وش ذا الكـــلام يــاسرهـــيــــــــد !!!!

[المري]

السلام عليكم .. وش ذا الكلام الزين يابو عبدلله !!!!

اخواني الموضوع هذا رد لأخونا سرهيد ( ابو عبدالله ) على واحد من الاعضاء .. المهم قريت الرد ولقيته

وارد ويشمل بعض الصقاقير الجدد وهو غصب عنهم لانهم ماتعمقو في هذا الهواية , فحبيت اكثر الاعضاء

يطلعون على هذا الكلام اللي اطلقت عليه ((( كلام من ذهب )):


الرجال اللى ما يتابع الطير الين يعرف علته والله ما يدري وين الصقارة رايحه

لكن الصقار الصحيح هو اللي يتابع الطير الين يعرف وش اسباب المشاكل اللي ظهرت فيه

عرفت لي رجال الله يرحم من توفى منهم ويطول عمر من بقى على ما يرضي الله

والله الواحد منهم يطالع بوجه طيره يعرف ان الطير مستذبح واللا مريض واللا منغث واللا معومس واللا مستنكر ............ هذولا الصقارة اللي يطلق عليهم مسمى صقارة صحيح

اما بعض هالجيل التالي والله ما غير يدودل دميجته ويقول انا صقار .

تلاقي طيره جايه رداد ولا عاد يقدر يطير وهو يقول والله لقرص عليك يالخبيث الين ما عاد تخلي صيدتك .........

الله المستعان .............. تبون الصحيح من عقب ذولا انا اشهد ان الصقور عيقبت



أنتهى كلااام سرهيد ( ابو عبدالله )

*********


كلااام من ذهب وياليت كل منا يحاول يدرس نفس طيره ويصيد خاااطره ..

اذا ناظر طيره وشافه يغضي بعيونه يعرف هو ينعس ولا مريض , مثل هذه الصورة

شاهين ينعس في فترة القيلولة:

http://www.mekshat.com/pix/upload/images48/mk1168_shaehhn.jpg

[القرناس المهاجر]

ماقصر ابو عبدالله 00 ولآقصرت يالمري 00

صحيح إن الصقّاره راحوا 00 لكن لايزال للأصايل ســلآله :D :good:




أخوكم 00 القرناس المهاجر:)

[فنجون]

الحين اللي يعرف للطير والا مايعرف ينقل طير ويقنص

[مران]

ماقصر ابو عبدالله 00 ولآقصرت يالمري 00

صحيح إن الصقّاره راحوا 00 لكن لايزال للأصايل ســلآله :D :good:




أخوكم 00 القرناس المهاجر:)
فعلا يابومعيض لايزال للاصايل سلاله شرواك وشروى الجميع
اخوك مران

[شبراق]

صدقت والله من ذهب

[الصامل111]

السلام عليكم


يالربع لاننكر ان اكثر الشباب انخرط في مجال الصقاره في الاونه الاخيره فجب الا يكون هناك قساوه عليهم

احبا ط لهم


بقدر مايكون هناك تشجيع لهم وتوجيه سليم 00000000000 مع الشكر للجميع

[قلب ذيب]

والله لقرص عليك يالخبيث الين ما عاد تخلي صيدتك .........!!!
ههههههههههههههههه
الله يخبث شيطانك ياسرهيد , انشهد انك طحت عليها , فعلا ماقلته صحيح 0
لكن ياجماعه الصقاقير يختلفون ولابد ان نعطي المجتهد قدره , ونخرط ظالم الطير بخيزران 0

[المري]

مرحبا اخوي فنجون والقرناس المهاجر ومران وشبراق والصامل..

تسلمون على المرور. وماقصرتو..

****

اخوي الصامل .. نعين ونعاون يابوحمد لأخونا المبتديئن ..

****

وسلاامتكم

اخوكم - المري

[المري]

مرحبا اخوي قلب ذيب..

وتسلم على المرور .. وصحيح المجتهد لازم يعطى قدره على الشكل الوافي..

وصحيح في ناس جدد توهم مبتدئين بس ماشاء الله عليهم ..مافيهم حيله..

اخوكم - المري

[الاشعل 316]

يعطيك العافيه اخوي ابو معيض

وصدق في كلامه ابو عبدالله

اخوك ابو سطام

[hawwamT]

يعطيك العافية يالمري ..وفعلا كلام سرهيد اللي كتبه من ذهب ..وأذكر والله ياأخوان أن واحد من الشباب اللي أعرفهم زين وقال لي بنفسه ان طيره ماصاد وضيع صيده وحاول الهروب من راعيه ويقول ماطرحته الا المغرب ويقول رجعته به الى البيت وحطيته في غرفة وجبت سلك حق الفيديو وقام يجلد الطير ويجلده ويجلده,,ويقول لي والله بلسانه ان الطير يفح في وجه الرجال ودخلوا الحريم الى الغرفة وقاموا ينشدوه بالله ان يترك الطير..حتى تركه...بالله عليكم وش ذا وش تقولون والله كلمة حرام قليلة ولاحول ولاقوة الا بالله

[طيرحوران]

كلام ابو عبد الله فيه من الواقع الكثير من هذا الجيل
وفي الحقيقة ان الصقار يعرف طيره اكثر من غيره إذا كان يطلق عليه صقار
ودائما تحصل معنا في مثل هذه الأمور
تجد صاحب الطير دائما يشتكي من طيره ويعرف تقريبا علته ولكن لا يثق بنفسه فمثلا تجد طيره فيه اقلاع والطير مايعلف زين
ويجيك صقار قديم ولكن أول مره يشوف الطير وحتى ماقلبه ويشوف الطير مايعلف علف زين ويقوله طيرك هذا فسقااان
اقصر عليه وشف وشلون يصير آكله
وفي الحقيقة هو فيه اقلاع ولا يكتشفه صقاره الذي كذب نفسه بحكمه على طيره بأن فيه قلاع إلا إذا وداه للمستشفى او العويدي ثم يقول والله اني قايله ان فيه قلاع
وتحصل مثل تلك الأمور كثير
وأذكر مرة من المرات أن فيه واحد من الشباب عنده طير ودائما يطلع المدعى وعارفين كل شيء عن طيره
الطير شنذره اول الوقت وحذف شبيكا اللهم ياكافي من كبرها واللي يشوف الشبيكا يقول تكفيه حق هالسنة والسنة الجاية من كبرها
المهم الطير تفك له حمام يطرد وإذا صملت الحمامه جنب وأشغلنا بطريقته هذه قلت لراعي الطير خلنا نشنذر الطير بعد مامر على الشناذر الأوله تقريبا شهر
وشاور من واحد من ربعة وقال لا خلاص شنذرناه ويكفيه المهم راعيه مل من طيره مره
ولا هاك اليوم طالعين وانا اضبط الشناذر واقول لراعي الطير خلنا اشنذر الطير قبل لا يجي فلان ولا يخليك تشنذره
قال تم واقضب الطير واسلقطها بحلقها
وبعدها بخمس دقايق والله يالربع لو تشوفون وش حذف كان تلمون راسكم من شيء شفته
حذف شبيكا تملا فنجال القهوة الصغير بدون مبالغه بكيسها كاملة
وحذف والله مادري هي ثنتين ولا ثلاث روابيج مثل روباجة الجربوع ومن حسن الحظ اننا وزناه قبل الشنذرة ووزناه بعد الشنذرة تقريبا 50جرام
هذا ماجرا
ولكن الطير ماتغير فيه شيء ضل على وضعة قبل الشناذر وباع الطير مع توضيح كل علومه
ومع ذلك شري الطير واللي شراه يقول ابحطه بالمجلس وشرهتك إذا فك مسباقه
والسلام

[طيرحوران]

يعطيك العافية يالمري ..وفعلا كلام سرهيد اللي كتبه من ذهب ..وأذكر والله ياأخوان أن واحد من الشباب اللي أعرفهم زين وقال لي بنفسه ان طيره ماصاد وضيع صيده وحاول الهروب من راعيه ويقول ماطرحته الا المغرب ويقول رجعته به الى البيت وحطيته في غرفة وجبت سلك حق الفيديو وقام يجلد الطير ويجلده ويجلده,,ويقول لي والله بلسانه ان الطير يفح في وجه الرجال ودخلوا الحريم الى الغرفة وقاموا ينشدوه بالله ان يترك الطير..حتى تركه...بالله عليكم وش ذا وش تقولون والله كلمة حرام قليلة ولاحول ولاقوة الا بالله
هل يعقل هالكلام
والله تمنيت انك ماكتبته ياراعي هومات
اعوذبالله من الشيطان واعوانة
الله لا يعاقبنا على هالفعل الشنيع
اللهم اني صائم

[المري]

مرحبا بالاخوان - الاشعل - hawwamat - طير حوران

وتسلمون على المرور..

****

اخوي طير حوران . بعض الطيور الطيبه مايطرد الحمامه ماادري وش السبب ؟؟ تحصله على الحبارى يهدون

عقب اطيور والحمام اذا هده راعيه وشافها ارتفعت جنب عنها ..

واذا دعيت على الملواح جاك على الهون . تقول مافيه حيل !!!

بس الا شاف الحبارى تغير اطياره .. فسبحان الله ..

اخوكم - المري

[احب الربيع]

مصيبت الوقت ياخوان كل واحد وياة طير بس ماقمنة نعرف راعي الطير من اشريطي بس قلن حاط علي سيارات طير ومانقول في ناس متولع بالطيور بس اختلط الحابل بالنابل ومشكور ياخوي علي الموضوع مع الف سلامة

[طيرحوران]

من حسن الحظ لقيت صورة الشبيكا والروابيج اكرمكم الله
http://www.mekshat.com/pix/upload/images48/mk8577_20070112113.jpg

[((الخالدي))]

كلام سرهيد صحيح

[BeLoveLy]

قلت فصدقت
والله صادق يا سرهيد على هذا الكلام ,,, الله المستعان
و مشكور يا بو معيض على هذا الكلام الي بصراحة يعادل بذهب الذهب

تقبلو مروري

اخوكم : عبدالرحمن

[سرهيد1]

السلام عليكم ورحمة الله

ههههههههههههههههههههههه ........... ابو معيض الله يهديك بس

والله يوم شفت عنوان الموضوع انخلع قلبي من بين الحنايا ............... قلت لروحي ولييييه هذا وش صاد علي ....؟؟؟؟

وتبي الصحيح انتفخ غاربي ونويت الهوشة ...........ههههههههه راعي مشاكل

الوكاد يوم دخلت ومير تبرد كبدي يا بن الحلال هههههههههههههههه تصدق من قو بردة الكبد حسيت اني افطرت والعياذ بالله ..

ياخوي اثري ارتاع منك يابو معيض ههههههههههههه

اقول بيض الله وجهك على وضع الموضوع

ويا عنك ان هالموضوع ما كان يلاقي له توهج لو انك مو انت اللى وضعته تحت اسمك

جزاك الله خير على ما تبذله لأخوانك ياب معيض


اشكر جميع من جاب لي طاري على جميل ذكرهم


وبالنسبة لسالفة اخوي حوام .............. لا تستغربون يالربع

يعلم الله اني شفت لي مقرود ناقل له وحش وكل ما جاء يمسح على وجهه عرط الطير بصابعه ........ عقبها اسمع الكلام القذر من المقرود ......... يابن الكذا ....... وياولد الكذا ......

والحقيقة ما وقف الوضع عند السب ....... تطور الوضع لتصفيق كفوف

وسمعت من ثقات انهم شاهدوا من يضرب وجه طيره بالنعال ....... يكرم الرجال والحرار ...... والله غبنه


اخوي طير حوران ........... مرحبا بك وترى لك وحشة في نفوسنا فلا تقطع لو سمحت واللا ترى بعدين مافيه وحش هالسنة .......هههه

اخوي طير تبي الصحيح............ والله ان الصورة اللي حطيتها لو ما شافوها الناس ما يصدقون ان هذا كله طاح من طير مشنذر من قبل ....!!!!

لكن لي تعليق بسيط

عندما تجد طير قاضب روابيج بهالشكل تأكد من أمر واحد :

الطير لا يثق في كرم صاحبه لذلك يخزن ما يذهب عنه الم الجوع .

تقبل الله طاعات الجميع

[ابو عايد]

السلام عليكم ورحمة الله وبركاته

كلام ابو عبدالله صحيح ذكرني أبو سعد الله يذكرة الشهادة أن شاء الله

عن الشنذرة ياصقارين كل من جاء مبتدء أو قديم وهو صقار الشنذرة خطيرة وقد أذبحت كم طير الشنذرة الطبية زينه وانصح باستخدامها ولكن المصيبه أنهم يشنذرون الفروخ أذكر العام تم طرح مثلوثة بحريه واهديناها على واحد من الجماعه وتوه ماأمرج الطير مادعاء الطير الا مرة أو مرتين ويشنذرة على طول والله يالربع تشوفون العجب في الطير وش يسوي في عمرة يالبع ماتم دقيقتان الا الطير شال عمرة وطاح على نحرة ومات وكم من الشنذرة .....!

[الرقعي]

ردن علي كلام اخوي المري نعم راحو صقارين الاوليون لكن الوقت كله تغير نحن في عصر السرعه ماحن مثل الاولين الحين تلقي الوحد يشتري طير وقت الموسم واخر الموسم يبيعه ولايقرنسه عند محل قرنسه ولايدري عنه الاوقت الهدد و لاهو فاضي علي كلامك يشوف الطير نعسان ولامرضان يبغي بس اهم شي يلقي شي ويصيده وما الاولين عندهم حب ومعزه الطير تلقي الطير عنده من 15سنه وهو يعتنبه وعرف اطبعه اما لان تلقي الطير مصقره عشرين واحد من يدهذا بيد هذك يخوك الدنيا كلها تغيرت الناس صار فيها حب التغيير وشكرن وناسف اذا فيه اي خطاء اخوكم الرقعي

[الدكتور00]

يضرب وجه طيره بالنعال .......






اعقب ونا ولد أبوي ..... !!!!


أبو عبدالله ........... تقوله صادق ولا تمزح ؟! حلالاه يا البندق اللي ما تخطي عينيه .
















بيض الله وجهك يا المري على تذكير الربع بهالموضوع الطيب .

وصح السانك يا سرهيد على هالكلام الزين .. وأبشرك الدنيا بعدها بخير .







وسلامتكم ،،،،،،،،،،،،

[خيال الصبحا]

وعليكم السلام ورحمة الله وبركاته
الاخوان
ابو معيض
ابو عبدالله
الاخوة جميعًا
بيض الله وجيهكم
والله لا يهينكم ، وهالطيور
امانة معانا ، والي ماهو قدها لاينقلها
وان كان يجي يوم ونسوي كذا بالطيور
الله لا يجعلنا ننقلها من اولها ، الجاهل يتعلم
ومااحد انولد متعلم ، ولكن البلاء الي يضرب الطير
ويهينه ( ياطـــيــــر مـــاحـــدك نـــصـــيــــبــــك عـــلــــى خـــيــــر)
والله لا يهينكم ، وشكرًا

[عناز]

رد سرهيد:(وتبي الصحيح انتفخ غاربي ونويت الهوشة ...........ههههههههه راعي مشاكل)




*أبو عبدالله والله بغى يطيح الفنجال بشليلي يوم قريت هالعباره بردك على أبو معيض


*أبو معيض الوكاد انك قلت الصحيح أخونا سرهيد فخر لنا بهذه الخيمه ومكشات عامه


اخوكم أبوريان

[محمد البازعي]

من حسن الحظ لقيت صورة الشبيكا والروابيج اكرمكم الله
http://www.mekshat.com/pix/upload/images48/mk8577_20070112113.jpg



اخواني ممكن معلومات عن الي بالصوره

يعني من وشو

وليش ومتى يجي



:confused: الصراحه مدري وشو هذا

:(واعذروني ع السوال الي مدري وش يبي

:j

دمتم بود

[تواق]

تدرون وش المشكله


فيه بعض الاخوان هداهم الله من الي توهم ناقلين الطير يشوفون الافلام ولا الصور في المنتديات

ويبي طيره ياصل نفس مستواها وهذا من حقه لاكن المصيبه انه لايسمع من اهل الخبره ولا حتى يعبرهم


وياخذ شوط طويل يتعلم على روس عشرين ولا خمسين طير لكن بعضهم والله والف نعم تلقاه قبل لايشتري


طير يخاوي الصقاقير في مجالسهم ورحلاتهم ويبداء يسحب الخبره منهم سحب هذا هو الصقار فعلا


ياخواني والله الذي لااله الا هو اني اصقر الطيور وانا صغير واني لا افوت فرصه واحده اتعلم منها


من واحد اكثر خبره مني ولا زلت اتعلم خصوصا في مجال طب الطيور واخرها من اخوي الكبير ابو عبدالله


وطريقته الفعاله مع الخل


واعبر هنا صقاقير منتديات مكشات منجم حقيقي يجمع صقاقير الوطن العربي كله

[رضوان]

السلام عليكم
مشاء الله عليك يالمري ما قصرت خوش موضوع رهيب يعطيك الف عافيه والاخوان بعد ما قصروا

[شواهين]

كلام فعلا من ذهب
وهذا الكلام اشهد انه من شي اغلا من الذهب
وبالنسبة لرحيلي فذلك حلم بالنسبة لك ولمن يستخدمون (بهائم التهجين) والله غير ايبس حلوجكم بالنقاشات التي تعوفكم هالبهايم اللى محسوبه على الصقارة غلط ....... هذي خلط بين شكل الصقور ونذالة العقبان وصياح القطاوة وغباء الحمير اعزكم الله ........... (شكلك بتحذف هذا الوصف) ههههههههههههههههههه
المهم انكم لا تحلمون ياهل التهاجين اني بروح واخليكم تستفردون بخلق الله تدعونهم لأمتلاك هالبهائم على انها هي الصقارة .............والله اللى ماهيب طيور صقارة

يامعود الصقارة علاقة مشتركة بين صقر و صقار

وذلك لا يمكن يكون مع بهائم التهجين .

وسلامتكم جميع

[سنجااار]

بيض الله وجهك يالمري على هالموضوع واخوان سرهيد مايحتاج رجال يبخص بهالامور
تقبل مروري

[ابو سمحه]

سرهيد الي ما جبنه البيض = رجال وما ضي تجاريبه
معروف بين الاخوه والصداقه= ماهو مثل الي لاجيته صد
كريم ابن الكريم ابن الكريم= يستا هل الشيم والتقا دير

[هلا بريدة]

اللي مايعرف الصقر يشويه

[بويوسف الكويت]

الله يعطيك العافيه على الكلام الطيب و بيض الله وجهك و تقبل مرورى بويوسف