منتديات مكشات



لمتابعة "الأحوال الجوية والرحلات" عبر جوال مكشات أرسل الرقم 1 إلى 89200 (اتصالات) - 601259 ( موبايلي ) - 708042 (زين)

::: تابعونا على تويتر مكشات :::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية

العودة   منتديات مكشات >
الـصــــــيــد > خيمة الصيد بالصقور
التسجيل التعليمـــات قائمة الأعضاء التقويم اجعل كافة الأقسام مقروءة

إضافة رد
 
أدوات الموضوع انواع عرض الموضوع
  #1  
قديم 05/08/2012, 08:50 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
خـوة نشـامـا..الـجـزء الـثانـي والأخـيـر مــن رحـلـة ولـع.........ذراع الذيب



""بسم الله الرحمن الرحيم""
ماشالله تبارك الله
وذكر الله واجب في كل حال

السلام عليكم ورحمة الله وبركاته..
اسعد الله اوقاتكم بكل خير..


عدى مقناص الوحش وراحت ايامه ولياليه راحت بحلوها ومرها ..
واليوم نستقبل عام جديد وانطوى عام ورى عام ولاشعرنا فيه

السنين تجري ولاحسبنا احسابها..

بالامس عشنا مع ناس وصاحبنا ناس

بالمقناص وغير المقناص

واليوم وينهم فيه..

احدن خذا الله وداعته جعل ربي يرحمه واحدن لازالت العين ترعيه جعل ربي يوفقه يهديه..

واسأل الله العظيم رب العرش العظيم وفي هذا الشهر العظيم لي ولكم ولكل من قرى موضوعي ان يغفر لنا ذنوبنا ويمحي خطيانا

ويفرحنا بشوف وجهه الكريم ووجه نبيه محمد صل الله عليه وسلم وان لايحرمنا من جنات النعيم..

وان يعتق رقابنا من النار وان يبلغنا ليلة القدر ويجعلنا وياكم ممن يقومونها ايماناً واحتساباً..

وان يرزقنا بالصحبه الصالحه الذين هم سبب في الصلاح والفلاح واللهم من اراد المسلمين في شر..


ان تشغله في نفسه وتجعل كيده في نحره وان تجعل تدبيره تدميره يارب العالمين..
اللهم ان تنصر المسلمين في كل مكان وان تنصر اخواننا المستضعفين في سوريا يارب العالمين..

وان تفرج كربتهم وتجلي همهم وان تلطف بهم وترحم موتاهم يأرحم الراحمين
وأسالك انت العظيم رب العرش العظيم الا تأتي بالعيد والا وقد حققت لهم نصرهم يارب العالمين
وان تأخذ روح بشار اخذ عزيز مقتدر اللهم امين

:::::::::::::::::::::::::::::::::::::::::::::::::: ::::::::::::::::::


ونكمل معكم مقناصنا

((رحلة ولع))

بعض الطواريح في نهاية كل مقناص يتوجهون للآراضي الجنوبيه لصيد الكراوين..

وكانت لنا فيها جولات ورحلات قصيره وذراع الذيب من يومه شرى طير للكراوين ماهوب على خبره في مقناص الوحش..


ضاعت علومه هالموسم
قبل نهاية اكتوبر بكم اسبوع كانت له جوله قصيره جداً على هدد الكراوين..

وهذا اخونا ابوصقر الجهني(شقران) هو اللي فرمت مخ ذراع الذيب يعني سواله غسيل مخ بالعربي..


ابوصقر من الطواريح والصقاقير القداما ومن الرعيل الاول اللي قنصو بالطير..
نبي نقربكم اكثر من هالاجودي..


لو نجي لأبوصقر ونقوله بالصبخه فيه طير وجول كراوين وش تختار يقول اطير الطير وابعده عن الكراوين واهد عليها ههههه

يقول الا اذا كان قرناس حر ههههه..

وهالسنه ابوصقر وجه القمر الصناعي على ذراع الذيب ويقوم يغريه من هالسوالف والقصص..


اللي مرت عليه في مقناص الكراوين منها المفرح ومنها المحزن..
وغدا ذراع الذيب يلتفت مره لأبوصقر وهو يسولف
ومره يلتفت يم شعله راااااح فيها ولدنا هههههههه..


وحس ابوصقر ان ذراع الذيب مرغب الوحش اكثر من مقناص الكراوين..
والتجاء لحيله اخرى !!!!!! قال ياذراع الذيب نبي نشغل جهاز الكراوين يوم ونقنص الوحش ثلاث ايام وزادها يوم علشان ارضى..


خلاها اربع ايام هههههه

خطير هذا ابوصقر (وتأتيك جهينه بالخبر اليقين ) المثل المشهور ماهوب لله هههههه


وعزالله جاب فيني الخبر اليقين هههه


اليوم الاول


والثاني


والثاااااالث


والرااااااااااابع


هههههههه


وتكلبش صاحبنا العالم تقنص الوحش وذراع الذيب محول جهازه يهد على الكراوين هههههه

مع ابوصقر الجهني وابومسعد الجهني (غنام)وابومسعد هذا حط فيني حجل هههه..


معاد فص ذراع الذيب ههههه
ونستعرض لكم بعض اللقطات




حصلنا اثنين كراوين ونتتظر خوينا قبل الهدد..
والطير بهالصوره تقول احد راشه بالما وهي رطوبه




خوينا ابومسعد(غنام) مع الفرخ دواس




شقران ولحظه قبل الهدد والفروخ اللي معنا باقي ماعلمت..




هذا خوينا توه وصل ونزهم عليه بالجهاز نوجهه عن الكراوين
وهذي الاثنين واضحه قدامكم..




واحد واضح بالصوره والثاني ضاعت علومه يوم شاف الطير على كف شقران




هدينا وافي وماقصر طرده مطراد طيب




رجعنا للثاني ولاهو مغير مكانه وراحو خويانا يدورون عليه..




ويوم العين طاحت عليه واقربو ياعيال وهد بن رشدان عزالله ماقصرت الوكريه




وابشري يالفروخ بالعلايم وغنام مبسوط جعلها دوم

وبعدها بكم يوم سافر ابوصقر للجنوب في مهمة عمل
لم تكن في الحسبان استعداد لموسم الحج

علق ذراع الذيب وراح شفتو وشلون سوى فيني بعد ماخاويته راح وخلاني هههههههه


عزالله بعد ماراح تكدر خاطري واعطا طيوره لصاحبه بمجيرمه..
دايم الصاحب الطيب لاغاب يضيق صدر راعيه وصدق من قالها..


الله يستر عليك يابوصقر وين ماوجهت ..
وان شالله تعالى يجمعنا مقناص هذا الموسم وجهز طيرك الجير شاهين..


بعد ماعزلنا الكراوين اتفقنا انا وابومسعد نقنص الوحش بالمسا سوى ولابرد الجو..
نعود للصبخه نعلم طيورنا..




ونركز طيورنا على المرتبه وكل الطيور فحمت من الحر ماغير ردام كفو والله هههه..
انشهد ان الوكري طير الساحل هههههه


وجهزنا الحر دواس وماشالله عليه من يوم شاف الكروان طلبه الله يطرح فيه البركه..




ماشالله تبارك الله من الطيور المجلوبه من سوريا الله ينصر اهلها




وماقصر دواس مع راعيه قنص الشمال وعين الحباري وهد فصيل




وصوره للذكرى لأبومسعد




شيهانتي شعله تعلمت تعلوم طيب الله يبارك..




عقبال الشارد يارب




ابومسعد يردد ابشري بالعشا الزين ابشري بالعشا هههه



من عقب ابورداد يامكثر الحوم

...............................معاد نميز في سما الكون جارح


قرناس نادر ماتجيب مثله القوم

.................................ولا تلحقه حتى رجال المشالح
رد مع اقتباس

رابط إعلاني

  #2  
قديم 05/08/2012, 09:16 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



انتبهي ياشعله مواسيك والسكين

وانتهى نهار ذاك اليوم وبأنتظار يوم جميل ملئ بالكراوين ههههه ان شالله تعالى
وتدرون اول مره اشتاق للهدد على الكراوين اكثر من مقناص الوحش امكن علشاني متحمس لشوف هدد الفروخ

ياخوفي اني اترك مقناص الوحش مثل الفيتو الله لايقوله ههههه..
وامسانا الليل وذراع الذيب راح بالاحلام الطيبه اللي تجيه على مدار السنه..

ودايم اردد واقول يالله لاتجعل احلامي الطيبه اثقاف احلام وابشركم مافيه طير طرحته الا وتحلمت فيه اللهم لك الحمد..


واذن المؤذن فجر ذاك اليوم واصبحنا واصبح الملك لله وصلينا الفجر وطلعت مع ابومسعد
وصاحبكم من بعد ثلاثه كيلو يبي يطلع على الكراوين ههههه ويقول مافيه شي..

وانت ياذراع الذيب عساك بس تشوف القريب ههههه..
واول ماوصلنا المكان كان هذا المنظر قدامي..

واثرني ياولد طلعت مربوش على الكراوين!!!!!!




واحد اثنين ثلاثه اعتقد انها اربعه ذاك اليوم تقول ماعمري صورت

نسيت الكميره ونسيت علومها..




وهذا وجه مستشر الله يعطينا خيره ايه والله..




وعزلناها عن بعض وكلن في جهه..




وهذا ماهوب فايق لأحد يقول لاتزعجوني وابشر باللي يطير نومك عشر سنين قدام




خلك مغمض لاتفتح عينك بس




هديت شعله وهذي هي معقربه على الكروان




ويروغها ويزبن المواتر وتخطيه من تحت موتري ويطير وتقوم معه وتعلقه ماشالله تبارك الله




وكني قهرتها والزعل واضح ههههههه




الخير جانا بحضور هالاجودي ابوعون شاعر المقناص




عزلناها نبي نلحق الباقي




وهذا تسمر بهالعصلا عقب ماكان في سبات عميق من النوم وجهز دواس ياراعي دواس




هدينا دواس وتردد فيه وهذا ابوسعد طير الكروان وقام يدعي طيره

وطلب الكروان دواس..




وعزم عليه لاكن يبيه طيار ..




وعدة لقطات




يوم استدار الكروان طيرناه له واخذ معه في مطراد ويلزمه ماشالله تبارك الله..

ومبروك يابومسعد..




ماشالله تبارك الله يطرح البركه فيه..




ونلحق الكراوين الثانيه..

رد مع اقتباس
  #3  
قديم 05/08/2012, 09:36 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



وهذا مجهز نفسه للمعركه ونهد عليه وكرية اخونا احمد ابومهدي..
استدارت الوكريه والكروان شغل جميع الحساسات..




الكروان يواجه الموت




وراغها الكروان والوكريه تتميلح قدام الكميره ايش اللي!!!!!!.وينك يابوعراده ههههههه




الكروان صابه تشجنج واعتقد انها تحميه قبل الانطلاق




وصيحة الموت وبعد هالصيحه جات علوم




والكروان بعد هالكفخه نجا بجلده والبحر كان اقرب
الله يعوض اخونا احمد بالخرب وباللي يتمناه



وهدينا هالجير الطيب وماقصر فيه الله يبارك لراعيه




وهذا هو راعيه الرجل الخلوق عماد الحربي

ومن المواقف المخيفه



هذي الكوبرا ظهرت علي وانا اعلف طيوري الله اكبر عليها




الكوبرا العربيه




لسان الموت الله يكفي المسلمين شرك وتركتها لأجل التوازن البيئي اللي يطرونه




وهذا الكروان هديت عليه وافي قريب المغرب..




وبعد ماانقطع عبور الوحش وياخذني الشوق جنوب ورى مجيرمه ونزهب امورنا انا وخويي..
ماجد الله يذكره بالخير..

وكنت ساري ليل وشوي والا الفال الزين متصل علي خوينا الصقار الكبير ابوحزام المطيري..
سلام عليكم وعليكم السلام وينك ياخوي علمته اني رايح للمنطقه الفلانيه قال انا شوي ظاهر من جده موجه جنوب..

وابيك تخاويني ديره اذكرو الرياجيل فيها طير قلت له ابشر بعزك يابوحزام
ياحظ من يخاويك بس وين ديرتك اللي تبيها قال قريب..

ورى مجيرمه بكم كيلو قلت له تمام انا انتظرك بمحطة مجيرمه..
وبعد ساعه ونص وصل خوينا ابوحزام ونحط الصدام بالصدام وتوكلنا على الله ابوحزام قال الديره قريبه

ماغير حذفت عصى عاااد تعرفون الشياب لاقالو حذفت عصى
خرجنا من مجيرمه الساعه 12 والديره اللي يبيها ابوحزام ماوصلناها غير الفجر هههههههه

يستر عليك ربي يابوحزام هههه..
وصادفتنا امطار بالخط واجواء ترد الروح مااخذنا ساعه والا واصبحنا




ماجد وده يعطيها نوم للظهر هههه




والله اجواء مرت علينا ولافي الاحلام غيوم وامطار يارب لك الحمد..




قنصنا في حروة الطير اللي اذكروه الرياجيل لأبوحزام ولاعيناه..
ومرينا على حراوي الكراوين قلنا لعل وعسا الله يرزقنا..




الاجواء الرهيبه خلت تعبنا يروح اللهم لك الحمد
رد مع اقتباس
  #4  
قديم 05/08/2012, 09:55 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



وين ماوجهت وجهك مافيه امل تشوف الشمس..
حليلآآآآآآآه لو نحصل جول ونهد عليه بهالاجواء عزالله هذا مراد كل قناص..
والله يبلغنا مرادنا يارب..





غيوم منخفظه وكنها ظاهره من الارض سبحان الله..



جانا الخير وهل المطر
انظر في ماجد واقول لونرجع ديرتنا وماعينا صيد ترانا راضين








الزعيم تنقل بنا من حروه لحروه وابوحزام ماشالله تبارك الله له اربعين سنه بالمقناص..
الله يطول عمره على الرضا والطاعه وتخبرون قرناس موسم 31 هو اللي طرحه جعله متبوع هالموسم وكل موسم

ابو حزام ماشالله عليه له تاريخ حافل في شبك الصقور




صاحبنا يسبر بالدربيل يم عمدان بعيده
وتراه من المتابعين لمنتدى مكشات بشكل مستمر




حي ذا الحجاج اني احبك في الله




وظهرنا من المنطقه لخط الساحل ناوين ديره ثانيه وحراوي كثيره يدلها ابوحزام..
والخير قدامنا مقبل الله يغيث ديارنا وديار المسلمين اجمعين..



وسحابه طيبه مطرها غزير صادفتنا على الدرب

ركبت أنا اللي موردينه من الغرب ،،،،،،،، الوارد المعروف محـدن يفوقـــه
شيكتله وغيرت زيته على الــدرب ،،،،،،،، من شان لاعطل ولا من مروقــه
دقيت سلفــه والمكينـــــه إتـعـذرب ،،،،،،،، وطلقت بالخط المزفلت إسبوقــه
ريحت قيره والمشاويــــر تــقـرب ،،،،،،،، يالله تكفيــــه العيون الرموقــــــه
أعطيه وآمالي تخالف كمـا الحرب ،،،،،،،، او حر نار بالصباح إمحروقـــــه
مشيت لـديـــــار بهـا النبت مشرب ،،،،،،،، من ماء مزن لامعات إبــروقــــه
خذتلها إسبوعين تـرعــــد وتسرب ،،،،،،،، وتسيـــل شعبــان زمـان شفوقـــه
قلبي أنــا من الشوق ياناس معطب ،،،،،،،، متلهف لـديـــــار نجـــد العروقــه
امشي وطالـــع والنــواظر تـرقب ،،،،،،،، ودعي بعد منشي السحاب الحقوقه
اشوف طير البر بالصوت يـرعب ،،،،،،،، ومن الفرح مدات ريشـــه طلوقـــه
الطيــر يغرد والتــــوالي تــطرب ،،،،،،،، والماء صافي والنـــواظر طلوقـــه
غدران وفياض بهــا النبت ينصب ،،،،،،،، ورويت بفضل اللي يراكم اطبوقــه
أبكي من الفرحه وخايل عطاء الرب ،،،،،،،، الـرب يعطي والمعاصي غموقـه
اجرى الشعيب اللي له اسنين مارب ،،،،،،،، يمشي إبـدربـــه راسيات اعروقه
من اعتـــدى دربــــــه ابيت تخرب ،،،،،،،، يجرف جميع اللي يحادي اطروقـه
مسايل ربي بـــداهـــــا من الغرب ،،،،،،،، تمشي ولاتحتــــاج ردم ومشوقــــه
مابين كــاف ونـــون امره يـتكرب ،،،،،،،، يالله تبـــــارك في مبـادي اشروقــه

وهذي القصيد الطيبه للعضو الرحال


مالله راد ونحصل شي من الكراوين وضحينا بهالمكان..
وكل ماشفت ارض ممطورة يطريلي هالبيت من قصيده انحفرت بالقلب وصح الله لسان شاعرها..

يازين سج القدم والارض ممطوره = مع درب نوقٍ يهيض القلب ممشاها

وزانت العلوم والسواليف وارتاح البال في هالديره الطيبه
وزانت العلوم اكثر يوم صادفنا خويانا خالد شرف واخوه ماجد جونا بهالمكان وقيلنا وتغدينا..
وفلينا الحجاج ونسيت ان اخذ لهم صوره ولهم تحياتي واشواقي ..




حتى الطيور مبسوطه
وبالمسا تشاملنا موجهين يم حراوي طيبه والله يكرمنا..




ووجهنا مع دروب طيبه شفنا فيها المناظر الزينه من مزارع ومن غدران ماء





مزارع طبيعيه مالها والي غير رب العالمين ويازين الممشى فيها




ومرينا من عند هالغدير ماشالله تبارك الله


رد مع اقتباس
  #5  
قديم 05/08/2012, 09:55 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع




ابوحزام راسلنا بالجهاز وقال نبي نوجه يم ربيع اطروه الرياجيل ..
ونبي ناخذها مقناص فيه الين يمسانا الليل ونعشي بالديره الفلانيه قلت له شورك وهداية الله..




!!!!!!!!!!
ووصلنا لهالديره الطيبه صراحه اخذتنا الدهشه يوم ابدينا عليها بمواترنا..
ماشالله جاتها امطار الوسم




انظر في ماجد واقوله معاد نبي كراوين ههههههه
صراحه هالمنطقه شي خيال وشوف البدو واهل الحلال طرب ..



يازين سج القدم والارض ممطوره = مع درب نوقٍ يهيض القلب ممشاها
ترعى من الريم والحيران مقهوره = عقب السحايب عليها نثرت ماها
أخير ياصاحبي من لعبت الكوره = واخير من كلمةٍ في الكتب تقراها
عيني بشوف البدو ياخوك مسروره = في فيضةٍ للدبش يازين مرعاها
لامن شيخ البدو كوع على كوره = والقهوجي دلته بالنار يصلاها
اهب وقتٍ مضى يامزين عصوره = تلقى العشا والشبب والناس تلقاها
واللي سمع كلمتي واهتزت شعوره = اكيد يفهم ويدرك ويش معناها
يابندر الناس منهيه وماموره = والموت ياصاحبي تراه يقفاها
اشفق على الطيب من الناس وازوره = لو ان رجلي من اجله تطول خطاها
والنفس ماهي على القشران مجبوره = نفس عزيزه وبعض الناس مابغاها
نفسي تبي ربهة بالطيب مذكوره = اللي تعز الخوي وتذلل عداها
ويابندر المعذره فالخط وقصوره = ياذخر ناسٍ تزين كا من جاها

محمد بن خربوش العضياني

بقي كراوين بس والله لتكمل معانا هههههههههههه الله كريم





اقول شوف جرة المواتر وسط الربيع شي ثاني
وبعد ماوصلنا لهالديره قنصنا باطرافها
بعيد عن الناس ولاالله كتب لنا شي..

وامسينا في طوارفها بعيد عن الربيع ومن الساعه 2 بالليل الين الفجر..
والمطر والرشاش ماوقف والله استمتعنا اللهم لك الحمد واصبحنا وعينا خير ..




واخذنا كفايتنا من النوم وارتحنا من عناء البارح ..
وان شالله نبي نجتهد والله يرزقنا

ابوحزام يقول في حروه نبي نروح لها ان شالله مانتعداها الاوحنا ذابحين..
واخذناها متشاملين قريب الساحل ..




واخذت صوره للبجعه معينين خير من هالمسقا
....................................

واخذناها مقناص الين وصلنا للحروه اللي يبيها ابوحزام وهو متقدمنا حول 2 كيلو..

دقايق وابواحزام يبشرني بها
واصبحت الفرحه فرحتين الفرحه الاولى يوم حصلنا الكراوين..
والفرحه الثانيه يوم درينا ان خويانا القثمه (اخوان نجد)متواجدين في نفس المنطقه
ويجونا ونجتمع على الجول يجيله حول الثمان..

ولاكنه في مكان عسر بالحيل ومذير مايشوف صدام الجيب ولاهو زابن
لاكن الشواهين كانت دوى..


خوينا (السهم )محمد القثامي عزلنا واحد وهد عليها مكيده واسم على مسمى ومامغط ظهره معها..

ماشالله تبارك الله..

وتفرقت الكراوين وصرنا ندور عليها
وضيقت علينا الكثبان الرمليه وهالغابه اللي يزبن فيها الكروان كل شوي..
ولحظات ويزهم علينا (اخو حسنا) عبدالمحسن القثامي عنده واحد..




ونجتمع عنده وينزله رجلي..




ويوم كفخ الكروان ويعطي شيهانتة جمرة سبوقها ماشالله تبارك الله طيرة السعد..
من اسبق الشياهين اللي شافتها عيني الله يطرح فيها البركه وماشالله عليهم محتزمين بطيور السعد الله يبارك في طيورهم..




من يوم كفخ الكروان وهي تطلبه ركوز وتهوي عليه تقول دلو وراد الصلاة على النبي..
وراح تشوفون لها مقطع فيديو ممتع جداً..




اخو حسنا عزل الكروان عزالله ان انبسطنا ذاك اليوم مع هالاجواد
واحمدالله يومه جمعنا




خوينا وليد القثامي(الرمح) راعي حلوه والحمدلله عينا حول ست كراوين..
وبعض المهدات مالحقت اصورها والطيور كلها هدت الا طيرة ذراع الذيب نحاسه هههههههه..

هديتها على ثلاث كراوين قامت قدامي ومقناصنا رجلي وتطرد الكراوين ويزبن بالشجر وتخطي لها واحد..

معاد فيها مجال وتقوم تحوم واضيعها بالحوم ولافيها ريشه

لا والله النحاسه بدت معك ياذراع الذيب ههههه..

واقوم الوح واصيح وادبل الصوت صوتين لاحول ولاقوة الابالله البارح الاجواء يازينها ومبسوط..

والحين تعكر الشغل كله ههههههه وخوينا ماجد من الجهه الثانيه يلوح بحمامه حيه..
شوي ويبشرنا بها اللهم لك الحمد..

واطق برقعها وينظر فيني ابوحزام بنظرات الزعل
يقولي والله هذا كثر ماتدبغ فيها مغير تكرمها عصب علي ابوحزام ههههههه

ونروح نقيل بمنطقه قريبه ونسوي غدانا اللي قاسمه ربي ومزاجي مااااش وخاطري مكسور..

ياليت طيرتي طارحه كروان واحد بس كان ارتحت نفسياً ههههه..
وبعد ماتغدينا استأذن منا خوينا اخو حسنا جاله امر طاري وراح على جده...
يستر عليه ربي وين ماراح

وامسينا بذاك المكان مع ابوحزام وماجد وخويانا الاعزاء اللي جمعنا معهم ربي..
وليد ومحمد ونعم الصحبه والمعرفه والله

وهذي اللي نرجيه من المقناص معرفة الرجال الطيبه ويبقى الذكر الطيب بينا
والا الطيور والصيد جعلها تولي لاكن البركه فيها اللي عرفتنا باللي مثلهم وشرواهم..

وبعد ماامسانا الليل كلن حط جهازه..
وشيهانتي شعوله ماعشيتها زين بغيت اكرمها بس ابوحزام واقف فوق راسي ياويلي لوازيدها فوق الصافق

هههههههههههههه

ويوم اصبحنا




حصلنا اثنين وهذا واحد الحين بنهد شعله..





ابوحزام بيهد وذراع الذيب بيصور


طيري يفز اليا عرض له شرايد
............................................فزة رصاص الملح من خشم بارود
طيري من عشوش الوحوش الفرايد
..............................................من عالي اللولاح بالقاع ممهود



ابيات شاعرنا الكبير والقدير يوسف الخليفه
رد مع اقتباس
  #6  
قديم 05/08/2012, 10:18 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



بسم الله هديناها وارتكز كروانها ثواني وارهت عليه وردته يمنا





ويالله ياكريم ان تساعدها




وتخطيه من فوق شجر الراك




وتردده من بين شجر الراك ونخفيها موجها جنوب من بين الشجر..
وترده من جديد يمنا وتردده وتخطيه كم مره ويرتفع من جديد..
يبي يرتكز عنها لاكن مااعطته مجال ضيقت عليه الفضا كل ماارتفع ارهت عليه..









وترده يمنا من جديد وصار الكروان يبي المزبان..
والمرد الاخير وتعلقه




ماشالله تبارك الله اطربتنا بهددها وونستنا مع ذا الصباح..





ماهو ابسط مني ذاك اليوم غير ابوحزام والعيال
ورحنا للثاني نبي نهد عليه شيهانه وليد حلوه


وماقصرت معه زبن الطلحه وسط القشع وهي وسطه ونظهرها منه..



اظهرها السهم من الطلحه والصوره تعبر عن ذلك..




عزلناه عنها




وليد وماجد ومحمد ومع بداية يوم طيب ولله الحمد..
ووجهنا بعدها لحراوي طيبه لعل وعسا نحصل الصيد فيها والله كريم




ماعينا غير الاثر البسيط وماتبشر بالخير والله كريم ..
واخذنا بهالمنطقه ساعتين مقناص ولاالله راد نعين شي وجا وقت المضحا..




ويازينه من مكان




ابوحزام والبلاك بيري ههههه وتراه يتابع المنتدى وقتها..
وزانت العلوم والسواليف وكلن يسولف عن هدد طير خويه

واعطانا ابوحزام نبذه عن الديار اللي مرينا عليها
وعن سنينها اللي مضت

وراح يتذاكرها مع وليد ومحمد وهذولا ماشالله عليهم قنصو هالديار من سنين طويلة مضت..




محمد الحين يبي يزين الغدا جعله يسلم..




قطا وكراوين اللهم لك الحمد والقطا رميناه بهالمكان..




وين مشرفنا ابوسيف والله هالادمي عذبني طول رمضان ماغير يرسلي..
صور كبسات للكراوين ماشالله عين خير بالسودان وسحوره ماشالله يومي كراوين..
وابوفيحان وذراع الذيب لاشافو كبسة الحين وقت الجوع معاد يسيل لعابهم انهاها لهم ابوسيف ههههههههه

رد مع اقتباس
  #7  
قديم 05/08/2012, 10:43 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



شحم في شحم ومن ازهار الربيع(الخنافس) هههههه





الله يعود علينا وعليكم الصيد والفيد



هاليوم فاله طيب واكبر دليل وصول صقاقيرنا الاعزاء..
عرار الدوسري وهيصان الدوسري توهم واصلين من جده وابركها والله من ساعه يوم جونا فيها يالله ان تحييهم..

ويبي يزين المقناص معهم




ولم الغدا وزانت العلوم




ركز بالرز يابوسيف لونه قلب لذهبي
والحمد تغدينا وعينا من الله خير ووجهنا بعدها شمال
لديره طيبه..
والله يكرمنا فيها وابوحزام رجع لجده جاله ظرف طاري الله يستر عليه..
ولو ان الخاطر تكدر شوي لاكن اللي مخاوي الطيبين يبي ينشرح صدره..





ونقطع هالنفود موجهين شرق يم الحروه المقصوده..




وقنصنا فيها ومالله كتب نعين شي واتفقنا نمسي فيها..
ونشغل اجهزتنا والله يكرمنا من هالنزل اللي بأخر الوقت واغلب الكراوين بهالديار..
هي في وقت المحاز وماتجي على الجهاز نحصل جرايرها ولانشوفها..

وباليوم الثاني اصبحنا ولاعينا الاكروان واحد..




وهذا الكراون طاير هدينا عليه الشيهانه مكيده طيرة محمد ماشالله تبارك الله..
وعدا من فوق هالطعوس وهفا ولاجابته الكميره وتلحق وتعلقه مكيده..




ونسوق مواترنا جهة ماحولت الكروان



مكيده شيهانه تركيه وهي من الطيور اللي جابها اخونا ابوصالح(الفيتو)
طيره مبروكه جات من رجال مبروك وراح تشوفون لها هدد ممتع بتصوير الفيديو..




وليد وماجد وهيصان هالهدد الطيب ابسطهم وجعلها دوم هالفرحه..




ووجهنا جنوب شرق نتقصص للأثر ونتنقل من حروه لحروه ..
بأسرع وقت لنختصر المسافه..

وعودنا بعدها متشاملين ولاعينا اثر وظهرنا على خط الساحل موجهين شمال..
ودنا بديره تشاورنا عليها وان شالله تعالى نحصل مرادنا فيها..


وقضينا لوازمنا من المحطه الفلانيه
وتقدمونا خويانا هيصان وعرار للديره المقصوده..


ولحقناهم بعد ماانتيهنا ويوم اقبلنا للحراوي اللي هم فيها..
زهم علينا بالجهاز اخونا هيصان وماهي الاكلمة ابشروووووبها!!!!!!!!..

ورقينا على ذيك المتان نبي هيصان يشوفنا ويدلنا على مكانه..
ونحدد موقعه ونسوق يمه..



ومن السهل للوعر




ونلحق هيصان والقلب تتسارع دقاته والحماس اخذ حقه..
هيصان يعلمنا عن الكراوين يقول حول العشر ويالله ياكريم..
رد مع اقتباس
  #8  
قديم 05/08/2012, 11:09 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



تفرق الجول وهذا واحد مجلد وسط الحصى




وهذي اثنين يالله ياكريم زود في عددها




وهذي اثنين في السمره الثانيه
وبعضها بالمسايل ولاقدرت اصورها




والهدد عند الذيابه ويجهز هيصان طيرة عرار الشيهانه شوق




شوق تستعرض المهارات الجويه




وتردد كراونها فوق مواترنا




وانفرد عنها وترتفع عنه وتاخذ معه في مطراد..




وهذي التنكيسه واخفيتها ورى الحزوم وساق وراها هيصان..
شوي ويبشرنا انها صايده ماشالله تبارك الله..




وهذي حلوه تطرد في كروانها وماقصرت فيه واغلب اللقطات
ماقدرت الحق واصورها..




هد واعزل والطير اللي بعده




ونحوم شوق ونطير كروانها ومارتبت المهدات بالموضوع




ويزبن بالحصى ونطيره لها وماقصرت فيه




وهذي صور لشيهانه مكيده مع وليد هدت هدد طيب الله يبارك




اخونا عرار نكد عليه ضرسه وهم الضرس ولاهم العرس..
لاكنه يوم شاف الكراوين راح منه الالم هههههههه الله يستر عليه




التركيات اثبتت جدارتها في جميع المهدات




لقطات متتابعه


تفرق علينا الجول وصرنا ندور عليه ووقت ماندوج..
طار واحد وسبرناه الين وقع ..




وشال وليد طيرته على يده وراح يمه يبي يهد عليه..
وكانت هناك مفاجأه!!!!!!!!




بلج عن شيهانته وليد وشوي يوم الجول طار يجيله حول العشرين!!!!!
تبعنا الكروان اثره راح لجول ثاني وتفرق الجول هالصوره ماهي واضحه ..

فيها سبعه كراوين تطاير فوق الحصى
والجول الثاني راح لجهه ثانيه..


الجول مذير ومن يحوم طيره ياولد نبي نركد الجول ونعزل منه..
وحومة شيهانتي ويوم كسرت ورى مواترنا والاالجول يوم طار يجيله خمس..
رد مع اقتباس
  #9  
قديم 05/08/2012, 11:15 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع


الجول تطاير مع بعضه وارتكز سما موجه غرب وانظر يم شعله والا هي متقفيتنا ولاشافت الكراوين..

واصيح يمها وتجينا وتشغل جناحها الثاني ماشالله طلبت الجول




هيصان تل جيبه يبي يلحق الجيب وشعله مابعد تعدتني..


شعله راحت ركوز وجول الكراوين غدا تقول جول حمام..
واحمدالله يوم انه عطا مع درب زينه سقنا الجيوب معها..

والجول وجهه غرب في عين الشمس واشوفه مرتفع ونسوق وراه
واعاين في طيرتي..

ولاهي مرتفع عنه بالحيل وانظر يم الجول وشوي يوم كسر شمال وقربت منه الشيهانه..

خويانا يبيون يثبتون الجول لانزل ومايدرون عن الشيهانه
وشوي يوم جناحه بدى يختلف بدى يشكل في كبد السما..

ثواني ولاهي فوق الجول وتجي منكسه عليه بعد ماتعدى الجول الضلع
وانا انظر فيها يوم توغلت الجول..


على سنعها ماظهرت من الجول نازله للأرض الا وهي معها واحد ماشالله تبارك الله..
والجول نزل للأرض هبوط اظطراري قريب المكان..

ويوم جيت من ورى الشعيب على وجهتها والا هيصان عندها جعله يسلم..
يقول مادرينا عنها الا وهي وسط الجول..




هيصان مبسوط ودايم هالضحكه ماتفارقه ..
شعله مواسيها مقلبه ووجها معفوس تقول مارغينها بتراب ههههههه..




عزلنا كروانها وعشيناها وتستاهل العشا الزين ووصف لي عرار لحظة هددها..






وهذا هو الموقف اللي مايبيه كل قناص وشلون لاصار وقت الهدد
قمنا على البنشر قومة رجال واحد وماخذنا خمس دقايق ههههه..

وهدينا حلوه شيهانة وليد وتردد كراونها وتجيك اثنين عقب نازله من كبد السما..
وحامت مع العقب وضيعناها اول شي البنشر والحين ضياع الطير الله المستعان..




وليد راعي حلوه الزعل معه واصل حد وفيه احد يلومه!!!!..
الجهاز يعطينا اشاره واكيد انها تكسر بروس الضلعان ومالنا حيله وشلون ناصلها..


قلنا نكمل هددنا وان شالله تجي على الهدد الله يعقلها يارب..
وهدينا الشيهانه مكيده..




وانشهد انها مكيده والكروان يبي السما وماله فيها مزبان




وشلون تجرى وارتفع




راح يطوي جناحه




ومكيده ضيقت عليه الفضا..




وترديد والكروان عازم




بتجهز له خطفه كالعاده




كادت ان تحسم الجوله




ومراوغه موفقه من الكروان ولاكنها الاخيره




وحكمت عليه مكيده بالاعدام..




مكيده تتلذ بطعم النصر من دماء الشارد





وليد خاطره ارتاح من هدد مكيده والله يعقل طيرته يارب..
رد مع اقتباس
  #10  
قديم 05/08/2012, 11:32 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



محمد اظهر حمام مذبوح للعزل وباقي من الكراوين
بنلحق عليها ..
وقبل الهدد شيكنا على الجهاز ولا اعطانا صوت فقدنا الامل بعقلان حلوه.




هيصان اظهر الجهاز وشوف تعابير وجه وليد وكله امل ان يعطينا..
الجهاز صوت واشاره عن حلوه..




تعرفون جهاز تخطيط القلب يوم يعطينا اشاره ان الشخص متوفي ويرجع يدق مره ثاني..
ويشعرنا انه حي عشنا هذي اللحظه يوم دق معنا الجهاز ماودنا والله يمسينا الليل وحنا مضيعينها..


ودنا نسمر هاك الليله وخطرنا مبسوطه ماودنا نتوجد عليها ايه الله..




ومبرووووك العقيله ياوليد راح محمد على وجهتها شرق وحصلها بالعمدان القريبه منا..
قرب وقت الزوال وفيه كم كروان نبي نلحق عليها..




ابشر بشوق ياصفر العين




زابن بالحصى الكروان ونطيره لشوق






مايبي غير المزبان




وتخطيه شوق بعد ماراغ عنها
وجابته ماقصرت..




ماشالله عليها




شوق ومكيده والحمدلله عينا خير
وهذي من المهدات الطيبه لمكيده وجاء لها تصوير طيب..




الكروان نوى بالارتفاع وهذا هو المطلوب..




ومكيده تطوي الجناح بكل شموخ وتقول السماء سمائيه







الكروان بدا يردم ويقول انا مخلي الوكور




وترديد في كبد السماء وامتاع في امتاع






وماشالله تبارك الله وضرب البواري اللي تستاهله..
الين نزلته بالارض..

والحمدلله انقضا هاليوم مع اجمل لحظاته ومن بعد صلاة الظهر الى قبل المغرب..
هدد ومطارد ورى الصيد والله يدومها علينا وعليكم..




هذا نصيبنا اللهم لك الحمد..

رد مع اقتباس
  #11  
قديم 05/08/2012, 11:49 AM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع








وجهزنا المقسوم ويازينه من مقعاد في هالرمال البارده..




وزانت السوالف على دله وبراد شاهي
والبارق نراعيه عنا جنوب وريحة الطبخ مع هالجو تجلي كل التعب وتصفي الذهن..




وزانت الكبسه وانطحو فالكم واحكر البراد يالنشمي بعدها..
والحمدلله طاب لنا ذاك اليوم واستانسنا وفلينا الحجاج فيه وباليوم الثاني..

رجعنا لديارنا ومابي اقول نكفنا باقي على النكيفه شهور..
وبعدها بثلاث ايام تواجهت مع وليد بالساحل لعل وعسا نحصل من هالعبور الاخير..


يوم اصبحنا ذاك اليوم ماعينا غير كروان واحد..




ياحليك الحين نهد عليك حلوه..




وبسم الله الرحمن الرحيم والحق اركب موترك ياوليد..




مااخذ معها امتار والا هي خامه راسه خمت الذيب..




بصياحه سبب ازعاج لمحمد هههههه


وقطع العبور بساحلنا ومعاد له طاري..
............................................

ومن الايام الطيبه اللي مرت علينا جانا ضيف عزيز وقنصنا سوى بالاراضي الجنوبيه..

وهو عضو معنا بالمنتدى وراح تعرفونه..
واكتملت الرحله يوم وافق يخاوينا صقارنا الكبير ابوحزام..




وصلنا للحراوي وعشينا في هالديره الطيبه..




واصبحنا موجهين لحروه طيبه ابوحزام متقدمنا والضيف وراه..
ونزلنا نقنص رجلي بوسط العصلا والهدد عند خوينا لانتق من عندنا كروان يهد عليه..
كنت ماشي مع الضيف يوم قام الكروان ونعطي الحر حيزوم سبوقه




هذا حيزوم راح يطوي جناحه ورى الكروان ومافيه امل انك تطرد وراه بالموتر..
ادعي بس ياراعيه انه يحوله قريب..

وثواني يوم ارهى على الكروان ورده يمنا وترديد الين علق ماشالله تبارك الله بدايه موفقه..
ورحنا نتجارا على وجهته جاته عقبان تنش عليه..




عرفتوه الحين خوينا والشيخ الفاضل ابوسيف العضو السيف وماشالله تبارك الله على حيزوم..


طير السعد




وصوره لصاحبكم




ابوعراده وابوسيف
ومرحبابك مليون يابوسيف نورت الساحل الجنوبي




الكروان مع صاحبنا نزار السيبيري




حما علينا النهار وماعينا شي قربت الساعه 11 ونص
وشوي يوم صوت علينا ابوحزام عندي اثنين كراوين ورحت على حروتها..
ويوم طارت اثنين من قدامي بحول ميتين متر واعطي شعله سبوقها..




الكراوين يوم ابعدت عنا


رد مع اقتباس
  #12  
قديم 05/08/2012, 12:04 PM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



وهذي شعله شوفوها وسط الصوره راحت تسابق الريح يم الكراوين وابعدت عنا ومالنا قدرة نتبعها..
الا نمسكها بالداربيل وتبعناها بالدربيل الين ارهت على الكراوين..

وراحت يمه في نزول يم الارض واخفيناها وماندري هي صايده ولا لا والله كريم..
وجينا بحروتها ونشغل الجهاز وتعبنا في دوارتها وهي في المكان اللي وصلناه..


لاكن الحمض والطعوس والشمس القايله دوشتنا
واخذنا حول النص ساعه..


وحنا ندور وشوي والا الشوفه اللي قدامنا..




الحر قطع كبدها وبعد هالهده اختلف مطيرها علي..
الله المستعان




حاشره نفسها بالكروان من الرمضاء..

على قول سبار ربعه مره من المراريت هههههههههه زهمنا ابوحزام على الجهاز قال تعالو ياخويانا
قلنا بس حصل الكراوين ويوم جيناه


وظهرناه
وظهرنا من هالديره لديره ثانيه





وهذا غطاط حصلناه ويازينه زيناه مع كبسة الكروان ايه والله






صوره لأبوعراده وصراحه فيه مقطع نطرد فيه انا ابوعراده جول قطا تقول نطرد وحش ههههههه..
افلام اكشن حدثت بالمقطع وودي انزله ابيكم تنبسطون به لاكن بموافقه ابوعراده اول شي..


لم لم لم مدري يلملم هههههههههههههه طرينا ميقات يلملم ههههه





وضحينا بهالمكان الزين ومع اطيب فطور







شعله اشغلتها هالعصافير ههههه




وجاتنا عجه وغيرنا المكان لديره ثانيه .
وامسينا فيها وقنصناها باليوم الثاني..




ورحنا نتقصص فيها وعينا جره وتبعناها الين حصلناه خاش في هالاثله.

وهديت شعله






ابوعراده حك الدعسه يستر عليه ربي يبي يطير الكروان..






ماشالله تبارك الله جابته




وبن رشدان بيعزلها
رد مع اقتباس
  #13  
قديم 05/08/2012, 12:10 PM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: انشا موضوع



تقول حباره




وعينا اثنين وهدينا حيزوم وهذا هو مغدانا..
وزينا العلوم كلها..





واحلى كبسة كراوين وقطا




قدر الظغط يتستس واحلى نغم وبالنسبه ترى الطير بعيد كل البعد عن القدر ههه..




تفرج يابوسيف تفرج ياربع خالي



ورحنا بعدها لديرها فيها ربيع زين وقلنا نتمشى فيها
وهذي لقطات متتابعه ولاتعليق تراني تعبت ههههههههههه

















الحمد لله قنصنا وعينا خير والله يدومها علينا بالسنين الجايه وحنا وياكم في صحه وعافيه..
وعودنا من الجنوب والبال رايق ولله الحمد..

وآخر اللقطات لاكن فيه كم مفاجأه نبي نعرضها لكم بعد الثلاث الصور الجايه..


هذا اخر كروان هديت عليه..


وتستاهل هالصوره ابروزها وشعله في عين ذراع الذيب بحريه


عبودي وبدوري ماشالله تبارك الله جعل ربي يحفظهم ويخليهم لعينن ترجيهم
أشبال نوماس

واهديكم فيلم مقناصنا وعساه ينال اعجابكم
ملاحظه:يجب تغير الجوده الى اتش دي عن طريق الايقونه الشبيهه للنجمه يمين المقطع ومن يسار توجد ايقونه رفع الصوت انصح الجميع بتغيير الجوده





الى عشاق الحباري

تابعو التفاصيل بعد يومين ان شالله تعالى وفي نفس هذا الموضوع


الى أدارة منتديات مكشات والى مشرفينها واعضائها وزوارها
حنا قنصنا شمال وجنوب وجبنا لكم علومنا واجتهدنا بقدر المستطاع في انشاء هذي المواضيع وعساها تجملنا بس..

ومانبي منكم غير دعوه صادقه في ظهر الغيب واسأل الله لنا ولكم التوفيق بالدارين واعذرونا على القصور..
ودعواتكم لأخوي بالرحمه والغفران ولجميع اموات المسلمين

واستغفرو ربكم وتوبوا اليه
رد مع اقتباس
  #14  
قديم 05/08/2012, 03:16 PM
الصورة الرمزية ذراع الذيب
ذراع الذيب ذراع الذيب غير متواجد حالياً
 
تاريخ التسجيل: Dec 2007
الدولة: اطهر بقاع الارض ,,والساحل الغربي
المشاركات: 9,982
المواضيع: 192
ذراع الذيب is on a distinguished road
رد: خوة نشاما..الجزء الثاني والاخير من رحلة ولع.........ذراع الذيب

اعتذر من الجميع لتأخير التكمله ان شالله تعالى راح اطرح الموضوع هذي الايام..
رد مع اقتباس
  #15  
قديم 05/08/2012, 03:56 PM
لازام لازام غير متواجد حالياً
مكشاتي متواصل
 
تاريخ التسجيل: Nov 2011
المشاركات: 68
المواضيع: 8
لازام is on a distinguished road
رد: خوة نشاما..الجزء الثاني والاخير من رحلة ولع.........ذراع الذيب

مششاء الله تبارك الله عليكم

مقناص كايف وخوة نشاما


(وابو حزام الله يذكره بالخير هاشايب قنصت معه العام ) ونعم الرجل






وعساء ايامك ي ذراع الذيب كلها زينه
رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 06:37 AM




Powered by vBulletin® Copyright ©2000 - 2014, Jelsoft Enterprises Ltd.
Translation By : exahost.com.sa
هذا المنتدى يستخدم منتجات بلص
جميع الحقوق محفوظة © موقع مكشات ،،، لأفضل عرض استخدم : 768 ×1024 ::: مكشات / أحد المشاريع المحتضنة في حاضنة بادر لتقنية المعلومات والإتصالات