15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
النتائج 1 إلى 3 من 3

الموضوع: قلي : ما تعرف تنام في البر ؟

  1. #1
    تاريخ التسجيل
    Apr 2017
    المشاركات
    969

    قلي : ما تعرف تنام في البر ؟

    السلام عليكم ورحمة الله وبركاته
    مساكم الله بالخير الجميع

    ابان خدمتي في العسكريه وكان عمري حوالي 24 سنه في احد فصول الشتا الماطر طلعنا للتدريب وقفت تحت المطر لين تجمعت فصيلتي ودوم الفصيله او المفرزه يكون عددها ما بين 5 الى 10 جنود
    تجمعت المفرزه قلت لهم : فصيله انتباه اليوم تدريبنا تكمله لتدريب امس كل منكم يعرف واجبه توكلوا على الله انصراف للتدريب
    طلعنا بالسياره وتوجهنا لمكان التدريب قضينا نص النهار في التدريب تحت المطر حين خلص التدريب تجمعت فصيلتي طبعا هدومنا كانت مبلوله وصل البلل لهدومنا للملابس الداخليه وفوق هاذ
    ملطخه بالوحل والطين رحنا للسياره كانت تبعد عنا حوالي 200 متر طلعنا بالسياره وتوجهنا للمعسكر تغدينا والربع توجهو للراحه محدثكم ابو ظاري تابع اعماله الكتابيه وكتابة بعض التقارير كنت ابلغت
    ربعي انه اليوم الثاني تبدا اجازتي مدتها 10 ايام بعد ما قضيت 100 يوم ما غادرت المعسكر حين طلع النهار كان الجو بارد وماطر مثل
    امس والليله الماضيه اجتمعت مع ربعي 4 اشخاص علاقتي وطيده معهم
    نزار , خلف ’ حميدي ’ مثنى
    ومحدثكم العبد الفقير لله ابو ظاري طلعنا بسيارة جيب وتوجهنا للمدينه كنت اناظر المطر وهو يتساقط على الرمال نزلنا في مكان موقف خاص للجيش ودعنا بعض وكل منا راح لاهله رحت
    مع خويي حميدي ودنا طلع بسياره توصلنا لمكان قريب من سوق اهل ديرتنا يوقفون سياراتهم هناك جنب السوق حين وصلنا السياره
    قلي حميدي :
    اسمع اللي يجلس جنب السايق يدفع الاجره وخبري فيك منت بخيل يا ابو ظاري
    ضحكت وقلت له : ابشر يا ابو دحام ادفع اجرة السياره
    طلعنا بالسياره وكان السايق وده ينتظر راكبين لاجل يكتمل عدد ركاب السياره
    قلت له : اعطيك اجرة الراكبين الاثنين مير توكل على الله وخلنا نمشي
    ودووم حنا متوكلين على الله ومشى السايق بالسياره وانزلنا جنب السوق ناظرت ساعة يدي كانت 8 صباحا صدفنا صديقنا ابو مرزوق كان اشترى بعض الاغراض وده يرجع للديره طلعنا معاه
    بسيارته جلست مكان السايق وجلس جنبي خويي حميدي وفي الكرسي الخلفي ابو مرزوق توكلنا على الله ومشينا باتجاه الديره وصلنا بعد حوالي ساعه في الوضع الطبيعي تاخذ وقت 30 دقيقه
    لكن بسبب المطر اضطريت امشي على مهل فزاد الوقت نص ساعه والحمدلله ما شعرنا بالوقت وحنا نسولف وصلنا الديره نزلت عند باب البيت وحميدي معي ابو مرزوق توجه لبيته بسيارته وحميدي
    راح يركض وده يشوف اهله دخلت حوش البيت وصلت باب البيت بسملت وذكرت الله فتحت باب البيت ودخلت صدفت شايبتي حامله منقل النار ودها تروح تشب نار لاجل تدفا بهاذ الجو البارد
    حطت شايبتي المنقل على الارض امسكت بديينها الطاهرتين وحبيت عليهم وهي تقولي الله يرضى عليك يمه الله يرضى عليك يمه رحمها الله واموات المسلمين
    قلت لها : تريحي يمه تراني اشب لك نار تدفي عليها اجلسي هناك عند الدفايه
    اخذت المنقل ورحت خلف البيت افرغته من الرماد وتركت شي منه في المنقل وبديت اشب نار كلها من قطع حطب اشجار الزيتون لين خفتت النار وصارت جمر ادخلها للبيت وحطيتها قدام شايبتي
    امسكت قطعه حديديه مثلثه لها 3 ارجول وغرزتها على طرف المنقل وامليت تنكه سعتها 1 لتر مويه وحطيتها على المثلث الحديدي وغطيتها ما صار وقت صلاة الظهر كانت المويه سخنت
    توضت منها شايبتي وقمت تجهزت وتوضيت وتوجهت للمسجد صليت الظهر ورجعت للبيت مسا ذاك اليوم توجهنا لبيت خالي ابو حاتم وخالي الله يطول عمره ابلغنا انه مبيتنا في بيته
    ذيك الليله كانت الجلسه العائليه نمنا وكنت اسمع صوت قطرات المطر تضرب الشباك حين طلع النهار كان الجو صافي والشمس ساطعه لفاني ابو مرزوق وقلي عندي مشوار ترافقني ؟
    جاوبته : هاذ اللي كنت انتظره خلني اتجهز
    بسرعه رحت البيت جبت سلاحي واطلعت حصاني من الحظيره واسرجته والجمته اذا اهل بيت خالي ساوو لي زواده ابو مرزوق ابلغ خالي انا ودنا نطوف حول الديره ركبنا خيولنا وانطلقنا
    وحنا في منطقه شفنا اثار خيول تتبعناها لمسافه توخرنا حنا راجعين واقترب الليل رحنا لمغاره واسعه ادخلنا خيولنا وجمعت اعشاب وحطيتها قدامها وساعدت ابو مرزوق بتقطيع الحطب وادخاله للمغاره
    وبدا المطر يتساقط شبيت نار وجلسنا نتدفا وتعشينا من الزواده اللي معنا قمت من مكاني ورحت صوب باب المغاره ناظرت الديره وشفت اضواء البيوت لاحظت شبت نار تشتعل وتطفي
    قلت : يا ابو مرزوق تعال شوف
    جا ابو مرزوق ووقف جنبي حط يده على كتفي وقلي :
    توكل على الله تعال اجلس جنب النار
    جلسنا جنب النار واشعل غليونه وصار يسحب
    قلت : يا هناكم في بيوتكم الفراش الوثير والدفا
    قلي ابو مرزوق :
    ما تعرف تنام في البر في فصل الشتا ؟
    جاوبته : يا خويي في التدريب نمت فراشي الارض وغطاي السما امس واول امس تبللت هدومي وصل البلل لهدومي الداخليه ناهيك عن الوحل والطين اللي على هدومي
    سولف لي عن جده والد شايبه حيث كان لقبه خوي الذيب لانه ربى ذيب وهو جرو صغير بعد سنه وشوي تركه وما عاد رجع له الوكاد نداء الطبيعه وغريزته البريه غلبت عليه
    عدلت وضعية شماغي والتصمت فيه
    قلي :
    هدبتلي شماغي الاحمر بيداها وغزلت علم
    قلت : وقالت يابني خلي راسك فوق عالي بالقمم
    قال :
    شكشكتني ... بالكرامة طرزتني ... بالكرم
    قلت : أنا أمي أردنية همها تربي زلم
    هاذ بعض شطرات من اغنيه وطنيه كتبت عنها في موضوع سابق بعنوان هدبتلي شماغي الاحمر
    حصاني جا علي وحط راسه على كتفي وصار يهمهم رفع راسه وصار يناظر باب المغاره ابو مرزوق امسك سلاحه وصوبه اتجاه باب المغاره حينها حملت سلاحي وقربت من باب المغاره
    ناظرت خارج المغاره شفت عدة قطع من الجمر وهي تتحرك اذا هي كلاب ضاله عمرت سلاحي على سبيل تخويف هالكلاب الا انها ما تحركت وظلت تطلع اصوات همهمه كان قدامها كلب
    لونه اسود وضخم تحفز للهجوم حطيت اصبعي على الزناد واطلقت 3 طلقات سمعت صوت كلب عرفت اني صوبته انحاشت الكلاب ورجعت مكاني تمددت على فروتي
    قلي ابو مرزوق :
    نام يا حمود حين يصيبني النعاس اصحيك
    قريت وردي واغمضت عيوني اذا ابو مرزوق يصحيني ناظرت ساعة يدي كانت الساعه 5 الفجر
    قلت : ليش ما صحيتني يا ابو مرزوق اخذ مكانك وانت تنام ؟
    قلي :
    يا ابن آخي ما نعست للحين النوم طار من عيوني قم توضا وخلنا نصلي الفجر
    قمت توضيت وصلينا الفجر وسوينا شاي وقهوه وحين بدا النهار يطلع كان المطر خفت حدته اسرجت خيولنا وصبرنا لين توقف المطر طلعنا من المغاره وركبنا خيولنا وانطلقنا صوب الديره مرينا
    على المكان اللي شفنا شبت النار فيه بالليله الماضيه ما في اي اثار للنار نهائي تابعنا طريقنا صوب الديره وبما انها الطريق حصى كنا نطرد بالخيول باقصى سرعتها حين وصلنا الديره ابتدا المطر
    بالهطل رحت لبيت خالي وابو مرزوق توجه لبيته ربطت حصاني وارخيت سرجه وتركته لين ارتاح وجف عرقه نزعت السرج عنه حطيت له مويه والعلف
    جلست مع خالي وسولفت له عن شبت النار اللي شفتها و ابو مرزوق
    قلي خالي :
    هاذ من فعل بسم الله الرحمن الرحيم
    جلست 10 ايام اجازتي الفراش الوثير والدعه والراحه شايبتي رحمها الله واموات المسلمين طول الوقت
    تقولي :
    ويش ودك اطبخ لك اليوم
    جاوبتها : الله يطول لي عمرك ودي رضاك علي ما تتعبين نفسك خلك مرتاحه
    تقولي :
    الله يرضى عليك دووم ارضى عليك وعلى خواتك الثنتين
    لكن ابد الا اقول ويش ودي طبخ من يدها رحمها الله وجعل مثواها الجنه واموات المسلمين اليوم تاريخ وفاتها 7/12/2018 سنه مرت على وفاتها والجميع يذكرها بالخير جعل مثواها الجنه والمسلمين
    وسلامتكم يالربع

  2. #2
    تاريخ التسجيل
    Dec 2010
    الدولة
    منتديات مكشات &الموروث الشعبي&الكمبيوتر والبرامج
    المشاركات
    12,252

    رد: قلي : ما تعرف تنام في البر ؟

    وعليكم السلام ورحمة الله وبركاته
    ما اجمل الايام الماطره سبحان الله
    رحم الله موتانا وموتاكم وموتى المسلمين هذا حال الدنيا والحمد لله دائماً وابدا
    شبت النار وضوء سراج اضوء تراها من بعيد دائماً ما نسمع عنها والبعض من مرتادين البر شاهدو الاضواء كفانا الله واياكم شرهم ولابد قراءة المعوذات عند النزول فالمكان
    جزيل الشكر
    تحياتي وتقديري واحترامي

  3. #3
    تاريخ التسجيل
    Apr 2017
    المشاركات
    969

    رد: قلي : ما تعرف تنام في البر ؟

    وعليكم السلام ورحمة الله وبركاته
    اختي قوافي الفاضله
    فعلا الايام الماطره جميله
    رحم الله موتانا وموتى المسلمين وجعل مثواهم الجنه
    اكثر من مره شفت شبت النار واضواء في البر حينها اقرآ المعوذات
    وحين دخولنا الكهوف او المغاور نقرآ الاوراد والمعوذات
    زينتي متصفحي بجميل حروف كلماتك الراقيه
    حفظك الرحمن ورعاااااااك

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •