السلام عليكم ورحمة الله وبركاته
صبحكم الله بالخير الجميع
في فترة طفولتي حصل عندنا مناسبه جدي رحمه الله واموات المسلمين سوا غدا لاهل الديره وكان بعد صلاة
يوم الجمعه في اليوم اللي قبله يوم الخميس اخوالي حضرو لوازم الغدا
الذبايح والرز والبهار والبن والجميد خوالي وجدي ورجال العشيره ابلغو اهل الديره بموعد الغدا بعد صلاة يوم الجمعه
في يوم الجمعه بعد الصلاه بدت الرجاجيل تتوافد على حوش بيت خالي حيث انه اوسع مكان ويتسع للربع كلهم صارت الرجاجيل تجلس عل الفراش ظلينا حنا الاولاد عند محارمنا ننقل صواني
الغدا شي منها كبير وشي صغير ونحطه قدام الرجاجيل ويكون الرز واللحم عليه ونصب فوقه الجميد ( اللبن المطبوخ ) كنت احمل ماعون فيه جميد اصب للي وده لبن بزود
اولاد خوالي وخالاتي والربع يساعدوني جدي رحمه الله كان يطوف بين الرجاجيل وقول هناك يبه حط للربع
رز هناك ودي لهم لحم هناك عطهم جميد
الرجاجيل يقولون لجدي : تعال اجلس يا شيخ تغدا .
كان يرد عليهم : ودي اتوكد انها كل الرجاجيل اللي حضرت تغدت وشبعت زين بعدها اتغدا .
خالتي عطت ماعون اللبن لابنها متعب حمل الماعون ومشى تدعثر كنت جالس اتناول من شايبتي ماعون فيه لحم شعرت بشي ساخن ينسكب على راسي وسمعت محارمنا
يقلن : متعب سكب اللبن الساخن على راس حمود
امسكتني خالتي ام فارس بالحال وصارت تسكب على راسي مويه بارده والحمدلله ما كان اللبن ساخن جدا خالتي ام حاتم حفظها الله اخذتني على غرفة اولادها وعطتني شي من هدومهم
لبسته ورجعت للغدا اولاد خوالي كانو يسكبون مويه للربع وشي منهم يصب القهوه للي خلص غداه اللي يخلص الغدا ويشرب القهوه
يقول لجدي : جعله عامر يا شيخ
كان جدي يرد عليهم : هنا وعافيه
بعد ما فرغ الحوش من الرجاجيل توجه جدي وخوالي لمكان حريمنا ومحارمنا سألهم كم باقي من اللحم والرز والجميد كان باقي شيء كثير
قلهم وزعوه على بيوت المحتاجين والايتام صرنا نودي المواعين لبيوت المحتاجين والايتام وكانت الدعوات لجدي وخوالي بالخير وزيادة الرزق وسعة الحال تنطلق من حناجرهم
بعدها تجمعنا كلنا رجال العائله وحريمنا والصغار والكبار جلسنا تغدينا وكانت اثار اللبن ظاهره على راسي .
حريمنا نظفن المواعين ومكان الطبخ وكل من رجال من العائله اخذ عائلته وتوجه لبيته جت شايبتي امسكتني
من يدي وقالت لي : تعال خلك تروش
رحت تروشت ونظفت راسي زين من اللبن المطبوخ
جدي قلي تعال يا حمود : اجلس ودي منك تتعلم حين تصير رجال شلون تتصرف حين يكون عندك معزبين ومعازيم شفت شلون كنت وخوالك بين الرجاجيل لزوم تفقدهم ما تخلي
رجال ينقص عليه شي في الغدا من الرز واللحم واللبن المطبوخ عطيه ولا تبخل قله هنا وعافيه ولا تعبس بوجه احد لزوم تكون مبتسم
العبوس بوجه المعازيم معناها روح لبيتك وما ودك يكون عندك احفظها عني يبه باكر تعرف معناها حين يكون عندك ضيوف ومعازيم
وهاذ اللي صار حين كبرت ورحت للعسكريه ولحقت ملاحيق الرجال في كل غدا للعائله او العشيره نعلم اولادنا مثل ما تعلمنا من ابائنا واجدادنا عطي ولا تبخل الي يقول لك عطني لا ترده
حين تزوجت الحمدلله ما احد شكا انه ما تغدا بدل الصحن اثنين والقهوه ما توقفت والمشروبات الغازيه 12 ذبيحه كانت للغدا و150 كيلو لحم عشا للضيوف من خارج الديره
وقفت مع خوالي نستقبل الضيوف والمعازيم اولاد خوالي واولاد خالاتي وربعي اللي كانو معي في مراحل الدراسه كانو يوزعون الغدا على الضيوف والمعازيم
وسلامتكم يالربع