السلام عليكم ورحمة الله وبركاته
مسيكم بالخير الجميع

اعتذر منكم لعدم متابعتي في المنتدى الفتره الماضيه بسبب وفاة والدتي رحمها الله وادخلها فسيح جناته واموات المسلمين اللهم آمييين ***** اللهم امييين وقد بلغت من العمر 93 سنه
توفيت شايبتي يوم الجمعه الموافق 7/12/2018 الساعه 5:30 الفجر رحمها الله واموات المسلمين

في احد ايام الشتاء البارد مثل هالوفت وكنت حينها اعزب صحتني شايبتي من النوم كانت الساعه تقريبا 6 صباحا سوت لنا شاي شربنا والحمدلله
قالت لي :
يمه الله يرضى عليك شب لنا نار الجو بارد
قلت : ابشري يمه الحين اشب لك نار
قمت جبت المنقل الكبير وحطيته في مكان مظلل وصرت اقطع الحطب والخشب واحطه داخل تنكه مفتوحه من الطرفين وهي فوق المنقل واشعلت الاغصان الصغيره وبدت النار تشب وتقوى
الله يكافينا شرها اللهم آمييين **** اللهم آمييين سرحت بذكريات قديمه حين جدي رحمه الله واموات المسلمين كان يوصيني
قلي :
يا حمود ودي اعطيك وصاه احفظها عني هاذ تفهمها حين تكبر وتصير رجال ان شاء الله حق الضيف واجب وكبير حين يلفيك ضيف تستقبله وتجلسه بصدر المجلس وترحب وتأهل فيه
يا هلا بالضيف يا حيا الله اجلس بصدر المجلس وتصب له القهوه ودوووم تظل مبتسم له حين تحط الغدا للضيف تقله تفضل يا ضيف الرحمن غداك وتحط قدامه قطع اللحم لين يخلص الضيف
من الغدا تصب على يديه المويه ويجلس تصب له القهوه وحين يطلع من عندك تقوله إن شاء الله ما نكون قصرنا بواجبك يا ضيف الرحمن ترى الضيف اسير المعزب وحين يطلع من عندك يصير شاعر

قلت له باستغراب : يعني يصير يقول الشعر ؟
قلي :
لا يا الغالي القصد انه يسولف للناس ويش شاف منك وكيف تصرفت معاه وهو في بيتك لاجل كذا ينقال له شاعر
انتبهت على صوت وقع حبات البرد وهي تضرب على الارض حين خمدت شبة النار وتحول الحطب والخشب لجمر ادخلت المنقل داخل البيت جلست مع شايبتي رحمها الله واموات المسلمين
5 ايام مدة اجازتي بعد مرور سنه وشوي في يوم كنت في حوش البيت انظف حصاني بفرشاه صار يهمهم بصوت خفيف ونصب اذانه وهو يناظر باب الحوش ناظرت خلفي كان في 2 من الرجاجيل ما هم من الديره
كل منهم راكب على فرس حينها تذكرت وصاة جدي شلون استقبل الضيوف
قلت : اهلا وسهلا تفضلو يا ضيوف الرحمن حياكم الله افلحو على المعازيب اهلا وسهلا تفضلو تفضلو حيا الله الضيوف والساعه اللي لفونا بيها
دخلو الرجاجيل الحوش ربطت خيولهم وفتحت لهم باب البيت وادخلتهم وانا ارحب فيهم واجلستهم بصدر البيت حسب وصاة جدي وقدمت لهم القهوه ودقيت على خالي ابو حاتم وابلغته انه عندي ضيوف فحضر عندي ومعاه خوالي في ذاك اليوم شايبتي ما كانت في البيت راحت مشوار مع خالتي فحضرت اختي الاكبر مني وصارت تجهز غدا الضيوف حين جهز الغدا قدمته للضيوف
وخوالي تغدينا والحمدلله وغسلو الربع ايدينهم وقدمت لهم القهوه والشاي وحين همم الرجاجيل انهم يطلعو من البيت
قلت : ان شاء الله انا ما قصرنا معاكم
تبسم رجال وقالي :
يا معزب الرحمن كفيت ووفيت بيض الله وجهك حشمتنا واكرمتنا وهاذ هي سلوم الغانميين
الرجال الثاني قال لخالي ابو اسماعيل
:
الله يطرح لك البركه في ابنك ما قصر ويعرف واجب الضيف لكنه ما هو ابنك من صلبك
قله خالي :
هو ابن اختي ولكنه واحد من اولادي ما افرق بينهم
قال الرجال :
ما شفنا شايبه عسى ما شر يالربع ؟
قال خالي ابو حاتم : شايبه توفي قبل حوالي 22 سنه فكفلناه واخواته وربيناهم مع اولادنا
ترحمو الربع على شايبي واموات المسلمين وقال رجال منهم :
اثمرت تربيكتم في المعزب وهاذ يدل على طيب الاصل والمنبت
امسكت رسان خيلهم حين اعتلو سروجهن
رجال منهم قال : يالربع ما قصرتو بيض الله وجيهكم ننتظركم يوم الخميس القادم حنا نسكن شرق ديرتكم حوالي 12 كيلومتر
قلت لهم : ما تقصرون لكن يالربع يوم الخميس عندي دوام بوظيفتي مدري كم اظل مع ربعي العساكر
قله خالي :
الاجازه القادمه نكون بطرفكم ان شاء الله توكلو على الله وعينو خير
ودعونا الرجاجيل وقصدو طريقهم دخلنا البيت وجلسنا سولفنا شوي وبعدها كل منهم راح لبيته جلست يومين وبعدها توجهت لوظيفتي ظليت في وظيفتي 60 يوم واخذت اجازه ورحت للديره
خلال ذيك الفتره نسيت موضوع وعدنا نروح للربع حسب ما وعدناهم حين وصلت للديره ورحت لبيت خالي ذكرني بوعدنا للربع وهاذ اللي صار توجهنا للربع وتغدينا عندهم
وقامت صداقه قويه ومتينه بينا وبينهم وهي لغاية هاذ اللحظه
وسلامتكم يالربع