السلام عليكم ورحمة الله وبركاته
مساكم الله بالخير الجميع
احد ابناء ديرتي يربي اغنام شياه ونعاج حوالي 50 راس يعتاش من انتاجهم من الحليب والطليان في صباح يوم من الايام افتقد هالرجال اذا حلاله ناقص 10 رووس 7 نعجات و3 شياه الرجال شاف اثار
ارجول جنب حظيرة الحلال ارسل لصديقي ابو مرزوق جا ابو مرزوق وناظر الاثار وتتبعها لين وصلت للاسفلت واختفت الاثار راعي الحلال راح لمركز الشرطه وقدم شكوى بسرقة الاغنام
ومرت الايام والاسابيع ولا اثر للاغنام المسروقه
بعد حادثة السرقه بحوالي 3 ايام وحنا في مجلس خالي كانو الربع يسولفون بهاذ الموضوع
قال ابو مرزوق : يالربع تتبعت الاثار لين وصلت شارع الاسفلت وهناك لاحظت اثار اطارات سياره السارق حط النعاج والشياه بالسياره ومشى فيهم الوكاد انه راح باعهم لا بد يلفي يوم واقبضه لاني حفظت اثره
راعي الحلال كان يروح اسواق الحلال ويناظر الحلال اللي يكون هناك وبدون فائده في يوم طلعت مع خالي ابو حاتم وابو مرزوق على طرف الديره لمراح حلال ابو مرزوق وصلنا منطقه ترابيه
كانت اثار ارجول شخص واضحه على التراب ناظرها ابو مرزوق
وقال : هاذ اثار سارق الحلال مساء امس قريب وقت المغرب
وصلنا حلال ابومرزوق كان هناك مرزوق واخوه مهاب واولادهم طرحنا السلام عليهم وردوه
قلهم ابو مرزوق : يبه ما لاحظتو شي امس في الليل
جاوب مرزوق : لا يبه كل شي كان طبيعي
وحنا واقفين نتكلم حصاني اليحموم صار يهمهم ويصهل بصوت خافت وكان مسلط نظره على مكان ناظرت شفت رجال يركب فرس كان بعيد عنا حوالي 1 كيلومتر
قلت ابو مرزوق : ناظر على يمينك من هالرجال اللي هناك ؟
قال ابو مرزوق : يا ولدي هاذ الرجال صارله هناك حوالي 5 دقايق حصانك يهمهم ويصهل لانه يشم ريحتها هاذ الرجال احتمال يكون السارق
ركبت حصاني وتوجهت صوبه قام انطلق بركوبته بسرعه رحت لمكان الرجال الغريب ناظرت حولي ما في اثر له رجعت لربعي
قلت : انحاش الرجال مدري وين راح الوكاد انه راح عند شجر البلوط والعليق هناك في اكثر من مكان يقدر يخفي نفسه فيه
ابو مرزوق قال : يبه تحرصو على الحلال من باب الاحتياط الحذر واجب الرجال هاللي شفناه وراه سالفه
جلسنا معهم فتره خالي وابومرزوق رجعو للديره محدثكم العبد الفقير لله ابو ظاري ظل عند اولاد ابو مرزوق في ذيك الفتره كنت اعزب فاضي اشغال قريب وقت المغرب رجعنا بالحلال صوب حظيرة الحلال
ادخلنا الحلال داخل الحظيره وغلقنا الباب جلسنا توضينا وصبرنا على ساعتي مضى على اذان المغرب 5 دقايق صلينا المغرب جماعه وجلسنا اذا ابو مرزوق راجع عندنا جاب معاه زواده لنا الجميع
وقال : خلنا على حذر يبه الليل ابو ساتر
حطيت راسي على الوساده ناظرة ساعة يدي كانت الساعه 10.35 قريت وردي واغمضت عيوني حين صحيت سمعت صوت صهيل حصاني كان بعيد عنا حوالي 6 امتار كان صهيل خفيف حين هميت
ارفع نفسي عن الفراش ابو مرزوق حط يده على صدري ناظرته اشر لي بيده اظل على وضعي
همس لي : يا ابن آخي تراني صاحي من زمان خلك جاهز
هزيت راسي اني موافق ناظرت مرزوق ومهاب لقيتهم صاحيين لكنهم في فراشهم كانهم غارقين في النوم مرت لحظات وكان الهدوء يقطعه صهيل حصاني مديت يدي على سلاحي بركاده وحطيت اصبعي
على الزناد ناظرت حصاني كان يتحرك ويناظر صوب الشرق عرفت انه هناك في شي مرت لحظات وحصاني يطلق صهيل قوي على ضو القمر شفت صوب شي يمشي صوبنا قمنا من الفراش
كل منا اخذ ساتر خلف حجر او شجره كنت اناظر هالزول اللي مقبل علينا اذا هي فرس او حصان راح صوب حوض المويه شرب لين ارتوى تقدمت منه وامسكته من رسنه واخذته وربطته جنب باب الحظيره رجعت عند ابو مرزوق وقلت له : هاذ الركوبه ماهي ركوبة الرجال اللي شفناه
جاوبني ابو مرزوق : هاذ فرس ابن عمي ابو سعيد
انتظرنا فتره وما اصعب الانتظار ما ظهر احد رجعنا للنوم مر وقت اذا ابو مرزوق يصحينا لصلاة الفجر توضينا وصلينا صلاة الفجر جماعه قبل لا ننهج بالحلال لفانا محارم ابو مرزوق زوجته
وزوجات اولاده وبناته الثنتين قبل زواجهم من اولاد خالي شاركتهم بحلب النعاج والشياه وحطو مواعين الحليب بالسياره وتوجهنا للديره بعد 4 ايام توجهت لوظيفتي جلست 3 شهور في وظيفتي وحصلت على
اجازه جديده مدتها 7 ايام غادرت موقع وظيفتي الساعه 6 صباحا وصلت الديره كانت الساعه 9 مضى على سرقة حلال هالرجال فتره وصابه اليأس انه يلاقي الحلال المسروق
ثاني يوم من اجازتي توجهت مع خوالي ورافقنا ابو مرزوق لسوق حلال ناظرنا الحلال ابو مرزوق صار يتفقد الحلال وده 3 اكباش جديده لتقليح النعاج صدفنا هناك رجال يعرفه ابو مرزوق
وهاذ الرجال يشتغل تاجر حلال ومعاملته صادقه مع الناس عرض على ابو مرزوق 4 اكباش وقاله انها الاكباش تعطي نسل طيب
ابو مرزوق له نظره ثاقبه ومعرفه ممتازه بالاغنام اشترى ابو مرزوق 4 اكباش من التاجر ورجعنا فيهم للديره مسا ذاك اليوم جلسنا في ديوان خالي ابو حاتم سولفنا بموضوع الرجال اللي انسرق حلاله
ابومرزوق قال : وكاد هالسارق باع الحلال بالفرادي للناس وماراح فيهم للسوق لانه ودهم الناس يسألوه عن الحلال من وين جابه حين يعرضه للبيع لانه الحلال في وسم على اذانها
مضى على سرقة الحلال سنتين وحوالي 4 شهور والرجال طلب العوض من وجه الكريم والحمدلله الله سبحانه وتعالى عوضه عن حلاله المسروق في يوم توجهت مع ابو مرزوق لسوق من اسواق الحلال
حين وصلنا السوق وحنا نمشي توقف ابو مرزوق وناظر الارض تمعن باثر على الارض
وقال : لعاد انت هنا في السوق اثرك عمره حوالي الساعه يفرجها الله
صرت امشى مع ابو مرزوق وابو مرزوق يناظر رجول الرجاجيل في السوق حوالي ساعة زمان توقف ابومرزوق صار يناظر ارجول رجال دقني ابو مرزوق بمرفقه واشر لي بعيونه على رجال
قلي ابو مرزوق : هاذ هو اللي سرق حلال ابو احمد اول ما شفت اثره تذكرت اثره
تقدمنا منه حضرت نفسي حطيت يدي على مسدسي ابو مرزوق حط يده على كتف الرجال وهمس باذنه كم كلمه تراجع الرجال مع ابو مرزوق اعطاني ابو مرزوق ايماءه براسه عرقلت الرجال وطرحته
على الارض وكتفته بشماغي الرجاجيل اللي في السوق يستفسرون ويش السالفه
قلهم ابو مرزوق : هاذ الرجال سارق قبل سنتين وشوي سرق حلال من شخص من ديرتي شفت اثره حفظته اليوم قبل ساعتين شفت اثره دورته لين لقيته
شخص قله : ويش يدرينا انك قصاص اثر ؟
جاوبه ابو مرزوق : قصاص اثر خدمه 18 سنه في العسكريه صدقتني اولا هاذ يرجعلك وهناك امر ثاني ليش اخترت هاذ الشخص من دون الرجاجيل في السوق وقلت انه سارق
تدخل رجال وقال : اشهد لك يا ابو مرزوق انك قصاص اثر متمرس يالربع تراني اعرف هالرجال من حوالي 40 سنه خدمت معاه بالعسكريه
اخذنا الرجال لمطعم وهناك اتصلنا على مركز الشرطه جت دوريه واخذنا السارق للمركز فتحو له محضر تحقيق واتصلوا على المركز اللي تتبعه ديرتنا وهناك راجعو الملفات ولاقوا الشكولى المقدمه من
طرف ابو احمد تفيد بسرقة 10 رووس من حلاله خلال التحقيق افاد السارق انه باع الحلال المسروق بالفرادي لعدة اشخاص وهم بدورهم باعو لاشخاص ثانيين فصار من الصعب انك تحصر الاشخاص
اللي باعو واشترو حلال ابو احمد
حين ابلغنا ابو احمد قال : الله عوضني خير بدل حلالي اللي انسرق
جا استدعاء لابو مرزوق لاجل يدلي بشهادته محدثكم العبد الفقير لله جاه استدعاء رحنا للمحكمه ورافقنا ابو احمد وادلينا بشهادتنا في المحكمه بعد حوالي 4 جلسات تم الحكم على السارق بالسجن لمدة 4 سنوات
ابو مرزوق واولاده يحفظون الكثير من اثار اهل ديرتنا
قلي ابو مرزوق في مهنتنا مافي مجال للخطأ لانك اذا اختلط عليك الامر لا بد انك تظلم انسان نشوف الاثر نحفظه طول العمر ما في يوم شفت اثر ونسيته هاذ المهنه ناخذها بالوراثه ونتعلمها وحنا صغار
مع الزمن نصير نقدر نميز الاثار حتى لو حاول الشخص يسوي نفسه اعرج اقدر اكتشفه لانه اللي يسوي نفسه اعرج ما تكون خطواته نفس الشي بعكس الشخص الاعرج تكون خطواته على نفس النسق
وهاذ الامر يقدر قصاص الاثر المتمرس يكتشفه بكل سهوله
قبل حوالي 10 ايام كنت اتمشى في الديره مع ابو مرزوق شاف اثر على التراب قلي : هاذ اثر ابن التاجر ابو اسعد
رحنا لبيت خالي جلسنا في الديوان قال ابو مرزوق لخالي ابو حاتم : ابن التاجر ابو اسعد كان عندك اليوم صحيح ؟
خالي قال : صحيح يا ابومرزوق لكن انت كنت اليوم براة الديره كيف عرفت ؟
ابو مرزوق قال : شفت اثره جنب بيت اختك ام فارس حفظت اثره من اول مره ناظرت ارجوله قبل حوالي 30 سنه وكان بعمر حوالي 20 سنه
اولاد ابو مرزوق مهاب ومتعب يشتغلون قصاصين اثر في الجيش في الشهر القادم متعب ومهاب يحالون للتقاعد بعد خدمه في العسكريه استمرت 21 سنه
وسلامتكم يالربع
رد مع اقتباس
