السلام عليكم ورحمة الله وبركاته
مسيكم بالخير الجميع
عندنا في المنطقه الجنوبيه الغربيه من ديرتنا وادي عميق اسمه وادي الحيايا يبعد عن ديرتنا حوالي 9 كليومتر وهاذ الواد ما دخله احد دخل شخص واحد وما طلع منه لغاية اليوم
ما احد يعرف ويش صارله لكن سمعو اصوات صراخه وكان يقول الحيايا تلدغه وكانت اصواته مرعبه نتيجة تردد صداها داخل الوادي
سولف لي جدي والد امي رحمه الله واموات المسلمين انه سنة 1959 من القرن الماضي جا رجال غريب على ديرتنا وسكن فيها وكان هالرجال لحاله وعرف عن نفسه وكانت لهجته شاميه سكن هالرجال
في ديرتنا حوالي 3 سنوات وكان هالرجال اطباعه واخلاقه زينه وكان يساعد اهل الديره في موسم حصاد القمح وموسم قطف الزيتون
في يوم من الايام هالرجال سأل جدي عن وادي الحيايا
قال الرجال : يا شيخ ويش سالفة وادي الحيايا يعني هو تسكنه الحيايا والثعابين ؟
سؤال الرجال اثار استغراب جدي لانه اهل الديره ما يقربون هالوادي لانه ما احد يدخله ويطلع منه على قيد الحياه
جدي قال للرجال : يا ولدي هالواد مخيف لانه اللي يدخله ما يطلع حي هاذ الودي اسمه من صفاته وادي الحيايا
لا تفكر تدخله ما نضمن سلامتك هناك
ومرت الايام في يوم والد صديقي ابو مرزوق شاف هالرجال يناظر اطراف الوادي دخل في الوادي مسافه
تفوق 100 متر ورجع
والد ابو مرزوق قال لجدي : يا شيخ الرجال الشامي شفته يدخل الوادي ويناظر مناطق معينه ويتفحصها هاذ الرجال سواته لها سالفه
جدي راجع الرجال الشامي بموضوع دخوله للوادي الرجال تعذر لجدي وقال انها دخل طرف الوادي بدافع الفضول مو اكثر جدي رجع حذر الرجال الشامي من مغبة دخوله الوادي
في يوم توجه ابو مرزوق بالشياه قريب من وادي الحيايا وكان معاه خالي ابو محمد ابو مرزوق لاحظ اثار ارجول شخص اول مره يشوفها وكان مضى عليها حوالي يوم ونص حسب خبرة
ابو مرزوق في قص الاثر مشى ابو مرزوق داخل الوادي مسافه قدرها حوالي 150 متر اختفت اثار
الرجال الغريب فقرر ابو مرزوق انه يرجع حفاظ على نفسه حين رجع ابو مرزوق
قال لخالي : يا ابو محمد اثار الرجال اختفت في الوادي الله يستر من تاليها .
رجع ابو مرزوق وخالي للديره وقالو لجدي على الاثار اللي شافوها واختفت داخل الوادي مضى فترة حوالي شهر وزود توجه جدي صوب الوادي يتفقد اشجار الزيتون في قطعة ارض
بعيده عن الوادي حوالي 1 كليومتر لكن بالامكان انه الشخص يقدر يشوف داخل الودي مسافه حوالي 20 متر لاحظ جدي كيس قريب من مدخل الوادي دفع الفضول جدي يروح يشوف ويش
هالكيس اللي هناك راح جدي صوب الكيس حين وصله كان كيس داخله روث اغنام هم جدي انه يرجع لاحظ اثار على الارض تتبعها كانت اثار ثعبان طويل و ضخم قدر جدي طول الثعبان
5 امتار كان الثعبان يتسلق شجرة سرو انحاش جدي حيث ما كان معاه شيء يواجه الثعبان فيه رجع جدي
للديره وسولف للربع عن اللي صار
مضت فتره حوالي اسبوع وبعدها افتقدو الربع الرجال الشامي ما عاد احد من الديره يشوفه لكن متاع الرجال موجود في بيته وهاذ يدل انه الرجال ما رحل من الديره جدي جمع الربع
وطلب منهم يدورون على الرجال الشامي والد ابو مرزوق رحمه الله واموات المسلمين توجه صوب الوادي
مع خوالي ورافقهم ابو مرزوق حين اقتربو من الوادي شافو الرجال الشامي منسدح
على الارض توجهو صوبه بسرعه وكان الرجال متوفي وصارله اكثر من اسبوع رجع خالي ابو حاتم للديره وسولف لجدي باللي صار توجه جدي ومعاه بعض اهل الديره
حين وصلوه والد ابو مرزوق كشف عن سواعد هالرجال كان عليها اثار لدغات ورجوله نفس الشيء حملو الرجال للديره غسلوه وكفنوه وصلو عليه صلاة الجنازه ودفنوه في ديرتنا
توجه جدي ومعاه بعض الربع لديرة الرجال وهي قريه قريبه من مدينة درعا في جنوب سوريا جدي وربع الديره ابلغو اهل الرجال بوفاة ولدهم نتيجة لدغ الافاعي السامه وعطوهم باقي متعلقاته
هدومه ومبلغ مالي 35 دينار وساعه لونها فضي ورجعو للديره
اول امس الاثنين توجهت لوادي الحيايا كنت على صهوة فرسي العبيه شهلا وصلت مدخل الوادي ومشيت لداخله مسافه حوالي 15 متر حينها توقفت الفرس ورفضت تتقدم خطوه واحده داخل
الوادي على العكس صارت تتراجع بسرعه للخلف توكدت حينها انها الفرس شعرت بشيء اخافها في الوادي ناظرت جوانبه كانت صخور متراصه على بعضها جدار كامل وارتفاعه في بعض
المناطق اكثر من 40 متر رجعت للديره وما اخبرت احد بالسالفه إلا خالي ابو حاتم زعل مني
وقلي : يبه يا ابو ظاري الله يرضى عليك لا تروح هالوادي مرت (ن ) ثانيه تراك امانه برقبتي وان صرت رجال انت قطعه من الكبد لا تتهور وترمي نفسك في المهالك عطني وعد رجاجيل
ما تروح الوادي ولا تقربه مرت (ن ) ثانيه
عطيت خالي ابو حاتم وعد ما اروح هالوادي ولا اقربه مره ثانيه
وسلامتكم يا الربع
رد مع اقتباس
