السلام عليكم ورحمة الله وبركاته
مساكم الله بالخير الجميع


عندنا في الديره شخص خبيل في يوم من الايام كنت جنب البيت جالس تحت شجره معمره ومعي مجموعه من شباب جيراني واخواني من الرضاعه ( اولاد خالتي ) نشرب القهوه مر عن هالشخص الخبيل توقف
ناظرنا وقال : يا ابو ظاري اربط حصانك العنيف زين امس خرب القمح اللي زرعناه جنب البيت
ابن جاري ابو طالب دقني بمرفقه بمعنى لا تهتم لكلام هالخبيل
قلت : حصاني مربوط بحوش البيت وكاد اختلط عليك الامر .
الخبيل هز راسه وكمل طريقه اخوي بالرضاعه قالي : يا خوي لا تهتم لكلام هالخبيل
قلت : توكلو على الله ونعم بالله
بعد يومين كنت جنب البيت مع صديق لي نتفقد مهره عربيه اصليه فصيلتها عبيه اشتراها من شخص بمبلغ حوالي 5000 دينار مر علينا هالخبيل توقف وصار يصفر ورمى علينا حصاه جت الحصاه في كتفي
ناظرته مسحت وجهي بالرحمن وتعوذت من الشيطان الرجيم عذ بالله من الشيطان الرجيم حطيت عالجرح ملح وسكت
قلي الخبيل : يابو ظاري مو كل من ركب الخيل خيال احذر ترميك عن ظهرها
همس لي صديقي : خلك منه ولا تهتم لكلامه انت والجميع نعرفه خبيل ما ينلام
قلته : زين يا ابن الناس توكل على الله وفارقنا
هالخبيل كمل طريقه هزيت راسي وقلت لصديقي : مدري يا خوي من امس هالخبيل ما منه فكاك كل ما يشوفني يستفزني الله يستر من تاليها
سحبنا المهره وربطتها تحت شجره ودخلنا البيت جلسنا في مجلس الرجال وطلبت من ام العيال تسوي قهوه شربنا القهوه وحمدنا الله صديقي استأذن مني واخذ المهره وراح لبيته عصر ذاك اليوم رحت على بيت
خالي ابو حاتم لقيت عنده خوالي وصديقي ابو مرزوق ومجموعه من شيبان العشيره والديره طرحت السلام على الربع الربع ردو السلام وجلست جنب صديقي ابو مرزوق
قلي خالي : بوجهك كلام يبه ويش فيه
رديت عليه : يبه ولا يهونو الربع هاذ الخبيل صارله يومين يرمي كلام ما ودي توصل لمرحله اني الزمه حده بطريقه صعبه ما هو لقوه لي يبه
قالي خالي : يبه هاذ خبيل لاتهتم كلامه يقول الله عزوجل في محكم تنزيله بسم الله الرحمن الرحيم
( خذ العفو وأمر بالعرف وأعرض عن الجاهلين ) صدق الله العظيم
الربع ايدو خالي بكلامه سولفنا بمواضيع كثيره لين صار آذان المغرب توجهنا للمسجد صلينا المغرب جماعه حين طعلنا من المسجد كل منهم توجه لبيته ظليت مع خالي وصديقنا ابو مرزوق رجعنا لبيت خالي
لقيت ام العيال والاولاد في بيت خالي جلسنا واهل البيت جهزو العشا تعشينا وحمدنا الله على نعمته وفضله قضينا ليلتنا في بيت خالي حين طلع النهار توجهت للمزرعه ظليت في المزرعه لغاية الساعه 5 بعد
العصر رجعت للبيت حين قربت من البيت شفت الخبيل يلاسن ابني سطام والخبيل يصفع سطام على وجهه سطام الله يحفظه كان في ذيك الفتره عمره 7 سنوات
حين شفت الخبيل يصفع سطام فقدت اعصابي رحت له وبدون كلام صفعته صفعه تهيأ لي كل الديره سمعت صوتها وتعاركنا الجيران فزعو على صوتنا في الشارع كنت امسك الخبيل من يده بحركة كراتيه
وهو يصارخ والدم ينزل من فمه وخشومه الربع ابعدونا عن بعض واحد من الجيران اخذ الخبيل لاهله وباقي الربع ادخلوني للبيت كنت في حالة غضب اجلسوني في مجلس الرجال وهم يكلموني ويطلبو من اتهدا وصل الخبر لخالي جا خالي لبيتي وتكلم معي
قلت : يبه امس قلت لكم ما ودي توصل لمرحله اني الزمه حده بطريقه صعبه ما هو لقوه لي يبه لكن ما باليد حيله هاذ الخبيل اطلعني عن طوري ليه يمد يده على سطام ؟
خلال الكلام سمعنا جرس البيت يدق اخوي بالرضاعه راح فتح الباب كان صديقي ابو مرزوق ادخله اخوي على مجلس الرجال جلس ابو مرزوق
قال ابو مرزوق : يا ابو حاتم اهل الولد الخبيل تجمعو ارسلت لهم اخوي ابو عقاب لاجل يردهم
خالي قال : ويش ودهم الحين يعني ولدهم فالت بالديره مثل الحصان الشموص ( العنيف ) الخبيل يصفع سطام الصغير ما ظل عند حمود صبر ما احد يتحمل يشوف ابنه ينصفع ويظل ساكت
وانتهت ذيك الليله على خير حين طلع النهارتوكلت على الله تجهزت وتوجهت للمزرعه مع وقت الظهر انهيت شغلي ورجعت للبيت تريحت فتره ودخلت تروشت حين طلعت كانت صلاة الظهر انتهت
صليت الظهر في البيت وخلدت للنوم بعد العصر طلعت للشارع اذا الخبيل في الشارع ومعه 2 من ربعه هاجموني 2 امسكوني لاجل الخبيل يصفعني على وجهي دفعت الخبيل برجلي اليمين بصدره فوقع
على ظهره تفلت من الاثنين اللي امسكوني واحد منهم ضربته بمرفقي على وجهه والثاني جته ضربه بخاصرته اذا اولاد جيراني واخواني من الرضاعه يفزعو بينا بيت خالتي بعيد عن بيتي حوالي 100 متر
الخبيل انجرح براسه حيث انه حين وقع على ظهره راسه ضرب بالاسفلت
الربع ابعدونا عن بعض اولاد جيراني اخذو الخبيل وربعه لاهلهم واخواني بالرضاعه 3 من اولاد جيراني ادخلوني البيت وصل الخبر لخالي ابو حاتم شيخ العشيره لفاني على بيتي وتكلم معي
وشرحت له السالفه بعد حوالي ساعه لفانا صديقي ابو مرزوق ادخلته البيت حين جلس
قلي : قلت لربع الولد الخبيل : اسمعو ترى حمود واهل بيته واخواله وعيالهم بوجهي واحذركم من تقطيع الوجه.
رد عليه واحد منهم : ودك تحمي حمود منا ؟
ابو مرزوق قله : وانت الصادق احميكم من حمود وخواله وعيالهم تظنون خوال حمود يتركوه لكم
انتم ما عرفتوهم ترى والله يحرقون الاخضر قبل اليابس في الديره
اذا حاولتو تمسون حمود اولاد خواله واولاد خالاته 30 رجال ناهيكم عن باقي شباب العشيره ودكم تسوونها سالفه ما حصلت من قبل امسحوا وجوهكم بالرحمن وارجعوا لبيوتكم
ومثل ما سمعتو حمود وعياله وخواله وعيالهم بوجهي لكم عنده حق تاخذوه بالسوادي عندنا سلوم نمشي عليها ملقانا اليوم بعد صلاة المغرب في بيتي
قلت لابو مرزوق : يا صديقي قول لاهل الخبيل يحفظو ولدهم لا يخلوه في الديره على كيفه لا يخلوه يناطح الرجوم
قلي ابو مرزوق : عين خير يا بن آخي
بعد صلاة مغرب ذاك اليوم توجهت مع خوالي ومجموعه من شيبان العشيره لبيت صديقنا ابو مرزوق ولفى علينا شايب وعمام الخبيل وبعض شيوخ وشيبان عشيرتهم كبير عشيرة الخبيل
قال : يالربع اذكروا الله وصلوا عالنبي لا إله الا االله اللهم صلي على سيدنا محمد
اللي حصل في اليومين الماضيات ما كان لزوم يصير لكن قدر الله وما شاء فعل ما ودنا يصير مرت ن ثانيه يا ابو سالم لزوم تضبط ابنك ولا تخليه على هواه في الديره وانت يا حمود عهدناك رجال تضبط
نفسك وافعالك وتصرفاتك ودنا نحل هالاشكال لاجل ما يتطور الحين ويش ودك يا ابو سالم ؟
قال ابو سالم : ودي حمود يتعذر لي ولولدي ودي بياض وجهه
رد ابو مرزوق عليه وقال : ما في داعي لبياض الوجه لانه ما صار شي يشينه بياضه محفوظ ومصيون اعتذار لك موافقين عليه لكن اعتذار لولدك لا لانه هو اللي ابتدا بالمشكله استفز حمود مرتين
قدام بيته وبين رجاجيل شهود وبعدها ولدك صفع ابن حمود الصغير وفوق هاذ 2 من ربعك يروحون معاه لاجل يثبتون حمود لاجل ابنك يصفع حمود لو صار هالشي توكد انها صارت مشكله عصفت بالديره
وحرقت الاخضر قبل اليابس
حمود قوم وتعذر لابو سالم وحب على راسه و تدفع له 1000 دينار
خالي قال : زين يا ابو مرزوق حنا موافقين قم يا حمود تعذر لابو سالم وحب على راسه
محدثكم العبد الفقير لله قام وتعذر لابو سالم وحب على راسه والدراهم استلمها ابو سالم قبل لا نطلع من بيت ابو مرزوق
كبير شيوخ عشيرة الشايب قال يا ابو سالم : اضبط ابنك لا تخليه يظل يطارد في الديره مثل الحصان الشموص ( العنيف ) تحرص عليه وديه المستشفى لاجل يتعالج ما ودنا يوقعنا بمشكله ثانيه
وتصالحنا في بيت ابو مرزوق وكل منا راح لبيته ثاني يوم ما كان عندي شغل في المزرعه رحت ازور خالتي
( امي بالرضاعه ) كنت جالس مع خالتي واولادها وزوجها نسولف لفى علينا زوج بنت خالتي
( اختي بالرضاعه ) ومعاه زوجته طرحو السلام علينا وتحية الصباح وجلسو معنا ردينا السلام وتحية الصباح عليهم
قلي زوج اختي : مر عني الخبيل قبل شوي يقولي لولا الرجاجيل فزعت بيني وبين خالك عيالك كنت فنعته من الضرب وخليت الجميع يتفرج
رد عليه زوج اختي : واضح واضح حيث الدم كانت ينزل من فمك وخشومك انصحك نصيحه لوجه الله تعالى لا تستفز خال عيالي وخلك بعيد عنه
مر حوالي 4 شهور وقام الخبيل سوى مشكله مع واحد من اهل الديره وانتهت بشخص نام في المستشفى 4 ايام والد الخبيل تعذر للربع واضطر انه يحشر ابنه في البيت فتره طويله
امس بعد العصر كنت جالس مع الرجاجيل جنب بيتي مر عنا الخبيل ناظرنا وهز راسه وتابع طريقه
قلت : الحمدلله مضت على خير وحنا مقبلين على عيد الاضحى المبارك
وسلامتكم يالربع