سؤال عن عزل الكروان من الجول؟ [الأرشيف]

مشاهدة النسخة كاملة : سؤال عن عزل الكروان من الجول؟

خيال الصبحا

20/09/2007, 02:46 PM

بسم الله الرحمن الرحيم
السلام عليكم ورحمة الله وبركاته
كيف حالكم ياهل مكشات؟ان شاء الله بخير
اخوكم خيال الصبحا كل يوم يخيل له الكراوين درج
وطيار(كراوين:يعني جول ماهو واحد ههههههه)المهم كل شي
ماشي تمام ، ويهد ويصيد(يخيل له)ولكن فيه حاجه لين الحين مقلقته وهي
إذا لقى جول كراوين وطلع الطير(مبرقع)وقام يكفخه والكراوين كلها البدت كيف
يعزل واحد منهن عن الجول على شان يهد عليه؟لإني لو هديت عليهن كلهن أكيد يطيرن ويصمل
الطير ورى واحد والباقيات افلس منهن ، ولكن لو عزلت واحد وهديت عليه الباقيات لاشافن الهدد يقضبن
القاع ولا يطيرن ، ان شاء الله انكم ماتقصرون معي(كالعادة)وانا معي ارقام سرهيد والمري وابو عايد وغيرهم
كثير ، كان بامكاني ادق على اي واحد منهم واساله ومايقصر ، ولكن على شان المبتدأين أمثالي يستفيدون،وشكرًا

طيرحوران

20/09/2007, 04:59 PM

حياك الله أخوي خيال الصبحا
ويعجبني فيك حماسك المتزايد تجاه الطيور
بس ابيك تكون ميداني اكثر من النت حتى تتعلم من واقع تجارب
بالنسبة للكراوين إذا صار عندك جول طبعا يبي يكون عندك اكثر من سياره
راعي الطير يوقف ويكون جاهز الطير والسيارات الثانيه تدحم الجول
الكروان المطفوق يبي يطير والباقي مخامير
من يوم يطير الكروان على طول اكشف عن الطير الطير تطيح عينه على اللي يطير ويبي يهد عليه
واخوياك مع باقي الجول يرصدون تحركاته
بس الشغله تراها تبيله سرعة شوي علشان يمديكم تصيدون اكبر عدد من الجول قبل مايتفرقع
وابشر باللي تبي ياخيال الصبحا
والسلام

قلب ذيب

21/09/2007, 01:12 AM

الهدد على جول الكراوين 0
يبدأ بتحويم الطير , اوتخفيقه بالقرب من الكراوين , بعد ذلك يقف الجميع ( اذا كانوا أكثر من سياره ) تتقدم سياره واحده , ويتم عزل الكروان المتطرف ويترك الباقي من الكراوين لأنها بتسير وبتوقف ( بتخمر ) وبعد ان يعزل احدها ويتم ابعاده عن الباقين يطير ويهد عليه , وحتى لو ابعد الطير مع الكروان الباقيات بتظل محلها , بعد صيد الكروان المفرد تعود السياره او السياره الثانيه وتعزل الكروان الثاني --- وهكذا 0
والربشه والعجله والهدد الثنائي يحصل عند الكثيرين من الصقاقير , لا وبعد يحصل 0 0 انت طيرت 00 ليش هديت 0 0 يااخي ماتشوفي هاد 0 0 اصلا طيرك مايبي الكروان 0 0 يااخي ماشافه 0 0 ماشافه قومه عشاك له البارحه !!! الخ ---- 0

رضوان

21/09/2007, 01:40 AM

السلام عليكم
ما قصروا الاخوان الله يبارك بيهم

#الفارس#

21/09/2007, 03:27 AM

مشكور اخوي خيال الصبحا على الأسئلة المفيدة
الي تفيد المبتدئين امثالي :D
واشكر كل من افادنا بلموضوع
اخوكم الفارس

((الخالدي))

21/09/2007, 08:06 AM

الاعضاء ماقصروا

ابو عايد

21/09/2007, 01:15 PM

السلام عليكم ورحمة لله وبركاته

تسلم على طرح هذا السؤال الجميل

اذا لقيت جول خذ اطف الجول حاول تبعده عن اخوانه بالموتر وهـــد

والطريقه الثانيه مثل ماقال قلب ذيب وهذي الطريقه اذا كان طيرك موهب سبوق

خيال الصبحا

21/09/2007, 04:58 PM

السلام عليكم
حي الله كلن باسمه
.
.
الأخ ابو سعد
بيض الله وجهك
والله لايهينك ، وانا احاول
اني اكون واقعي وميداني بس إذا
نقلت الطيرة ماهو الحين ، وبخصوص الموضوع
انت تقول(والسيارات الثانيه تدحم الجول)يعني يسوقون
باتجاهه؟هل يوصلونها أو من دونها يوقفون؟أخاف الكراوين تطير
ليتك تشرح لي زياد الله لايهينك ، وشكرًا
.
.
الأخ ابو ماجد
بيض الله وجهك
والله لا يهينك ، ولكن
لين الحين طريقة العزل فيها شوي
يعني أشوف المتطرف منها واسوق واخلي
السيارة تمر بينه وبين اخوياه؟؟كذا..وشكرًا
.
.
الأخ رضوان
وعليكم السلام
وشاكر لك مرورك
وردك الكريم ، وهلا بك
.
.
الأخ #الفارس#
أشكر لك مرورك
وردك الكريم ، وهلا بك
.
.
الاخ ((الخالدي))
شكرًا لك،وهلابك
.
.
الاخ ابو عايد
أشكر لك مرورك
وردك الكريم ، ولكن كيف
ابعده عن اخوانه بالموتر؟؟يعني هم مخامير
حول بعضهم كيف اعزله؟؟وشكرًا

قلب شاهين

21/09/2007, 07:22 PM

أخوي أبو نايف الأخوان أفادوك ،،

والطريقة مثل ماقالو يبيلها سرعه وتركيز ،،

وانت معك شيهانه يعني مايحتاج انشاء الله تعلقهم كلهم وتبقيلي واحد :)

تحياتي / قلب شاهين ،،

خيال الصبحا

21/09/2007, 10:04 PM

أخوي أبو نايف الأخوان أفادوك ،،

والطريقة مثل ماقالو يبيلها سرعه وتركيز ،،

وانت معك شيهانه يعني مايحتاج انشاء الله تعلقهم كلهم وتبقيلي واحد :)

تحياتي / قلب شاهين ،،
ابو عبدالعزيز
عساها بحملها تقوم
من أول نقول البناخي يبي
يرسل لي علومه ، والحين تدور
من وراي ههههههههههههه ، أمزح معك
وان حصلت جول أبشر أبقي لك واحد مااهد عليه
وادق عليك جوال والله يعينك تمشور للخرج وتهد عليه
وهلا بك

طيرحوران

22/09/2007, 11:43 AM

حياك الله اخوي خيال الصبحا
اولا شيهانتك كم باقي بها
ثانيا يالنسبة للجول
خلنا نفرض ان طحت لك بجول عشرة كراوين مانبي اكثر
نشوف الأرض اللي حنا فيها ونحاول نخلي اتجاه الجول للسهل بحيث نجي بالسيارات خلف الجول بحيث تكون حركة الجول إذا تحرك بتجاه الأرض السهل
الجول إذا شفت حركته كثير وتنقلاته سريعه شكله ذاير ماعليك إلا تكفخ احد الطيور من من جنب السيارة وانت شايله على يدك علشان يخمر الجول
بعد هذه المرحلة يكون اللي يبي يهد زاهب ومرخي برقع طيره ومركب الريشة
يبداء واحد من الربع يقرب صوب الجول اكثر
بعد الأقتراب يبي ينفرد واحد والا اثنين ماعليكم إلا ابعادهم عن الجول اكثر شوي وبعدها طيروه وهدو
وافضل تطيره والهدد عليه علشان مايتعب الطير بالمراوغ لأنه طير مراوغ من الدرجة الاولى
بقية الربع تكون مع الجول ويرصدون تحركاته
هذه الطريقة المتبعة لدينا
ونشوف من الأخوه طرق اخرى
والسلام

الاشعل 316

22/09/2007, 12:25 PM

والله الاخوان ما قصروا كفوو وفوو

وجزاهم الله الف خير

اخوك ابو سطام

خيال الصبحا

22/09/2007, 05:49 PM

السلام عليكم
حياكم الله
.
.
الأخ ابو سعد
الله لا يهينك ، وبيض
الله وجهك ، وشاكر لك متابعتك
للموضوع ، وبخصوص شيهانتي باقي معها
الموس(على كلام ابو معيض انها تحذفه الاسبوع هذا)
والله يستر اخاف ان الموس مايصك بالعيد ، ماادري ان كان
15 يوم يمدي موسها يصك أو لا ؟ من أول ابخلي عيدي عيدين(بالعيد
وبنقلة اول طير)والحين متخوف ولكن ان شاء الله تتيسر الامور ، وهلا بك
.
.
الأخ ابو سطام
أشكر لك مرورك وردك
الكريم ، وهلا بك

طيرحوران

22/09/2007, 08:48 PM

خيال الصبحا

23/09/2007, 02:07 AM

حياك الله اخوي خيال الصبحا
والله انها مشكله بالنسبه للشيهانه إلا الحين ماحذفت هذه تعتبر متاخره بالحيل
عموما حتى العيد ماتنقل لأنك مجازف في نقلها موسها توه اخضر
الجبليات اغلبهن مصفيات
واهل الوادي يفكون حمام الحين لهن
وشرايك تدور لك فرخه جبلية 13.5 وتتعلم الصقاره بها وإذا صقرتها وصادت معك تبي تكسبك على بال الإيرانية صفت مجرد رأي
الله يوفقك دنيا وآخره
والسلام
هلا بك يابو سعد
وشورك زين ولكن مااظن
اسويه ، توي بادي بالصقارة وانقل
طيرين ، ولكن الايرانية ابنقلها بالعيد باذن الله
لو كان موسها خضر حتى لو انكسر او انشلع الله لا
يعوق بشر ناقلها ناقلها وعسى الله يعين ، واسف لازعاجك،وشكرًا