ما نوع هذه الحمامة ؟

[Magellan]

السلام عليكم
الحقيقة وجدت هذه الحمامة موجودة عند بيتي وقد أبلغوني الأهل بأن هذه الحمامة لاتغادر البيت إلا في النهار وعند المغيب تجي وتدخل البيت ولها ثلاثة أيام على هالحال.......
ولما شفتها حسيت إن فيها موضوع ثاني وخصوصا التحجيل الموجود برجليها.
وقلت خلني أشوف المكاشيت وش نوع هل الحمامة يمكن لها صاحب،أو إذا كانت لقطة نبيعها ويمكن أصير من الأثرياء:D

http://www.mekshat.com/pix/upload/images48/mk11979_pigeon.jpg


http://www.mekshat.com/pix/upload/images48/mk11979_pigeon1.jpg


http://www.mekshat.com/pix/upload/images48/mk11979_pigeon2.jpg
http://www.mekshat.com/pix/upload/images48/mk11979_pigeon3.jpg

[الدعيسة]

.

.
هلابك أخوي Magellan خلاص ترانا شرينا الحمامة بالي تبي :p ..حبيبي الحمامة من نوع الزاجل وأعتقد أنها تائهة و مضيعة الطريق لكن بما أنها عليها حجل رسمي من الاتحاد السعودي لسباق الحمام الزاجل فــ تقدر تشوف الرقم الي مكتوب علي الحجل وتروح لمهم ويخبرونك من هو صاحب الحمامة أذا ماعليك أمر يابعدي ممكن ترسلي رقم الحجل وأكون شاكر لك :rolleyes:

[طير سدير]

مالك لوا يالدعيسه ما اضنها زاجل

هذي حمامه عاديه شكلها من النوع القطيفي واللي ما يعيش بعيد عن عشه في السطح

بس اذا ودك بالعلم الصدق ياماجلان طيرها في الصبح وشف ان قام يقلب في الجو اعرف انه قطيفي والا فكلام

اخونا الدعيسه صح لان الحجل اللي برجل الحمامه ما يحطونه الا في الزاجل او القطيفي بس والله اعلم

[Magellan]

الدعيسة
الله يسلمك وش يدرينا إنه التحجيل من نادي الإتحاد السعودي للحمام الزاجل
قل غيرها.. ماودنا نفرط فيها:D
راحت 3000 ريال:D:D:D

طير سدير
أخوي شرهتك على الفاضي لها ،،
بالنهار دوام وبرمضان ، ولانيب هاوي إلا القميري
لو إنها قميري كان أكلتها :D ...بس قلت يمكن نشمشم منها علوم وممكن تصير غالية وتعوضنا عن سوق الأسهم
أخوك غشيم بالحمام:D

[Magellan]

ترى ياجماعة نسيت أقول طباعها هادية مرة مرة ......
ولاتخالف لو قرّبت من حولها .......
تكفون علموني وش أخر التحاليل ...غديها تطلع زاجل :d

[الدعيسة]

.
.
.
.
هلابك يا بعد حيي شوف أذا الرقم مكتوب عليها رقم تسلسلي وعبارة KSA ,والعام الميلادي فــ 100 بالمائة الحجل صادر من النادي فيه نقطة حبيت أضيفها بصراحة أول مرة أشوف زاجل مقنبر وأحتمال عاد مايكون زاجل علي حسب أخوي طير سدير ننتظر الخُبراء حمام الزاجل :p .

[Magellan]

.

.
.
.

هلابك يا بعد حيي شوف أذا الرقم مكتوب عليها رقم تسلسلي وعبارة KSA ,والعام الميلادي فــ 100 بالمائة الحجل صادر من النادي فيه نقطة حبيت أضيفها بصراحة أول مرة أشوف زاجل مقنبر وأحتمال عاد مايكون زاجل علي حسب أخوي طير سدير ننتظر الخُبراء حمام الزاجل :p .


والله ياخوي مانيب مسوي به شيء، لأني مانيب راعي حمام ولا ودي أقلب فيه،،، يمكن فيه فلونزا وإلا بلا...
وتراه الحين يقضي في البيت أيام الضيافة الواجبة:D
وبيني وبينك شكلي أبحطه بكرتون وأوديه سوق الحمام:D
يشوفون له حل ... يمكن نبيعه ونحصل قيمة الشروخ حقت العيد:D

[جبل راف]

وبيني وبينك شكلي أبحطه بكرتون وأوديه سوق الحمام:d
يشوفون له حل ... يمكن نبيعه ونحصل قيمة الشروخ حقت العيد


ههههههههههههههههههههه اضحك الله سنك

[وليدة حرب]

ياجماااااااااااااااااااااعة هذي قطيفي مو زاجل والحجل اللي برجلها ممكن اي واحد راعي مزاج في تربية الطيور ويهتم في النوع ويبي يطلع سلالة لازم يميز الحمام ..
يعني الذكر والانث لون الحجل اصفر في الرجل اليمنى لهم مثلا رقم 001 الفراخة لازم يكون الحجل في نفس الرجل بس الحجل اللي تبع الرقم راح يكون 002 وهكذا

[Magellan]

هلا أخوي عبدالله الحربي
وشكرا للمشاركة:)

أخوي وليدة حرب:
شيكت على التحجيل الصبح ولقيت مكتوب عليها KSA ومجموعة أرقام ولا أدري وش أسوي بالحمامة
أكيد لها والي

[ملك الزاجل]

أخي العزيز
السلام عليكم ورحمة الله وبركاته وبعد:
أولاً : تصويرك للحمامه جيد مبين جميع المواصقات المطلوبة
ثانياً : الحمامه من الحمام العادي يمكن كما يقال قطيفي أو كويتي أو ... المهم أنها من الحمام العادي جداً
ثالثاً : أنصح بعدم الذهاب للسوق من أجل الحمامه لأنها ما تسوى مشوار الطريق لكن أتركها أفضل
رابعاً : الحجل الذي عليها هو حجل الاتحاد السعودي لهواة الحمام الزاجل والذي يضهر لي أنه قديم حسب علمي حسب لون الحجل يمكن يكون قبل عام 2000 أو عام 2004
ولك هذه الهدية لكي تميز الحمام الزاجل عن غيره
مواصفات الحمام الزاجل
http://www.mekshat.com/pix/upload/images43/mk42403_01.jpg
http://www.mekshat.com/pix/upload/images43/mk42403_44.jpg

http://www.mekshat.com/pix/upload/images43/mk42403_ph_511.jpg

http://www.mekshat.com/pix/upload/images43/mk42403_232.jpg

لك مني التحية والتقدير
أخوك
ملك الزاجل

[ذيب ساقان]

هذا يطلق عليه حمام بصراوي ، ولد عم الزلابه الكويتي .:p

[كل القصيد]

هذي زاجل مايحتاج

[ديم الليل]

بيني وبينك سواقي يبي يشتري حمامه شرايكـ ترسلها لي

ههههههههههه :D :D

الصراحه شكلها حلو وشكلها مطيعه ومؤدبه :D

انا رأيي انك تدور على صاحبها واذا مالقيته خليها تصير من العائله :D :D :D

[Magellan]

أخر التطورات:
أمس تلقفت وجيت أبصيدها وطارت :D..
واليوم مالها أي أثر شكلها زبنت عند الجيران ، لتقضي أيام الضيافة عند غيرنا وبأسعار أفضل:D

أخوي ملك الزاجل
عسى ربي يسلمك
والله إستفدت منك كثيرا
بس بيني وبينك غدي الواحد يفرّق بين القوقسي والقميري :D:D
وتكدرت صراحة كنت مخطط على الأقل تجيب لي قيمة الطرطعان والشروخ لها الصغار مادام رايح لسوق الحمام:D
وشكراشكرا للهدية


أخوي بن دخيل
مشكور لها المعلومات والمشاركة

أخوي كل القصيد
الحين طارت ماعاد فيها نفع زاجل وإلا قطيفي

أخوي بو طلق
الظاهر للحمامة مُعرّف في مكشات وشافت هالموضوع:D
وقالت مابدهاش : النحشة النحشة:alarm:
خيرها بغيرها وماتغلى عليك بس خلها ترجع

[ديم الليل]

أخوي بو طلق
الظاهر للحمامة مُعرّف في مكشات وشافت هالموضوع:D
وقالت مابدهاش : النحشة النحشة:alarm:
خيرها بغيرها وماتغلى عليك بس خلها ترجع


هههههههههههههههههههههههههههه

تسلم يا الغالي :rolleyes:

الظاهر انها فكرت انك بتفطر عليها عشان كذ نحشت :D :D

[وليدة حرب]

أجوي ماجلان السلام عليكم ورحمة الله وبركاته.
دام الحجل مكتوب عليه Ksa فمعناته من انواع القطيفي النادر اللي الواحد لازم يهتم فيه . وفيه ناس واجد وللأسف يفكرون ان نوع القطيفي واحد وهو اللي يقلب وبس . مع العلم انه انوع والأصل اللي ما فيه شرك مع نوع حمام ثاني .والله يعين صاحبها على فقدها لأنه شكله مهتم في تربيتها وحريص
وللناس فيما تعشق مذاهب

[Magellan]

بوطلق شكرا لمشاركتك:)

وليدة حرب
بالفعل موجود عليها KSA وطارت الله يخلف علي وعلى راعيها.......
وبالمناسبة فما أفقه فيها شي يعني يمكن لورحت سوق الحمام وجاء واحد وسامها بـ10 ريال لأبيعها ..
وللناس فيما يعشقون مذاهب كما قلت:)

[ابوفهوود]

اقووووووووووووول ان جاتك جودها
ترى هذا حمام عراقي قريب من الزاجل مايخاف اذكر اني شريت وحده زيه اول ماجات سوق الدمام ب 500 ريال طبعآ الكلام هذا عام 88 -89 والحين مدري وش تسوى لاني تركت الحمام من زمان
على فكرة ترى نسميه القطمي ابو عرف ترى حجمه صغير مره مثل اليمامه
ولك شكري

[جريح الصيد]

مشكور على الموضوع
الربع ماقصرو ردو بالمطلوب

[برنو بيشة]

هذي حمامه قطيفيه مولد جازل والطوق برجله طوق شخصي لصاحب لمزرعه