المشاركة الأصلية كتبت بواسطة مكشات
الله يعطّر سيرة( الراس) تعطير
....... توّجت بحضورك تواضع مقالي
ديباجةٍ فيها عطور النّواوير
....... مثل الربيع لراعي الذّود غالي
اللي عطاه الله عفرٍ مغاتير
..... أزرى يعشّيها وشحّ الريالِ
حلّيت مثل الغيث لا جفّت البير
..... تروي العروق الضاميات النّحالي
طلّيت عيد و جيّتك لي تباشير
..... طلّة عزيزٍ للرفيق الموالي
حليت مثل النور للدار تنوير
..... يكشف سناك بمظلمات الليالي
راس الهرم ( مكشات) يكتب تعابير
مثل القراح العذب جمٍّ زلالي
كنّا نجي للدار مثل المسايير
واليوم كنّه واحدِ من عيالي
حياك ربي عدّ ما غرّد الطير
...... واعداد نجمٍ في السموات عالي
واعداد ما داجت ورود ومصادير
..... على البسيطة من وحوش وحلالِ
أشكر حضورك مع تحية وتقدير
..... تنصا جنابك يوم طيّبت فالي
===========
تحياتي لقلبك