السلام عليكم
ايها المكشاتيين نعود اليكم بعد انقطاع ومبروك عليكم الحيا والخير والامطار الاسابيع والايام الماضية ، سالفتنا فيه موقف صار لي قبل اكثر من عشر سنوات ومضحك ومخيف بنفس الوقت ، بسم الله نبدا هذا الله يسلمكم كنت مسافر من الرياض الى حفرالباطن وبعد ماتعديت مركز الارطاوية سقى الله الارطاوية ذيك الايام اللحين ماشاءالله متطورة << كمل وانت ساكت 😂 المهم ادركتني صلاة المغرب والشمس غابت وقفت بمحطة بعد الارطاوية ناوي اصلي المغرب لبقت الموتر ونزلت لدورات المياة اعزكم الله للوضوء خشيت طبعا المحطة فاضية مافيها احد كان داخل دورات المياة شايب كبير عمره وقتها فوق ال 60 سنة كان يتوضى وفيه ولد يمكن عمره 27 سنة اتوقع ولده كان ماسك ابوه من ورا يسنده لحنفية الموية عشان يتوضى وانا يوم شفت الموقف قلت بنفسي جزا الله الولد هذا الف خير ماشاءالله عليه بار بالشايب اللي عنده وهنا تبدا القصة بعد مادققت بوجه الولد والله ياجماعة وجه الولد يخوف بشرته مائلة للسواد اسنانه بارزة للامام شكله كان مرعب حقيقة ومن اول ماخشيت دورة المياة اعزكم الله وهو يناظر فيني نظرات قوية وكانه يقول وش عندك ليش جاي هنا والله عينه مانزلها عني انا قاعد اتوضى قلت ماعلي منه بسلامته وانا اتوضى والله ياجماعة الخير اناظر برجول الشايب اعزكم الله والله مافيه رجول الثوب يتحرك ولا فيه رجول ولا شي كيف واقف انا ما ادري والولد مستمر بنظراته لي الوكاد مالكم بالطويلة خلص الشايب وولده الوضوء وانا اقول بنفسي يمكن يا حفراوي متوهم تخبر طريق وسفر وتعب خلصت وضوئي ورحت عشان نصلي جماعة مع الشايب وولده الشايب الامام الوكاد كبّر الشايب الله واكبر كبرنا اناظر برجوله وانا قلبي يرجف مثل رجف المكينة ولا مافيه سيقان والولد يناظر فيني وحنا خاشعين بالصلاة وش يبي الله واعلم وهنا انا تأكدت وايقنت انهم ماهم اوادم اعوذ بالله من الشيطان الرجيم كبر الشايب للركوع تونا بالركوع الاولى واخوكم بالله حفراوي قطع صلاته الله يغفر لي ويسماحني وبغمضة عين طلع من المسجد عاض شليله 😂وماوقفت الا بمحطة البطيحانية وصليت المغرب والعشاء فيها سألت كذا مطوع وشيخ وكان ردهم لي انهم جن مسلم ، وسلامتكم ولاتحرموني من ردودكم الجميلة ، حفراوي 3 .