((الموارد))
يا هاتفي جريت بالصوت موال = قاف ن بنيته والموارد رويه
لا ني بمتغزل بمن لبست الشال = أم الخدود الناعمات النديه
اللي إليا مرت مع البيض تختال = غريافة فازت بطله بهيه
ولا ني بطالب حاجة من هل المال = ولا أبغى أتوسط بالنفوس الرديه
الحمد لله حالتي بأطيب الحال = مبسوط وأدي واجب الله عليه
أسج لا من ضاق صدري مع سهال = اطرد بكاري ذيك وأرد ذيه
أصيح لنياقي وأهوبل تهوبال = وليا زعجت الصوت جني سرية
أشوش كني بالوغى وصف خيال = سمع الصياح ولا حسب للمنية
شهم شجاع معرب الجد والخال = مجناه من روس الهضاب العلية
تنخاه بنت تنهمه بين الأزوال = تعرف فعوله ليبسن الشفيه
وسل املح ما يشبعه غير الأبطال = ولعيونها لوح بظهر العبيه
وقبل شعاع الشمس ينذر بمرسال = في عبلة خضراء ودار خليه
أشب ناري وأقدح البن بدلال = واضبط على كيفي هوى الشاذليه
بنيت قافي مدح في طيب الفال = الشاعر اللي مسند القاف ليه
حييت يالي شوفته تشرح البال= وتنبت سهال القلب لو هي سنية
وافي ودايم للمراقيب نزال = مراقب الطولات لوهي نحيه
لك في رياض القلب يالقرم مدهال = ولك منزل عالي ولك مقدرية
والوقت مهما شان والبعد لو طال = مايقطع حبال الوصال القوية
وترى الرجال ألوان وأطوال وإشكال = لكن معادنهم علينا خفيه
ماكل من حط الشنب صار رجال = ولا كل تاجر يستطيع العطية
ولا كل من حط المغاتير جمال = ولا كل حي سد بغياب حيه
دنيا تخلي صاحب العقل يهتال = متقلبه مابين صبح وعشيه
فيها ارتفع رقم المؤشر للأنذال = وفيها انخفض طبع الشرف والحميه
فيها انقلاب وميل في كل الأحوال = ولا عاد به راعي ولا به رعيه
راع الرديه صار مضرب للأمثال = كل يبي قربه ويصبح خويه
وراع العلوم الطيبة زيح للجال = بلية ياكبرها من بلية
وختامها مني تحيات وإجلال = وصلاة لمحمد رسول البرية