السلام عليكم ورحمة الله وبركاته
مسيكم بالخير الجميع
صباح يوم ربيعي دافيء طلعت اتمشى على ارجولي وصرت بطرف الديره الشمالي الغربي .
لمحت شخصين من تحت شجرة تين معمره معهم سياره لاند كروزر كان واحد منهم بعيد شوي عن سيارة التويوتا لاند كروزر .
قلت لهم : ويش تسوون عندكم ؟.
تفاجأت باطلاق نار من اللي جنب السياره اتخذت ساتر وبديت ارد على اطلاق النار اطلق علي 7 طلقات من سلاح رشاش وكان يقول لخويه بسرعه تعال اطلع بالسياره صوبت على البعيد عن السياره واطلقت عليه
النار اصبته بذراعه فصرخ على خويه صوبني في ذراعي ووقع على الارض .
صوبت على الشخص الاول اللي كان يطلق الرصاص علي من جنب السياره وضربت عليه رصاصه فعلقت الرصاصه في مسدسي بديت احاول اطلعها
انتهزو الفرصه وطلعوا بالسياره وانحاشوا اطلعت الرصاصه ولقمت المشط بالمسدس وانطلقت صوبهم وبديت اضرب الرصاص على السياره اصابتها في صندوقها الخلفي .
تلفت حولي شفت الدم على الارض قطعت طرف كم ثوبي وحطيته على الدم حين رفعته عن الارض
لطخت نقاط من الدم ثوبي الابيض وبغصن صغير حملت الرصاصات وحطيتهم في كيس نايلون كان في جيبي ونزلت على الشارع الرئيسي ومشيت صوب الديره وصرت التفت خلفي
لمحت سياره كان يسوقها ابن احد خوالي اشرت له وقف طلعت معه حين شافني
قالي : عسى ما شر يا ابو ظاري ثوبك عليه دم ؟ الله يكافينا الشر اللهم آمييين ***** اللهم آمييين
قلت له : بسرعه خذني للبيت وبعدين تفهم الموضوع .
قالي : يابو ظاري ويش السالفه الله يكفينا شر الدم . اللهم آمييين **** اللهم آمييين
حين وصلت البيت دخلت البيت بسرعه وهو لاحقني يستفسر مني اذا صار شيء .
كانت زوجتي على سطح البيت حين نزلت وشافتني وكنت امسك سماعة التلفون واتكلم مع ضابط مركز الشرطه بلغته باللي صار فطلب مني اجيب له طرف كم الثوب والرصاص .
لانها ادله لزوم نثبتها بمحضر رسمي لاجل نعرضها في المحكمه بدلت هدومي وطلعت مع ابن خالي مره ثانيه وتوجهنا لمركز الشرطه .
فقالي : الحمدلله انها السالفه كذا مو مثل ما تهيأ لي .
وصلت للمركز وسلمت الادله اللي تحصلت عليها طبعا الشرطه عممت على سيارة التويوتا لكن ما ظهر لها اثر كأنها الارض انشقت وبلعتها .
بتحليل الدم والبصمات ما في اي تطابق بالسجلات اللي عند الشرطه
قلت في نفسي : ادله بعرض ميل ولا اي متهم بهالقضيه .شيء يجعل الحليم حيرانا .
بعد 3 اياام كنت في مكتبي في مركز الشرطه اتابع عملي دخل عندي حارس الباب
وقالي : في شخص عنده بلاغ مهم جدا
قلت له : خليه يدخل فدخل هالشخص طلبت منه يجلس عرفني بنفسه
وقالي :عندي بلاغ غامض شوي يا حضرة الضابط .
قلت له : تفضل اسمعك .
قال : كنت جالس في مطبخ البيت سمعت شخص يقول لاتنسى موعدنا الليله عند سوق الخضار القديم يعطونا المبلغ اللي اتفقنا عليه ونعطيهم صولجان الذهب ما شفتهم ولا هم شافوني لانه شباك المطبخ مغلق وعليه ستاره هاذ اللي عندي .
قلت له : يعطيك العافيه حنا نتابع الموضوع بطريقتنا .
استأذن الرياال وطلع .
توجهت لضابط المركز وابلغته باللي صار فطلب انا نتفحص ونراقب منطقة سوق الخضار راودني شعور انه هالبلاغ له صله وثيقه بالسالفه اللي صارت معي .
قلت لضابط المركز : عندي شعور انها القضيه مرتبطه بالسالفه اللي ابلغتك فيها قبل 3 ايام ودي اكون معاكم الليله
قلي : طبعا لانك من الضباط المميزين في المركز وسجلك العسكري مشرف ما شاء الله
رجعت للبيت قلت لام العيال : ودي انام فتره طويله عندي دوام في الليل في الشرطه .
نمت من الساعه 10 صباحا تقريبا حتى الساعه 6 بعد العصر جت ام العيال صحتني من النوم توضيت وصليت الظهر والعصر وبدلت هدومي وتوجهت لوظيفتي جمعنا الضابط
وقال : نظل نراقب المكان وحين يجتمعون اللصوص نقبض عليهم متلبسين بالجرم المشهود الدراهم والذهب .
توجهت مع الضابط لمنطقة سوق الخضار تفحصنا المكان
فقالي : لابد انهم يلقون هنا
المنطقه ما احد يلفيها ومستويه وصف الشجر اللي هناك يستر اضواء السيارات رجعنا للمركز وبدينا نتجهز الساعه 11 توجهنا لمنطقة سوق الخضار وتمركزنا في اماكن متفرقه لكن كل المنطقه محاصره بعناصر الشرطه جلسنا ننتظر وصارت الساعه 1 بعد نص الليل وما في شيء الوضع ساكن وهاديء
فجأه قال شخص : اضواء سياره تتوجه عند صف الشجر طلبت من الجميع يكونو متأهبين
قلت :حين اقول توكلوا على الله نطبق عليهم وما نخلي لهم وقت ينحاشوا
بعد حوالي 10 دقايق شفنا اضواء
سياره ثانيه توقفت السياره واعطت اشاره باضوائها للسياره المتوقفه عند صف الشجر
فقلت على اللاسلكي : اقتربت اللحظه الحاسمه تجهزو
على ضوء القمر شفنا السيارتين توجهو صوب بعضهم وتوقفوا ونزل من كل سياره شخصين وصارو يتكلمون .
حينها قلت : توكلوا على الله انطلاق
وانطلقنا صوبهم بالسيارات وصافرات الشرطه تنطلق حوطناهم وقبضنا عليهم بدون اي اطلاق للنار لقينا معهم صولجان ذهبي ومبلغ 1000000 مليون دولار تم عد المبلغ في مركز الشرطه لاحظت شخص منهم عضده ملفوف بشاش طبي سألته عن السبب .
فقال : قضيب حديد صابني وانا اشرف على العمال اللي يبنون البيت
بكل قوتي ضربته على جرحه فاطلق صرخه قويه سحبته من يده وطرحته على المكتب
قلت له : الحين نشوف هالجرح اذا كان جرح رصاصه او جرح من قضيب حديد
نزعت الضماده اللي على عضده فنزل الدم حطيت له قطن على جرحه حين نقعت بالدم طلبت من الرقيب يرسلها للمختبر لاجل يساوو لها فحص ويطابقوها بالعينات اللي على برنامج الشرطه
قلت له اسمع : وين سيارة التويوتا لاند كروزر ؟
انكر معرفته بسياره التويوتا لاند كروزر
قلت له : زين الحين احط لك ملح على جرحك ونشوف اذا كنت تصبر على الوجع والالم
( طبعا هاذ الاسلوب ممنوع في عمل الشرطه ولكنه كان مجرد تخويف له واعطى نتيجه )
فقال : لا لا لا السياره في مغاره بالجبل بعيده من هنا حوالي 20 كلم .
استفسرت منه كم شخص في المغاره عند السياره واذا معهم سلاح .
فقال : 4 اشخاص ومعهم اسلحه رشاشه .
طلبت من الشرطي يحط كل واحد منهم في غرفه لحاله وتوجهت للضابط وابلغته بسالفة السياره اخذنا اذن ضبط واحضار من النيابه العامه وتوجهنا للجبل .
قبل وصولنا للمغاره بمسافة حوالي 3 كلم مشينا بدون اضواء السيارات على ضوء القمر نزلنا من السيارات وتفرقنا 3 مجموعات مشينا بدون صوت واجهزة اللاسلكي صامته
لين اقتربنا من المغاره بدت اضواء الصباح تنتشر وقفت تحت شجره اناظر الجهه المقابله لي لاحظت واحد من الربع اعطاني اشاره انه جاهز عطيته اشاره بيدي اني جاهز
والمجموعه الثالثه كانت جاهزه شفت شخص طلع من المغاره ويحمل بيده قربة مويه كان رايح للبير تسللت خلفه بكل خفه انقضيت عليه وجهت له ضربتين على خواصره وحملته وطرحته على الارض ولكمه سريعه على وجهه فاغمي عليه قيدت ايدينه بالكلبشات على شجره ورجعت للربع طلبت من اللي في المغاره يستسلموا بدأو اطلاق النار بدينا نرد عليهم والقينا قنبلة غاز مسيل للدموع في المغاره
وصبرنا لين طلعوا اللصوص وهم يسعلون بقوه ودموعهم تغرق وجوههم حطينا في ايدنهم الكلبشات بعد ما جردناهم من اسلحتهم واطلعنا سيارة التويوتا وما زال اثار الرصاص عليها مشينا حوالي
3 كلم طريق وعره اطلعناهم في سيارات الشرطه وتوجهنا للمركز كانت الساعه 7 تماما الصبح ادخلناهم المركز وبدأو بتجهيز محاضر تحقيق للسارقين
توجهت لغرفة ضابط المركز وناظرت الصولجان الذهبي كان عباره عن شكل اسطواني بطول 60 سنت متر وله مقبض من فوق فوق المقبض كوره ذهبيه صغيره فيها قطع زمرد وياقوت بلون احمر واخضر .
سألت الضابط : كم تقدر ثمنه يا حضرة المقدم ؟
قال : مو اقل من 2 مليون دولار .
قلت : الله عليهم يبيعونه بنص هالمبلغ اللي تقوله يبيعون اثار وتراث بلادهم بسعر التراب
كان هاذ اللي طالوه من طرف ديرتي حين شفتهم رجعت للديره بعد ما اعطيت افادتي كان الساعه 10 حين وصلت البيت خلدت للنوم وما صحيت إلا الساعه 4 العصر .
اخذت اجازه مدتها 9 ايام ارتحت من عناء عمل الشرطه بعد حوالي 9 شهور من التحقيق تم الحكم على السارقين اللي قبضنا عليهم
25 سنه وبعضهم سنه 20 اقل حكم للسايق 15 سنه .
وسلامتكم يالربع
رد مع اقتباس
