نبذة عن شاعر المقناص بدر الحويفي مع بعض القصائد

[صقر]

السلام عليكم ورحمة الله وبركاته

يعتبر الشاعر من كبار شعراء النبط بالمملكة العربية السعودية وله لمساته الواضحة وتأثيره
القوي على مسارالشعر النبطي في المملكة والخليج العربي ويتجلى ذلك واضحا بالمساجلات الشعرية
مع شعراء داخل المملكة والخليح، ومما لا شك فيه ان كل واحد يعشق البر والمقناص لا بد وانه
ترنم بأحد ابيات الحويفي حيث ان شعره يتميز بالسهولة وموافقتها لأغلب احداث المقناص حيث
ان الشاعر مرعليه من الاحداث ما يجعل قريحته تحيط بكل احداث الرحلات البرية.

البطاقة الشخصية

بدر بن عواد الحويفي
الميلاد 1348هـ
مكان الميلاد قرية القرين غرب القصيم
وشاعرنا اليوم موظف متقاعد بوزارة الزراعة فرع الرس
ويسكن الان مدينة الرس (أطال الله في عمره)

ويوجد للشاعر ديوان يتكون من جزئين جمعهما ابنه محمد

وبما اننا في منتدى مكشات
إذن ساعرض بعض قصائده التي قالها في المقناص:

وبسم الله نبدأ:


نصحه بعض اصدقائه بترك هواية الصيد معللين ذلك بأنه لا يستفيد منها وانها تشغله عن امور الدنيا

وينصحونه بأن يتجه الى التجارة ويترك القنص . فرد عليهم بهذه القصيدة:

[poet font="Simplified Arabic,4,black,normal,normal" bkcolor="transparent" bkimage="backgrounds/1.gif" border="none,4,gray" type=0 line=200% align=center use=ex length=0 char="" num="0,black" filter=""]
والله يلولا غايتي مانقل الطير=مانقل على كفي خفوق الجناحي
ابي اليا فزت تقل شعف معصير=واقفت تعقد مع سهال فياحي
ليا تلني واقفى يخطرف له السير=جايع وحاديه الزعل من صياحي
لاطقها بالصايدين المواخير=طاحت تدوس ونجم الطير صاحي
وليا حصل جول رتوع ومخامير=في ماقع عن نشر الادباش زاحي
وتركزن له تقل شول معاشير=وغزن غلبهن عقب ماهن مطاحي
منهن علق اللي مثل بكرة الظير=ونكد عليهن عقب ماهن ضواحي
وجيته يمزرها على القاع تمزير=يشلق معلق ثديها بالجناحي
هذيك والله منوتي يالمناعير=ان كان انا مجنون وان كنت صاحي
وكل برايه له تصرف وتدبير=ولاحد(ن)على الدنيا جلس واستراحي
وارزاق خلق الله وهايب وتقدير=ورزقي على مجري هبوب الرياحي
ولا ينقص الرجال كثر المخاسير=لصاردون الوجه ماهو سفاحي
والقل ما عذرب رجال بهم خير=والمال ماعز الرجال الشحاحي
مار اتركوني يالوجيه المسافير=هذاالذي وافق عليه اقتراحي
[/poet]

وهذه القصيدة شارك بها العضو(غنام) وساعده بها (القرناس المهاجر)

[poet font="Simplified Arabic,4,black,normal,normal" bkcolor="transparent" bkimage="backgrounds/2.gif" border="none,4,gray" type=0 line=200% align=center use=ex length=0 char="" num="0,black" filter=""]
ياللي طلبتم نبذةِ من قصيدي=عن واقع المعقول لا انقص ولا أزيد
أناغرامي وانبساطي وعيدي=تفريعة القرناس بأرض بها صيد
لاشطب الصيحان روس الزبيدي=والعشب جاله بالمثاني عناقيد
والبدو مايبدي لهم بالشديدي=تسعين ليله ما حكوا بالمواريد
ضيق بهم در الغنم والجميدي=مايشربون الا حليب المجاديد
والبل وبرها طار وأبدل جديدي=ورودم على الفطر سوات المجاليد
من فضل ربي كل يوم تزيدي=قامت عشايرها تسن المفاريد
والفجر تسمع للطيور أتغريدي=ليل الشتاء طوله عليهن سراميد
هذيك والله منوتي ياعضيدي=لا جابها الله من صدوق المواعيد
ماكفه الديّر لرجم المفيدي=وذوب على خشم الخدار ومشاحيد
مجهود من نو الجباه السديدي=وحصل لها قبل القارب تماديد
غثوه على روس الشجروالهضيدي=وساق وتساقى للنفود وتخاديد
وفيض على فيحان ريف المعيدي=نبي لنابشعاف لوقه مطاريد
على أوسوق مقربات البعيدي=من فوقهن يازين مزح الأواليد
لافرع النادر وطلعه وكيدي وحوٌل=على جول الحباري تقل حيد
وسلط على الخرب النشيط العنيدي=حاسه وداسه والحباري ملابيد
يقضي بها الصقار يوم جديدي=في ساعة مابه وجيه مقاريد
هذا هوى بالي وهذا رصيدي=سوق النظر بين السهال الجراهيد
نومي تحت طل النجوم الجليدي=عندي كنب ومنجد زل نتجيد
لو لامني خطو الغشيم البليدي=طرد الولع مابه عليه مناقيد
وشوف الفياض المخضرة يالحميدي=وشمة ذعاذيع الهوا عندنا عيد
وللكيف ذوق ولاستماع النشيدي=لا قلطوا رسلان والا بغاديد
ثنتين هيل وثالثتهن عويدي=وكل على ما تطلب النفس وتريد
وقدوعهن من طلع هدب الجريدي=احسن نمونه من نما شرع الغيد
وسوالف ما قيل فيها جحيدي=بالصيد لا نمة ولا هرابيد
ساعات نقضيها ويوم سعيدي=ولا دامت الدنيا لعامر وابا زيد
الدايم الله والفنا للعبيدي=والرزق عند منزل الدر بالديد
محيي الهشيم اللي عروقه هميدي=رزاق ما تحت الصخور الجلاميد
والله يدبرنا على ما يريدي=وصلوا على اللي وحد الدين توحيد
[/poet]

وكتب العضو (نهار) هذه القصيدة للشاعر بدر الحويفي

[poet font="Simplified Arabic,4,black,normal,normal" bkcolor="transparent" bkimage="backgrounds/3.gif" border="none,4,gray" type=0 line=200% align=center use=ex length=0 char="" num="0,black" filter=""]
الله من قلب هجوسه تمله=مل الغضا لمبهرات المباهير
وشوف البراري والفضا ولعة له=لا شفت بالمنشا مزون مزابير
ياموتري ريحتك القيض كله=أبيك لاقامت تطول المشاوير
لابد لك لابرّد الوقت تله=يحن ماطورك على ساقة الطير
في ماقعِِ بعض العرب مايدله=مدهل لفتخان الرجال المناعير
نبي لنا معهم وناسه وفله=مع درب مسهاج الوسوم المباكير
ليا اصبحت روس النوازي مطله=عقب الجليد نكّسر الثلج تكسير
ثم أصبح القرناس من عقب طله=يوجس بجلده مثل دق المسامير
واستطلعوا خطو أشقر عادة له=حرش الكفوف يمزّر الخرب تمزير
والبارحه حل المساء قد حصل له=عشاءخفيف من ابرق الريش تنسير
لافرعوه وشافهن وادرجن له=وأدلج وراع الجمس كفه علي القير
وتضايقن عقب الفضا وأحضرن له=وسلط علي وحده وذلكّ مخامير
وليا المشبب عندهم مزهب له=باللي ندبها طيّر الريش تطيير
والخرب طقه ماتعدى محله=والثالثة فرّت ولاعينت خير
بطيارها شفنا غياره وخله=زمّت وحوّلها ولي المقادير
أعلق بها اللي عوقهن سهمة له=شيهان عوق ملوعات المعاشير
ملموم مثل الصول طوله بجله=أجرد يصخّر شرد البرق تصخير
وكل ركض للي بوجهه يشله=تزارقوهن بالحدود البواتير
أكبودهم عقب القرايا مغله=تسع الشهور نقزر الوقت تقزير
وركبوا وقالوا تبّع الجمس ظله=لاما نقول أوقف كفيت العواثير
نبى لنا خد مهامل امزله=مادوجت فيها الغنم والمظاهير
تلقى بها زرق المعارف محله=بيض الدواغر متعبات المداوير
هذا هوى اللي قزّر القيض كله=ماشاف غير القوبعة والعصافير
[/poet]

ايضا عضونا البيطار اورد هذه القصيدة

[poet font="Simplified Arabic,4,black,normal,normal" bkcolor="transparent" bkimage="backgrounds/4.gif" border="none,4,gray" type=0 line=200% align=center use=ex length=0 char="" num="0,black" filter=""]
متى على الله تبتدي رخصة الطير=وعقب الرباط يصف ريش القرانيس
والمزن بالمنشأ نشوفه مزابير=والبرق تالي الليل مثل المقابيس
ابي إليا قالوا مشينا على خير=والراي شدوه العيال المدابيس
وتواعدوا عقب العتيم المناعير=مسرى تحت داج الظلام الغطاليس
ربع لهم عندي معزه وتقدير=مدلهين اللي بقلبه هواجيس
وافين باللزمات ماهم مثابير=شيالة الكايد إليا دنق الهيس
يبون من خشم المسمى محادير=نشمل إليا لوقا ونجنب الى التيس
لاوقفوا بارض(ن)بها اثرة وتأثير=وفكوا براقعهن حرار(ن)فواعيس
والطير تل وشافهن بالعثامير=الخرب كوبر والطبايل مفانيس
واعلق به اللي مزر الريش تمزير=اللي مخاليبه سواة الدبابيس
واللي تروح طيار ما عينت خير=شيهان نكسها على القاع تنكيس
نادر بحر ياخذ عليها مشاوير=ماهو بوكري(ن)يهاب الدماميس
وإليا تلافوا بالمعشى مناعير=في خايع(ن)جرمه سواة الكناديس
وشبوا وقادوا للسوالف معابير=النجر يلعي والمباهر متاريس
خفاف النفوس رجال ماهم مثابير=ولافيهم اللي فيه كبر(ن)ولا فيس
وجوهم يبون الكيف ربع(ن)مسايير=قالوا علوم الربع قالوا عواسيس
نذكر لكم جول(ن)رثعنابه عصير=حازن من الخبه يبن الطعاميس
في ماقع(ن)عقب المطر مابعد ذير=تومي بنواره هبوب النسانيس
والصبح مدوا للحراوي مداوير=وطاحوا بجرتهن جداد ومداريس
وحثوا بهن بالخور مثل الطوابير=وتزارقن قوع الشجر والمتاريس
وتنهض اللي كن عينه سنا الكير=كد ذوقوه من الثنادي تلاميس
والخرب قام يحوز دون المعاشير=وزته وطار الريش مثل القراطيس
ومدوا عليهن مبهمات المواصير=شغل الفرنج مقولمات النواديس
وصادوا و وفقهم ولي المقادير=واهل الوكارى ربطوهن مفاليس
هذي حلاة الصيد وقت المخاضير=وبعض الصقاره يالنشاما مطاريس
[/poet]

ايضا العضو(النادر) اورد هذه المساجلة بين الشاعر واحد طيوره عندما عجز عن طرح احدى الحباري:

[poet font="Simplified Arabic,4,black,normal,normal" bkcolor="transparent" bkimage="backgrounds/5.gif" border="none,4,gray" type=0 line=200% align=center use=ex length=0 char="" num="0,black" filter=""]
الخرب ياغنام ماهوب كروان=تبرك عليه ولايهمك صفيره
الخرب عابي لك قنابل بخزان=يبي على خشمك يفك الذخيره
غرك فعولك يوم نقنص لفيحان=اثرك جيد لاقضبت الكسيره
غنام:
انته وراك تذمني يابو سلمان=والله لاعوضك كان حصلت غيره
وانا الحقيقه يوم هديت غلطان=جيته مع البومه واثرها خطيره
مامقصدي خايف من الخرب طقعان=لكن ماجيته بعرف وبصيره
خربٍ نشيط وله اسبوعين بشمان=مليان من قطف الخزامى مصيره
هو طار متعافي وانا طرت عميان=عيوني سدد الله نظيره
[/poet]

اخونا العضو (مراكي الذيب) اورد هذه القصيدة ولكنها ناقصة واكملتها من الديوان

[poet font="Simplified Arabic,4,black,normal,normal" bkcolor="transparent" bkimage="backgrounds/6.gif" border="none,4,gray" type=0 line=200% align=center use=ex length=0 char="" num="0,black" filter=""]
يامل قلب دق به كل طاري=طواريٍ باقصى الضماير تتله
وشفق على شوف الفضا والبراري=لا صار معه مشببٍ مسند له
خطو أبلج لملاقف الصيد ضاري=جدع الضريبة بالسهم عادةٍ له
قرم بوجهه للمروه شواري=رايه سديد وكل درب يدله
ماهو حضيبي مزاجه تجاري=ليا عقدت الراي عود يفله
أول نهارك يعجبك ما أنت داري=مار البلا تالي نهارك تمله
أبا امدح الطيب ولاني مداري=واللاش لا خايف ولا حاسب له
الفرق باللي ياصلون المحاري=وإلا الردي شرهات مثلي تزله
أبي خويٍ ضاريٍ بالمساري=ماهو مهينٍ يرقد الليل كله
ومعنا قطامي يصيد الحباري=لحّاق لاكوبر له الخرب شله
خطو اشقر جثل من الريش عاري=افحج مخاليبه سوات الاهلة
به دق ريش مثل دق الخزاري=مهدف ورا مناكبة متقلة
منخر وبوز فيه عدة مواري=يحتار به راع النظر لا فطن له
مهوب كفاخ طفوق زعاري=طلعه حقاق ان شافهن ساوقن له
لا شافهن متطاولات المذاري=عقد وحق الطلع والسير تلة
يحول اللي طار منهن اجباري=ذباح للي يوم هد سجدن له
يازين طلعه بالضحى والعصاري=لامن خشنات الغلب خيشن له
هذيك والله منوتي واختياري=لو كل من يطلب لزوم حصل له
لو ان حظي مع مزاجي يباري=سجلت له صفحة وفا بالمجلة
ما لي هدف بالسوق بايع وشاري=قلبي ذعاذيع الهوا ولعة له
انا غرامي مع فجوج الصحاري=وشوف الرجوم النايفات المطلة
لا شفت بالريضان نقع وخباري=راح الزعل والبسط حل بمحله
بارض بها للصيد عينه واثاري=فيه القطا تلقى فروقه محله
مهامل تردم شجرها الذواري=نبي لنا فيها وناسة وفلة
يازين شبة نارنا بالغداري=والكيف ابو صالح جلس وارتجلّه
والما مفوح في نظيف الغضاري=وصفر يجاذبهن على جال ملة
وصاحب لهن تقول ماخذ حذاري=وفنجالهن يجلى عن الكبد علّة
واللي على مثلي من الناس زاري=لاسامع قوله ولا مصغي له
وافخر بحبي للصقارة واماري=ورزقي على اللي كون الكون كله
[/poet]

الشاعر يعلن الفرح بانتهاء الصيف والمقيض الذي يكون ثقيلا على الصقاقير:

[poet font="Simplified Arabic,4,black,normal,normal" bkcolor="transparent" bkimage="backgrounds/7.gif" border="none,4,gray" type=0 line=200% align=center use=ex length=0 char="" num="0,black" filter=""]
القيض راح وبردن الليالي=والطير عقب القرنسة كمّل الريش
والمزن بالمنشأ غدا له ظلالي=وتراكمت غر المزون المراهيش
وتذكر الصقار وقت مضى لي=ايام جالي بالغبية مغابيش
يوم الحباري حوزهن بالدحالي=ليا فرع النادر طلبهن مخاييش
والخرب بادناهن يصير الموالي=يوجس براسه للشجاعة نغاميش
خرب مغفل ماحسب للتوالي=طقيق حنكانه سوات القراقيش
وجاه اشقر جوفه من النسر خالي=جزام صياده يقض النشانيش
له بالطيور البرق فعل ومدالي=ضربه عطب ماهو مسوح وتناويش
ذاك الزمان اللي به المر حالي=يوم الصقارة تنعش القلب وتعيش
واليوم لو نقنص جنوب وشمالي=صرنا على ما قيل مثل القراريش
ما شوف والله للصقارة مجالي=نقفي ونقبل يالحميدي على ويش
مهما تجاوزنا فياح السهالي=غير الدجاجة ما لقينا عراميش
ما شوف غير القوبعة والكحالي=وزرق الثعال اللي سواة القرافيش
عزي لحالك يازميلي وحالي=بارض الرحيل نفتش القشع تفتيش
والله يلولا الطير بالقلب غالي=اني لاجوز من العنا والمطاريش
لاكان حب الطير شارك اعيالي=ولو ما تسلى بالولع كيف اباعيش
والله ماني عن غلا الطير سالي=لو نعلفه من بارد الخبز والعيش
لوكان للخارج نشد الرحالي=وندفع على شانه ضريبة وبخشيش
[/poet]

وايضا خاطب الشاعر بدر الحويفي صديقه الشاعر / مبارك بن منير العوني حين يقول:

[poet font="Simplified Arabic,4,black,normal,normal" bkcolor="transparent" bkimage="backgrounds/8.gif" border="none,4,gray" type=0 line=200% align=center use=ex length=0 char="" num="0,black" filter=""]
يامبارك الصقار قرب هبابه=والطير قرنس واكمل الريش تكميل
والوسم له يومين داخل حسابه=الله لايحرم وطنا من السيل
يالله بنو يوم يردم ربابه=توابعه مثل الجبال المظاليل
يومر على غسل المحول انصبابه=في قدرة الخالق يكيله مكاييل
يحيي الهشيم اللي يبس في ترابه=يبست عروقه والهوا شالته شيل
يبس الشجر والقاع والعجز صابه=وضاقت على راع الحلال المهازيل
راع المواشي زادها من زهابه=يرهن لها الذمة ويشري لها الكيف
نشف الثرى والبر مقحط جنابه=واللي حواله دون ذاق البهاليل
يالله بدعوة مسلم مستجابه=من عابد له نافلة تالي الليل
يطلب بها ربه ويرجي ثوابه=وقلبه نظيف من الريا والتضاليل
رزقه حلال وملبسه واكتسابه=ما للربا بحساب رزقه مداخيل
دعواه عن عجم البهايم نيابه=اللي شكت من قوتها فترة الحيل
يفتح لها رب السموات باه=دون السما ما يعترضها عراقيل
نطلب مطر رحمة ثقيل سحابه=في البروق تلوح مثل القناديل
ياخذ ثمان ايام حسبة اوجابه=دقاق رفاق زلوفه هماليل
واليا انتهى الثامن وعزل ضبابه=نهار تاسع باذره كنه النيل
والعصر لامن المولع مشى به=يغيب هوجاسه وينسى الولاويل
لا صاغ له فنجال عذب شرابه=وزنه غدير وشب نار المعاميل
وجذب لهن جمر كثيف التهابه=والكيف طاب وساقها بالفناجيل
على نشاما ماخلطهم قلابة=خفاف النفوس رجال ماهم دعابيل
ودارت سواليف مزوح وعجابه=وطرايف تشفق عليها الرجاجيل
هذا منى كل شخص وادابه=وكل على شبحه يصوغ التماثيل
الا الذي طرد الولع ما شقى به=ولا يعجبه شوف الزهر بالهذاليل
مرتاح لو طاح المطر ما درى به=لو تنشده ما يعرف الجدي وسهيل
[/poet]

مقعد العياضي صديق حميم للشاعر بدر ودائما ينصحه بترك الصيد فرد عليه بدر بهذه الأبيات:

[poet font="Simplified Arabic,4,black,normal,normal" bkcolor="transparent" bkimage="backgrounds/9.gif" border="none,4,gray" type=0 line=200% align=center use=ex length=0 char="" num="0,black" filter=""]
راع الولع لو تنصحه يالعياضي=المنتحي شور العرب ما يطيعه
لو قلت طعني قلت بالقلب حاضي=مارتاح لين البرد يلوي صقيعه
لاشفت نزاز الطفل بالفياضي=والسيل ناقع والمنادي سبيعة
واخضر نبات القاع عقب الرماضي=زان التمشي بالديار الوسيعة
هذيك والله منوتي يبو ماضي=باقصى الخرم والا يسار الوديعة
بالبر لو برد مبسوط راضي=طبعي وكل له مزاج وطبيعة
وتحت المكيف بس اهوجس وفاضي=اوجس كسل واوجس عظامي وجيعة
برده يعقب بالمفاصل شواظي=يدخل صميم العظام المنيعة
لاقمت جاني بالعظام انتفاضي=لو ما اتعنز طحت طيحة وقيعة
انا خشن ومسن ماني غضاضي=ولفح الهبايب والسموم استطيعه
وليا انتحى هاجوس جاشي وهاضي=مالي مع اهل السوق شريه وبيعه
دنيت ما يطوي بعيد الاراضي=وسلمت مفتاح الوداعة وديعة
وكملت من راع البقالة مقاضي=مدهال مكفي الهموم وربيعه
ومعي اشقر جثل المناكب غلاضي=افحج مسرول والمناخر وسيعة
والبوز وافي والثنادي عراضي=حرش كفوفه مثل شوك النقيعه
صيروم ضربه بالهداد انقضاضي=مضرب كفوفه بالحباري شنيعه
طلعه عليهن فزة بانتهاضي=يردم وله كسرة عليهن سريعة
[/poet]


ارجو ان يكون جهدي المتواضع حاز على اعجابكم

شكر خاص للمشرف المسفهل على التوجيهات والدعم

كما ارجو ان يسمح لي بعض الاعضاء الذين اوردوا بعض القصائد للشاعر بدر الحويفي وذكرتهم اعلى كل قصيدة حفاظا على جهدهم. وهم
غنام/القرناس المهاجر/نهار/النادر/البيطار/مراكي الذيب

وتقبلوا تحيات اخوكم صقر

[البيطار]

..............مشكور اخوي صقر على هالنبذة الرائعة للشاعر الرائع بد ر الحويفي

........وماقصرت والله......... ويمنى ما نعدمها.......والله يعوض تعبك على هالمشاركة بالعافية وطول العمر على عمل صالح ان شاء الله


..............ولا تحرمنا من امثاله

والسلام عليكم

[وكرى بحر]

مشكور اخوى صقر الله يعطيك العافيه

[القرناس المهاجر]

يستاهل الشاعر الكبير والخبير في قصائد المقناص والحياة البرية الشاعر/ بدر الحويفي الحربي
مقدمة رائعة 00 وتسع قصائد اروع في الصيد والرحلات والأمنيات

اشكرك على الإشادة وليس لنا فضل فقط قمنا بالواجب 00 وبدر الحويفي يعتبر رمز لكل عاشق مغرم بالصيد والحياة الفطرية بمعناها الصحيح حينما كانت بكراً .. اما الآن على الدنيا السلآم ......؟؟

مشكور أخي صقر على هذا لإخـتيار والسرد الوافي 00 جزاك الله كل خير

تقبل تحـــياتي 000

[تالي الاولين*]

.


بدر الحويفي شاعر الصقاقير

سلمت يمينك اخوي صقر على هذه المختارات لبدر الحويفي

والشكر موصول لجميع اخواني المذكورين


.

[الجمس الحمر]

ما قصرت ياصقر


جهد رائع
لشاعر رائع


مشكور

[al-nashmi]

اخونا صقر............... السلام عليك ورحمه الله وبركاته

اخوي مشكور على هالجهد الكبير الذي بذلته في اخراج بعض قصايد الشاعر الصقار بدر الحويفي
مع العلم ان كل قصائد بدر رائعه.

اخي الكريم فضلا لا امرأ نبي منك مساجلات بدر مع شعراء الكويت حول موضوع الصقاره.

وتقبل تحيات اخوك// النشمي

[صقر]

اخي العزيز البيطار
السلام عليكم ورحمة الله وبركاته

مشكور على الدعاء والله يبارك فيك
والجهد يستاهله اهل مكشات اللي هم انت وامثالك.

وشكرا لزيارتك.

[صقر]

اخوي وكري بحر

السلام عليكم ورحمة الله وبركاته

مشكور اخوي على الزيارة

والله يبارك فيك

[صقر]

اخوي القرناس المهاجر

السلام عليكم ورحمة الله وبركاته

مشكور على الزيارة وفعلا الشاعر بدر الحويفي يعتبر رمزا للصقارين وعشاق البر

واشكر لك مرورك وزيارتك

[صقر]

اخي تالي الاولين*

السلام عليكم ورحمة الله وبركاته

الله يسلمك ومشكور على زيارتك

وتقبل تحياتي

[ابو عايد]

مشكور أخي صقر على هذه القصائد الرائعه عن

الشاعر بدر الحويفي الحربي


وصح لسانك والله لا يهين اخوينا الاعضاءعلى طرح موضوع



الشاعر بدر الحويفي

وتقبل تحيات // العاشق الولهان

[المسفهل]

فعلا كما وعدت أخي العزيز صقر جاء هذا الموضوع متكاملا من كل

وجه وخصوصا في ما يتعلق بوصف الطير وقصائد القنص ...

أرجوا أن يكون هذا التميز طابعنا جميعا وهدفنا نشدان الكمال

فما أجمل أن يعرف المرء بعطائه العميق وطرحه المتميز ...

[صقر]

الاخ العزيزal-nashmi
السلام عليكم ورحمة الله وبركاته

مشكور وما قصر ت على زيارة الموضوع

ومثل ما قلت كل قصايد بدر رائعة

والحقيقة انني عند كتابة الموضوع ترددت في ادراج هذه المساجلة لأنني حرصت ان لايدخل في هذه المشاركة غير شعر بد الحويفي

ولكن بناء على طلبك سأدرج هذه المساجلة الجميلة وخصوصا انها تتكلم عن الموضوع نفسه.

هذه القصيدة موجهه للشاعرين /سمير بن صليهم الهرشاني وعايش بن مرزوق الجويسري من اهالي الكويت

الشقيقة:

[poet font="Times New Roman,5,white,bold,normal" bkcolor="transparent" bkimage="backgrounds/15.gif" border="none,4,gray" type=2 line=200% align=center use=ex length=0 char="" num="0,black" filter=" glow(color=blue,strength=5)"]
لا والله اللي راح وقت الصقارة=والبر ما يعجبك لارحت دوار
البر عج ومدلهم غباره=الشكوى لله ميته كل الاشجار
وماتت دباديب الخلا بالجحارة=قضى عليها الجوع من قل الامطار
نشكي على اللي رزقها باقتداره=اللي نصر موسى على سحار
الله يعيد لكل وادي خضاره=ويغيثنا ويبدل العسر بايسار
غيث من المنشا يعم انتشاره=دفاق رفاق حقوق ومدرار
هذا ووضعي حول طيري مداره=ابي نظر توجيه ذربين الاشوار
الطير نقله يالنشاما خسارة=ينعاف لو هو يذبح الصيد وخيار
ياسمير ياراع الولع وانت كاره=يابن صليهم مكرم الضيف والجار
محتاج رايك ياحكيم العبارة=رجال عرف ومن طويلين الاشبار
عطني نظرك الطير قطّع شكاره=عانى من البرقع غرابيل واضرار
من قل تفريعه تصيبه حراره=نقنص ونرجع ما تمغط ولا طار
انا اطلقه والا اتحمل وزاره=ياسمير انا من قصةالطير محتار
ياسمير ما شفنا من الطير باره=بلاه قل الصيد والطير ما بار
حبه بقلبي باني له عمارة=على حجر وفروعها عشرة ادوار
شعبية عندي تمثل سفارة=لو كان دور الطير مقفي ومنهار
تذكر عليه نوزته وانحداره=يشره على زرق الغلب وقع وطيار
يازين تفريعه بخطو الزبارة=بالنازية ما بين جدلا وسنّار
خطو اشقر مابه ملوع ونزاره=بالوكر ما يكفخ وللخرب حشار
واظن عايش ودعه باختياره=ماشاف له بهواية الصيد معبار
اطلق سراح الطير واصدر قراره=من عقب ماهو للمناعير سبار
ياما جهم للصيد باول نهاره=ايام هندابه مع الطير مختار
هده على المضياح من راس قارة=واهوى على روض نواميه نوار
وادلى على خرب كبار فقاره=واعلق به اللي للحفافين جزار
يوم الولع له ذوق فن ونهاره=وعايش يطلع من عكاشات وايسار
واليوم ناشه من زمانه غياره=لاباس يالطيب عسى خير ومجار
اللي فتل قيدي فتل له هجاره=على الشرف ماهو على موتة النار
والسيف لا بد له من الاندثاره=والحصن يخلف جريها طول الاعمار
واللي حذف باول شبابه جمارة=يشقى بها غيره ويقنع بما صار
وجهتها والحر تكفيه اشارة=رجال كلمتهم ثمينه وشعار
واللي يشاور ينتظر مستشاره=والشور له عند الرجاجيل مقدار
ومضمون وضعي للولع واختصاره=يالربع ماني عن غلا الطير صبار
غديت مثل اللي عليه الخفارة=بالبيت جالس بين فيّه ومصهار
ما ارتاح في جو البلد والحضارة=هوايتي شوف الصحاري والاقفار
ولا لي هواية باكتساب التجارة=والرزق عند اللي خلق خلقه اطوار
وارسلت كلمات احترام ووقارة=واقع وفا ماقلتها زيف وقمار
ورسالتي عني تنوب الزيارة=قصدي بها نوع استشارة وتذكار
مندوبنا جاكم وخوذوا اخباره=يا هل الكويت وحمضونا بالاخبار
ياهل البلاد اللي عزيز جواره=اخواننا واعواننا سر واجهار
الدين واحد والهدف والادارة=اسلام بالعليا رمز واشعار
نسير مع هدي الرسول ومساره=الدين واحد والعقيدة والانظار
ضد البغيض ليا تشايط عشاره=ليا طار في جو السما عج وغبار
وصلوا على الهادي رسول البشارة=عداد ما سار القلم فوق الاسطار
[/poet]

رد الشاعر سمير بن صليهم الهرشاني:
[poet font="Times New Roman,5,white,bold,normal" bkcolor="transparent" bkimage="backgrounds/21.gif" border="none,4,gray" type=2 line=200% align=center use=ex length=0 char="" num="0,black" filter=" glow(color=red,strength=5)"]
دن القلم واكتب املاي بشطارة=واخذ البيوت اللي تقل حص محار
من شاعر قلبه يزيد انحشارة=تواردنه جملة افكار واذكار
ماعندي الا دلتي والزقارة=وابيات شعر من عزيزات الاشعار
اهيم في حارة وقلبي بحارة=واردع هواجيسي ولا ابيح اسرار
من واهج وسط الضمير استعارة=لولاي اكنه كان وسط الحشا طار
قلبي مصد وجاه شي واداره=وذكرني الماضي وانا غافل غار
ذكرني اصحاب الندا والندارة=ومقناصنا غرا شمال عن الطار
بارض وساع وسايلات بحاره=كد على ريضانه من الوسم وابكار
متخالط ريحة نداه وعفاره=وهبوبه الغربي على وقت الاسحار
ومعنا اشقر جزل خفيف طياره=فرخ جليل ومن صواريم سنجار
ابيض حمر خالط بياضه حماره=جثل المناكب لابرق الريش فعار
لكن بعيونه سواة الشرارة=عين العديم اللي ضحى الكون مغوار
يوم القنص له مزة وازدهاره=نمسي بنور وتطلع الشمس باسرار
واليوم ما حتى نشوف السمارة=الا ليا حطيت بالعين منظار
والطير ناسينه ومخفين اثاره=ولاعندنا نية مطاريش واسفار
يا بدر تطلب مني الاستشارة=وانته بعد عارف وشاعر وصقار
ياريف ضيفانه وياريف جارة=عساك تسلم من صواديف الاقدار
الطير عندي راجح في عياره=ولا نيب الومك فيه يا طيب الثار
لو كان انا عفته وعفت احتكاره=مبطي ولا لي مع هل الطير مشوار
وليه ثمان سنين ما شفت واره=ولا عدت سيارتي سكة القار
ولكن انا ابطلب لك الاستخارة=ولله فينا ما يريده ويختار
نصيحة لك كلمة باختصارة=ياللي تحب الطير والطير نكار
اطلق سبوقة لا تجود وساره=خله يروح يبدل الدار في دار
فقده ولا شوفه ربيط حسارة=مشيع له فوق وكر ومسمار
يمكن يعيش بديرة غير داره=الطير رزقه بين مخلف ومنقار
والا اعتزم بالله وجود حضاره=وخلك على ما قيل له والد بار
من ذاق حلوه ما نشد عن مراره=ولا ينقص الدنيا ريال ودينار
يونسك في شوفته وافتراره=تلد يمه كل ما جيت مرار
يمكن يدور له الفلك باستداره=بيسر بعد عسر والايام بادوار
بامر الذي يبري كسير الجبارة=منجي الرسول وصاحبه باوسط الغار
اللي ليا ضاق الضعيف استجاره=حاكم حكيم عادل الحكم غفار
بامره يمد الكاينات بغزارة=من مدلهم تالي الليل سمار
غيم ثقيل وزايد به وجاره=مترادف يضفي على كل الاقطار
تنقر له الشرقي هبوب قطاره=ويرده الغربي على الشرق حدار
يملا الخباري والسهل والثبارة=من بعد سيله تنبت اشجار وازهار
تشوف في الديدحان انتشاره=وصدي عشبه غردت فيه الاطيار
يا بدر يابدر الوفا والندارة=علمك جميل وانت شاعر وبيطار
ومضمون قافك يالحويفي منارة=منارة يوضي سناها للابصار
وانته بدار اهل الوفا والنمارة=اللي يساقون العدا كاس الامرار
وحنا بدار اهل الصخا والصطارة=شيوخ الكويت مطوعة كل غدار
ننعم بامن والدين نرفع جداره=من فضل ربي كلنا اعوان واحرار
هذا كلامي واقبله باعتذاره=واسلم ودم ودامت لياليك بانوار
وصلوا على من شرف الله مزاره=صفوة قريش الهاشمي سيد الابرار
[/poet]
ورد الشاعر/ عايش بن مرزوق الجويسري على الشاعر بدر بهذه الابيات:

[poet font="Simplified Arabic,4,black,normal,normal" bkcolor="transparent" bkimage="backgrounds/18.gif" border="none,4,gray" type=0 line=200% align=center use=ex length=0 char="" num="0,black" filter=""]
بديت باسم اللي عظيم جواره=الخالق الرازق للاحوال ستار
هو الذي عبده نوى واستخاره=وهو الرحيم ارحم من الوالد البار
اسمه بدا وابدى الضمير امتداره=يامرحبا واهلين مانيب عيار
ما اقولها تزييف والا عيارة=ترحيب احلى من لبن حسك الاوبار
در البكار اللي رعت بالشقارة=وقت السماك وحل تبييض الاطيار
ليا تساوى الليل وايا نهاره=لا شمس لا برد لا واهج حار
برسالة جتنا نسوق البشارة=من بدر جتنا قصدها شور من شار
اعطيه رايي كان لي استشارة=لا يطلقه وتهل عينه بالاعبار
انكارة الرفقة ذنوب وخسارة=وهو بري جاره الله من النار
ولو فاخت اللذات يونس مراره=كنه يتله بالشرايين مجدار
يسكت ويصمد غمزته بافتكاره=ويجيه بين السراجيف مرار
مرار هاجوس خطير انفجاره=تذكر الماضي غرابيل واعزار
يابدر كان الصيد تاصل دياره=والشوف زين وتبخص الظبي ليا نار
ومركبك فوق ولا تريد الغمارة=وعند المعشى تكفي صغار وكبار
بفنجال بن يوم يدرج حماره=يشدي لدم الجوف بالصين ليا فار
مكثر بنه وهيل بهاره=ويبعد عماس اللي من الصبح دوار
مايه غدير وجيب له بالغضارة=وقدوعه خلاص الحسا زين الاثمار
يا بدر لو مات الشجر والحجارة=من عالم الاسرار يا بدر تندار
يجي وقوت فيه يذبح حواره=وقوت قصر بلال تنبيك الاذكار
ورد الحفر هزلا عطاش بكاره=وجا له على خرجا من الغرب مصدار
وقت فقد منه الجراد انتصاره=من الجوع مات وصار لبلال مسيار
قلنا مسير يوم قصر مزاره=حبّس بنات القود ليا ورد الابيار
ليا صدرن القود والحوض طاره=منهن تكسر واصبح ابلال محتار
تشدي هجيج الريم عقب الذعارة=وبلال معها ضايق الخلق صبار
عاضه جليل الملك وارجع لداره=وتبدلت باليسر من عقب الاعسار
كل يعود الا الشباب ازدهاره=ليا اقفى شباب العود يبسن الازهار
يوم الشباب اشرفت في راس واره=واخذت لي يوم الولع فيه مشوار
ليا بغيت الدرب عندي جسارة=خد نبيه يجي لنا فيه مصفار
برفقة شبيب وناقلين حذاره=سارين في دار وناوين في دار
يدلهم دل القطاة الثبارة=ليا حداها القيض والقيض جبار
تنقل شراب عيالها بالستارة=الهور عنها بعيد وشطوط الانهار
يا زين مصفار بذيك القرارة=خد تحرا فيه في وقت الاصفار
مصفارها وقت الخضار القفارة=وسمية ما طبها كل صقار
طبوا عليها عصير باتلى نهاره=سهيل ما عشي وهلاع محتار
وزلن وساقن وانتون بانحداره=وتل السبوق الفارسي والسعد ثار
وساقوا وراه وصف عند اختياره=وماتن وهن حيات ياوال الاقدار
وقالوا لراع البقس يبعد مداره=خل الذي عنده ترا حوز وكثار
يوم استدار البقس عجل استداره=شافوا مخامير من الخوف خمار
وطارن وسارن وانزلن بانحداره=من ضرب خطلان بصلفات الاوقار
وصادوا وفادوا وشب للضيف ناره=وبدر الحويفي نستحقه بمسيار
رسالته لا يعتبرها زيارة=قدره كبير اكبر من الضلع سنجار
من ديرة فيها الحبيب ومزاره=وبيت الله القادر على كل غدار
وحكامها رجال الفخر والامارة=هم الملوك مطوعة كل جوار
وتم الكلام وزبدته باختصاره=وصلاة ربي عد هتاف الامطار
على الذي كلم وهو وسط غاره=جاه الوحي والناس في شرك كفار
وهو رسول الدين دينه شعاره=صلوا عليه اعداد ما ساير سار
[/poet]

[صقر]

مشرفنا الغالي المسفهل

لولا الله ثم انت لم يخرج العمل بهذا الشكل فأنت من شجعني وساعدني على كتابة الموضوع وارجو ان الاضافة تنال اعجابك.

ملاحظة: لا أدري لماذا تغير تنسيق الثلاث قصائد الأخيرة عن القصائد السابقة حيث ان هوامشها الايمن والايسر اصبحا اكبر من هوامش القصائد الأولى

ارجو اذا امكن تعديلها

وشكرا