شيهانه صايده وجير صايد للبيع

[القرناس1]

بسم الله الرحمن الرحيم

اخواني الاعزاء
واحد من الربع عنده جير طول 17 عرض 18 مغتر ينقل ثالث توه حاذف الامواس
صايد الموسم اللي راح ثلاث حباري وخمس كراوين وطياره موقف
الطير راكد (يفرع على التكايه) ويلاعب الملواح وطبوعه جدا ممتازه لا يحقل
ولا يصيح ولا ينقل علفته
السوم عليه 10000 عشرة آلاف ريال

وهذي صورته
http://www.mekshat.com/pix/upload/im...k16600_444.jpg

بالنسبه للشيهانه
صادت بكر حبارى وكراوين والموسم اللي راح ثنو ماراح عليها شي من الكراوين
اما الحبارى ماشافتها ثنو
تنقل ثالث طول 15 عرض 16 تقريبا
باقي فيها الموس والطويله
السوم عليها 9000 تسعة آلاف ريال
طبوعها زينه

وهذي صورها
http://www.mekshat.com/pix/upload/im...k16600_555.jpg

http://www.mekshat.com/pix/upload/im...k16600_333.jpg


وأي استفسار آخر الرجا الارسال على الخاص واعطيه رقم راعيها وهو يتفاهم معه

والله يوفقنا وياكم
تقبلو تحيات اخوكم القرناس1

[الاشعل 316]

بالتوفيق ان شاء الله

للبايع والمشتري

تقبل تحيات

اخوك ابو سطام

[مبسوط]

بالتوفيق يالقرناس
والله يرزقك بالبيعه الطيبة ان شالله
(اشوفك غطيت على الباحوث في الطيور "امزح معك" )

اخوك/ مبسوط

[القرناس1]

بالتوفيق يالقرناس
والله يرزقك بالبيعه الطيبة ان شالله
(اشوفك غطيت على الباحوث في الطيور "امزح معك" )

اخوك/ مبسوط

حياك الله مبسوط
ليش الله يهديك شايفني احرج ولا شارط سعي
هذولا اخوان وربع ولحوات غانمه إن نفعتهم انا ولا نفعهم غيري


حياك الله اخوي مبسوط والمزوح تجي وتروح


تقبلو تحيات اخوكم القرناس1

[حطاااااب]

السلام عليكم ورحمة الله وبركاته
الله يتمم بالقيمه اللي بيونها اهلها
وتستاهل الطيور
بالنسبه للجير
اذا مشروط وسالم العيوب
اسوم 12 الف
والله يوفق للجميع

[القرناس1]

السلام عليكم ورحمة الله وبركاته


الله يتمم بالقيمه اللي بيونها اهلها
وتستاهل الطيور
بالنسبه للجير
اذا مشروط وسالم العيوب
اسوم 12 الف
والله يوفق للجميع

وعليك السلام ورحمة الله وبركاته
الله يجزاك خير ياغالي
على العموم هذا رقم جوال راعيه
0504150562
تقدر تتصل فيه وتاخذ من راسه

تمنياتي للجميع بالتوفيق

[قلب شاهين]

الله يرزقك بالبيعه الطيبه ،،

تحياتي / صقار القصيم ،،

[مبسوط]

لا ابد اخوي قرناس وبيض الله وجهك وعداك العيب ما كنت اقصد كذا


والعذر والسموحه
مبسوط

[القرناس1]

لا ابد اخوي قرناس وبيض الله وجهك وعداك العيب ما كنت اقصد كذا


والعذر والسموحه
مبسوط

مرحبابك
ما صار شي يستحق العذر وانا اخوك
عزيز وغالي اخوي مبسوط

[الكاشف الاشقر]

السلام عليكم ورحمة الله وبركاته
اخوي القرناس وين انت في السعوديه وين حدودك
وكم حدك على الشاهين وابغى علومه كاملا

[حطاااااب]

السلام عليكم ورحمة الله وبركاته
القرناس1
على العموم راعي الجوال
مرتين اتصل مايرد
؟؟؟
ان شاءلله خير

[القرناس1]

حياكم الله جميعا

اخوي الكاشف الاشقر تقدر تكلم راعيها من خلال الرقم ادناه

اخوي حطاااب مرحبابك حاول تدق عليه بعد المغرب

رقم الجوال للتأكيد 0504150562

تمنياتي للجميع بالتوفيق

تقبلو تحيات اخوكم القرناس1

[ابو سمحه]

لشاهين اسمحلي والحك ماينزعل منه ماهو 9000

[قرناس حائل]

مساكم الله بالخير

الطير اللي بالصورة الاولى هل هو جير ام حر ؟

اظن والله اعلم انه حر

والله ان شاء الله يرزقكم بالبيعة اللي تسر الخاطر

[القرناس1]

لشاهين اسمحلي والحك ماينزعل منه ماهو 9000

اخوي ابو سمحة
والله مادري شتقصد بالضبط

لكن بالسنبه للشاهين مكلم راعيها اليوم ووصل السوم عليها 10000 عشرة آلاف ريال
والله يوفق الجميع