المساعد الشخصي الرقمي

مشاهدة النسخة كاملة : أسئلة عن شنذرة الطير..


خيال الصبحا
21/09/2007, 03:26 PM
بسم الله الرحمن الرحيم
السلام عليكم ورحمة الله وبركاته
كيف حالكم يااهل مكشات؟ان شاء الله بخير
الأسئلة اليوم عن شنذرة الطير والله يعينكم علي ..(دام
شركة الاتصالات ماقطعت التليفون كل يوم فيه اسئله جديدة ههههههه)
المهم .. أن شاء الله ثاني أيام العيد أبنقل المبروكة(شلفا)لذلك قلت خلني اسألكم
من بدري على شان أرتب أموري تمام :
1-هل لازم أشنذرها أو الأفضل؟
2-وش مقدار الشنذره الي اعطيها للشيهانه(13.5تقريبًا طول وعرض)؟
3-هل تكون عالفة قبل أعطيها الشنذره أو لا؟
4-كيف طريقة الشنذرة؟لإني قرأت أكثر من موضوع عنها ومتلخبط شوي ،فيه
ناس يقولون لفها بشاش وناس يقولون ابرد اطرافها فقط وماادري وش اسوي.
5-الله يرزقكم الجنة..أمـــــــــيـــــــــــن
أخوكم
خيال الصبحا
BeLoveLy
21/09/2007, 06:35 PM
السلام عليكم و رحمة الله و بركاته
اخوي خيال الصبحا ,,,, مساك الله بالخير
بالنسبة لسؤالك عن الشنذره
طبعاً انت عارف الشنذرة وشو شي,,,
و سؤالك الاول يقول هل لازم اشنذر الطير او الافضل ,,, في ناس تعتبرها ضروريه ,, اما انا توني ناقل طيري من اسبوع ما شنذرته لائن نفسه زينه و الشنذرة تعتمد على نفس الطير ,, اذا شفت نفس الطير بالعلف زينه و يجي على الملواح بشكل ممتاز على كذا ما يحتاج شنذرة ,, و انا نصيحة قبل لا تشيل الطيره من الربطة باسبوع اقصر عليها ,,, بس اذا قصرت عليها لا تشنذر ,, و اذا شفت نفسها مهي بزينه ارجع ارفعها و بعدين شنذرها,,,
السؤال الثاني عن مقدار الشنذرة ,,, بالنسبة للحين في هذا الوقت يوجد كبسولات شنذرة ,, عطها كبسوله وحده تكفي لها ,,
السؤال الثالث هل تكون عالفة او لا ,,, لا طبعا ما تكون عالفة ,, و اذا شنذرت و خلصت الي ترميه تعطيها (( هبر )) اي علف خالي من العظام و الريش يعني بس لحم
السؤال الرابع طريقة الشنذرة ,,, انا في نظري انك تمسك الكبسوله حقة الشنذرة و تبللها في حليب بارد ,, و على حسب الطيره اذا هي تحتاج احد يمسكها اي يمهدها لك او لا في بعض الطيور هاديه ما تقول شي يستطيع واحد بس يشنذر و بعض الطيور يحتاج ثلاثه رجال ... الاول يمسك الطير و الثاني يمسك منسر الطير يعني فتح منسره و الثالث يعطيه الشنذرة ,, و طريقة اعطاع الشنذرة هي عباره ادخال الكبسوله الى بلعوم الطير بحيث تتأكد من انها لن تخرج ,,,

انا اسف على الاطاله بس يا ليت الربع اذا في شي غلط او شي ينبهون عليه

تقبلو مروري
اخوكم : عبدالرحمن
قلب شاهين
21/09/2007, 07:02 PM
هلا فيك يابو نايف وعقبال ماتنقل حر ،،

بالنسبة للأس~لة جاوبك عليها اخونا عبدالرحمن وكلامه عين الصواب ،،

بس حبيت أضيف أشياء بسيطة ،،

اذا جيت تشنذر الطير الأفضل بعد مايرمي الروباجه لكي تتأكد أن فرسه خالي من العلف ،،

ويجب أن يكون في صحن ماء لكي يشرب الطير ،،

وعندي لك نصيحه /

أذا أنت ولا مره شنذرت طير الأحسن والأفضل أنك تذهب فيه الى صقار كبير وخبير بالطيور وتطلب منه انه يشنذر الطير وتابع وش يسوي وتعلم منه ،،

وبعد ماتشنذر الطير عطه مهله يومين او ثلاث ايام بدون دعو وعلفه لحم صافي بدون عضم ،،

هذا ماعندي وأي سؤال أو أستفسار أنا حاظر والربع مو مقصرين ،،

تحياتي / قلب شاهين ،،
ابو عايد
21/09/2007, 07:17 PM
<<< الشناذر >>> (http://www.mekshat.com/vb/showthread.php?t=12657)

الشناذر-الشناذره (http://www.mekshat.com/vb/showthread.php?t=21997)

هل لازم اشنذر الطير يا خيال الصبحا
بويوسف الكويت
21/09/2007, 08:59 PM
الله يعطيك العافيه و تقبل مرورى بويوسف
خيال الصبحا
21/09/2007, 10:31 PM
السلام عليكم ورحمة الله وبركاته
الاخوة الاعزاء
حي الله كلن باسمه
.
.
الأخ عبدالرحمن
وعليكم السلام ورحمة الله وبركاته
أشكر لك مرورك وردك الكريم،وهلا بك
.
.
الاخ ابو عبدالعزيز
اللهم أمين
وجزاك الله خير
ولكن فيه سؤال بخصوص
الماء هل اخلي الطير يشرب قبل
الشنذره أو بعدها ، والطيرة ذي ماحدها نصيبها
على خير يوم جت بيدي ، أبي أتعلم عليها كل شي(من النقل
إلى مالا نهايه ههههههههه)وعسى الله يعين ، والله لايهينك ، وهلا بك
.
.
الأخ ابو عايد
أشكر لك مرورك
وردك الكريم ، وادراج
الروابط ، وانا حفظتهن على الجهاز
وبعد ماافصل النت ابي اقراهن ، ولكن وش
قصة السطر الاخير ، ماجاوبت عليه ولافهمت قصدك ، وهلا بك
.
.
الاخ ابو يوسف
الله يعافيك ، وهلا بك
ابو عايد
22/09/2007, 12:34 AM
السلام عليكم ورحمة الله وبركاته

اول شي يامشرفنا الشنذره شي خطير ماهو اي طير يشنذر

محدثك مجرب الشنيذره الطبيه والتيزاب الطيب افضل للطير واريح

بالنسبه للتيزاب اذا كبرت الشنيذره خطر ان يموت الطير حدثت عندنا العام ملت الشنيذره وماتت والسنه ذي حر تام من اطيب الحرار شنذره لاراعيه ثلاث مرات متواصله الاوله طبيه والباقي تيزاب الثالثه قضت عليه الا حاجه بسيطه حياة بعد موت وراعيه بالرياض اليوم بيدخله المستشفى .......!
فنجون
22/09/2007, 01:07 AM
الطير بعد ما ينقل من المقيض لفتره اسبوع لازم يشنذر قبل يوم التشنذر يعشى عشاء كامل وفي اليؤم الثاني بعد رمي الرباج يعطى اشناذر كبر قطعه سكر نبات ويتم تنسيره بقطعه صغيره من اللحم ويتم تلهيته لمده عشر دقائق وبعدها يتم وضعه على الحصاه حتى يرمي الشناذر وبعد رمي الشناذر يوضع ليان الماء له
راكان 11
22/09/2007, 01:18 AM
يا ابوعايد الشنذره امر عادي جدا
ولا يحتاج ان الاخوان يخافون منها

الصقار المتمكن يعرف كمية الشنذره التي يحتاجها طيره من ناحية الحجم والصنعه ... والخ
وبعدين خويك اللي شنذر الطير ثلاث مرات ..... لاتعليق عليه

بعض الناس صقاقير متمكنيين ولاكنهم لايجيدون علاج طيورهم
وفيه منهم معروفين لدى الجميع وتجده يشنذر طيره عند الناس الآخرين
الرويلي2388
22/09/2007, 05:05 AM
سلام عليكم
باالنسبه لتشنذر الطير

افضل شي يكووووون بعد ماتجرد الطير تشنذره
والشنذره سهله مابي خبره تضع قطعه صغيره من الشناذره في قطعة قطن صغيره وتضعها في فم الطير ويكوووون معك بروااااز ابره مليان مي وتسقيه الطير بعد ماتخل القطنه اللي فيها الشناذه ولايكووون الطير عالف اذا تبي تشنذره

هــــذاا اللي اعرفه ونسويه كل سنه بعد الربطه وافضل شي مايكووون من تطلع الطير من الربطه تشنذره لا بعد ماتجرد الطير تشنذه
خيال الصبحا
22/09/2007, 03:12 PM
السلام عليكم ورحمة الله وبركاته
حي الله كلن باسمه
.
.
الاخ ابو عايد
وعليكم السلام ورحمة الله وبركاته
وهلابك ، واشكر لك مرورك ومتابعتك
للموضوع ، وبخصوص الشنذره(الله يكفينا شرها)
الظاهر أني هونت عنها ، وابي اطول نفسي مع الطير وعسى
الله يعين(قريت الروابط الي انت ادرجتها البارح)وهلا بك
.
.
الأخ فنجون
أشكر لك مرورك
وردك الكريم ، وهلا بك
.
.
الأخ راكان11
أشكر لك مرورك
وردك الكريم ، وهلا بك
.
.
الأخ الرويلي2388
وعليكم السلام
أشكر لك مرورك
وردك الكريم ، وهلا بك
.
.
وهلااااااااااااااااااااااابكم
قلب شاهين
22/09/2007, 03:14 PM
هلا أخوي بونايف ،،

بالنسبة للماء يعني بعد ماتشنذر الطير الطير راح يكون بحااجه للماء خله يشرب شوي ماء ،،

أرجو أنك فهمت علي واي سؤال أان حاظر ،،
خيال الصبحا
22/09/2007, 05:47 PM
بيض الله وجهك يابو عبدالعزيز
والله لايهينك
وشكرًا