قصر الرجى
بنيت قصرٍ لـلرجى نايف الجال = وهدمت بيت الياس عقب المذله
وفتحت لي بابٍ عليه الصبر طال = وقـفلت بـابٍ مـنه كبدي مغله
وهديت طيرٍ يطربه صوع الاجوال = وبرقعت طيرٍ ماتعـدى محله
وسجيت رجلي في وسيعات الاميال = وحولت من روس الرجوم المطله
وقفيت عن دارٍ بها شـفت الاهوال = وحليت عند اهل القصور المظله
وفلّيت لي طرسٍ حوا زين الامثال = وطرسٍ قريت العام حرّمت فله
وخايلت لي برقٍ سرى يشعل اشعال = وبـرقٍ تـعدى مـاتـبعـــــــناه لله
وشربت لي من صافي الجمة زلال = مـن عقـب عـدٍ ريقـنا مايبلــــــــــه
وطويت صفحات النكـادة والانكال = وكفيت دمعٍ من عيـوني تـهلـــــــه
يـاما كتمت الغيض عن كل الانذال = اللي لهم شذب الـعراقـيب فلــــــــه
وخذيت من بقعا لي دروسٍ جزال = وعـرفت من روغاتها العلم كلــــــه
يـافكرتي بالوقت راحل ونـزال = احـدٍ هني واحدٍ على جال ملــه
وفكرت بالدنـيا على مر الاجـيال = واثر السـديري قالها في سجلـــــه
( احدٍ تذعذع له على روس الاقذال ) = واحدٍ كما السرحان والوقــت ذله
ويـالله يـالـلي عـالمٍ كل الاحـــوال = تحـسن خواتمنا على خير ملـــه
عبدالله بن سعود الدغيثر
28/1/1422 هـ
(ابو سالم)