السلام عليكم ورحمة الله وبركاته
مساكم الله بالخير الجميع
في فترة طفولتي وعلى ما اذكر حين كنت بعمر 8 سنوات لفانا ضيف على بيت جدي رحمه الله واموات المسلمين كان مع هالضيف 5 نعجات ومهره فصيلتها العبيه ومعها اوراق سلالتها
حين جلس هالضيف وصبيت له القهوه حط الفنجال على الارض وما شربه
قاله جدي : ابشر باللي اقدر عليه مير اشرب فنجالك
الرجال شرب الفنجال وهزه ورجعه لي
الرجال الضيف قال لجدي : يا شيخ ذيب ودي منك معروف نصيتك من دون الرجاجيل
جدي قاله : ابشر باللي اقدر عليه
الضيف قال : ودي اترك هالنعجات والمهره الاصيله امانه عندك لاني ودي اتوجه لخوالي في منطقة معان وتبوك ما عادت الامور تحتمل الجميع يرتاح
قله جدي : الامانه هاذ نحفظها لك بعون الله ولزوم يكون عليها شهود
وحنا جالسين لفانا خوالي وكانو توهم راجعين من العسكريه جلسو وسولفو وطلب مني جدي اروح انادي العم ابو علي وزوج خالتي ( امي بالرضاعه ) و2 من الربع
حين تجمعت الرجاجيل في بيت جدي وقال لهم جدي انه الضيف وده يترك عندنا امانه ولزوم نكتب فيها صك ويوقعون عليه الرجاجيل هاذ امانه نرجعها لصاحبها حين يطلبها
خالي ابو حاتم كتب الصك جدي والعم ابو علي حطو بصماتهم على الصك لانهم لا يعرفون القراءه ولا الكتابه خوالي وزوج خالتي كتبو اسمائهم وحطو تواقيعهم على الصك وقدمنا واجب الضيف
ذبيحه سمينه طبخنها جدتي وشايبتي رحمهم الله واموات المسلمين وقدمناها غدا للضيف والربع الموجودين عصر ذاك اليوم الضيف طلع من بيت جدي ورافقوه الربع ودعوه على باب البيت ركب بسيارة شخص من ديرتنا
وتوجه نحو مدينة معان ومنطقة تبوك
مضى على وجود هالامانه عندنا سنتين النعجات توالدت على سنتين كل وحده جابت طلي او نعجه صار مجموعهم 10 طليان في يوم كنت العب مع ربعي قدام البيت لفانا 3 رجاجيل حين
شافهم جدي مقبلين علينا طلب مني انادي خوالي الثلاثه ويجون بالحال رحت ناديت خوالي وحضر معهم بعض رجاجيل العشيره جلسنا مع الرجاجيل في بيت جدي
لاحظت الفناجيل باقي فيها اثار القهوه غسلت الفناجيل ونشفتها وصبيت فيها للربع
الرجاجيل اللي لفو لبيت جدي من اولاد عمومة الضيف اللي ترك الفرس والنعجات امانه عند جدي جونا يطلبونها
قلهم جدي : يالربع هاذ امانه عندي ما اسلمها لكم لين يجيني راعيها ويقولي اعطيها لكم تاخذونها وغير هيك ما عندي كلام
زعلو الرجاجيل وطلعو من بيت جدي قبل لا يتغدون
قال جدي لخوالي ولابو مرزوق وشايبه تحرصو على الحلال خلكم حذرين ماني متطمن للرجاجيل ذول
السنه الثالثه مات من نعجات الرجال نعجتين و 5 نعجات من حلال شايبي رحمه الله واموات المسلمين وضاق صدر جدي سبب موت النعاج كلو عشب كان مرشوش عليه ادويه زراعيه
توجه جدي لامام المسجد وقاله اللي صار ويش الحل يا شيخنا
قال امام المسجد : دام انها النعاج كلت من العشب المرشوش بالادويه وانتم ما عندكم علم ما تتحملون سبب موت النعجات قضاء الله وقدره ولا تنسى انه مات لكم 5 نعجات لكن لاجل ترضي الرجال تعطيه
من حلالكم قدر الله وما شاء فعل وتكاثرت نعجات ضيف جدي والمهره لقحت مرتين وولدت اول مره مهره والمره الثانيه ولدت مهر بعد 6 سنوات لفانا الضيف
واستقبله جدي ورجاجيل العشيره جلسوا الربع في بيت جدي وحريمنا ساوو عشا للربع صباح اليوم الثاني توجهنا لمفلا الحلال وحضر معنا امام المسجد محدثكم ابو ضاري توجه لمربط الخيول
وجبت الفرس ومهرها ومهرتها ربطتهم تحت شجره ووقفت مع الرجاجيل
جدي قال : يا ضيف الرحمن نعجاتك وبهمهم وطليانهم وصل عددهم 60 مات منهم نعجتين قضاء الله وقدره لكن لانهم عندي تنقى من حلالنا 2 بدل عنهم تنقاهم نقو العين ما نقول لا وهاذ الفرس
وامهارها وان شاء الله اني ما قصرت معاك
الرجال قال : يا شيخ ذيب اشهد لك انك ما قصرت والنعجات اللي ماتت قضاء الله وقدره ما ودي اياها واشهدو يالربع اني تنازلت عن المهره للشيخ ذيب حلال زلال عليه هديه ما من وراها جزيه
عزلنا حلال الضيف على جنب واذكر انه الضيف اشترى من حلالنا كبشين لتلقيح النعاج قضى الضيف ليلته في بيت جدى وحين طلع النهار توجه للسوق احضر شاحنه اطلعنا نعاجه والفرس ومهرها
فيها وتوجه فيها نحو مدينة معان
جدي قال للضيف : لفانا 3 من اولاد عمامك ودهم حلالك والفرس قلت لهم هاذ امانه اردها لراعيها وزعلو وطلعو من البيت وما تغدو
الضيف قال : صدفت رجال من ربعي في مدينة معان وسولف لي اللي قلته يا شيخ اولاد عمومتي ودهم كل شي لهم هاذ نصيبي من حصتي من الحلال والفرس تنازل لي عنها شايبهم بشهادة الرجاجيل لكن ويش تقول
الطماع والجشع وعينه فارغه وده كل شي حتى لو عن طريق الخداع
المهره العبيه ظلت عندنا وماتت بكبر السن حين كبر جدي رحمه الله واموات المسلمين وما عاد مثل زمان يقدر يسرح بالحلال اقترح على شايبتي تبيع حلالنا لخالي ابو اسماعيل ووافقت شايبتي
وعطاها خالي مربح عن كل راس ربح دينار واذكر جدي يقول لشايبتي رحمهم الله واموات المسلمين
ودي حمود يظل بالمدرسه يتعلم ما ودي اياه يطلع راعي حلال ودي اياه يطلع رجال متعلم ودي اياه احسن الناس
ثمن الحلال حطه جدي في حساب في البنك وما يدخل عليه شي من الفوائد والحمدلله كان مبلغ طيب بعد وفاة جدي رحمه الله واموات المسلمين خوالي تولو مكانه وظلو يتابعون امورنا الماليه لين كبرت
ولحقت ملاحيق الرجال والتحقت بالعسكريه وصار عمري 22 سنه جمعنا خالي ابو حاتم الله يطول بعمره سحب كامل الحساب واغلقه وجمعنا في بيته وقسم قيمة الحساب بيني وبين خواتي الثنتين
اخر علم لي بالرجال راعي الامانه سنة 1996 انه كان يسكن في منطقة تبوك
بعد تقاعدي من الشرطه اشتغلت في تربية الاغنام والحمدلله على نعمته وفضله
وسلامتكم يالربع
رد مع اقتباس
