السلام عليكم ورحمة الله وبركاته
هذا اول موضوع لي في المنتدى حبيت الكل يستفيد منه
اول شي احكي لكم القصة بأختصار
بدأت لمبة الدبل الخضراء في الطبلون ما عاد تولع وباقي اللمبات العادية منها لمبة الدفلوك وو تولع
سألت ناس وشباب طيبين شرواكم عن اللمبه وليش ما تولع كثير اجتهدوا وقالوا يمكن حساس الدبل
وعادي لا تهتم طالما الدبل يشتغل معاك طبعا ما كنت ادري ان الدبل يشتغل اول لا خصوصا اني اذا
عشقت الدبل على الثقيل احس ان الموتر يفز او ينهض قلت عادي ما تهم اللمبه بعدين اشوف له حل..
مالكم بالطويلة رحت للبر مشخص بموتري اول ما دخلت الرمل غرز عشقت الدبل عيا يطلع الموتر
الكفرات الخلفيه تدور لكن الامامية ما تدور عرفت ان الدبل ما يشتغل نسمت له واااااااجد ويالله طلع بعد ما رجعت
رحت للصناعية عند واحد متخصص دفرنسات ودبل فحص الموتر قال الدبل ما يشتغل قلت طيب والحل ..؟
قال عندك دينمو الدبل خربان وهذا عيب مصنعي
اذا بتصلحه عندي شغل يد250 ريال والدينمو قيمته حدود 800ريال
وانا راح افك الدينمو اللي عندك وممكن اني اصلحه اذا الخراب في الدينمو الداخلي
اما اذا كانت التروس البلاستيكية متكسره و خربانه يبيلك واحد جديد
قلت فكه
المهم بعد ما فكه من السيارة مدري وش طلع فيه هل هي التروس او الدينمو الداخلي
قالي عندي دينمو دبل كامل انا مصلحه بعطيك اياه مع شغل اليد كامل 500 ريال
او اعطيك واحد جديد وكاله مع شغل اليد واخذ حقك ب750 قلت خذه
المهم ركب دينمو الدبل الوكاله واخذ حقي القديم وشيكت عليه تمام
اللهم لك الحمد والشكر حاسبته 750ريال وتوكلت على الله
طبعا الورشة اسمها ورشة العتيبي في الصناعية القديمة (صناعية طريق الخرج)
للمعلومية الشغله بسيييييييييطة جدا والله لو عارفها كان سويتها بيدي
اول شي تفك الصاجة اللي تحت الدبل بتبين عندك القطعه مباشرة
طبعا القطعه حجم كف اليد لها اربع مسامير متعلقه في جانب الدبل
لها فيش كهرب وبس والله حرام ياخذون عليها 250 ريال
شغل يد لكن اللي يجهل الشي ما يعرف يثمنها وعشان كذا
طرح لكم الموضوع تستفيدون منه وتدعون لي بظهر الغيب
وهذي الصور
هذا الموتر مرفوع على الرافعه
وهذي القطعه غير واضحه قبل الفك
بعد فك الدينمو نزل زيت الدبل
وهذي هي القطعه على الارض
وهذي هي القطعه باينه نظيفه بعد التركيب
اذا خلصنا نشبك فيش الكهرب ونعبي زيت الدبل ونقفل الصره ونركب الصاجه ونتوكل على الله
طبعا الحمد لله رجعت اللمبه الخضراء ولعت وبدأ يعشق الدبل تمام باقي نجربه بالنفود
ودعواتكم