افضل انواع القهوة

[الشويطي]

بسم الله الرحمن الرحيم

يا اخواني الاعزاء ابنشدكم عن افضل انواع القهوة الموجودة في الاسواق ووين احصلها ابغا لاشربة فنجال يطلع فنجال يعدل الراس ولكم خالص الشكر والتقدير

[عاشق السيل]

علشان أكون صريح معك أنا متعامل مع نوع واحد ولا أعرف غيره ،،

((( بن هرري حق باشنفر ))) وتلقاه بأي سوق مركزي ،،

بصراحة ممتاز جدا جدا وأنا مرتاح معه كثير وأكثر الله أعرفهم يستخدمونه ويمدحونه جدا ،،

وبالتوفيق يالغالي وتقبل مروري ...



.

[تيروبيروا]

تسلم يالغلى

على المعلومة

[راعي ابوعراوي]

أولا البن اليمني الخولاني

ثانيا
البن الهرري باشنفر درجة أولى

ويقولون ان فيه بن من المخواة يعتبر الدرجة الأولى أكثر من اليمني
وهو للناس حقين الكيف والخاااصة حتى بعض اهل المخواة ما يلقونه وانه غالي من جودته

ولا أدري عن صدق الكلام من كذبه

[الماكرو]

اضافة الى ابوعراوي
هناك قهوه في منطقة المجارده (تهامة بني شهر الجنوب) في وادي الغيل وانا زرت الوادي شخصيا وكانت القهوة الطازجه التي تعدل الراس ولكن لقلة الزارعين فهي محصوره على اهل المنطقه وبها موز ماذقت الذمنه

تحياتي 0000

[راس الرعيلة]

بأعطيك اللي يعدل مزاجي وكلن بكيفه راضي



أنا يالحبيب ما يعدل راسي إلا القهوة الخولانيه وسبق لي أن جربت وحست ودست ولا لقيت مثلها في تعديل المزااااااج


خخخخخ


طبعا كلن وهواه


وأأكد عليك بعد:
نص حمسه ,لا تكثر عليها تحمس (لا تخليها لين تسود أنتبه)



وعلى النار ثلث ساعه بعد


خخخخخخ


بصراحة إن جريتها ما تعداها

[ابو وكر]

المهم أنا وين احصل الخولاني الأصلي

[الشويطي]

مشكورين وما قصرتم وبيض الله وجيهكم علي المعلومات القيمة لكن ابنشدكم عن الخوان من اليمن الي يبيعون قهاويهم عند المساجد وعند بعض المحطات وش رايكم بقهوتهم هم يقولون عندهم برية وخولآني وكيف اعرف البرية الطيبة من غيرها وزي منتم عارفين الغش موجود افيدونا جزاكم الله خير ولكم خالص الشكر التقدير.

[$$$ نايف $$$]

أنا شاري هرري رقم واحد الأصاله بس للحين ماجربته

يقولون طيب وأنه مثل باشنفر والله أعلم

بس نصيحه لزم تنقي القهوه قبل الحمس لان فيها بعض الحبات السوداء هذي تعطي مرار بالقهوه

يعني تخرب شغلك كله

وعساكم على القوه

[رووس الشواهيق]

القهوة فيها انواع :
الاول/ البرية
الثاني /الهرري
الثالث/الخولاني

انا بالنسبة لي ماأشتري الا الخولاني لأني صراحه لقيت فيها نكهة ماحصلتها في البرية ولا في الهرري



شكرا اخوي الله يبارك فيك

[ضاحي]

اخوي الشويطي
السلام عليكم ورحمة الله وبركاته
مشاركتي لموضوعك سلمك الله عبارة عن قصيدة القهوه للشاعر الكبير محمد العبدالله القاضي رحمه الله رحمة واسعة وأمواتنا وأمواتكم واموات المسلمين آمين
وقد رويت القصيدة بعدة روايات والرواية اللي سوف اذكرها هي رواية المرحوم
عبدالرحمن البراهيم الربيعي


وقبل انقل لك القصيدة بالنسبة لانواع القهوة مثل ماذكرو الاخوان كل واحد له ذوقة مع اني من انصار القهوه اليمنية ولكن هناك حاجة تزكي القهوة وتجعل مذاقها غير شكل وهي ان القهوة ما تطحنها الا قبل الطبخ مباشرة مع اضافة البهارات المرغوبه من المسمار( العويدي او القرنفل) الزعفران ومن ثم يضاف الهيل بعد ان تطبخ على نار هادئه ويذهب عنها الزبد




يا من لقلب كل ما التم الاشفاق ***** من عام الأول به دواكيك وخفوق
يجاهد جنود في سواهيج الإطراق ***** ويكشف له أسرار كتمها بصندوق
إلى عن له تذكار الأحباب واشتاق ***** باله وطف لخاطره طاري الشوق
قربت له من غاية البن ما لاق ***** بالكف صافيها عن العذف منسوق
احمس ثلاث يانديمي على ساق ***** ريحه على جمر الغضا يفضح السوق
واحذرك والنية وبالك والاحراق ***** واصحا تصير بعاجل الحمس مطفوق
الى اصفر لونه ثم بشّت بالاعراق ***** صفرا كما الياقوت يطرب لها الموق
وعطّت بريح فاضح فاخر فاق ***** لا عنبر ريحه بالأنفاس منشوق
كبه بنجر يسمعه كل مشتاق*****راع الهوى يطرب إلى دق بخفوق
واحشه بدلة مولع كنّها ساق ***** بلورة مربوبة تقل غرنوق
خله تفوح وراعي الكيف يشتاق ***** إلى طفح له جوهر صح له لوق
أصغر قموره كالزمرد بالاشعاق ***** واكباره الطافح كما صافي الموق
زله على وضحا بها خمسة أرناق ***** هيل ومسمار بالأسباب مسحوق
مع زعفران والشمطري إلى انساق ***** والعنبر الغالي على الطاق مطبوق
إلى اجتمع هذا وهذا بتيفاق ***** صبه كفيت العوق عن كل مخلوق
بفنجال صين صافي عنه الارماق***** تغضي وكرسيه غدان لمعشوق
إلى صب فابصر جوهره تقل شبراق ***** رنق تصور بالحمامة على الطوق
شكل غرا الفنجال لونه كما انراق ***** دم لقلب وإن مزع منه معلوق
خمر إلى منه تساقى بالأرياق ***** عليه من ما صافي الورد مذلوق
راعيه كنه شارب كاس ترياق *****كاس الطرب وسرور من ذاق له ذوق
يحتاج من خمر السكاره إلى فاق ***** خشف تشف شفاه والعنق مفهوق
عبث يعيل بحبةٍ منه ماماق ***** وهو يضاهي زاهي البدر بشعوق
بين اشفيته إلى غنج بارق حاق ***** عجل رفيفه بارقه غرق بطبوق
سحر كتب من حبر عينيه باوراق ***** خديه صادين ونونين من فوق
كن العرق بخدودها حصّ أرناق ***** ينثر على صفحات بلورة الشوق
إلي تبسم شع وأشرق بالآفاق ***** نور يفوق البدر مع حسن منطوق
بالعنق كنّ الورس والمسك به راق ***** ما مشخص في صدره الشاخ مدقوق
يمشي برفق خايف مدمج الساق ***** يفصم حجول ضامه الثقل من فوق
إلى صفا لك ساعة وأنت مشتاق ***** فاقطف زهر مالاق فالعمر ملحوق
وإلى حصل ما قيل عندي فالارزاق ***** بيد كريم كافل كل مخلوق
هذا وصلّوا عد ما ناض برّاق ***** أو ما شكا الفرقى شفيق ومشفوق
على النبي ما زِج زاج بالأوراق ***** وآله وصحبه عد ما سيق مسيوق




مشاركاتي


ضــ جنوب افريقيا بعدسة ـاحي (http://www.mekshat.com/vb/showthread.php?t=88278)


ضـ دولة كينيا بعدسة ـاحي (http://www.mekshat.com/vb/showthread.php?t=88506)


طريقة تثبيت الكنوود بسهولة (http://www.mekshat.com/vb/showthread.php?p=615465#post615465)


نبي تعليق على الصورة (http://www.mekshat.com/vb/showthread.php?p=635657#post635657)


من مشاهداتي المؤلمه في النفود الكبير (http://www.mekshat.com/vb/showthread.php?p=635647#post635647)

[الدبل الثقيل]

الخولاني وارد بافرط كيس وزنه كيلو منقى
والهنديه وارد المستنير خيشه عشرة كيلو .......... واهم شي العويدي والهيل الهندي .........

[مارشال]

السلام عليكم

الخولاني تلقاه عند محلات الحميضي او الحصين الديرة غرب سوق المعيقلية جنوب سوق الحساوية هم افضل من يجيبون في السوق واكثر الناس للأسف يغش في بيع الخولاني يقولك انها خولاني وهي ماهي خولاني

اذا تبي افيدك اكثر راسلني على الخاصة

[وليدة حرب]

إلا بغيت الكيف فلا عنك وعن البرية هي اللي تقعد الراس...
ولاكن تراها يبلها وقت وهي تقلب على النار ولا تكون النار قويية اقصر دونها وخلها من 20 إلى 30 دقيقة
ثم زلها . ولا بعدها غير القطمى وتلقاها عند عطارة بن منقاش خذ الحمسة القالطة ( الثقيلة )
هذا من واقع تجربتي مع القهوة

[الاشعل 316]

غير الخولاني لا تدور