السلام عليكم ورحمة الله وبركاته
صبحكم الله بالخير الجميع

ذات يوم لفاني على بيتي الخال ابو حاتم وبعض شيبان العشيره والديره اجلستهم في مجلس الرجال مفروش فرش عربي وصبيت لهم الفنجال وقلت لام عيالي تسوي شاي للربع وحنا جالسين نسولف
دخل علينا اولادي سطام ومحمد اللهم صلي على سيدنا محمد حين شافو خالي اندفعو عليه يعانقوه ويحبو على ايدينه فحظنهم
وهو يقول : هلا بغاليين اولاد الغالي هلا ورحب
قام ابني سطام يمسك عقال خالي ويرفعه عن راسه قمت بالحال اخذت العقال منه ودي اردجعه على راس خالي
قلي خالي : خله يبه ياخذ العقال
رديت عليه : يبه ما ودي يتعلم هالشي مايصير اخاف باكر يسويها قدام ناس من براة الديره يقولون اولادنا ما يحترمون شيوخنا وكبارنا وشيابنا
قلي خالي : يبه وانت كنت صغير كنت تاخذ عقالي وتحطه على راسك
رديت عليه : صحيح يبه لكن ما كنت اقيم العقال عن راسك ما ودي سطام يظن هالامر شي عادي هاذ اول مره يسويها وحلفت يمين الا ارجع العقال على راس خالي وهاذ اللي صار
استأذنت من الربع ورحت على غرفتي جبت شماغ وعقال وحطيتهم على راس ابني سطام
قال سطام : صرت رجال الرجال يلبس شماغ وعقال
ابني محمد جلس بحجر خالي وجلس جنبه سطام وكل منهم اركى راسه على ساعد من سواعد خالي وهو يحظنهم ويحب على رووسهم
قله شايب من الشيبان : يا ابو حاتم انت صاحب قلب حنونن عطوف رهيف لولا هالعطف والحنان عيال حمود ما يحبوك بهالشكل
قال خالي : الحمدلله اني لي قلب حنونن وعطوف حمود وهو صغير كان ما يحب يجلس الا بحجري حين تجتمع العائله عندي في بيتي
في يوم تجمع رجاجيل العائله وحريمها في بيت خالي سوا لنا خالي عشا حيث اني كنت ترقيت لرتبة وكيل ( شرطه على الكتف ) وكانت بنتي الكبيره بسن حوالي 6 سنوات حين جلسنا على العشا لاحظت بنتي
ما ودها تاكل كانت تناظرني وتحرك حواجبها لفوق وتحت
قلت لها : يا مطراق الرمان ودي اقوم لك اوريك
انحاشت عند خالي ابو حاتم جت بينه وبين شايبتي رحمها الله واموات المسلمين تقوم بنتي تمسك يد خالي ترفعها وتلفها على نفسها
قلها خالي : وصلتي وصلتي يا عصفوره ابوك ما يوصلك خلنا نتعشى يلا وين صحنك ؟
جلست بنتي بين خالي وزوجته وظلت تحرك حواجبها وتعطيني اشاره باصبعها انها عند خالي ما اقدر اسوي لها شي
قالت لها خالتي ( ام بالرضاعه ) : خلص بعدين معاك ترى اقوم لك وتشوفي مني شي ما يسرك فهمتي ؟
وقامت خالتي جابت صحن وحطت لها رز وقطعة لحم وحطتها قدامها واشرت لها انها تاكل قامت ام عيالي راحت عندها واخذتها من يدها واجلستها جنبها وقالت لها : كلي الحين
بعد ما خلصنا العشا وحمدنا الله على نعمته وفضله محارمنا نظفن الغرفه اللي تعشينا فيها جلسنا في غرفه ثانيه جت اختي بالرضاعه جلست جنبي
قلها اخوها : اجلسي هناك جنب ابو عيالك
قالت له : والمفروض انك تجلس جنب ام عيالك مثل ماهو اخوك هاذ اخوي
ناظرهم خالي وقال : ويش فيكم كلكم اخوه حمود اخوك واخوها ما فيها شي حنا الحين بجلسه عائليه حتى لو انها بنتي جلست جنبك او جنب حمود هاذ اخوها وهي اختك
صار خالي يسولف مع خوالي والرجاجيل وقال امس لفاني ابن التاجر ابو اسعد وطلب مني زيت وزيتون مكبوس وطليان وجبنه سجلتهم على ورقه مد يده على جيب ثوبه واطلع محفظته وفتحها
راحت عنده بنتي ناظرت المحفظه حين طال الورقه طلع معها ورقه نقديه من فئة 20 دينار ناظرتها بنتي باستغراب
قلها خالي : خذيها حلال زلال عليك والله ما ترجع
قلت له : يبه خيرك سابق اصرفت علي لين صرت رجال ما في يوم قصرت وحاشاك من القصور ودوم يدك ممدوده للربع كلهم ودوووم وجهك ابيض إن شاء الله
قلي : يبه هاذ واجبي اني صرفتك عليك لانك ابني اللي ما هو من صلبي وابن اختي انت ما اخلي اختي تربيك لحالها انت وخواتك الثنتين ربيناكم مع اولادنا وانتم اولادنا وبناتنا
بنتي اخذت القطعه النقديه وجت وقفت قدامي وقالت لي : باكر لا تقلي عطيني مصروف زين هاذ لي من جدو حاتم
قلت : زين زين ما يخالف ما اقولك عطيني مصروف
خالتي قالت : تعالي يا مطراق الرمان ومدت يدها على جيب ثوبها اطلعت محفظه صغيره فتحتها واطلعت منها قطعه نقديه وقالت لها هاذ بعد لك يلا عطيهم لامك تحفظهم لك بلاش تضيعيهم
خالي قلي : يبه باكر ان شاء الله ودي منك انت واخوانك حاتم وعبدالمحسن وسلمان تروحون على مخزن الزيت تعبون 20 جالون زيت توزنوهم على الميزان كل جالون 18 لتر تزيدون في كل جالون شوي
وتحطون 10 تنكات زيتون مكبوس وتشوفون كم قصعة جبنه في المخزن
قلت : إن شاء الله
قضينا باقي ذيك الليله واولادنا ما تركو خالي شي يحظنه وشي يتعلق فيه ويتزاحمون للجلوس في حجره وحنا نحاول نبعدهم لاجل خالي يرتاح يقولنا : اتركوهم ذول نعمه وفضل من الله لزوم تلاعبونهم الحين
في هاذ السن اذا ما لاعبوتهم الحين تلاعبونهم حين يصيرون بسن الشباب ؟
صباح اليوم التالي رحت مع اخواني جهزنا جالونات الزيت وتنكات الزيتون وعديت قصعات الجبنه كان عددهم 8 قصعات اخذناهم لبيت خالي تتسع كل قصعه 5 كلجم جبن حريمنا صرن يعطونا الجبن وحنا
نحطه داخل القصعات ونوزن القصعه على الميزان الالكتروني لين خلصنا وبعدها رحنا على مزرعة خالي ابو اسماعيل حطينا 30 طلي في حوطه وحطينا عليهم علامات باللون الاخضر
حين جا ابن التاجر ابو اسعد دخل الحوطه وتفقد الطليان وتفحصهم صار يهز راسه
قال : يا ابو حاتم كافي ووافي ما رحت لاي شخص وطلبت منه طليان لاني كلي ثقه انك تعطيني بضاعه نظيفه والله ما تظل عندنا اكثر من يومين ما شاء الله
كان مع ابن التاجر شاحنه اطلعنا الطليان داخلها وجاونات الزيت وتنكات الزيتون وقصعات الجبنه رحنا لبيت خالي ابو حاتم تغدينا مع ابن التاجر ابو اسعد وشربنا القهوه ابن التاجر ابو اسعد
عطى خالي 3 شيكات ثمن البضاعه واخذها وتوجه فيها للمدينه
لغاية اليوم ما في يوم يمر خاصه اذا تكون عطله اولادي تلاقيهم عند احفاد خالي ابو حاتم امس رحت لبيت خالي سمعت ضحاك وصراخ اذا اولادي واحفاد خالي متحلقين حوله وفالينها مبسوطين باللعب مع خالي
الحين بنتي الكبيره ما شاء الله سنه اولى في الجامعه ظاري السنه القادمه بحول الله تعالى توجيهي بنتي الثانيه في الصف السادس سطام في الصف الثالث ومحمد في الصف الاول
حفظ الله لكم اولادكم واحفادكم
وسلامتكم يالربع