.
.
( الفصل الأول )
في ضحى يوم الأربعاء الموافق 2/8/1428 هـ ، كان هذا الحوار ..
زيزوم : طق طق طق ..
المدير : تفضل .
زيزوم : السلام عليكم يبو فهد .. وشلونك ؟ طيب إن شاء الله ..
المدير : وعليكم السلام .. هلا بك زيزوم .. والله بخير ..
زيزوم : أبو فهد .. طالبك طلب .. تكفى لا تردني ..
المدير : سم .. أبشر .. وش بغيت ؟
زيزوم : أبغى إجازة نقاهة لمدة أسبوع فقط .. أنت تدري إني محجور بهالصيف بالرياض وأبروح أتنفس .
المدير : لا يا زيزوم .. أنا هذي جالس بالرياض مثلك وماسك محل ثلاث موظفين وما قلت شي !. تبي إجازة وأكتب لك غياب ، رح الله يسهل دربك ..
زيزوم : ( عصب زيزوم وقفلت معه وتعوذ من الشيطان ) ، وبعد عدة مناوشات ..
المدير : شف يا زيزوم .. إذا وافق المدير العام ، فأنا موافق بالإجازة .
زيزوم : بس أنت عارف إن المدير العام شديد الله يهديه ( وأنا أقول بقلبي : يعني ظامن إن ما فيه إجازة يالذهين !. عشان كذا أرسلتني للمدير العام ) ..
المهم يبو فهد تامر شي ؟
المدير : الله يسهل دربك .. شكرا .
.
.
( الفصل الثاني )
طلع زيزوم مقفل من مكتب المدير ، والأخلاق تجارية ههههه .. وجالس يفكر لوحده ..زيزوم : الله يعين بس .. أنا آخذ إجازة آخذ ، بالطيب ولا بالغصب !. بس ما أدري وشلون ؟
هل أخربها وأسحب عليهم !. أو أدخل على المدير العام وأصارحه بالموضوع ! إن لقحت ولا ما ضره الفحل ..
أخذ زيزوم الجوال ، وفتح الرسائل .. إنشاء رسالة .. وكتب :
حسبي عليهم حرموني الإجازة ... ما راح أرافق شلة قروم لأبها !
والله لأخربها وبأكــسر قــزازة ... وأقول صـابتني شظايات منها !
سجلني رايح واستلم خبر طازة ... والله لأخـربها وبألعن جــدفها !
وقام بإرسال الرسالة لأحد قروم الرحلة الزيزومية وهو الأخ / يزيد .. طلع زيزوم بيمشي للقصيم .. وعند باب الشركة توقف وهو يقول ..
زيزوم : أقول وراه ما أتعوذ من الشيطان ، وأدخل على المدير العام ، وأقول له الموضوع .. يمكن يوافق .. ما على الله شي تسايد ..
.
.
( الفصل الثالث )
زيزوم : طق طق طق ..
المدير العام : تفضل .
زيزوم : السلام عليكم يبو محمد .. وشلونك ؟ طيب إن شاء الله ..
المدير العام : وعليكم السلام .. هلا بك ..
زيزوم : بصراحة توني جاي من مكتب أبو فهد ، وطلبت منه إجازة لمدة أسبوع ، وحدد الطلب بموافقتك أستاذي الكريم ..
فما أدري وش ردك الله يرضى عليك ؟
المدير العام : بس تبي إجازة أسبوع واحد ؟ ( يقوله وهو يضحك )
زيزوم : ( أتلفت ما أدري هو يعنيني ولا يعني شخص ثاني ) .. إيه إيه الله يحفظك .. بس أسبوع أبروح لأبها ..
المدير العام : رح الله يسهل دربك ، ولا تنسى تجيب لنا شوي براد من أبها ..
زيزوم : الله يجزاك ألف خير ، شاكر ومقدر جهودك يالغلا .. مع السلامة .. والكشرة عشرة بوصة ..
ويطلع زيزوم من مكتب المدير العام ، ودايركت لمكتب أبو فهد ..
زيزوم : هلا بك يبو فهد .. تمت الموافقة .. يالله سلام يالغلا ..
وأطلع مباشرة من الشركة ، ودايركت للبيت ، وأتلين وأظف عفشي وأمسك طريق القصيم ..
حيث الانطلاق من هناك إلى أبها ..
.
.
هذا ما حدث معي بالضبط مع قصة إجازتي الاستجمامية ..
وبهذا الحوار المثمر ، بدأت الرحلة الزيزومية لأبها البهية بمرافقة أربعة قروم من أبناء العم ، من مدينة الرس بمنطقة القصيم لمدينة أبها ،
حيث الهروب إلى البراد الساحر ..
.
.
.
بسم الله الرحمن الرحيم
الســــــلام علـــــيكم ورحــــــمة الله وبركـــــــاته
مساكم الله بالخير جميعا فردا فردا .. إدارة ومشرفين وأعضاءا وزوارا
بين نواظركم ، الرحلة الزيزومية الحصرية .. لمصائف أبها البهية ..
++ رحلة زيزوم بالصيف .. لأبها لتعديل الكيف ++
تابعوا معي أحداث هذه الرحلة الممتعة .. فقد تتعرف على مناطق لم تزرها من قبل .. فهيا بنا ..
.
ملاحـــــظـة :
زيزوم غير مسؤول عن أي تعطيل لمصالحكم الشخصية ، مقابل تضييع جزء من أوقاتكم الثمينة ، في قراءة هذا التقرير الشيق ..
لذا جرى التنويه ..
.
.
.
تــــــــاريخ الرحــــــلة :
الانطلاق من القصيم ( الرس ) إلى أبها الساعة 2.30 فجر الخميس الموافق 3/8/1428 هـ ..
والوصول من أبها إلى القصيم ( الرس ) الساعة 12 ليلة الجمعة الموافق 11/8/1428 هـ ..
.
.
وجـــــهة الرحـــــــلة :
الإنطلاق من مدينة الرس بمنطقة القصيم ، وصولا لمفرق الهمجة ، مرورا بالخرمة وما جاورها و وصولا للهدف المنشود وهو مدينة أبها البهية .
.
.
مرافـــــــقوا الرحــــــلة :
رجـــــال قـــــروم .. شروى من يقرا من القـــــروم .. ومخــــاواتهم تنشرى ..
1 / زيزوم ( أمير الرحلة و من يتخفى خلف الكاميرا دوما ) .
2 / بسام ( قائد وصاحب المركبة وأحد أعضاء هذا الموقع بمعرف " أبو عفجه " ) .
3 / يزيد ( صاحب عزبة الطبخ والنفخ >> المشكلة إنه دب ما شاء الله ) .
4/ أحمد ( معاون الأمير ، قرم خدوم ) .
5 / محمد ( مستشار الأمير ، ورفيق دربي بالرحلة ) .
.
.
برنـــــــامج الرحـــــــلة :
بما أني ديموقراطي ولست دكتاتوري ، فقد أحببت أن تكون البساطة والعفوية وفلة الحجاج هي ديدن الرحلة ..
فلم نحدد برنامجا معينا نسير عليه .. سوى الاتفاق المجملي على بعض الأمور المهمة .. وقد نجحنا بحمد الله ..
علما بأنه حدث انقلاب على الأمير في نهاية الأمر .. ولم يصمد معي سوى (محمد)
ونجحنا بفضل الله في السيطرة واستتباب الأمن ..
.
.
( قــــــبل الانطــــلاق )
بالتأكيد بأنك قد سمعت
بمنطقة ( الســــــــودة ) .. ومناظرها الخـــــلابة ..
بالتأكيد بأنك قد سمعت
بمنتزة ( سحــــاب ) .. ومعانقته الدائمة للضــــــباب ..
بالتأكيد بأنك قد سمعت
بمنطقة ( الحــــــبلة ) .. وشواهقها المرعبة .. ورعودها الشالعة ..
لـكـن ..
هل سمعت
بالوادي ذا المســــــيل المتواصل والذي يدعى ( وادي المَـخـَـظ ّ ) ؟
هل زرت
منطقة ( المربعات ) ذات الأشــــــجار الكثـــيفة ، والمـــــساحات الواسعة ؟
هل أصدمك بالخبر .. وأقول لك بأنها هاتين المنطقتين توجدان
في منطقة ( الســـــــودة ) الشهيرة ..
.
.
إذن ماذا تنتظر ؟
اركب معي .. لنتابع أحداث هذه الرحلة المتواضعة الشيقة ..
هيا بنا ..
.
.