ضـ دولة كينيا بعدسة ـاحي

[ضاحي]

بسم الله الرحمن الرحيم

رحلة كينيا (1)

هذا تقرير لرحلة اتممتها الى دولة كينيا في العام الماضي

اولاً من لايشكر الناس لايشكر الله فالشكر للاخوين وائل الدغفق على ماكتبة وبينه في رحلته الى كينيا وجنوب افريقيا والذي كتب موضوع رائع كان الدعامة لبداية التخطيط لرحلتي الى كينيا وجنوب افريقيا. فله مني الدعاء والشكر والعرفان على ماقدمه لي من المساعدة للتخطط للسفر الى هذين البلدين الجميلين.

ثانيا عرفاً مني لمنتدى مكشات الذي استفدت منه الكثير سواءً للتخطيط لهذه الرحلة او بالاستفادة من المعلومات الاخرى المفيدة الموجودة في ثنايا الموقع وعرفاناً مني وإكمالاً لما بدء به الاخ ابو ابراهيم ( والعين ماتعلى على الحاجب) والذي استفدت منه الكثير واضفت ووضعت تجربتي الخاصة في السفر لهذين البلدين وقدمتهما لرواد المنتدى لربما يستفيد منهما غيري من المسافرين او لربما يجد احد القراء فيهما المتعة والتسلية بقراءة التقرير واشكر كل من سيقراء الموضوع علما انه لا يغني الاخوة قراءة موضوعي هذا من دون الرجوع للاصل وهو تقرير الاخ مرجعي في تلك الرحلة.

لقد كان السفر الى افريقيا حلم يراودني من وقت ليس بالقريب ولكن ضروف العمل بالاضافة الى قلة المعلومات التي يمكن ان يستفيد منها المسافر العربي لتلك المناطق وان كانت التجارب الغربية موجودة ولكن النكهة العربية والتقارير المكتوبة من الاخوة المسافرون العرب لها طعمها الخاص وبعد ان مضت السنوات ووجدت ضالتي في موضوع كُتِب في موقع رائع هو موقع (مكشات ) على الرابط التالي


اخوي وائل الدغفق ( رحال الخبر) على الرابط التالي في موقع مكشات عن كينيا وجنوب افريقيا.

http://www.mekshat.com/vb/showthread.php?t=32792

وكتب ايضا نفس الموضوع على رابط كتبة في موقع المسافرون العرب لايحضرني الرابط


وسوف يكون الموضوع مقسم الى قسمين كل دولة على حده لتركيز الفائدة وسوف نبداء بدولة كينيا

ومن المهم ان نبدء ببعض المعلومات المتعلقة بالسفر الى الدولة المذكورة

معلومات للتخطيط للرحلة.

اهم شيئ والحافظ هو الله اخذ حبوب وقاية من الملاريا لان افريقيا موبوئةبهاوتؤخذ حبة واحدة قبل السفر باسبوع ويوم السفر حبة وبعدها حبة كل اسبوع اخذتها عن طريق الطبيب ويمك اخذها مباشرة من الصيدلية.

· وكالة واجنحة المؤيد بالملز ت : 4774460 والتذاكر عن طريق المكتب.

· قيمة الفيزا لكينا (210 ) ريال والنموذج الالكتروني للفيزا مرفق. واستخراج الفيزا لايأخذ اكثر من ساعة

· رقم السفارة الكينية في حي السفارات بالرياض 4881238 / 4882484

· الخطوط الكينية الوكيل بالرياض يوسف بن احمد كانو طريق الملك عبدالعزيز بالقرب من البنك الفرنسي (ت:4772228 تحويلة 288/305)

· رخصة القيادة الدولية 100 من اجنحة المؤيد لمن اراد استاجار سيارة بنفسة.

الاسعار والعناوين المهمه وسيأتي التفصيل لهذا خلال الموضوع.

· اسم السائق الكيني ( JAMES N. NJUGUNA ) ت: 254-020-0723-381666 الايميل حقة ( NJNJUGNA@ YAHOO.COM ) وكان الاتفاق معة عن طريق المكتب ويمكن الاتفاق معة مباشرة.

· سعر الصرف (1) ريال = (20) شلن كيني تقريباً.

· مواصلات من مطار نيروبي الى الفندق 20 $

· مواصلات من الفندق الى سوق القرية 20 $ التاكسي

· مواصلات من السوق الى الفندق 600 شلن بأستخدام الاجرة العامة

· سكن ننيوكي 3400 شلن.

· دخول محمية سويت ووتر بمبلغ 1950 شلن للكبار 975 شلن

· دخول ماساي مارا 30 $

· سكن مخيم ماساي مارا 8000 شلن خيمتين لليلتين.

· زيارة وتصوير مع قبيلة الماساي 20 $

· هذا نبذه والاسعار بالداخل


الرحلات الدولية كاملة كانت على الخطوط الكينية ماعدا خطين وتفاصيل وخط السير

[ الرياض– دبي (الخطوط السعودية )] [ نيروبي – جوهانسبرج – نيروبي – دبي (الخطوط الكينية )] [ دبي – الرياض (السعودية )] التذاكر ب 3485 خط السير شامل التذاكر والضرائب والاقامة في الفندق في طريق العودة بدبي لمدة 18 ساعة.


برنامج كينيا

الاقلاع من الرياض الساعة 6:20 مساء.

الوصول الى دبي الساعة 21:00 توقت الامارات.

الاقلاع من دبي الساعة 1:05 صباحا.

الوصول الى نيروبي الساعة 5:10 صباحا توقيت كينيا يوم الجمعة 4/8/2006



مجموعة خرئط لكينيا











ويمكن التزود من الخرائط من عدة طرق من الماب سورس لمن يملك هذا البرنامج او بزياره بعض المواقع مثل.

http://www.kenyalogy.com/eng/mapake/mapke.html

http://www.africantravel.com/mapofafrica/flash_kenya.html

http://www.southafrica.com/limpopo/mokopane/



ارجو التمهل بالرد حتى انتهاء الموضوع حفاظا على الترابط والتسلسل



يتبع

[ضاحي]

،،،،،،،،،،،،،،،تفاصيل الرحلة ،،،،،،،،،،،،،،،

يوم الجمعة 4/8/2006

الوصول الى نيروبي

· التوجه الى وسط المدينة والذهاب الى الفندق المحجوز مسبقا عن طريق الانترنت وبعد المعاينه لم يكن الفندق مناسب وذهبنا للبحث عن بديل وإن كان بسعر عالي وقد استأجارنا فندق قراند ريجينسي (grand hotel) بسعر 180 $ للغرفة.واللي محتد لازم يدفع والمشكلة اننا اربعه ماتتنترقع بأي مكان على العموم توّنا واصلين والميزانية مليانه قلنا البطره زينة وعدم الحجز مشكلة اغلب الاحيان.



مناظر متفرقة لنيروبي من داخل الغرفة في فندق قراند





استقرينا بالفندق وبدا مشور البحث عن الخيار الانسب اما استأجار سيارة بسائق اوبدون، والخيار الثاني كان احسن خيار اخذناه بالرحلة بعد ماشفنا وضع الطرق وإن كنت من اللي كان يشجع استأجار سيارة بدون سائق (بغيت اوهق الربع) ظنيت ان البلد مخدوم سياحياً (وهنا عتب على اخوي ابو براهيم ماوضح النقطة هذي لانه ماشا الله تبارك الله عليه يسلك بكل محل مهب حنا عليميه) على العموم لا احد يتوهق ويستأجر سيارة بدون سائق بكينيا هذي وجهة نظري الخاصة واللي يبي يجرب بكيفه على العموم تم الاتفاق مع احد المكاتب السياحية وإستئجار سيارة مع السائق لمدة 5 ايام وكان الآجار بقيمة 660 $ المدة كاملة اي ب(495 ريال يوميا) والسائق لحاله يستاهل هالمبلغ لانه صار هو المعزّب يدبر لنا السكن بدون حجز ويوفر علينا التدوير على المحلات متى مابغينا ومرشد سياحي ونصوح يرشدنا على الزين ويفاصل عنا في كثير من الاحيان المهم كان رحمة من الله والسبب في عدم الحجز لاننا ماندري وش حنا مقبلين علية شي جديد ولا ندري تجوز لنا الشغلة والا لا فما نبي نرتبط باي شي طبعا هذا الشي له ضريبه وهي ربما الأسعار في الغلب تكون اكثر من العادة وهذا مهب دايم.



هذا مكتب السفريات اللي بكينيا اللي عن طريقة اخذنا السيارة ويمكن الاتفاق مع السائق مباشرة عن طريق العنوان الموجود في اول الموضوع.

· زيارة سوق القرية ( Village Market ) وهذا سوق فيه المشغولات اليدوية والتحف يرتادة الاجانب لانهم يحبون هالدباعين المهم كان فرصة للتعرف على شي جديد وكينيا كلها مليانه من هالتماثيل المنحوتة لكل شي حيوانات واوادم وجمادات وكل شي وتحصلونهن بكل محل تجونه.

· الرجوع من السوق الى وسط المدينة وزيارة المسجد الجامع واكل وجبة الغداء بمطعم برستد قدام المسجد. والتمشي شوي في المنطقة.وزيارة بعض المحلات.



يوم السبت 5/8/2006

مغادرة الفندق الى مدينة ننيوكي في اجواء غائمة وجميلة.

· الوصول الى المدينة ةإستأجار فندق ( Lion Court Lodge ) بمبلغ 3400 شلن لغرفتين.





وهذي بعض الصور من داخل السكن



هذي الغرف وهي متواضعة لكن المكان جدا جميل





هذي صور لجبل كينيا من داخل حديقة الفندق

يتبع

[ضاحي]

· الانطلاق الى محمية سويت ووتر في اجواء ماطرة وطريق ترابي زلق كان فية مغامرات جميلة كان من ضمنها ان السيارة استدارة بنا 180 درجة وحنا بنزلة بسبب المطر والطريق الزلق لكن الله ستر وكملنا الى المحمية.

· دخلنا المحمية بمبلغ 1950 شلن للكبار 975 شلن للصغار وتجولنا داخلها.

· يوجد في المحمية منتجع رائع لمن اراد الاستجمام ولكن السعر نار اسم المنتجع ( sweet waters tented camp ) السعر المباشر 360 $ ولكنه عن طريق الانترنت ارخص وهذا الموقع حق الفندق http://www.serenahotels.com/products1.asp?PACKid=22

ويمكن التزود بالمعلومات عن هذه المنطقه من هذه العناوين

· http://www.africanmeccasafaris.com/kenya/safaris/lodges/sweetwaterscamp.asp

· http://www.mountkenya.org/sweetwat%20pictures.htm

· http://www.e-gnu.com/sweetwaters_tented_lodge_kenya.html

· وهذي بعض الصور للمنتجع











· العودة الى الفندق بعد المرور على المدينة وشراء بعض الاغراض للعشاء، خبركم دجاج وبصل وطماط والذي منه.

· القهوه والقدوع اولا وبعدين اوقدنا على عشانا كبسة على كيف كيفكم.

· استانس جيمس ( السائق )على الكبسة بالقرع والاكل من تبسي واحد.

· بعد العشاء تجي العلوم الطيبة والسواليف مع الشاهي الكيني يوم قضت سواليفنا جاء دور التسلقي والنوم.



يوم الاحد 6 /8 / 2007

· خرجنا من الفندق الى المنطقة اللى يمر عليها خط الاستواء وكانت هذه الصور النادرة



على خط الاستواء اذا صورة صورة مايطلع الراس فيها ( هاهاهاهاها)



مقارنة بين الصورة والجهاز بس الجهاز محطوط على المتر



شوفو الشماليات

يتبع

[ضاحي]

· وتفرجنا على عرض يسوونه على خط الاستواء يبين الفرق في مغناطيسية الارض واختلاف اتجاه الدوران بين جنوب وشمال خط الاستواء وقالوا لنا انه لازم نبعد عن اللوحة اي خط الاستواء 12 متر على الاقل من ناحية الشمال او الجنوب وكان العرض يبين انه في شمال الكرة الارضية دوران الماء بإتجاه عقارب الساعة وكان العرض يتم عن طريق وضع وعاء من الماء يوجد به فتحة من الاسفل ووضع عود ثقاب على الماء يكون بمثابة الثمثيل على الدوران المغناطيسي وفي الجزء الجنوي العكس وفي الوسط ثبات وعدم الدوران.

· وكان هناك اقتراح انه نقلب الشغلة بزنس ببيع الصورة مع جهاز القارمن اللي يوضح بالارقام خط الاستواء على السياح علشان نطلع تكاليف الرحلة (هاهاهاهاها).

· بعدها اتجهنا الى مدينة ناكورو وكان وصولنا لها تالي النهار وبحثنا عن فندق واستاجرنا فندق خارج المدينة قولوا ليش خارج المدينة ( عربوه يبون فندق وشرط يكون فيه محل للطبخ لو بالحديقة) واخذنا غرفتين متجاورتين (لغة عربية ) خبركم اول شي القهوه والقدوع تقول في مضارب بني كين وبعدها كبسنا ذيك التونة (مساكين بعد مااخذنا الفندق دورنا بالديره لحم او دجاج حلال مالقينا ) على العموم كانت التونه ذبح اسلامي.



صورة من المدينة



صورة من الفندق اللي استاجرناه وفي الخلف السيارة والسائق جيمس قدم اللوبي حق الفندق.

· وهذي الديرة هي ديرة اهل السواق اللي معنا ( جيمس ) بس تراة مهب وارد الجميح ، خليناه يروح بدري يشوف مرته وعياله تعرفون حنا اكثر من يراعي الشي هذا خصوصا انا بدينا نشتاق لعيالنا

( اقول عيالنا بس لاتفهمون غلط ).



يوم الاثنين 7 /8 / 2006

اليوم ورانا مشوار طويل

· دخلنا محمية ناكورو الجميلة باكرا ويرى فيها ابداع الخالق سبحانه وتجانس الطبيعة الجميلة والجو الرائع.

· دخول ناكورو 40 $ للكبار 20 $ للصغار 1000 شلن للسيارة.





صورة عند المدخل

· في هذا المحمية توجد بحيرة مالحة التي تعتبر موطن ومقر لطائر الفلامنقوووو (كح كح كح ) الكاتب لازم ينقل الصورة كاملة فكنت اكح وانا اكتب هذي الفقرة.

· تمشينا بالمحمية وعيّنا من الله خير وعلى فكرة فيها منتجعين جميلين لمن اراد السكن فيها.

هذي بعض الصور من داخل المحمية.

يتبع

[ضاحي]

هذي الزرافة تعاندنا معها نبيها تناظرنا علشان نصورها وهذي النتيجة

· خرجنا من المحمية باتجاه اشهر المحميات بكينيا بل من الاشهر بافريقيا وهي محميه ماساي مارا عن طريق هذاك البطناج الله لايوريكم طريق اقشر ولكن قطعناه ولله الحمد ووصلنا قبل المغرب وكل واحد منا به ثلاثه الف صعرور (للي مايعرف الصعرور هو باللغة العربية من صعرر الرس اذا صبخ له شي وطلع زنقور او زناقير اما زنقر باللغة ماادري وشي )

· وخلال الطريق الذي استغرق قرابة سبع ساعات ماتشوف الا الغزلان على اليمين ثم يتقطع قلبك وتصد يسار وتشوف الغزلان ( وتقعد تصيح ) ويامالك من قولت اخخخخخخخخخ بسسسسسس.

يتبع

[ضاحي]

· صور متفرقة من الطريق الى المحمية



مزارع الشاي



ورق الشاي





ورق الشاي



مزارع الشاي

يتبع

[ضاحي]

تجار سلة على وزن تجار شنطة يبيعون شاي عن المزارع



شجرة الاكاسيا





احد فنادق الخمس نجوم اللي على الطريق الى ماساي مارى لمن اعياة الطريق

يتبع

[ضاحي]

بعد وصولنا الى منطقة ماساي مارا

· رحنا الى احد المعسكرات القريبه من المحمية وهي عبارة عن مخيمان للتاجير واسمها



لاتصدقون الكلام اللي بالانجليزي

واخذنا خيمتين فيها وبغينا نتوهق لاننا وصلنا متأخرين ولاحجزنا لكن السنافي اللى معنا ( جيمس ) قال لنا لاتشيلون هم ( طبعا قالها بالانجليزي) يوم وصلنا راح للموظف قال الموظف ماهناش والله الورطة وين تنام ياولد ، نزل وراح لمديرة المعسكر وهج عيونه عليه وهاشه بالكيني وعلى طول عطونا خيمتين.

· دخلنا اغراضنا ( واحجوا وش طلبنا من جيمس ) ؟ قلنا نبي ذبيحه تويس مهب كبير ( ياخوان مادري وش بلانا لازم ذبايح بكل مكان عربوه ) قال هالحين اسنعكم قالها بالانجليزي طبعا المعسكر فيه حراسة رجال من قبيلة الماساي مسك واحد منهم ورطنوا شوي يوم الرجال قال بلاحراسه بلا هم راح يجيب الذبيحه تدرون متى جاء الساعة 9:30 وحنا كنا ناوين نذبحة ونتعشاه بس مابقى الا خير لاحقين قلنا له خذا فلوسة 140 ريال وخله عندك الى باكر طبعا دفعنا القروش علشان مايتعشانا ذاك الرجال البليّه اللى كبر اللايحة خصوصا انه تعب وراح يجيب التيس من بعيد خفنا نقول تأخرت وبعدين يتوطانا.

· خلال الوقت هذا تقهوينا وقدعنا وتعشينا والحمد لله على النعمة.

وهذي صور من المخيم والخيام المستأجرة



شوفو هاالمنقد اللي نطبخ عليه شريناه ب7 ريال وشرينا فحم وصار هو قزّنا بس يافحمهم رهييب



هذي الخيمة عبارة عن سريرين بدون منافعهم الحمام مشترك

يتبع

[ضاحي]

يوم الثلاثاء 8 / 8 / 2006

الصحيان باكرا للذهاب الى المحمية

· الدخول الى المحمية وكان بسعر 30 $





بوابة المحمية

· تمشينا بالمحمية واول ما دخلنا تخابروا اهل الباصات عن طريق الراديو ان فيه الفهود صادت فريسة وعلطول عليها وشفنا الفهود الصيادة وهي تفترس الصيد اللي صادته قبل شوي صور طبعا مشهد الفهود نادر جدا حتى انه فية بعض الناس يجلس اسبوع كامل مايحصل له شوفتها لكن التوفيق من الله





· وشفنا من الحيوانات الكثير ملك الغابة والفيلة والزرافات والغزلان بانواعها والوعول وفرس النهر وحمير الوحش وبقر الوحش ( بقر النو) وكان في هذا الوقت وقت هجرة النو من تنزانيا ( محمية سرينقيتي) الى كينيا فكان يتواجد باعداد كبيرة جدا وهذا موسم الهجرة يقصدة الاوربيون من كل مكان لمشاهدة هجرة البقر وهذه بعض الصور من داخل المحمية



مادري عنا معطينا ظهره طبعا من الاحترام الزايد



والاخ هذا مهب داري عن احد

يتبع

[ضاحي]

شوفوا الترتيب كل سيارة تاقف لمدة بسيطة للتصوير والمشاهدة عن قرب بعدين يمشي ويجي اللي بعدة طابور منظم





فرس النهر



هذي بعارينهم جمع بعرور وهو الجمل



· وبعد التمشي رجعنا الى المعسكر علشان التويس نذبحة ونطبخ غدينا

· وصلنا وذكينا التيس وخلينا رجال الماساي يكملون السلخ علشان نشوف طريقتهم ( تراه مهب عجز بنا وكسل ) بس نشوف ونتفرج وكانوا وهم يصلخون حريصين على الجلد اكثر من اللحم علشان يستفيدوا منه

· وعلى الكاتم طبخنا غدانا وتغدينا وعينا من الله خير

يتبع

[ضاحي]

· في العصر رحنا الى قرى قبيلة الماساى نشوف طريقة حياتهم وتقاليدهم المعيشيه وكانت هذه الصور



بداية الاستقبال بعد ما اخذو الدراهم 20 $ للشخص (ايه تستاهل هالمبلغ حنا نبي نروح كل يوم)



والاناشيد الحماسية ماندري وش يقولون وشكلهم يحشون بنا للمعلومية تراهم كلهم رجال



شوفوا النشاط تقل سبرنق



هذا بعد وهو ماشد حيلة للنطه



هذا ابوهم كلهم عندة 7 حريم وعمرة بالتسعين والبشر اللي استقبلونا كلهم عياله



طريقة شب النار

يتبع

[ضاحي]

شوفوا البودرة اللي تطلع من الخشب حارة وتوضع وانتم بكرامه على روث يابس




وانفخ لاتنفخ الين تعجعج





· رجعنا الى المخيم وكالعاده قهوه وقدوع وشاهي تقول (مشروط علينا ) ولما جن الليل وااغربالي من اللي يبي يصير.

· بدينا نشوي من اللحم ( اذكرو الله لاتقولون ياكلون مرتين الغداء كان بدري وكرفنا الين جعنا ) احجو وش صار هذه الليلة ؟؟؟؟؟؟

· وحنا نشوي سمعنا صوت وياله من صوت تدرون وشوا ((ملك الغابة )) بالجوار يزئر بالقرب من المخيم طبعا لااسوار ولايحزنون الدعوه مفتوحة ( خر مر ) هذا مصطلح مهب بالقاموس ولايمكن شرحة هو كما هو، سكت الزئير بعدها انطفأ الماطور حق الكهرباء وغدة الدنيا (خرمس) لاتسألون عن معنى هذه الكلمات اللي ماعاش هالمواقف مايفهمها فجأة رجع الزئير وكان قريب جدا وعينك ماتشوف الا النور كل اللي بالمخيم انحاشوا اللي بخيمتة واللي بالسيارة وازبن لاتزبن .تدرون مع ذلك اخوكم كان اشجع واحد واسرعهم بالوصول الى الخيمة وتسكير السحابات على وانا بوسط الخيمة وقالوا لي بعدين انهم يبي يحطونن بكتاب جينيس للارقام القياسيه .وكانت تجربة فريدة من نوعها والله ياهي روعه ( هو بالحقيقة انا شجاع مثل عنترة ولكن وش يعرف الاسد اني عنترة) واخيرا هداءت العاصفة وذهب الغضنفر الى اهله.

يتبع

[ضاحي]

يوم الاربعاء 9/8/2006

ربطنا عفوشنا وركبنا راجعين الى نيروبي وتوقفنا على مرتفع يطل على وادي اسمه ريفت فالي

( RIFT VALLEY GREAT ) وهذا الوادي حسب مايقال وماهو موضح بالخارطة يمتد من فلسطين الحبيبة الى دولة موزنبيق بطول قدرة 9600 كم ويقال انه عند افتراق القارات نشاء هذا الوادي والذي يعتبر البحر الاحمر جزء منه حسب الرواية والخارطة وفي هذا الوادي يوجد بعض البحيرات المالحة متفرقة على اجزاء منه مثل بحيرة محمية ناكورو ويوجد ايضا بعض البحيرات الحلوة .







صورة للوادي



هذي وبران الوادي

وكان هناك وقفت استراحة في هذا المكان الجميل للراحة وشرب الشاي

يتبع

[ضاحي]

· وبعد الوصول الى نيروبي كنا حاجزين في فندق اسمة ( Kenya comfort )





هذا عنوانه





· وكان بسعر 45$ للغرفة

· ادخلنا اغراضنا ورحنا للجامع وصلينا الظهر والعصر جمع تأخير

· هالحين وقت العشاء رحنا نتعشاء في مطعم بيتزا دبنهامز والطلب بيتزا وهمبرقر ( قولوا ماشاء الله)

· رجعنا للجامع وصلينا المغرب والعشاء جمع تقديم ومنه الى الفندق لتضبيط الاغراض السفره باكر الفجر بدري .



يوم الخميس 10 /8/2006

· صحينا الساعة 4 الفجر وكنا مرتبين مع جيمس يودينا للمطار الساعة 4:30

· في المطار انهينا اجراءات السفر وصار لنا مثل ما قال اخونا رحال الخبر حول موضوع الشهادة الصحية لكن على مين كان الجواب جاهز ( قلنا لهم حنا السعوديين مايحتاج لنا شهادة ) وعدت بسلام واقلعنا الى جوهانسبيرج الساعة 7 وصلنا الساعة 10:40 صباحا.

[مسافر1]

جهد جميل أخي ضاحي ..
وتقرير بحق مميز .
ورحلة من الرحلات الغنية بالتفصيل والبيان..
لك كل الشكر والتقدير ..