ابو مرزوق سلاحه بندقيه انجليزيه الصنع كنا حنا نساعد جدي واخوالي وابو مرزوق في رعي الشياه وحين نورد الشياه على بير المويه
وقت الظهر حين تصل الشياه يكون الحوض مملي بالمويه نساعد بعض وحنا ننشل المويه من البير بالركوه ونسكبها في الحوض بعدها تروح الشياه تهجع في ظلال الشجر لوقت العصر
نسوقها ترعى وقت المغرب نرجع لمكان جنب البير نهجع الشياه ونجلس نتعشى ونسهر بعدها ننام لين الفجر حلب الشياه ونسوقها للرعي كل يوم هاذ هو البرنامج اليومي
في يوم توجهت اجلس في ظل شجرة زيتون معمره شفت اثر واضح على التراب الاحمر ناديت ابو مرزوق وشافه هز راسه وما قال شي مسح بيده على راسي
لاحظت في عيونه شيء راح وهمس لجدي وقف جدي وخوالي وابو مرزوق وصارو يتكلمون بصوت خافت
رحت عندهم وقلت : من وقت شاف ابو مرزوق الاثر وانتم تهامسون ويش في ؟
جدي رحمه واموات المسلمين نادى علينا تجمعنا
وقال : يا عيال تحرصو على الحلال في حواف حولنا خلكم منتبهين لا تغفلون عن الحلال
ظهر ذاك اليوم راحو خوالي للديره جابو اغراض لنا وتتن لجدي حين سقنا الشياه وقت العصرحملت بندقية جدي على ظهري وصلنا مكان تركنا الشياه ترعى تجمعو الربع في مكان عالي
يناظرون الشياه ربعي يتمازحون ويتضاحكون كنت على طرف الحلال جالس تحت شجرة زيتون معمره انتبهت حين فزعت الشياه وانحاشت ناظرت قدامي على بعد حوالي 10 امتار
كان كلب اسود يناظرني وفمه ينقط منه مويه وبعض شعر جسمه متساقط وعيونه تقدح شرار اعتدلت بجلستي ووقفت على ارجولي وصوبت البندقيه عليه
اندفع الادرينالين في عروقي وتصبب العرق البارد من جبيني واصبعي على الزناد يرتجف من الانفعال صار الكلب يتحفز ويطلع صوت خشن وهاجمني اطلقت رصاصه
من قوة ردة فعل البندقيه انسدحت على ظهري وطارت البندقيه من يدي قمت بسرعه امسكت البندقيه مره ثانيه وصوبتها على الكلب اذا جدي وصديقي ابو مرزوق وصلوني كنت اناظر الكلب كانت الطلقه اصابته في راسه
قلي ابو مرزوق : عفيه عليك يالذيب قتلت الكلب العقور
تجمعو الربع يناظرون الكلب كان كلب لونه اسود وضخم
قال ابو مرزوق : ارجعوا لاتقربون الكلب هاذ الكلب مسعور
طلب منا ابو مرزوق نحفر حفره عميقه جدي اخذ البندقيه مني وصار يمسح بيده على راسي
قلي : عفيه عليك ان شاء الله تطلع مثل والدك الله يرحمه واموات المسلمين .
ربطنا الكلب من رجوله بحبل قصير وسحبناه ووقعناه في الحفره وطمرناه بالتراب مسا ذاك اليوم سولفنا عن الكلب وما كنا شفناه قبل الا عصر ذاك اليوم
ثاني يوم وحنا مع الحلال قلت لولد خالي : حاتم تشوف الرجال اللي هناك تحت شجر الزيتون ؟
قلي : اشوفه صار له حوالي ساعه يناظرنا وكاد انه حواف .
ظلينا نناظره بعد حوالي 10 دقايق راح حين لفا ابو مرزوق قلت له عن هالرجال اللي شفناه راح وناظر اثره
رجع وقال : يا شيخ ذيب يالربع لزوم نتحرص ويظل رجاجيل مع الاولاد ما يفارقوهم مهاوش الضبع حولنا
صرنا نناظر بعض اول مره نسمع بهاذ الاسم
سألت ابو مرزوق : من هاذ مهاوش الضبع ؟ ويش هو من الرجال ؟ من يكون ؟
قلي : هاذ سارق واللي سماه الضبع صدق لانه مثل الضبع تحرصوا ولا تخافون حنا نظل معاكم
بعدها بيومين طلبت من جدي يحملني البندقيه
قلي : زين لكن توعدني ما تستخدمها الا وقت الضروره مثل المره الماضيه استخدمتها في وقتها
وافقت اطلعنا الحلال وسقناه قدامنا وصلنا منطقه وتركنا الحلال يرعى ناظرت صوب الغرب كان رجال واقف بعيد عنا حوالي 800 متر تحت شجرة زيتون امسكت البندقيه
واطلقت رصاصه في الهوا فسدحتني على ظهري قوة ارتداد بندقية ( الميم ون M 1 ) امسكني اخوي حاتم من يدي وساعدني اوقف على ارجولي خوالي وجدي وابو مرزوق
كانو قريبين منا حين سمعو صوت الرصاصه حضرو بسرعه سألني جدي
خير يا حمود ضربت رصاصه ؟
قلت : شفت الرجال هناك شجرة الزيتون اللي جنب شجرة اللوز وضربت الرصاصه في الهوا لاجل يعرف انه اذا حاول يحوف الحلال هاذ جزاه راح ابو مرزوق وشاف الاثر رجع
وقال : اثر مهاوش الضبع الله يستر من تاليها والعلم عند الله انه ناوي على نيه
وسواه شينه الله يجيب العواقب سليمه
مسا ذاك اليوم رحت للبيت مع خالي ابو حاتم ارتحت 4 ايام في البيت
امي تقول لجدتي رحمها الله واموات المسلمين : شوفي يمه حمود كان ابيض مثل التفاحه الحين لوحته حرارة الشمس
ردت جدتي : خليه يتعلم ويصير رجال وإلا ودك يظل جنبك مثل الولد الضعيف اللي ما ينفع والده وقت الحاجه خليه يمه يتخشن ويعرف انها الحياه ودها تعب ومشقه
رجعت للربع كان معي ربعي رافقني 3 من ربعي اللي في نفس فصل المدرسه خالد , سلمان , فواز وظلوا معي اسبوع وبعدها رجعو لبيوتهم
في صباح يوم حريمنا يحلبون الغنم وكنا نساعدهم كان مع حريمنا بنات ابو مرزوق وامهم فقامت وحده من البنات صارت تطلع لي لسانها من فمها وكل شوي ترمي علي حصاه
وتقولي انت ابوك راعي الحلال والشياه ابوي صاحب الحلال والشياه انت ما تسوى حبة شعير
سمعها ابوها فقام صارخ عليها : غلقي فمك وحده باردة وجه هاذ اللي فالحه فيه واذا كنت صاحب حلال اسمي راعي الحلال لاني اسرح فيه تفهمي انقلعي هناك
وصار يطيب خاطري قلت له : والله ماني بزعلان لكن هاذ البت لسانها اطول منها
فصار يضحك وقالي : قلتها بنفسك يا حمود لسانها اطول منها / الحين هاذ البنت تكون زوجة عبدالمحسن ولد خالي ابو حاتم
بعد يومين قلت لربعي : صارلنا فتره ما نشوف هالرجال يناظرنا وكاد انه حين سمع صوت الرصاصه عرف انا متحرصين فارقنا في ذاك اليوم وردنا الحلال وقت الظهر على بير المويه
اسقينا الحلال وتركناه يهجع في ظلال الشجر وجلسنا في المغاره جوها بارد بعد حوالي ساعه طلعت ومعي ابريق كنت ودي امليه مويه كانت البندقيه على ظهري امليت الابريق
ورجعت لاحظت شخص يتفقد مهرة ابو مرزوق العبيه نجمه حطيت الابريق على الارض ومشيت بركاده جنب جدار من الحجاره صرت على مسافه قدرتها حوالي 300 متر
صوبت عليه وضربت رصاصه فسدحتني قوة ردة الفعل على ظهري طلعو الربع يشوفون ويش قيه قمت وقفت على رجولي اذا ابو مرزوق راح صوب الرجال ولحقه جدي
كانت الطلقه صابت الرجال في فخذه خرقت الفخذ لكنها ما صابت العظم
قال جدي للرجال: ويش اسوي فيك الحين لو قتلتك ما احد يلومني
وصلت كان جدي وده ياخذه للديره ويسلمه للشرطه
قله ابو مرزوق : يا شيخ ذيب الرجال تراه مجيور
جدي ناظر ابو مرزوق وقله : تجير علي سارق الحلال يا ابومرزوق ما ظنيت انك تساويها .
قله ابو مرزوق : صار بوجه اللي لا انا ولا انت نقدر نسوي معاه شي صار بوجه ابو حمود زوج بنتك تخالص معاه الحين .
شديت جدي من يده وابو مرزوق صار يتفحص جرح الرجال ووكان ذاك الرجال يتوجع من جرحه
قلت لجدي : جدو الرجال دخل بوجه ابوي وجدي ما ظنيت تقطع وجه ابوي وجدي .
جدي حط ايدينه على كتوفي وقلي : ما اسويها يا حمود خلص الله يصلحه ويهديه دخل بوجه والدك وهو في دار الحق
رحنا لعنده قال ابو مرزوق : الرصاصه خرقت اللحم وما صابت العظم قم معي خلني اعالجك
ابومرزوق امسك الرجال من يده وساعده يوقف على رجوله واسند الرجال نفسه على ابو مرزوق الرجال هاذ سأل ابو مرزوق

من اللي صوبني يا ابو مرزوق ؟
قله ابو مرزوق : ولد اللي دخلت بوجهه هو اللي صوبك ويا ليته حطها براسك وريحتنا من غثاك .
صار الرجال يولول وقال خلي هنا اموت ابو مرزوق حملت هالولد حمل ما يقدر يحمله بعده ولد صغير خلني هنا يا ابو مرزوق اموت ولا يحمل هالولد الحمل الثقيل
قلت له : خلك ساكت صرت بوجه ابوي وجدي الله يصلحك ويهديك
ادخلناه المغاره وقام ابو مرزق يكوي جرح الرجال بالنار الرجال صرخ من وجع الكي بالنار
بعد ما ارتاح حطينا الزاد قدامه صار يناظرنا جلسنا حولنا واكلنا معاه وبعد الغدا صبينا له الفنجال بعد ما شرب القهوه
قال : بعد هاذ الحادثه تبت على يد الله ومن ثم يدك ما عدت امشي الدروب الشينه هاذ وعدي لكم يالربع ما تعودت اترجع بوعودي اوفيها دوم وانت تعرفني .
رد عليه جدي رحمه واموات المسلمين : اعرف وادري انك توفي بوعودك
جلس هالرجال عندنا حوالي 10 ايام خلال هالفتره اللي جلسها معنا تغير تماما صار يتوضا ويصلي بعد ما صار يمشي بعرج خفيف
قالي : يا حمود انت صوبتني ودخلت بوجه ابوك الحين احلك من هالحمل الثقيل يا شيخ ذيب وانت يا ابو مرزوق اطلبوا الحق اللي ودكم اياه ما اقول لا
رد عليه جدي : صحيح انك واحد ماسخ وقليل ادب وقليل حيا بعد ما اكلت من زادنا وشربت من قهوتنا ودك نطلبك للحق حط لسانك بفمك وخلك ساكت .
ودعنا هاذ الرجال وراح في حال سبيله واخر علمنا فيه صار يواظب على الصلاه وترك الدروب الشينه وصار يتاجر بالحلال حين توفي كان عمره 85 سنه
وكان دوم معاه مصحف وكان امله يروح عمره او للحج لعل الله سبحانه وتعالى يغفر له ذنوبه
توفي هاذ الرجال سنة 1995 وفاه طبيعيه وكان تزوج من حرمه ارمله وعنده منها 3 اولاد
وسلامتكم يالربع

بعد اذن الاداره هاذ صورة بندقية M 1

[راعي الجيب2]

وعليكم السلام ورحمة الله وبركاته

الله يرحم والدك
قصة جميلة رقم قساوة الظروف ايام الطفولة

[راعي الصقلاوي]

اخوي راعي الجيب 2 المكرم
الله يرحم موتانا وموتى المسلمين .ويرحم والدينا ووالديك والمسلمين
اللهم آمييين **** اللهم آمييين
في فترة طفولتي كانت احيان تكون الظروف قاسيه علينا وخاصه في فصل الصيف
3 شهور حراره لاهبه وخاصه شهر آب اشد شهور السنه حراره تكون مع الحلال في البر في هجير وحرارة الشمس واذا فقدت شاه او جدي او طلي
او نعجه تشعر بالالم والوجع لانك تعبت عليه وضاع في غفله منك
ورغم هاذ
كانت طفوله رائعه تعلمت من قساوة الظروف تحمل الصعاب والمشاق حين كبرت ودخلت العسكريه
والحمدلله على كل حال في ذيك الفتره كان الشيبان شغلهم الزراعه وما في شي غيره
نورت متصفحي بمرورك الكريم وردك الجميل
دمت في حفظ الله ورعايته .

[قوافي ( أم نهار )]

وعليكم السلام ورحمة الله وبركاته
كفاح وقوة صبر
شدني حضور النساء لحلب الغنم ومن ثم العوده بالخير للديره تمنيت ان اراهم فلا شك انه اجمل من ان يكتب
لابد من وجود من يعكر اجواء الحياة كالحواف وغيره
جزيل الشكر
تحياتي وتقديري واحترامي

[راعي الصقلاوي]

وعليكم السلام ورحمة الله وبركاته
تعلمت من سرحتي بالشياه الكفاح والقوه والصبر على المشاق والصعاب
وهاذ ساعدني في تحمل التدريبات الشاقه في العسكريه
كانت محارمي يحلبن الشياه في ماعون بلاستيك او ماعون معدني حين يتعبا بالحليب
تحط الماعون على راسها وتمشي فيه بدون ما تمسكه تروح لعند مواعين كبيره كل ماعون على وجهه
قطعة قماش تكون نظيفه وخفيفه لونها ابيض حين تسكب الحليب اللي في ماعونها في الماعون الكبير
تصفي الحلبي من اي شوائب تكون وقعت داخله صوف او شعر او قش من الاعشاب
بعدها ينقلونه للديره يسوون منه لبنه وسمن وجبنه وجميد والحمدلله كانت ايام جميله رغم التعب
والحوافين شر لا بد منه يتواجدون في كل عصر واوان حتى في وقتنا الحاضر
زان موضوعي ما خطته الانامل من حروف كلمات زاهيه معبره
دمتي في حفظ الرحمن ورعايته .