السلام عليكم ورحمة الله وبركاته
مسيكم بالخير الجميع
ذات يوم توجهت لمراح حلال صديقنا ابومرزوق مع اخوالي ابو محمد وابو حاتم وابو اسماعيل ورافقنا والد صديق طفولتي ومستودع اسراري حين وصلنا جلسنا مع ابو مرزوق وصارو يسولفون عن الحلال
والمراعي وابار المويه ثم قامو وصارو يتفقدون الشياه والنعاج
خالي قال لابو مرزوق : ليش ما خليت اولادك يسرحون بالحلال وانت رحت للمدينه تجيب علاجات وادويه للحلال ؟
رد عليه ابو مرزوق : مالي نفس اروح المدينه احب اظل مع الحلال .
الربع استأذنو من ابو مرزوق ورجعو للديره ورحت مع خالي مشوار في الطريق تسابقت مع خالي على صهوات خيولنا خالي كان صهوة فرسه رباب ومحدثكم العبد الفقير لله ابو ظاري على صهوة حصاني الاغر
بعد ما خلصنا مشوارنا رجعنا لعند ابو مرزوق وكان وده يورد الحلال على بير المويه سبقته ورحت لعند البير صرت ارفع المويه من البير بالركوه واسكبها في حوض كبير حصاني شرب وارتوى ربطته في ظلال
شجرة خروب رجعت للبير وصرت ارفع لمويه واسكبها في الحوض لين انه امتلى وجلست انتظر لين لفاني خالي وابومرزوق وردنا الحلال وساعدوني في رفع المويه وسكبها في الحوض لين الحلال كله ارتوى
ورجعت مع خالي للديره مسا ذاك اليوم رحنا تطمنا على خالي ابو اسماعيل حيث انه تعرض لحادث تسبب في التواء كاحله ورضوض في قدمه اليسرى والحمدلله جت سليمه
في اليوم الثاني رحت لمراح حلال ابو مرزوق لقيت اولاد ابو مرزوق الثلاثه مرزوق ومهاب ومتعب جلست معاهم وشربنا شاي وقهوه
قلت لمرزوق : انت قصاص اثر متمرس مثل العم ابو مرزوق ؟
ناظرني وقلي : 16 سنه قصاص اثر بالعسكريه والجميع يشهدلي بالكفاءه وتسألني ؟ تعال اوريك
مشينا وقفنا في مكان وقلي : هاذ اثر خالك ابو حاتم وهاذ اثر خالك ابو اسماعيل ابتعدنا مسافه اشر لي وقال هاذ اثر خالك ابو محمد مشينا حوال 4 خطوات قلي هاذ اثر العم ابو حميدي صديق طفولتك
رجعنا لعند شجره قلي هاذ اثر حصانك وهناك اثر فرس خالك ابو حاتم هناك عند الصخره الحمرا اثر فرس العم ابوحميدي
مشينا مسافه حوالي 5 امتار وقفنا قلي مرزوق هاذ اثر فرس خالك ابو اسماعيل
قلت له : يكفي يا ابو خلف اشهد لك انك متمرس
قلي مرزوق : للحين ما خلصنا السالفه تعال معي اركب حصانك وامشي معي
ركبت حصاني وهو مشى قدامي
قلي مرزوق : هاذ اثار حصانك واثر فرس خالك ابو حاتم
كان مرزوق يمشي قدامي ويناظر الاثار على التراب الاحمر وحيث انه كان فصل الصيف ظلت الاثار واضحه على التراب الناعم وصلنا لمكان في حجاره كثيره تخطيناها وتابعنا المشي لين خلصنا
من المنطقه الحجريه ووصلنا منطقه ترابيه في طريق واسع شوي مشينا مسافه وتوقف مرزوق وناظر الارض وتمعن فيها قدم مسافه ورجع
ناظرني مرزوق وقال : هاذ اثر بغل ابو واصف
تابعنا المشي ووصلنا منطقه ترابيه اشرلي مرزوق اظل واقف مكاني ومشى وهو يناظر الارض مشى مسافه حوالي 300 متر اشر اروح عنده رحت
قلي مرزوق : كنت تتسابق مع خالك ابو حاتم فرس خالك ابو حاتم سبوق سبقك
قلت له : ويش الاثر اللي هناك
مرزوق راح لعند الاثر وناظره
قلي مرزوق : يا ابو ظاري هاذ اثار ابو حمدان و فرسه ابو حمدان كان يعدل الحمل اللي على ظهر فرسه .
اشر لي انا نرجع لعند الحلال مشينا مسافه
قلت له : ما تعبت للحين تعال اردفك خلفي يا مرزوق .
قلي : ما عليك مني كذا انا مرتاح .
رجعنا لعند الحلال ورحنا للبير صرنا نرفع المويه بالركوه ونسكبها في الحوض ووردنا الحلال بعد ما شرب الحلال وهجع في ظلال اشجار الخروب جلسنا تغدينا وحمدنا الله ظليت عندهم للعصر ساقو الحلال
وابتعدنا مسافه حوالي 4 كلم عن بير المويه تركنا الحلال يرعى وجلسنا على صخره وكان الحلال تحتنا نناظره
قلي مرزوق : يا ابو ظاري تعلمت مهنة قص الاثر من شايبي وكنت صغير مهنتنا ما فيها مجال للخطأ لانك احتمال انك تظلم انسان تعلمت شلون اميز اثار الرجال والحريم هناك اشياء تكون دقيقه جدا انتم
ما تلاحظونها حنا قصاصين الاثر نلاحظها وهاذ تصير بمرور الزمن والمتابعه والتعليم المستمر نقدر نميزها اجيب لك مثال شلون نميز اثر رجال سمين
الرجال السمين يكون اثارها اعمق من الرجال النحيف او حتى اذا كان اكتع او اعور او حتى فاقد واحده من اذانيه او ان كان يحمل سلاح او لا مهنتنا ناخذها بالوراثه جدي رحمه الله واموات المسلمين
الجيل الرابع من عشيرتنا في قص الاثر
قمنا من المكان ودنا ننزل عند الحلال مشينا مسافه حوال 7 امتار
قلي مرزوق : شايبي موجود حولنا
وحنا ماشيين وقفني مرزوق واشر لي على اثر خطوه ناظرتها
قلي مرزوق : هاذ اثر شايبي قبل حوال ساعتين على اكثر تقدير وقريب منا هناك ما بين الصخره والشجره
ناظرت ما في شيء رحت للمكان اللي حدده مرزوق وكان يبعد عنا حوالي 20 متر حينها شفت ابومرزوق حين اشعل غليونه قربت منه وصافحته
وقلت له : والله ما شفتك الا حين قربت منك
مشى معي لعند اولاده صارو يحبون على يده وهو يسحبها ويقول : الله يرضى عليكم الله يرضى عليكم
مشينا لين وصلنا لعند الحلال ابو مرزوق ناظر الحلال وقال : ماني شايف الطلي سارح ابن النعجه العبسه
قاله مهاب : يبه الطلي سارح هناك خلف الصخره
ناظرني ابو مرزوق وقلي : شايبتك تنشد عنك روح شوفها
ودعت ابو مرزوق واولاده رحت لحصاني ركبته ورجعت للديره خلال الطريق كنت اقول في نفسي سبحان الله العظيم مرزوق عرف اثار ربعي وما كان موجود وهاذ يعني انه يحفظ اثار كثير من اهل الديره
راجعت ابو مرزوق في موضوع قص الاثر
قلي : يا ابن آخي سبق وقلت لك حنا ناخذ هاذ المهنه بالوراثه ونعلمها لاولادنا وهم صغار لاجل يتقنونها
للعلم احفظ اثار كثيره من حريم ورجاجيل الديره اشوف الاثر مره وحده احفظه ان كان غريب
حين اشوفه مره ثانيه اتذكره ابان خدمتي العسكريه حصلت حادثة سرقة اغنام من حوش بيت شخص وصلني استدعاء اروح اشوف ويش اللي صار حين وصلت وناظرت الارض شفت اثار شخصين
واحد كنت شفت اثاره قبل هالمره والاثر الثاني اول مره اشوفها تتبعت الاثار لين اختفت في منطقه سخريه دورت وبحث لين لقيت اثار تتبعتها من جديد لين وصلت الشارع الرئيسي حينها اختفت الاثار تماما
رجت للمركز ومن هناك بالسياره على سوق الحلال رافقني 2 من الشرطه شفت اثا واحد منهم وظليت اناظر ارجول الناس في السوق لين لقيت الرجال كان جالس مع رجاجيل يشربون قهوه
قلت للشرطه : هاذ واحد منهم الشرطه قبضو عليه وسألته عن خويه قلي مدري عنه وين راح والحلال بعناه لرجال ودلنا عليه راحو رجاجيل رجعو الحلال وكان عددها 7 نعجات ودفعو للرجال ثمنهم
السارق الثاني بعد حوالي 4 ايام شفت اثاره تتبعتها لاحظته من بعيد جالس تحت شجره رحت عنده بركاده وحين صرت فوق راسه قام وده ينحاش مديت عليه سلاحي فاستسلم للامر الواقع
اخذته للمركز وفتحو له محضر واعترف انه سرق النعجات ودل على خويه اللي قبضو عليه من قبل وحكمو كل واحد منهم بالسجن مدة 3 سنوات
كم مره طلعت معي مشاوير وحين كنت اقولك هاذ اثر فلان وصارلي سنين طويله ما شفته ويش جابه على ديرتنا ؟
قلت له : صحيح يا عم ابومرزوق اشهد لك ولاولادك انكم قصاصين اثر محترفين .
صديقي ابومرزوق الحين بلغ من العمر حوالي 75 سنه وما زال يتمتع بصحه جيده وترك رعي الحلال لابنه مرزوق واحفاده لكنه بين الفتره والثانيه يروح للحلال
يقولي ما اقدر اغيب عن الحلال هالشي صار في دمي رعيت الحلال من كنت صغير وقص الاثر بعد تذكر حين كنت صغير تطلع خوالك وجدك واكون معاكم تسرح معنا نرعى الحلال
قلت له : ايه على ذيك الايام تعلمت منها الصبر وتحمل التعب والمشقه رغم هاذ كان ايام خير وطيبه
ظليت ارعى الحلال مع اخوالي في اشد اشهر الصيف حراره 3 شهور من بداية شهر حزيران مرورا بشهر تموز لنهاية شهر آب لين صار عمري 13 سنه بعدها شايبتي باعت حلال والدي
لخالي ابو اسماعيل وزاد لها على كل راس ربح دينار وكان مبلغ حوالي 3 الاف دينار وتم ايداعه في حساب في احد البنوك بوصاية خالي ابو حاتم الله يحفظه ويطول بعمره وكان كل فتره يروح للبنك
يودع مبلغ عليه لكن كان شرط خالي ما يدخل على الحساب اي مبلغ من الفوائد والحمدلله حين صرت شاب ولحقت ملاحيق الرجال وخدمت بالعسكريه خالي سحب كامل المبلغ واغلق الحساب
وجمع افراد العائله خوالي وازواج خالاتي وقسم المبلغ بيني وبين اخواتي الثنتين بشهادة الموجودين والحمدلله كان مبلغ طيب تركته بعهدة خالي ومنهم دفعت تكاليف زواجي وساعدني اخوالي وشايبتي رحمها الله واموات المسلمين
وسلامتكم يالربع
رد مع اقتباس
