رجة في الباث فندر

[المنبسط]

السلام عليكم
مساكم الله بالخير
يالربع طلع عندي مشكلة في الباث فندر
الا وهي اذا مشيت بسرعة 40كم او اقل يبدأ الموتر يرج كأنك تمشي في بطناج(مثل اللي يجي في الطرق البرية ) والموتر كأنه ماسك شوي
ويسوي هاذي الحركة بعض الأحيان.
سواها معي مره وشغلت الدبل الخفيف ثم فصلته لكن ما تغير شي!
الشكر موصول لكل من شارك أو أفاد اخوانه بمعلومه او انه قرأ الموضوع.
اخوكم المنبسط

[الباثفايندر3]

هذا سلمك الله عمود الدبل ركب فرارات ب450 برازيلي من عند السليماني شارع الغرابي انا معي باث وطلعت عندي الرجه كذا وركبت فرار وراحت ولله الحمد واذا بغيت توضيح ارسل رقم جوالك على الخاص وابشر بالمساعده

[المنبسط]

الله يبيض وجهك اخوي الباثفندر 3
وماشاء الله عليك برق في الرد الله يوفقك
لكن مع السرعة ما تطلع ذا الرجة
اخوك المنبسط

[المنبسط]

السلام عليكم
مافيه حل غير الفرارت لهذه الرجه
المنبسط

[ق ب م 632]

السلام عليكم

مافيه حل غير الفرارت لهذه الرجه
المنبسط

فيه حل ياطويل العمر وارخص من الفرارات اطلع لم الصناعيه العصر واشتر لك صليبن عمود الدبل وسعر الواحد تحت الميه ورح لم ميكانيكي ويركبها وماتكلف شغل يده ولا 50 ريال ومن بعدها انسى شى اسمه رجه ولا فرارات ولا عوار رأسعلى فكره هالمشكله هذه صايره معي وسويت اللي قلت لك عليه الله يشفى موترك ويقومه بسلامههههههههههههههههههه سلاااااااااااااااام

[salehhd]

السلام عليكم

احتمال عندك حد الكفرات او الجنوط مضروب او منتفخ
كذلك ممكن يكون فية طين ماسك في الكفر
لاتستعجل وحط السيارة في حفرة وافحصها من تحت والله عينك

[راع الصمان]

اخوي المنبسط مساك الله بالخير..نفس المشكله اللي عندك حصلت معي بس الرجه عند 80 ورحت للصناعيه عند مركز كبير ومعروف المهم وزنت الاذرعه وخرطوا عامود الدبل وتغيير الصلبان وترصيص كفرات....وبعد فتره رجعت الرجه بس على
خفيف واحيانا, وما ادري وش السبب..الظاهر ان كلام اخونا الباثفاندر3 صحيح .. لازم فرارات.

[بن محفوظ]

كلام صحيح .. تأكد اول شي من الكفرات و الجنوط ثم اوزن الموتر ..

وفيه عند العضيب ميزان ارضي .. راح يبين لك بعد الميزان اذا المشكلة في الترصيص و الوزن او في عمود الدبل ..
اتبع الطريقة التالية :

1 - وزن مع ترصيص .

2 - اختبار للكفرات بالجهاز الارضي .

3 - اذا ماراحت المشكلة عندك طريقتين :
أ / خرط عمود الدبل و تركيب صلبان
ب / تركيب فرارات .

والله ولي التوفيق

[المنبسط]

السلام عليكم
اخوي ق ب م 632
ما قصرت والله يبيض وجهك
اخوي salehhd
الله يبالرك فيك ويوفقك
المشكلة ما اتصور من كفر او جنط لانه قد حصل لي طعج في الكفر وهذي نختلف عنه.
اخوي راعي الصمان
مساك الله بمثله
الرجه تطلع وانا امشي اربعين واذا اسرعت تخف بل تختفي.
اخوي بن محفوظ
الله يبيض وجهك
ورايك ان شاء الله انه مبارك والله يعافيك
الشكر للجميع ولا حرمكم الله الأجر فالمستفيد ليس شخص بل كل من قرأ الموضوع.
أخوكم المنبسط

[المنبسط]

اسعدالله مساءكم
وديت السيارة لورشة واحد من الربع وقال لي فك عامود الدبل وجرب اذا راحت الرجه فمعناها من العامود
فعلاً فكيت العامود وراحت الرجه
فصارت المشكلة مثل ماقال اخوي ق ب م 632
من الصليبات في عامود الدبل
والحمدلله رب العالمين
الله يبيض وجهه ويبيض وجه كل من شارك في الموضوع
اخوكم المنبسط