السلام عليكم ورحمة الله وبركاته
مسيكم بالخير الجميع
ابان خدمتي العسكريه طلعنا عدة مرات جولات بريه سيرا على الاقدام مع طلاب وطالبات من الجامعات ضمن برنامج متفق عليه بين الجامعات والجيش مدة هاذ الجوله كانت 4 ايام
كان من المقرر كل يوم نقطع مسافه معينه يتخللها فترات استراحه
اخذت معي سلاحي بندقية M 16 وعدد 8 امشاط رصاص ومسدسي وعدد 8 امشاط رصاص وحبال وصديقي نفس الشيء وخريطه وجهاز اتصال ومؤونه تكفيني وخويي مدة 4 ايام
في صباح يوم سبت وكانت الساعه 6:30 صباحا حين التقينا مع الطلاب والطالبات عرفتهم بنفسي وبصديقي
قلت لهم : اسمعوني الجميع الحين نطلع لكن اللي اقوله تسمعوه لصالحكم كل واحد منكم يحتاط من ناحية الزاد والمويه قبل لا يجلس في اي مكان يتفقده وحين يقوم يتفقد اغراضه
اذا شاف اي ثعبان او افعى لا يسوي فيها رامبو يبتعد عنها ولا يضايقها او يحاول يمسكها حين اقول استراحه نجلس مده معينه وبعدها نتابع طريقنا حنا ملتزمين بموعد ما ودنا نتأخر
راح نقدم كل مساعده ممكنه اتفقنا جميعهم قالو متفقين
توكلنا على الله طلعنا في الباص مسافه حوالي 10 كليومتر ونزلنا في مكان وبدينا نمشي كنت في المقدمه وصديقي في اخر الفريق كل شوي كنت اناظر خلفي وصلنا مكان ناظرت الخريطه
كان عليها اشارات معينه توقفنا حوالي 5 دقايق وتابعنا طريقنا بعد حوالي نص ساعه وصلنا منطقه فيها اشجار
قلت لهم : نستريح هنا مدة 45 دقيقه ونتابع بعدها مثل ما وصيتكم قبل لا تجلسوا تفقدو مكانكم وحين اقول مشينا تفقدو اغراضكم
وقفت مع صديقي على طرف الطلاب والطالبات صارو يلتقطوا الصور التذكاريه بعد ما استرحنا تابعنا المشي حوالي الساعه 1 ظهرا جلسنا في مكان لاجل يتناولون الغدا
كانت مؤونتنا عباره عن معلبات وخبز وطماطم وخيار وبعض الفواكه استرحنا مدة ساعه وتابعنا طريقنا استرحنا مره ثانيه وكملنا طريقنا كل فترة استراحه 10 دقايق
كانو الطلاب والطالبات يرددون بعض الاغاني وصلنا مكان وكان باقي على غياب الشمس ساعه ونص كنت اصلي وخويي واللي يصلون من الطلاب اضبط ساعتي على موعد الاذان
انتظر 10 دقايق وبعدها نصلي جماعه
قلت لهم : الليله نبات هنا كل منكم يتفقد فراشه قبل لا ينام الجميع حط اغراضه على الارض جمعتهم وقلت ودي اعلمكم كيف تشبون نار بدون ولاعه اطلعت من حقيبتي حبل قصير
وامسكت غصن جاف ولفيت عليه الحبل عدة دوائر واوقفت الغصن على قطعة حطب جافه ثبت الغصن برجولي واصرت اسحب الحبل يمين وشمال بسرعه مع احتكاك الغصن بقطعة الحطب
نتج عنها حراره مع تزايد الاحتكاك بدا الدخان يتصاعد حين شفت احمرار قطعة الحطب صرت انفخ عليها وحطيت عليها بعض الاعشاب فاشتعلت النار بعض الطالبات تبرع منهم ساوو
طبخة مقلوبه مع لحم دجاج مجمد كان في ثلاجه متنقله اشبه بصندوق فيه ثلج ومبطن من الداخل حتى يحتفظ بالثلج اطول فتره ممكنه وساوو شاي وقهوه وسهرو حين صار وقت النوم الجميع تفقد فراشه قبل النوم
قلت لخويي روح ارتاح حين يصيبني النعاس اصحيك .
راح صديقي تمدد على فراشه ونام ظليت سهران جلست اناظر السماء وكان هدوء رائع والنار شابه جا عندي طالب
وقلي : ودي اسهر معاك عندك اعتراض مو جايني نوم ؟
قلت : عادي لكن ودنا الصبح نصحى بدري تعودت اصحى بدري حوالي الساعه 5:30 الصبح اكون مستعد للتدريب الصباحي والهروله
سهر الطالب حوالي ساعه وبعدها توجه لفراشه صارت الساعه 1 صحيت خويي قام غسل وجهه وجلس مكاني رحت مكنه وغمضت عيوني وفجأه فتحت عيوني كانت الساعه
5:30 الفجر توضيت وصحيت الجميع كان خويي يشب النار اللي يصلي من الطلاب توضا وصلينا الفجر جماعه بعد صلاة الفجر شربنا شاي وقهوه وافطرنا خويي اطفا النار وتابعنا طريقنا
وصلنا بير مويه كانت الركوه على الباب ومربوطه بحبل تريحنا فتره وتزودنا بالمويه وتابعنا طريقنا تريحنا عدة مرات وصلنا منطقه فيها اشجار متفرقه جلسنا نرتاح تيممت وخويي والطلاب
اللي معنا وصلينا الظهر جماعه بعد ما فرغنا من الصلاه سمعت صراخ بعض الطلاب والطالبات توجهت اشوف ويش فيه اذا طالب حاصر ثعبان والجميع يصارخ واللي يشجع واللي يحذره
اقتربت منه وقلت له : ابتعد عن الثعبان بلاش يلدغك مو ناقصين .
قالي : لا تخاف اعرف اتعامل معاه
كان الطالب قريب من الثعبان خلال لحظات الثعبان لدغ الطالب في ساعده الايمن بسرعه دست على راس الثعبان وسدحت الطالب على الارض وسحبت سكينتي وجرحت الطالب في مكان
اللدغه وصرت امص السم اول مره وبصقتها كان اللون اصفر والمره الثانيه نفس الشيء المره الثالثه كان اللون احمر مختلط باللون بالاصفر المره الرابعه كان اللون احمر والمره الخامسه
كان اللون احمر قاني حملوا الطالب وحطوه في مكان ظليل وتقدم احد الطلاب يدرس طب وفحص الطالب قلي الطالب خايف ويرتعد
قمت اجريت اتصال حضرت طائره فيها اطباء ساوو فحص للطالب وقرر نقله للمشفى للتأكد انه ما صارله مضاعفات
قلت لهم اني مصيت السم من ساعد الطالب وشافو اللي مصيته وبصقته من ساعد الطالب فاخذوه للمشفى وشافو الثعبان اللي لدغ الطالب وكان ثعبان سام
جمعت الطلاب والطالبات وقلت لهم : شفتو بعيونكم هاذ اللي حذرتكم منه لا تتصرفو برعونه وطياشه
قالت لي طالبه : ما تخاف يصيبك تسمم لانك مصيت السم ؟
جاوبتها : اللي يكون في فمه جروح يتسرب من خلالها السم لجسمه ويتسمم لكن والحمدلله ما عندي اي جراح بفمي وكان هاذ السبيل الوحيد لاجل زميلك ما يتسمم
تابعنا طريقنا وتزودنا بالمويه من بير ومشينا مسافه طويله بدون استراحه وصار وقت العصر تريحنا ساعتين وانتقلنا لين وصلنا مكان قضينا ليلتنا فيها
وفي الصباح تابعنا طريقنا بعد الافطار اخر يوم لنا في هاذ الجوله بعد العصر وصلنا مكان تريحنا وقررنا المبيت فيه حيث انه ابعد مكان في عمران يبتعد عنا 10 كليومتر
في الصباح بعد الافطار وشرب الشاي والقهوه مشينا لين وصلنا مكان توقفنا ناظرت الخريطه طلبت من الطلاب والطالبات يجلسو تفقدت المكان وخويي تفقد القسم الثاني من المكان
رجعت عند الطلاب والطالبات انتظرت خويي حين جا اعطاني ايماءه براسه
قلت لهم : اسمعوني الحين وصلنا نهاية المطاف حنا قريبين من الشارع الرئيسي يبعد عنا حوالي 4 كليومتر نمشي بسرعه وان شاء الله نسبق الباص
مشينا بسرعه كانو الطلاب والطالبات يتضاحكون اقتربنا من الشارع جلسنا على طرف الشارع بعد حوالي 10 دقايق وصل الباص طلعنا فيه اوصلنا لمكان ما التقينا الطلاب والطالبات
التقطو لنا الطلاب والطالبات الصور التذكاريه وودعناهم ورجعنا لكتيبتنا العسكريه
حين وصلت كتبت تقرير ووقعت عليه وخويي وقدمناه لقائد المعسكر
الطالب اللي لدغه الثعبان من فضل الله ما حصل له تسمم لاني قمت بمص السم قبل لا ينتشر في جسمه حصلت على عنوانه توجهت على عنوانه جلست مع شايبه واخوانه وتطمنت عليه
قلي : خلص ما عدت مره ثانيه اسويها هاذ كان درس لي
قلت له : الله يهديك ويصلحك حذرتك من عواقب العبث مع الثعبان وقبل لا نمشي حذرت الجميع من هالشي الحمدلله جت سليمه
من اصعب اللحظات اللي مرت علي حين شفت هالطالب يتلقى لدغه من هالثعبان السام
واللحظه الاصعب حين ثعبان سام لدغ اختي بالرضاعه في قدمها بعد ما مصيت السم نقلتها بسيارتي للمشفى ورافقني ابوها وامها والحمدلله تشافت وتعافت
صورة افعى فلسطين الاكثر سميه في فلسطين والاردن ( تعبيريه )
وسلامتكم يالربع
15 نوفمبر 2015 - 16:514 نوفمبر 2015 - 21:27
 |
رد مع اقتباس
