السلام عليكم ورحمة الله وبركاته
صبحكم الله بالخير الجميع

في يوم من الايام حصل اشكال بين بعض افراد العشيره وكبر هالاشكال وتداعت شيبان وشيوخ العشيره لاجل يحلون هالاشكال بدت المساعي الحميده والخيره وتوصلو لاتفاق ينهي هالاشكال
واذكر انهم تجمعو في ديوان خوالي بعد صلاة المغرب وكان يوم ثلاثاء تداولو في الموضوع وتم الاتفاق على الصلح بوجود كفيل لكل طرف على انه يتم الصلح صباح يوم الاربعاء
خالي ابو حاتم اتفق مع خالي ابو اسماعيل يسوون غدا للربع فارسلني خالي ابو حاتم لمزرعة خالي ابو اسماعيل مسا يوم الثلاثاء جبت 5 ذبايح سمينات
صباح يوم الاربعاء تم ذبح الذبايح وصلخها وتقطيعها وتجمعن حريم العائله الكبيرات خالاتي وشايبتي الله يشافيها ويعافيها وخالتي ام حاتم وعمتي ام صالح الله يرحمها واموات المسلمين
كل وحده من حريمنا جابت معها بناتها لاجل يساعدوهم في الطبخ عمتي ام صالح كان دورها الاشراف على الطبخ حيث انها اكبر حريمنا سنا
في صباح يوم الاربعاء كنا ننتظر حضور شيبان العشيره سمعت طرق على باب حوش البيت رحت فتحت الباب كان الطارق شاب غريب اول مره اشوفه
قلي : صباح الخير يا حمود ابو حاتم موجود ؟
دريت عليه : صباح الخير تفضل خالي موجود .
مشى الشاب لباب الديوان استقبله خالي وصافحه وادخله الديوان صبيت له الفنجال شربه وهزه اخذت الفنجال غسلته وحطيته على الصينيه
سمعت خالي يقول : ارسلت لابو مرزوق يجيني باكر للحين ما وصل .
اذا صوت ابو مرزوق يقول : جيتك جيتك ما تونيت عنك يا رفيق العمر .
دخل ابومرزوق الديوان وصافح الشاب وجلس امسكت الدله ودي اصب له الفنجال اشر لي بيده ما وده يشرب القهوه حطيت الدله وتعذرت من ابو مرزوق والشاب وطلعت براة الديوان
بدت الشيبان تتوافد على الديوان كانو خوالي يستقبلون الشبان على باب الديوان الشاب هاذ نادى كل شايب
باسمه
/ ابو محمد , ابو خالد , ابو سعيد , ابو سلمان , ابو صالح , ابو عواد
ذول بعض الشيبان اللي كانو موجودين مو كلهم كان عدد الشيبان حوالي 30 شايب من العشيره حين جلسو الشيبان الشايب ابو سلمان
قال : يا ولدي انت عرفتنا كلنا باسمائنا لكن حنا ما عرفناك وهاذ اول مره نشوفك فيها
رد عليه الشاب : معاك حق يا ابو سلمان ولا يهونو الربع لكني فلاح ولد سليم الله يرحمه واموات المسلمين لفيت للديره امس عند المغرب شفت البيت مغلق مر عني ولد صغير سألته عن
اهل البيت قلي انهم توفوا من فتره طويله الله يرحمهم واموات المسلمين رجعت للمدينه ومعي اللي يثبت
اني فلاح ولد سليم
فتح الشنطه الصغيره الي معاه واطلع منها ورقه مكتوبه باللغه الانجليزيه وعليها اختام
قاطعه خالي وقال : الحمدلله على السلامه وحياك الله بين هلك وربعك خلنا يالربع ننهي هالاشكال اللي تجمعنا لاجله وبعدها نجلس ونشوف فلاح له امانه عندي اردها له
احضرت ورقه وقلم وكتبت صك الاتفاق اللي صار والشيبان وقعوا عليه وشيء حط بصمته لانه لا يعرف يقرا ولا يكتب وعطيت الصك لخالي ابو حاتم وحنا جالسين نسولف لفاني ولد
اخوي حاتم وقال : جدتي ودها عمي ابو ضاري ضروري .
تعذرت من الربع ورحت اشوف خالتي ام حاتم قالت لي
: الله يرضى عليك يمه ودنا اسطوانة غاز كبيره وراس مع منقلها
رحت بالسياره لبيت الرجال اللي يبيع اسطوانات الغاز احضرت اللي طلبته خالتي ام حاتم ورجعت ركبت الراس على الاسطوانه مع منقلها واشعلتها ورفعت قدر كبير حطيته على راس
الاسطوانه كان داخله مويه ولحم حريمنا وبناتهم مشغولين بالطبخ عمتي ام صالح كانت تعطي تعليمات للبنات سوي كذا , حركي اللبن اللي في القدر وهو فوق النار , حطي ملح , وين الهال , وين البهار
ومن هاذ الكلام اللي يخص الطبخ رجعت للديوان ناظرت ساعة يدي كان باقي على آذان الظهر 10 دقايق قلت للربع قامو وتوجهو للمسجد توضينا في متوضأ المسجد
وصلينا صلاة الظهر بعد ما فرغنا من الصلاه امام المسجد قال : يالربع غداكم اليوم في بيت ابو حاتم لا يتونى احد منكم توجهنا لبيت خالي لقينا اولاد خوالي جهزو حوش البيت الواسع
للغدا وبدينا ننقل الصحون حط رز, هات لبن , حط لحم , عطي كولا , الملاعق يا بو ظاري , القهوه يا حاتم , صب لبن لفلان يا عبدالمحسن , المويه يا جازي
ظلينا على هالمنوال حوالي 3 ساعات لين ما ظل احد من العشيرتين الا حضر الغدا اللي يخلص من الغدا يقول جعله عامر يا ابو حاتم
بعد صلاة عصر ذاك اليوم تجمعت الشيبان في الديوان وقام فلاح اطلع من حقيبته الصغيره ورقه
مكتوبه باللغه الانجليزيه وعليها اختام وقال هاذ هو الاثبات وحيث ان
الموجودين شيبان ولا يعرفون الانجليزي خالي طلب من ولده حاتم يقرا ويترجم المكتوب في الورقه حيث انه حاتم يتكلم 3 لغات انجليزي , اسباني , فرنسي تعلمها في الجامعه قرآءه كتابه
محادثه فصار حاتم يقرا مقطع بصوت عالي ويترجم للربع معنى اللي قراه كان فحوى المكتوب
فلاح تعرض لحادث سير وكانت الاصابه في وجهه شديده بسبب الاصابه تم اللجوء لعمليات التجميل حيث
انها الوسيله الوحيده لترقيع وترميم وجه المصاب فلاح على اثرها تغيرت ملامح وجه فلاح وهاذ الكتاب
يفيد بهاذ الشيء
واطلع فلاح صوره لجواز سفره القديم وجواز سفره الجديد
خالي ابو حاتم قال : يالربع والد فلاح الله يرحمه واموات المسلمين ترك عندي امانه قيمتها 1500 دينار وطلب مني اتاجر له فيها بتجارة الزيت والاغنام بحضور 3 شياب من الديره
وفيها صك الشيبان الحاضرين على الصك ابو مرزوق وابو سلمان وسليمان العواد ابونعمان الله يرحمه واموات المسلمين على مدى 10 سنوات شغلت الامانه في التجاره بعدها اوقفتها
لانه توفي الله يرحمه خليت الامانه بارباحها في البنك بدون فوائد عندي دفاتر التجاره 10 سنوات احتفظت فيها لاني كنت موقن انه فلاح لا بد يجي يوم يطلبها وجا هاذ اليوم
ارباح الامانه في تجارة الزيت على مدى 10 سنوات بلغت 1200 دينار اما ارباح الامانه في تجارة الاغنام على مدى 10 سنوات بلغت 3700 دينار قبل 3 سنوات خسرت في صفقه
1200 دينار خسارة ابو فلاح حولتها علي حسبت خسارة ابو فلاح فبلغت 400 دينار اعطيته من كيسي 400 بدل منها لاجل لا يقول الناس ابو حاتم تلاعب بامانة ابو فلاح وشاركه في
خسارته وهاذ الشيء مثبت في دفتر ذيك السنه لتجارة الاغنام وهاذ هي الدفاتر تحب يا فلاح تراجعها انت حياك تحب تاخذها لاي مكتب محاسبه يراجعها لك حياك الله خذها ما عندي اعتراض
فلاح قال : لا يا ابو حاتم ما اخونك .
خالي صمم الا يراجع الدفاتر بحضور محاسب من مكتب للحسابات الماليه بحضور شهود من الديره وهاذ اللي حصل جلسوا مع محاسب في بيت خالي بحضور شهود من الديره وراجعو
الحسابات فقال المحاسب: الحسابات صحيحه وما فيها اي تلاعب
جلسو الربع وتم عمل حساب للامانه وارباحها بلغت 6400 دينار رحت مع خالي للبنك وسحب
مبلغ 6400 دينار وغلق حساب الامانه وسلمها لفلاح بحضور شهود من الربع وتم
عمل صك انه فلاح استلم الامانه وارباحها وما ظل له في ذمة خالي اي مبلغ نهائي ووقع فلاح على الصك بحضور 4 من شيبان العشيره
فلاح الحين يشتغل بتجارة الادوات الصحيه والمنزليه وتزوج من بنت من ديرتنا وعنده 4 اولاد
وسلامتكم يالربع