السلام عليكم ورحمة الله وبركاته
مسيكم بالخير الجميع

في فترة طفولتي حين كنت بعمر 9 سنوات حصلت حادثه بالديره كادت تعصف بالديره كلها ابتدت هاذ الحادثه
في يوم من الايام بعد صلاة العصر كنت جالس في البيت واختي الكبيره تراجع لي واجبي المدرسي البيتي بعد ما اختي خلصت لي مراجعه طلعت من الغرفه على حوش البيت لقيت جدتي وشايبتي رحمهم الله
واموات المسلمين كانو يجمعون حزم الحطب ويحطوه على طرف حديقة البيت ساعدتهم لين جمعنا حزم الحطب وخلصنا حينها سمعنا اصوات رجاجيل وشباب تتراكض
قالت جدتي : عسى ما شر الرجاجيل والشباب تتراكض الله يستر
طلعت اشوف ويش السالفه شفت صديق طفولتي ( زوج اختي بالرضاعه )
سألته : ويش السالفه يا حميدي ويش فيه ؟
قلي حميدي : مدري وانا اخوك مدري ويش فيه
فجأه سمعنا دوي صوت الرصاص في الديره كانت رشقات سريعه ومتلاحقه جت شايبتي رحمها الله واموات المسلمين امسكتني من يدي وامسكت صديقي حميدي من يده واخذتنا لداخل البيت
قلت لها : ودي اشوف ويش يصير في الديره
قالت لي : يمه هاذ صوت ضرب رصاص ما تسمعه
وحشرتني في البيت ومعي صديق طفولتي خليتها تلتهي مع جدتي وطلعت مع صديقي بدون ما تحس فينا رحنا نشوف ويش السالفه وكانت اصوات الرصاص تتردد في كل انحاء الديره امسكنا خالي ابو اسماعيل
ورجعنا للبيت شايبتي رحمها الله واموات المسلمين ما طاب لها طلعتي من البيت مع خويي حميدي فقامت ودها تطقني انحشت من وجهها مع خويي هو راح لبيته محدثكم العبد الفقير لله راح عند الحمى
الحامي والحصن المنيع عمتي ام صالح رحمها الله واموات المسلمين ظليت عندها لثاني يوم الصبح نرجع لموضوع اطلاق الرصاص
بدت شيبان الديره بمساعي حميده وطيبه لانهاء هالاشكال والحمدلله شيوخ الديره وشيبانها طوقو الحادث وتوقف اطلاق الرصاص جدي رحمه الله كان براة الديره حين وصل وعرف باللي صار ارسل لكل
اطراف المشكله وابلغهم انها المشكله هاذ لزوم يحلونها وكان الموعد للجلسه مساء يوم خميس
مسا ذاك اليوم الخميس تجمعت الشيبان في بيت جدي رحمه الله واموات المسلمين جلست خلف الرجاجيل قريب من جدي
فقال لهم : ويش هاذ يالربع تطلقون النار على بعضكم وانتم اولاد عمومه واولاد خوال لاجل شي بسيط امر هين تخلوه يصير كبير بفعلكم انتم الرجاجيل مو الصبيان الصغار توصل المواصيل فيكم تطلقون النار
على بعضكم وترعبون اهل الديره ودكم تساوونها مثل حرب البسوس يا حيف عليكم يا حيف عالرجاجيل حين توصل فيها المواصيل وتطلق النار على بعضها لاجل موضوع ما يستاهل
اولاد صغار يعلبون وضربو بعض بعد شوي تلاقوهم ينادون على بعض لاجل يلعبون ما توقعتها منكم لا والله
قام شايب قال : يا شيخ ذيب والله ما دفعني اضرب الرصاص الا بعد ما ظل عندي اي حل ثاني والله ما همني امر الاولاد الصغار لكن الهم انه ولد عمي وده ياخذ من ارضي 100 متر زور وبهتان
رد عليه ابن عمه : شايبي طول عمره يقولي ذوول 100 متر لنا مو لاخوي واولاده
وتناقرو الربع في بيت جدي صارخ عليهم جدي : ويش هاذ انتم في بيتي ما ودي اسمع مناقره وصراخ و كل عقده ولها حلال كلنا نعرف انها 100 متر دوم والدك وعمك يتنازعو عليها ولاجل كذا
الحل الوحيد نقسمها بينك وبين اولاد عمك رغم انه هالحل عرضناه على شايبك الله يرحمه الا انه رفض ودنا نحل هالاشكال اليوم قبل باكر سمعت ؟
قال الرجال : زين نقسمها بيني وبين ابن عمي كل واحد له 50 متر ونكتب بهاذ الموضوع صك
ابن العم قال : ما عندي اعتراض نقسم ونكتب صك ويوقعون عليه شهود من الربع
جدي قال : توكلنا على الله ونعم بالله يظل موضوع الاولاد الصغار ناظرني جدي وناداني
قلت : نعم يا جدي
قام همس باذني وقلي : روح شوف من الاولاد اللي يلعبون جنب بيت خالك ابو حاتم ؟
قمت طلعت من البيت بسرعه رحت ناظرت شفت اولادهم الصغار يلعبون جنب بيت خالي رجعت بسرعه للبيت دخلت الغرفه وطرحت السلام على الموجودين ورحت همست باذن جدي
قلت يا جدي : اولاد العم يلعبون مع بعض بالكوره جنب بيت خالي
ورحت جلست مكاني جدي صار يهز راسه
واحد من الرجاجيل قال : ويش فيه يا شيخ ذيب ؟
جدي قال : ارسلت حمود يشوف من اللي يلعب جنب بيت ابني ابو حاتم تعرفون هناك ؟
قالو الرجاجيل : لا ما نعرف من هناك ؟
قال جدي : اولادكم يلعبون مع بعض جاكم كلامي كنت متوكد من هالشي اتركو الاولاد الصغار يتصرفون مع بعضهم لا تتدخلون بينهم هاذ حمود اللي تشوفوه يلعب مع اولاد خالاته واولاد خواله كم مره
ضرب اولاد خواله واولاد خالاته وهم كم مره ضربوه ما تدخلنا لانهم ذول اولاد صغار يتفاهمون مع بعض اذا الكبار تدخلو تصير المشاكل واللي صار يوم الاثنين الماضي اكبر دليل
لا تتدخلو بين الصغار لانه هاذ باكر يسوي بينهم ضغينه وحقد وكره ومشاكل قبل 4 سنوات حمود ضرب ولد خالته اخوه بالرضاعه وجرحه في راسه تركناهم ثاني يوم كانو يلعبون مع بعض
رجال قال : يالربع والله اولادي واولاد اخوتي يلعبون مع بعض يتزاعلون ما تمضي ساعه تلاقوهم يلعبون مع بعض
قال جدي : يلا قومو يا رجال تصافحو وتعذرو لبعض وحبو على رووس بعض تسامحو من قلب ونيه صافيه
قامو الرجاجيل تصافحو وحبو على رووس بعضهم وتسامحو وتصالحو محدثكم العبد الفقير لله ابو ظاري جالس يناظر الربع حين جلست الرجاجيل ناظرني جدي قمت من مكاني وامسكت دلة القهوه
والفناجيل وصرت اصب للرجاجيل وهم يشربون الفنجال ويهزوه ويقولون قهوه دايمه
واحد من الرجاجيل قال : ما خبرناك يا شيخ انك بخيل
ضحك جدي وقال : ابشر ولا يهونو الربع باكر غداكم عندي في البيت
شايب من الربع سولف لهم سالفه طويله لكني ما حفظتها خالي ابو حاتم كتب صك وقراه للربع بقسمة 100 متر بين اولاد العمومه ووقعو بعضهم وفي منهم حط بصمته على الصك بعد ما طلعو الرجاجيل
من البيت رحت مع خالي ابو اسماعيل لبيته جبنا 2 من الطليان السمينات خليناها في حوش البيت صباح يوم الجمعه بعد صلاة الفجر قام جدي ذبح الطليان وسلخها وقطعها محدثكم ابوظاري كان يساعد بنقل
اللحم المقطع للمطبخ وجمع الحطب ونقل قدور الطبخ على حوش البيت حين طلع النهار ارسلني جدي ناديت خالاتي وزوجة خالي ابو حاتم لاجل يساعدون شايبتي وجدتي وخواتي في الطبخ
بعد صلاة يوم الجمعه قال لهم جدي : يالربع ترى الغدا اليوم عندي في بيتي
توجهنا للبيت وجلست الرجاجيل وبدينا ننقل الصواني عليها الرز واللحم واللبن المطبوخ ( الجميد ) تطلع مجموعه من الرجاجيل ونصب لهم الفنجال تشرب وتهز الفنجال وتقول : ليته عامر
تدخل مجموعه ثانيه ونفس الشي لين ما ظل احد الا تغدا
والحمدلله الزاد ظل منه ارسلناه لخالاتي واخوالي والجيران رحم الله ذاك الزمان الجميل
لغاية اليوم الجرح في راس ابن خالتي واضح وهو اخوي بالرضاعه هاذ الحادثه اسردها لكم السالفه القادمه بحول الله
وسلامتكم يالربع