تركيب مساعدات استراليه

[الهاوي]

السلام عليكم ورحمة الله وبركاته

اخواني راعين الكيف والمطامر في البران على ظهور ( فور ويل درايف )4x4
عندي سؤال وهو ....
المساعدات الاسترالية ابي معلومات كاملة يعني تنصحون احد يركبها على النيسان الصالون والمجرب مهوب مثل اللي يسمع
وبعدين في اليايات على حد علمي يقولون فيه ثلاث اوزان مختلفة وش الافضل والانسب
ومشكورين مقدما .

[اخو نورة]

هلا وغلا بالهاوي

المساعدات الاسترالية والله مدري عنها
وفية السست الاسترالية يقولون انها اطول بنص لفه عن السست العادية الى موجوده في السوق واظن مالها لزوم على الجيب الصالون الى عندك لانها بترفعه زود وماله داعي الرفع الزايد
((((((((((((((مجرد معلومات بسيطة واامل التاكد من الاخوان في المنتدى)))))))))))

[نجم سهيل]

هلا باخوي الهاوي.

انا معي لاندكروزر 2001 GX وقبل اسبوعين ركبت طقم كامل مساعدات ويايات خلفية وامامية, ليش ركبتها؟ لان المساعدات واليايات شد البلد ماتصلح للبران والمطارد, مع التحميل يضرب الربل الخلفي اللي داخل الياي في الدفرنس عند ادنى مطب.

المهم ركبت يايات ومساعدات خلفية استرالية حمولة 200 كيلو وارتفاع اضافي 4 سم وركبت مساعدات امامية (الاند من 98 وفوق مايجي يايات قدام لكن فية TORSION ARM ) ماشاء الله الموتر صار مثل السلوقي وماتغير علي قساوة المطب لكن فية حمولة 400 و 500 كيلو وهذة على ماسمعت مطبها قاسي وفية حمولة 200 كيلو بس ارتفاع 2 سم للي ماعندة نية يركب كفرات حجم كبير مثل البالون 900 او اليوكوهاما 8.25.

حسب الارشادات في الكتالوج لليايات والمساعدات الاسترالية يفضل تركب طقم كامل ويمكن تحتاج ترفع او تنزل وجه الموتر.

المشكلة اني حسيت ان الموتر عزمة ضعف شي بسيط واعتقد ان هذا بسبب تغير زاوية عمود الكردان شي بسيط.

والموقع الخاص بالشركة على الأنترنت هو:

http://www.arb.com.au/

ارجوا اني افدتك بشي وانا بشورك طال عمرك.

سلامي لك وللجميع.

[الهاوي]

اقول ما شاء الله عليك يانجم سهيل
عز الله اللي كفيت و وفيت ما يحتاج وآمر تحت امرك باللي نقدر نفيدك فيه .
لكن طمعت واحترت اجل معنى انك تشور علي تركيب استرالي حمولة 200 ولكن اي ارتفاع 4 او 2 سم لانه لو ركبت كفرات 900 بالون اخاف تحك في الرفارف علشان كذا ابركب كفرات عادية رملية وحجرية وبعدين اخوي نجم سهيل كم السعر الطقم كامل مساعدات مع اليايات ومن وين شريتهن .
وتسلم و تقصر ونخدمك بالافراح .... ( الزوجة الثانية ) مزحة ملقوف

[الخبير]

السلام عليكم
يا جماعة انا الشاص حقى ما غيرت مساعداته الشد بلد و عز الله انه رجال و مايحتاج في البر تقل ما شاء الله كابرس .
لكن يا نجم سهيل هل اذا ركب المساعدات الاستراليه هل اقدر ازيد الحمولة ، و هل سمعت بمساعدات جبريل الغاز ( مهيب الزيت ) يمدحونها و الله ؟

[نجم سهيل]

هلا وغلا بالاخوان الهاوي والخبير.

اخوي الهاوي اليايات الخلفية للاندكروزر ب 504 ريال والمساعدات 4 الواحد 283 ريال هذا طقم حمولة 200 كيلو وارتفاع 4 سم, وشريتهن من الرماية لانهم يعطونك ضمان سنة ولا تركب الطقم عندهم في ورشتهم الجديدة نهاية طريق التخصصي وانت رايح شمال لأن الميكانيكي اللي عندهم ماعندة ماعند جددتي. بالنسبة للكفرات الرملية لاتفوتك اليوكوهاما 8.25 اصغر شي بسيط من البالون 900 لكن في الحصى بس عط الكفر هواء صح وكل الله.

أخوي الخبير الشاص كامل والكامل وجه الله نصيحتي لاتغير شي فية وماشاء الله من ناحية التحميل مافوقة شي من السيارات اللي من نفس فئتة. انا اضطريت اغير اليايات والمساعدات لان اللاند كوزر الجديد ماينفع للتحميل ابد.

وسلامي للجميع.

[الهاوي]

ما قصرت اخوي نجم سهيل على سعة صدرك من هالاسئيله اللي طولتها معك
وترى ردي مصيف بس اشكوى لله كنت غير موجود في الخدمة مؤقتا
تحياتي

[ابوقاسم]

السؤال ل نجم سهيل.
لاهنت يا خوي ولكن هل عندك رقم تليفن للمحل ووينه فيه بالضبط وايش اسمه لو تكرمت .
وللجميع التحية





ومع السلامة

[فـ(الجـوف)ـتى]

السلام عليكم :
الله يعطيك العافيه ولك الشكر اخوى 0

[AL_3NZI]

انا ياشباب عندي شيفروليه تريل بليزر وابي ارفعه ما ادري المساعدات تركب ولا لا .عطونا رايكم يا اهل الخبره

[شروكي ربع]

اللي اعرفه ان موترك تركب عليه مساعدات شاص ..


ومساعدات الشاص ما يحتاج امدحها لا نها معروفة ..


وتوفر مبلغ كبير ..

[الكونترولCONTROL]

المساعدات : الامريكية اشوف انها احسن و متوفرة بالصماعية مونرو
اليايات : الاسترالي اولد مان .... و احسن شي لا ترفع الموتر خذ اقل شيس ارتفاع
و الاصلي تلقاه عند الرماية الحبتين بحدود 600 اعتقد

[الفتكي]

السلام عليكم
كل عام وانتم بخير
شوف اخوي الهاوي الياي الاسترالي الخلفي ركب مقاس 200 كيلو الطول 3سم (490 ريال عند السنيدي الرمايه .......) ممتاز جدا انا مركبها والكفرات بالون 900 ماكسس ممتازه جدا ولا يحك ولا يردح مثل شد البلد ولافيه مطب ممتاز ولاينزل واحمل فيه خيمة البيرق4*4 (تراها ثقيله) وتانكي المويه 100لتر واربعه شباب والفرش والأغراض كامله ولا ينزل الا تقريبا 2سم وسيارتي صالون 2004 نيسان وخل الياي الي قدام شد البلد ولا تركب المساعدات الا شد البلد تراني مصلح في موتري كذا اذا بتطيعني ركبها ولا تتردد أسأل مجرب ولا تسأل طبيب ولا تنساني من الدعاء .
the.5555@hotmail.com

[Mohammad]

من تجربه ركبت 4 مساعدات اولدمان من الرمايه ويايات خلفيه, المساعدات لم تناسبنى ابدا ربما فبها عطل مصنعى او لم تناسب الموتر ولكن الياي تمام. والله اعلم

[شرزان]

أنا عندي لاند كروزر 2001 غيرت مساعدات استرالي أصفر خلفيات فقط بصراحه جيده
موجوده عند الرمايه وأفضل لكم تروحون للورشه حقتهم وتوفر مشوار عليك بدل عن مشوارين فيها مساعدات ويايات وفلبيني يفهم أسمه أليفريدو جواله 0509395771 بصراحه شقردي وسعرطقم أمامي ب 700ريال و50 تركيب
موقع الورشه إمتداد التخصصي وانت متجه شمال بعد ثاني نفق تجيك محطه نفط . تلقى الورشه داخل المحطه 4 في 4 وهذا الموقع للأخوه الحراريف اللي عندهم أجهزة ملاحه Gps
n 24 44.854
e 046 38 541