السلام عليكم ورحمة الله وبركاته
مسيكم بالخير الجميع
في احد الايام توجهت مع صديقي ابو مرزوق لمراح حلاله حيث اخذ زواده لابنه فلاح توقف ابو مرزوق وناظر الحلال
قلي : الحلال ناقص حوالي 20 الى 25 راس .
اسرعنا لعند الحلال كان الحلال شرب مويه وهجع تحت ظلال اشجار الخروب سمعنا فلاح ينادينا رحنا نشوفه تفاجأنا بمنظره منسدح على بطنه وايدينه ورجوله مربوطه ببعضها قطعنا الحبال اللي كان مربط فيها
ونشده ابو مرزوق : ويش صار يا فلاح يبه من اللي ربطك هيك
قال فلاح : يبه كنت جالس لفاني 4 رجاجيل وطرحوا السلام رديت عليهم السلام قام واحد منهم مد سلاحه علي والثلاثه الباقين ربطوني وخذو قسم من الحلال وراحو فيه من هناك
ركبنا خيولنا وانطلقنا خلفهم في الهجير وصلنا مسافه حوالي 4 كليومتر وصرنا نمشي على مهل كان ابو مرزوق يناظر الارض بتمعن لانه قصاص اثر متمرس
وصلنا منطقه صخريه فيها طريق واحد وضيق فيه بعض المناطق ترابيه لاحظت اثر قدم رجال نشدت ابو مرزوق عنه
قلي : هاذ اثر رجال عمره تجاوز الثلاثين طويل ونحيف بحمل بيده اليمين بندقيه
مشينا لقدام مسافه حوالي 700 متر سمعنا صوت ثغا الشياه والنعاج نزلنا غن خيولنا ومشينا مسافه تركنا خيولنا جنب شجرة زيتون معمره كانت الشياه والنعاج بعيده عنا مسافه حوالي 300 متر
صاح ابو مرزوق : اتركو الحلال وانجو بارواحكم
كنت جهزت نفسي لضرب النار بديت ومعي ابو مرزوق نطلق النار عليهم النار لكن ما هو بقصد القتل فتركو الحلال وانحاشو لاحظت اللي كان يحمل البندقيه ما استعملها
توكدت حينها انها بندقية السارق معطله صوبت عليه وضربته رصاصه فصاح تصاوبت في كتفي رحت للمكان اللي تصاوب فيه السارق شفت اثار الدم صار ابو مرزوق يصفر للحلال
قام الحلال لحق ابو مرزوق مشيت خلف الحلال كنت كل شوي اناظر خلفي لاحظت السارقين اختفو بين الصخور الكبيره حين وصلنا الحلال جلسنا تحت ظلال الشجر
ابو مرزوق قال لولده فلاح : غلطتي يا يبه اني ما عطيتك البندقيه القديمه اللي عندي وما الومك لانك ما تقدر تناطح 4 رجاجيل وانت لحالك ما معاك إلا شبريتك
سألت ابو مرزوق : انت شفت اثار السارقين الاربعه ؟
قلي يا ابن آخي : حفظت اثارهم وحفظتها للابد توكل على الله ونعم بالله .
ظلينا مع فلاح لبعد العصر ابو مرزوق رجع للديره وظليت مع فلاح لثاني يوم الصبح حين لفى ابو مرزوق ومعه بناته وحرمته واولاده الاثنين ساعدتهم في حلب الشياه والنعاج
حملنا الحليب في السياره وعطا ابو مروق البندقيه لولده الكبير مرزوق وعطا لفلاح مسدسه ركبت حصاني ورجعت للديره ابو مرزوق ساق سيارته ومعه بناته وحرمته
مع انهم بنات ابو مرزوق يدرسن في الجامعه إلا انهم يرحن مع ابوهم ويساعدنه في حلب الشياه
قالت بنت ابو مرزوق : يا اخوي يا حمود احب شي لي حين اجي احلب الشياه مع اهلي لو يرضى شايبي اسرح بالحلال اسرح فيه
قلت : يا خيه شايبك كفاك تعب هالشي وما عادت الايام مثل زمان الحريم تسرح بالحلال مع ابو عيالها او ابوها
مضى على سالفة سرقة الحلال سنتين في يوم رحت ابو مرزوق لسوق الحلال حيث انه اخذ 6 نعجات لبيعها ربطنا النعجات في مكان وجلسنا وقسم الله انه ابو مرزوق يبيع النعجات
مشينا مسافه لاحظت ابو مرزوق يناظر الارض امسكني من يدي مشيت معه وهو يناظر ارجول الناس لين وقف جنب رجال وناظره من راسه لرجوله
قاله الرجال : ويش فيك تناظرني في شيء ؟
قله ابو مرزوق : لا لكن اثرك شفته قبل سنتين حين سرقت الحلال وكان معاك 3 اشخاص في اثر
اثنين منهم هاذ وهاذ
صار الرجال يتهم ابو مرزوق بالكذب تجمع الناس على صوتهم وحضرت دورية شرطه
قلهم ابو مرزوق : يا حضرة الشرطي ذوول سارقين عرفتهم من اثار ارجولهم تراني قصاص اثر اب عن جد خدمت فتره طويله في العسكريه وكنت قصاص اثر
الشرطه قبضت على السارقين الثلاثه وطلبو منا نلحقهم لمركز الشرطه هناك تم فتح محضر تحقيق مع السارقين وسولفنا للضابط اللي حصل حين لحقناهم يوم سرقو قسم من الحلال
ابو مرزوق اتصل على خالي وطلب منه يجيب فلاح لمركز الشرطه ويجيب سلاحي بعد للفحص وهاذ اللي حصل حين شافهم فلاح تعرف عليهم قبل لا يشوف ابوه او يتكلم معاه حينها توكد
ضابط مركز الشرطه انهم الثلاثه ذول سارقين تم وضعهم في الحبس على ذمة التحقيق 14 يوم حين رجعنا للديره
قلي ابو مرزوق : قلت لك يا ابن آخي حفظت اثرهم للابد لا بد يجي يوم اصدفهم او اشوف اثرهم وحينها لكل حادث حديث
بعد مرور 7 شهور تم استدعائي للشهاده في المحكمه وادليت بشهادتي حاول محامي السارقين يغلطني باقوالي وتذرع اني ما شفت وجوههم
قلت له : يا حضرة المحامي صحيح اني ما شفتهم لكن ذاك الشخص الطويل اثر رصاص بندقيتي بكتفه اليمين
القاضي طلب من الشرطه يحضرو السارق وكشفو عن كتفه الايمن فكان مكان الاصابه واضحه وتم تحوليه للطب الشرعي لبيان نوع الاصابه هل هي ناجمه عن رصاصه او لا
بعد فترة 5 ايام تم استدعائي مره ثانيه للمحكمه وكيل النيابه قدم للقاضي نتيجة فحص الطب الشرعي واللي اثبت انها اصابة السارق ناجمه عن رصاصه بندقية M 16
تم الحكم عليهم بالسجن لمدة 4 سنوات لكل منهم اما بندقية السارق وجدتها الشرطه داخل بيت جدة السارق وكانت معطله ولا تصلح لشيء حيث انها اجزائها الداخليه محطمه
وهي نوعيه قديمه جدا صناعة فرنسيه تعود لعام 1950 ميلادي
حاليا ابو مرزوق ما عاد يسرح بالحلال صارله حوالي سنتين لانهم اولاده واحفادهم يقومون بهاذ العمل وهو قارب عمره 75 سنه لكنه يروح يتفقد الحلال بين الفتره والثانيه
محدثكم العبد الفقير لله ابو ظاري كنت اسرح بالحلال في فترة طفولتي مع اخوالي في كل فصل صيف ونعزب فيها 3 شهور من شهر 6 الى نهاية شهر 8 اشد شهور السنه حراره
لغاية الان تعن في بالي ذكريات سرحة الحلال اولادي ما تعلموها لكن اذا جدت الامور اسرح بالحلال ما استحي ولا اخجل من مهنة رعي الحلال لانه والدي رحمه الله واموات المسلمين
كانت مهنته راعي حلال رغم تعبها الا انها مهنه شريفه
وسلامتكم يالربع
رد مع اقتباس