السلام عليكم ورحمة الله وبركاته
مساكم الله بالخير الجميع
كل عام وانتم بالف خير وعساكم من عواده
في يوم من الايام لفاني على بيتي شخص اعرفه معرفه زينه واستلف مني مبلغ 5 الاف دينار لمدة سنه ما كتبت عليه صك اكتفيت بشهادة 3 اشخاص من ديرتي ومضت السنه وحان
موعد سداد الدين والرجال ما رد لي جواب ولا اتصل يبدي لي عذره
قلت في نفسي وكاد هالرجال ما رد لي جواب ولا ابدى لي عذر في شيء صار عنده ومنعه وحسب ما قال رسولنا محمد صلى الله عليه وسلم ( التمس لاخيك عذرا )
بعد يومين رحت للرجال على بيته اكتشفت انه هالرجال حالته ضيقه جدا وام عياله فارقته بسبب عدم قدرته على سداد الدين ما حبيت ادق على باب بيته واسولف معاه رجعت لديرتي
بعد فتره حوالي اسبوع تقصيت عن اخبار الرجال عن طريق رجال موثوق فيه ويعرفه زين قلي الرجال حالته صعبه جدا ما معاه درهم واحد ومضى على موعد السداد اكثر من سنه وشهر
احترت ويش السوا والراي والتدبير في هالموضوع وما كان قدامي الا استشير الشيبان كلهم خير وبركه ومنهم نتعلم رحت لخالي ابو حاتم لاجل يشور علي في هالموضوع
وصلت بيت خالي كالن جالس في الديوان وعنده صديقنا ابو مرزوق طرحت السلام ردوا السلام وجلست معهم وسولفت السالفه لخالي ولابو مرزوق
خالي قال : انت تعرف الرجال زين يا ابو ظاري ؟
جاوبته : طبعا يبه اعرفه معرفه زينه ما عمره الرجال اخلف موعده معي ولا تراجع بكلامه
خالي قلي : اسمع يبه دق على الرجال الحين قدامي وسولف معاه واعرف منه سبب توخره انه ما رجع لك دراهمك وخلي كلامك رزين وخلنا نسمع جوابه
دقيت على الرجال رد علي سولفت معاه
قلي : يا ابو ظاري الامور قصرت معي وماني بناكر دراهمك وخجلت ادق عليك واتعذر لك ما قدرت اسد هالدين احيان ما اعرف طعم النوم بسبب هالموضوع تعال عندي
ونجلس ونتفاهم وإن شاء الله نوصل لحل يرضيك ويرضيني تنقى اليوم والموعد اللي تحبه ما عندي اي اعتراض
خالي هز راسه لي انه موافق
قلت له : يناسبك باكر الساعه 10 اكون عندك ونجلس ونتفاهم ؟
قلي : حياك الله يا ابو ظاري وجيب معاك بعض ربعك يكونو شاهدين على السالفه
جاوبته : توكلنا على الله موعدنا باكر إن شاء الله تعالى . في امان الله تعالى ومع السلامه / وغلقت الخط
قلي خالي : اسمع يبه باكر إن شاء الله تعالى نروح للرجال ونجلس ونتفاهم لا تقدم على شيء بدون تفكير
ورويه كل عقده ولها حلال
ابو مرزوق قال : يا ولدي يا ابو ظاري رايي من راي خالك نروح للرجال ونتفهم ولا بد انا نوصل لحل بحول الله تعالى ونعم بالله
صباح اليوم التالي دقيت على الرجال وبلغته انا نكون عنده حسب موعدنا
قلي : حياك الله انتظرك انت وربعك
توجهت للرجال ورافقني خوالي ابو حاتم وابو اسماعيل وصديقنا ابو مرزوق بسيارة خالي ابو حاتم بيك اب هايلكس حينا وصلنا بيت الرجال كان في انتظارنا استقبلنا
بكل ترحاب وحفاوه وكان عنده شايبه وعمه اخو شايبه ادخلنا مجلس الرجال جلسنا صب لنا الفنجال شربنا الفنجال
قلي الرجال : بعد الصلاه على رسول الله صلى الله عليه وسلم خلنا نسولف بالموضوع يا ابو ظاري ما احب المقدمات هاذ حقك وتاخذه بالصاع الوافي ماني بناكر دراهمك وعندك 3 شهود عليه
قول اللي عندك يا ابو ظاري
قلت له : اسمع عرفت انها امورك الماديه متعسره جدا شلون ودك تسدد دينك ؟ ودك تمدد المهله ما عندي اعتراض عطني رايك
قال : بيض الله وجهك ما قصرت كافي ووافي ما ودي امدد المهله ام عيالي فارقتني بسبب هالموضوع ودي ارتاح واريح راسي من وجع هالموضوع عندي راي إن شاء الله يعجبك
عندي فرس عربيه اصيله معها اوراق سلالتها فصيلتها العبيه ولاقحه من فحل له اوراق سلاله ويش رايك يا ابو ظاري ؟
قلت : زين اشوفها ونخلي شخص يثمنها وإن شاء الله نحل هالموضوع
بالصدفه كان موجود في ذيك الديره تاجر خيول عربيه اصيله وله باع طويل وخبره كبيره فيها ارسل شخص يطلبه يلفينا على بيت الرجال حين جا التاجر ابو متعب سولفنا معاه
قال ابو متعب : يالربع خلنا نشوف الفرس وإن شاء الله خير
طلعنا من البيت الرجال جاب الفرس ومشى فيها قدامنا عدة مرات ركبتها وطردت فيها على الخفيف لانها لاقحه والخوف اذا كان الطراد بقوه تسقط اللي في بطنها بسبب التعب والاجهاد
لاحظت ابو متعب كان يناظر ارجول الفرس بتمعن وهي تمشي حين نزلت عن ظهر الفرس تفقدناها مع ابو متعب ما فيها اي جرح او ضربه او شعر مقصوص خاليه من العذاريب
الفرس لونها احمر يميل للاشقر يزين ارجلها الاماميه تحجيل وفي بوجهها خط ابيض من جبينها لحد خشمها وعمرها 4 سنوات وهاذ اول حمل لها اسم الفرس شهلا
دخلنا البيت جلسنا وطلبنا راي ابو متعب
بسمل وقال : بعد الصلاه على رسول الله صلى الله عليه وسلم هاذ الفرس اثمنها بمبلغ 5200 دينار واللي في بطنها اثمنه بمبلغ 300 دينار لولا انه ابو ظاري شاف الفرس قبلي
وصار عليها كلام بنية الشرا لكنت دفعت المبلغ اللي ذكرته 5500 دينار واسألوا اي تاجر كم يدفع فيها
قله شايب الرجال : ما طلبنا رايك إلا لاجل انك تاجر معروف بصدقه وامانته ولك باع طويل وخبره كبيره في الخيول العربيه الاصليه وحنا موافين على اللي قلته مير نشوف
راي ابو حاتم وربعه .
خالي قال : يالربع اتكلم نيابه عن ابو ظاري موافقين وكلام ابو متعب ما عليه مزاوده حنا نعرف ابو متعب ونثق فيه .
قلت : توكلنا على الله ونعم بالله
اتقفت مع الرجال آخذ الفرس واعطيه 500 دينار وهاذ اللي صار الرجال عطانا اوراق سلالة الفرس وقبضته 500 دينار بحضور خوالي والتاجر ابو متعب ووالد الرجال وعمه
قال الرجال : الحمدلله كان حمل ثقيل على كتوفي والحين راح هالحمل وارتحت منه كان ينغص علي حياتي
قلته له : ليش ما طلبت من ربعك يساعدوك في سداد هالدين كنت ارتحت من زمان ؟
قلي شايبه : يا ولدي عرضنا عليه المساعده ورفض بكل اصرار وعناد ومثل ما شفتم يالربع الحمدلله انتهى هالموضوع على خير
تعذر منا الرجال وقام من المجلس غاب حوالي 5 دقايق ورجع واذا هو يحمل صينيه كبيره عليها رز ولحم حطها وراح ورجع بصينيه ثانيه نفس الشيء وجاب ماعون كبير فيه جميد مطبوخ
وصار يصبه فوق الرز واللحم ونثر فوقه بقدونس مفروم وحط عليه لوز مقلي هاذ الطبق نسميه منسف لحم بالجميد وهاذ هو الطبق الشعبي عندنا في الاردن ويقدم للضيوف وخاصه في الافراح
قال الرجال : يلا يالربع تفضلوا غداكم على مقسم الرحمن
كل 4 اشخاص منا جلسو على صينيه تغدينا وشربنا القهوه وحمدنا الله وبعدها ودعنا الربع الرجال جاب الفرس اطلعناها في سيارة البيك اب وتوجهنا لديرتنا حين وصلنا دخلنا حوش البيت
بالسياره اوقفها خالي في مكان منخفض شوي مقابل قطعة ارض صغيره فتحت باب قفص السياره وسحبت الفرس من قفص السياره واخذتها لباب البيت كان عندنا في البيت خالتي ام حاتم
بنت عم شايبتي همست باذن ابني ضاري بشيء راح قبال البيت في هناك شجرة توت جاب ورقه كبيره من الشجره غسلتها خالتي ام حاتم وجابت معها قطعة عجين حطت ورقة التوت على جبين الفرس ولصقتها
بقطعة العجين هاذ عاده قديمه في ديرتنا
قالت لي : ليتها فال سعد عليك وعلى اهل بيتك الله يعطيك خيرها ويكفيك شرها اللهم آمييين ***** اللهم آمييين
خالي قال : سبحان الله شفت يبه رحت للرجال تاخذ حقك منه الله يسر له مبلغ 500 دينار
هالملبغ يساعده في تسيير بعض اموره
حين حل فصل الشتا صرت اخلي الفرس وحصاني في مزرعة خالي في احد ايام المربعانيه البارده والماطره توجهت للمزرعه رحت اتفقد الفرس لقيتها طايحه على الارض ومهرتها جنبها
مهره لونها بني ضارب للسواد يزين جبينها طبعه بيضا كبيره وتحجيل برجولها الاماميه اسميتها نجمه وسويت لها اوراق سلاله فطمتها السنه هاذ في بداية شهر 4
وسلامتكم يالربع
رد مع اقتباس
