السلام عليكم ورحمة الله وبركاته
مسيكم بالخير الجميع
في يوم من الايام ارسلي خالي ابو حاتم رحت لقيت عنده في الديوان زوج خالتي ام فارس ( والدتي بالرضاعه ) وصديقنا ابو مرزوق طرحت السلام عليهم ردو السلام وجلست
قلي خالي : يبه باكر بعد مشيئة رب العالمين ودي تروح تجيب البيطار لاجل يحذي الخيول تكلمت وتفاهمت معاه ينتظرك البيطار اول السوق جنب الصيدليه .
قلت : زين يبه باكر ان شاء الله اروح واجيب البيطار
سمعت دق سريع على باب بيت خالي و جرس البيت ما توقف عن الرنين طلعت من الديوان اركض كنت اقول : يا ستار استر يا دافع البلا يا الله فتحت باب البيت تفاجأت ببنت
والدها يكون من ابناء خؤولة شايبتي كانت في حالة خوف شديد ومرتعبه
قالت : وين عمي ابو حاتم ؟ وين عمي ابو حاتم ؟
اشرت لها على الديوان راحت تركض بسرعه لحقتها اشوف ويش السالفه دخلت البنت الديوان وصارت تبكي
وقالت : داخله على الله ثم عليك يا عمي ابو حاتم داخله عالبيت واهل البيت
خالي قلها : ابشري ابشري يا بنيتي وصلتي لكن بدون بكا خلنا نفهم ويش اللي صار ؟
قالت البنت :يا عمي ابو حاتم ابوي وده يزوجني لولد فلان وعطاه كلمه وانت تعرفه ما هو بالريال الزين كلمه توديه وكلمه تجيبه ( ضعيف الشخصيه ) غير سوي
وقامت ربطت طرف شماغ خالي على شكل عقده
رد عليها خالي : ما يخالف روحي عند عمتك ام حاتم ونحل الموضوع ان شاء الله
قالت البنت : ليتك سالم وغانم يا عمي ابو حاتم وهي تمسح دموعها .
طلعت من الديوان شفت خالتي ام حاتم كانت تعلق على حبل بعض قطع القماش لاجل تجف لانها كانت تنقط مويه كانت البنت تمشي وراي اشرت لها على خالتي ام حاتم ورجعت على الديوان
سمعت زوج خالتي يقول لخالي ولابو مرزوق : يعني ابو البنت ما لقى إلا هالردي ما ظل في الديره رجاجيل ؟
رد عليه خالي : ما تصير هالزيجه هو يفكر بسواته يزوجها بدون رضاها ام البنت ابوها خالي وعمي .
قلت : يبه ارح لابو البنت وابلغه باللي صار ؟
ناظرني وهز راسه علامه انه غير موافق
خالي قال : يا ابو فارس تروح لابو البنت وتقله على لساني بنته دخيله عند ابو حاتم ما تتم زيجة هالبنت الا حين تتفاهم مع ابو حاتم وتتوصل معاه لحل للمشكله
راح زوج خالتي ابو فارس وبلغ ابو البنت بالكلام اللي قاله خالي
ابو مرزوق قال : يا ابو حاتم هاذ ولد خالك صابه خبال يزوج هالبنت لهاذ ضعيف الشخصيه مسلوب الاراده وكاد ماهو بصاحي ؟
رجع زوج خالتي وجلس وقال لخالي بلغته بكلامك يا ابو حاتم حين عرف انها بنته دخيله عندك صار كانه مجنون وصار يتوعد ويتهدد
خالي صار يهز راسه علامه انه واثق من انه والد البنت راح يسوي هالشي لانه سريع الهيجان والغضب بعد حوالي ساعه سمعت ضرب قوي على الباب وشخص ينادي خالي
رحت فتحت الباب كان والد البنت وعلامات الغضب مرتسمه على وجهه
قلي : وين خالك يا حمود وين الشيخ ابو حاتم؟
قلت له : في الديوان
مشى قدامي وحين دخل الديوان طرح السلام ردو السلام عليه وجلس
قال : يا ابو حاتم بعد إذنك ودي آخذ بنتي معي للبيت
ناظره خالي وقله : تاخذ بنتك بهاذ السهوله ؟ نسيت انها دخيله عندي ما لك بنات عندي بعد ما نتفاهم ونتوصل لحل ويكون شهود عليه رجاجيل من العائله والعشيره تاخذ بنتك .
والد البنت ما عجبه كلام خالي وقال : اسمع آخذ بنتي بالقوه والغصب والصياح وطق الرماح
صاح خالي عليه : بنتك دخيله عندي وربطت طرف شماغي تفهم والا ما تفهم ويش معنى هالكلام تعرف ويش يعني ربط طرف الشماغ ؟
والد البنت وقف على ارجوله وقال : ودي اخذ البنت الحين بالقوه
حين شفت هالمنظر غلى الدم في عروقي وكنت ودي اصفعه على وجهه قلت له : تكلم شيخ العشيره وانت واقف على ارجولك صابك خبال وجبت الغثا لنفسك ما تمر السالفه كذا خالي وقف على ارجوله
وحينها شفت زوج خالتي يصفع والد البنت على وجهه تهيألي الديره كلها سمعت صوت الصفعه
والد البنت قال : تمد يدك علي يا ابو فارس وتصفعني على وجهي هاذ الحادثه كبيره وردها اكبر من الديره كلها .
رد عليه زوج خالتي : ودك تاخذ بنتك من بيت الشيخ بالقوه ما فيه رجاجيل يردوك والا حاب الدم يسيل في العشيره الله يكافينا شره اللهم آمييين **** اللهم آميين
خالي قال لوالد البنت : ما تقدر تاخذ بنتك من بيتي حاول انك تجرب لكني متوكد انك ما تقدر تخطي خطوه باتجاه بيتي وامسكه من تلابيب ثوبه وكمل كلامه لوالد البنت
انصحك نصيحه لوجه الله تعالى انك تختصر الموقف وتروح لبيتك تروح للي عطيته كلمه وتقوله ما لك عندي نصيب البنت ما ودها تزوج تفهم ودفعه للخلف
تدخل ابو مرزوق وقال : بالهداوه يالربع بالهداوه استهدوا بالله لا اله إلا الله الله يخزيك يا شيطان عذ بالله من الشيطان الرجيم
وامسك ابو مرزوق والد البنت من يده واخذه على طرف وصار يهمس له بكلام وابو البنت يحاول يثبت لابو مرزوق انه ما يقدر يتراجع في نهاية الامر ابو البنت رضخ لكلام ابو مرزوق
وقال : زين يا ابو حاتم يصير خير لكن حقي من ابو فارس ما اخذه بحب الخشوم اخذه بدق الخشوم
قلت له : اسمع ترى والله اذا حاولت انك تمس شعره منه ما يحصل لك طيب وانت تعرفني وخبرتني قبل هيك
زوج خالتي قال : ما يقدر يسوي شي وهو يعرف هاذ الامر صعب وكبير عليه
طلع والد البنت من الديوان وراح لبيته بعد يومين توافد على ديوان خوالي اهل الشاب اللي عطاه والد البنت كلمه لاجل يزوجه بنته وجلسو صبيت لهم الفنجال وجلست
بعد ما شربو الفنجال قال والد الشاب : يا ابو حاتم حنا تكلمنا مع ولد خالك ابو البنت وعطانا كلمه وبعدها رجع بكلامه وقال ما لكم عندنا نصيب ودنا نتمم الموضوع
رد عليه خالي وامسك طرف شماغه وقال : تشوف طرف شماغي مربوط ؟
هز والد الشاب راسه وقال : صحيح يا ابو حاتم
خالي قال : البنت ربطت طرف شماغي وهي داخل بيتي بين بناتي دخيله عندي ابوها عطاكم كلمه من راسه ما شاورها بامر زواجها
رد والد الشاب : من متى حنا ناخذ راي البنت في هاذ الامور
خالي رد عليه بغضب : اليوم غير امس بناتنا نشاورهم بامر زواجهم ما عدنا مثل قبل 60 _ 70 سنه حنا نسأل البنت رايها حين يلفي شخص يطلبها للزواج
الربع الموجودين قالوا : هاذ اخر كلام عندك يا ابو حاتم ؟
قلهم خالي : سمعتوني قلت غيره ؟
صارو يناظرون بعض تدخل خالي ابو محمد وقال : يالربع البنت والدها ابن خالنا وما يقدر ابوها يزوجها بدون راينا حنا شيوخ العشيره والبنت دخيله عندنا ما لكم عندنا نصيب
استأذنو الربع وطلعو مسا ذاك اليوم جا والد البنت وجلس مع خوالي
وقال لهم : تخالصت مع الربع واوعدك يا ابو حاتم والربع يشهدون ما ازوج بنتي إلا بحظاها ورضاها مير خلها ترجع معي للبيت
قله خالي : زين لكن احذرك انك تمد يدك عليها او تعنفها بكلمه
استأذن خالي من الربع وطلع من الديوان بعد حوالي 10 دقايق رجع وكان معاه البنت : قال هاذ بنتك انت وعدتني وعد الحر دين عليه ما تزوجها غصب عنها
والد البنت قال : وعدتك يا ابو حاتم ظل صفعة ابو فارس لي ودي حقها
خالي قال : ابو فارس يغزلك على بيتك رايه بيضا ويتعذر لك قدام الربع ويدفع لك 3000 دينار رد اعتبار ظل شيء ثاني ؟
زوج خالتي ابو فارس قال : ابشر يا ابو حاتم نغز له رايه بيضا على بيته ونتعذر له ونعطيه اللي فرضته علي .
قال والد البنت : بيض الله وجهك يا ابو حاتم حقي يوصلني .
زوج خالتي ابو فارس قال : ما صفعته يا ابو حاتم إلا لانه تجاوز حده في الرد عليك
بعد يومين توجه زوج خالتي ابو فارس لبيت ابو البنت ومعاه مجموعه من رجاجيل الديره والعشيره وربط قطعة قماش بيضا كبيره بعصا على سطح بيت ابو البنت ودفع له 3000 دينار
وتعذر له قدام الربع بعد حوالي 4 سنوات جا والد البنت لخالي ابو حاتم
وقله : يا ابو حاتم جاني ولد فلان وده يخطب البنت انت شيخنا وكبيرنا حين يجون الربع لبيتي انت اللي تتكلم اقمتك مكاني انت ابوها تصرف معاهم
وهاذ اللي حصل خالي تكلم بالنيابه عن ابوها واتفق مع الربع على كل شيء يخص فرح البنت والحمدلله انه ما كلفهم شيء فوق طاقتهم
كان كل اللي طلبه من مهر وتوابعه ضمن العقل والمنطق والحمدلله اليوم اكبر اولاد
هالبنت عمره حوالي 16 سنه
وسلامتكم يالربع
رد مع اقتباس
