يا جماعة اخوكم يبغى يشتري فراش للبر بس محتار وش الزين / لاتبخل علينا بالإجابة

[رياض الصمان]

أخواني اهنئكم بقرب حلول فصل الشتاء فقد اقبلت الرحلات

الممتعة والتي تحمل طياتها الذكريات الجميله

وتعرفون الشتاء لها مقاضي من عزب وفرش ونحوه

بس أخوكم محتار بين فراش السنيدي والدريويش

وماهوا لأفضل هل الصوف افضل ام البولستر

الله يجزكم خير لا تبخلوا علينا فالفائدة للجميع

أخوكم / رياض الصمان

[الوعب]

السلام عليكم ورحمه الله

اتمنى الشباب يفيدونك اكثر مني
بالنسبه لي ماجربت الا فراش واحد وهو فراش القاضي سعره معقول حول 200 ريال وفيه منه احجام العغير منهم خفيف (صيفي)
يتميز بجوده الصنع وبالتوفيق

[الوانيت1]

عليك بالدريويش أحسن وأدفا وأوقا لضهرك من الأرض من السنيدى هذا وجهة نظرى من باب تجربة . والسلام ختام....///.

[مداوي]

كلام صحيح الدريويش جيد ومتين

[جلمود الجبيرى]

والله شف وانا اخوك انا جربت فراش القاضى(الصمان) اعتقد ان هذااسمه بحدود220ممتاز جداً بس فصلت معه قماش تنزانى بسحاب او عرظته شوى وطولته يعنى حطيت الطول230والعرض متر ونص طلع ميه ميه بحيث انه الا صار الجو لطيف انام على الفراش الداخلى ما يصير على الا القماش التنزانى واذا برد الجو اصير فى الفراش الرئيسى وفى هل حاله تسلم من المطر ما يدخل عليك بس عرض مصافط السحاب شوى والله ان الربع معهم فراش الدريويش وانهم يقومون فرشهم فيها ماء من المطر-- ودمتم سالمين

[عبدالرحمن السالم]

فراش القاضي عز الله انه فراش
وسعره زين ماهو غالي وخذ إلى داخله فرو احسن
وبالتوفيق ان شاء الله

[هدد ؟؟؟]

بالنسبة للفراش لابد يكون حشوة الدريويش ، والشراع تنزاني 303
واسلم وسلم ..

[رياض الصمان]

اخواني أعضاء منتدى مكشات الغاليين


((Aaziz + الوانيت1 + مداوي + جلمود الجبيري + دحيم آخر لفة + هـدد ))


الله يجزاكم خير جميعاً الحقيقة ما قصرتوا الله يعطيكم العافية


وانا شاكر لكم على المرور وتعليقكم على الموضوع



والله انه لسرني هذا التفاعل من قبلكم فبارك الله فيكم جميعاً

وجعل ما تقدمونه في ميزان حسناتكم
++++++++++++++++++++
+ فبكم يرتقي المنتدى للأفضل +
++++++++++++++++++++
أخواني


من خلال قرءاتي لمشاركتكم الله يعطيكم العافيه وجدت


الضوء يدور حول فراش الدريويش والقاضي


الحقيقة وضعـتونا في حيرة من جديد


لكن ما نقول الا الله يكتب لنا مافيه الصالح لنا


لكن ايهما افضل من الداخل الصوف أو البولستر


لكم مني أجمل تحية / أخوكم رياض الصمان

[راعي ساموده]

فراش دار الفراسه

رائع بطانة الدريويش والخياط تنزاني 303
والسعر 230 ريال

[أحب القمرا]

اخوي الكريم أنا عندي فراش ( كول مان ) من سبع سنوات أمريكي مقاسه عريض لأنه يجي منه نوع مو عريض ما يصلح للأجسام العريضة وداخليه مثل البطانية . يدفي بالحيل وضد الماء والأجمل في الموضوع أنه حجمه وذف مرة ما يأخذ حيز في السيارة مثل حق القاضي والدريويش وماركة ( كول مان ) مشهورة عالميا وللأسف ان صناعته أمريكي .

[جلمود الجبيرى]

اللى داخله صوف او وبر يطلع ريحه وقت الندا يعنى الى جاه رطوبه فا افضل البلستر او اللى داخله تقل بطانيه افضل

[برق تميم]

انحش من الفروا والصوف علطول الرمل يمسك فيه ولا عاد يروح ان كانك ماخذ ماخذ خيط عليه شرشف

[طخيمان]

والله يا بعدي انا عندي فراش الدريويش طوله 220 وعرضه 120 وتنزاني 303 أصلي لا تدري عن برد ولا عن مطر ولا عن غيرهن بإذن الله
مره من المرات امطرت علينا وانا داخله يوم قمت لقيت منقع ماء على الفراش ولا هرّبه لداخل الفراش

والله يكتب لك اللي فيه الخير ...

[عطارد]

السلام عليكم ورحمة الله وبركاته

خذ مني العلم عندك فراش خالد الدريويش ومن بعده فراش القاضي وغيرها لا تدور وتعب نفسك وتضيع دراهمك على الخرابيط اللي مالها داعي

[رياض الصمان]

أخواني الطيبين اعـضاء منتدى مكشات



((راعي ساموده +أحب القمرا+ جلمود الجبيري +برق تميم +طخيمان + عطارد ))



الحقيقة انا شاكر لكم وممنون على هذه المعلومات القيمة وكل ما شاركنا بقلمه ومجهودة وخبرته


وأيضاً على تفاعلكم مع الموضوع الله يجزاكم بالخير ولا يحرمكم الأجر والثواب من الله


ويجعلكم ربي ذخر للمنتدى تفيدون وتستفيدون


يقولون معرفة الرجال تجارة ماهي شطارة نعم وانا اصوت معهم على ذلك


بيض الله وجيهكم يالنشامى ماقصرتوا الله يعطيكم العافيه


أخواني شكلي قررت ابشتري فراش الدريويش وذلك نظرا للغالبية


فهم يصوتون لفراش الدريويش وراعين فراش القاضي لا يزعلون علينا


حنا نستشير ونرى الأفضل فانتم ماقصرتو والله يجزى الجميع خير


سؤال أخير اين اجد فراش الدريويش في الرياض هل في محل الرحلات أو لهم مكان معين جزاكم الله خير



لكم مني أجمل تحية / أخوكم ابوطارق

[مخاوي قناص]

السلام عليكم اخواني الاعزاء انا شريت فراش السنيدي 280ريال خارجي تنزاني داخلي قماش جربته في طريق القصيم كانت ليله بارده شديدة البرد خشيت فيه ورحت في نوم عميق:o :o روعه الدفء بعد البرد لاكن فيها عيب عام تصفق والله انصفقت صفقه في الرياض والسبه هلفراش صحيت الفجر وخرجت منه وذاك اليوم مالحقت خير يارب لك الحمد والشكر اجعلها كفارات ذنوب احذرو من صفقتها

[فتى الرابيه]

الدريويش جيد ومايلقط وصخ

[راعي ساموده]

أفضل المحلات اللي تلقى فيها فراش الدريويش ( خالد)
تروح مخرج 17 ( متجه جنوب)
تلف يمين اتجاهك غرب
ثاني اشاره تلف يسار اتجاهك جنوب
تمشي مع الشارع تلقى كل المحلات مفروشات واثاث تبي تلقى محل بعد 200 متر تقريبا على يمينك يبيع الدريويش بسعر مناسب جدا .
فيه ثلاث انواع
فرو ( لايقربك ابدا ابدا ) دافي جدا ولكن يمسك الرمل والشوك ولايطلع نهائيا 330

مخمل على شكل جلد نمر ( راااااااااائع ) ودافي جدا جدا 300

بوليستر ( ممتاز) يصلح صيف وشتا 270

وفيه عند دار الفراسه يسوي نفس فراش الدريويش البوليستر ( مثله بالملي ) 230

[الوعب]

اسمحولي باستفسار

ايش يقصد الاخ مخاوي المقناس بانه عيبها تصفق ؟؟؟

ايش هو العيب بالضبط مافهمت !!

[sawa900]

اهم شي انوه يكون صوف من جوا علشان بالشتاء يكون دافي العام انا دخلت بالفراش احس الفراش بارد ولازم اجيب معي كنبل انت خابر الصوف دافي مره بالحيل

[sawa900]

اهم شي يكون صوف وانا اخوك ترى الصوف زين بالشتاء خذها من مجرب العام كل مادخلت الفراش احس انوه بارد بالحيل الين غيرتوه وشريت صوف

[Abu Saad]

نفس الاستفسار العام الماضي:
http://www.mekshat.com/vb/showthread.php?t=60063
وانتبه لاتاخذ اللي داخليه الفرو لانه يمسك الرمل ... خذا ساده.
وبالتوفيق.

[ابو سردي]

والله انا فصلت على رغبتي وسويت تعديلات على العرض والطول لكن الشراع تنزاني ولاكلف على الا 130 تقريبا وبالتوفيق

[رياض الصمان]

أخي (( راعي سامودة )) اشكرك على المعلومات القيمة

جزاك الله خير وماقصرت

شرينا واحد بولسترمن الداخل القيمة270ريال

واشكر جميع الأخوان على المرور والتعليق

وكل عام وانتم بخير

[عاشق خلاوي]

موضوع رائع وفي وقته المناسب يا الغالي :رياض الصمان , والله يعطيك خيره يا رب ويكفيك شره ان شا الله.

انا عندي سؤال :وين احصل فراش الدرويش بالدمام ؟عند اي محل؟؟

وشكراااا

[رياض الصمان]

حياك الله ياعاشق خلاوي

بالدمام والله ما اعلم شف القاضي بالدمام ولكن لا اعرف مكانه بالضبط

أخوك / رياض الصمان

[هملان]

اتركو عنكم هالفرش كلها
اذا كان ماعندك مانع تدفع
رح دور لك مفرش امريكي اصلي تحصله من 400 ريال وفوق بعدين لبسه طربال تنزاني
ماتدري عن البرد

[الورقا]

الدريويش-تنزاني -وبس:)

[ابو عادل1]

اخواني رعاكم الله وحفظكم وين نلقى الامريكي الوسيع والكبير الضافي اللي ذكروه الاخوان ننتظر فساعدونا

[د/فهد]

أنا أقول السنيدي وبس
الدريويش ينلبد مع الوقت عكس السنيدي

[فتى احد]

السلام عليكم ...

أنا بالنسبة لي كنت ابغى أشتري فراش ولما كنت رايح القصيم من حائل قال واحد من الزقرت فيه محل مشهور مقابل النقل الجماعي بحائل عند زاوية الضمان الاجتماعي قرب قصر القشلة الاثري الشهير يفصل تفصيل على كيف كيفك ورخيص بدل ماتروح للسنيدي والقاضي ومشوار بعيد هذا يفصل حسب مزاجك قلت شورك وهداية الله ذهبنا المحل السابق وصفه ولقينا بالمحل هندي شايب شكله راعي نفود ههههههه من كثر الغبرة اللي عليه المهم قال خويي نبي زي الفراش الأول بالضبط قلت لحظة نشوف القماش والمقاس قال ماعليك تجي بكرة وتاخذ أحلى فراش من هاالهندي البدوي يقول امه جابته بحايل حتى لسانه سعودي حايلي بحت مايعرف كيرلا ولاعمره شافها حسبته من هل النفود ههههههه المهم فصلي فراش الطول 230 والعرض 150 والداخل قماش اضن انه بوليستر ثقيل دافيء والخارجي قماش تنزاني 303 وعمل حركة فوقه خلاه من داخل كأنه حق اثنين نفر قال واحد للصيف والثاني للمربعانية وأخذ على هالشغل كله فقط 300 ريال طبعا مع سحابات قوية وخيوط متينة وشغل مرتب بصراحة الله يعطيه العافية ويزوجه وحدة سعودية علشان ياخذ الجنسية لأنه مواليد السعودية وماعمره حول هللة وحدة برى السعودية وكل أقاربه يقول في جدة والرياض يشتغلون مافيه احد بالهند نهائيا من قرابته المهم لايفوتكم التفصيل أفض شىء .

[q.8]

اخوي الدريويش واتكل على الله مجرب بالثلج وبالبر وبكل مكان مافيه ازين منه

[رياض الصمان]

أخوي (( فتى واحد )) الله يعطيك العافية ما قصرت

مافيه صور للفراش تنزله نشوف جودة خياطة الهندي

[فتى احد]

السلام عليكم ...

والله كان ودي عندي صورة له أخوي رياض الصمان لكن الفراش في بيت جدتي بحائل مخلي عزبتي عندها بالمستودع علشان إذا جيت لحائل أحرك للبر من هناك تعرف علشان أنزل الأهل عندهم أخليهم يتونسون وأنا أحرك لوناستي الخاصة أنا والزقرت .

[فتى احد]

السلام عليكم ...

والله كان ودي عندي صورة له أخوي رياض الصمان لكن الفراش في بيت جدتي بحائل مخلي عزبتي عندها بالمستودع علشان إذا جيت لحائل أحرك للبر من هناك تعرف علشان أنزل الأهل عندهم أخليهم يتونسون وأنا أحرك لوناستي الخاصة أنا والزقرت .

[هوى الشرق]

موضوع جميـــــــــــــــــل يامال العافية

[عبدالرحمن]

اذا كنت بتوصل 400 ريال علمني انزل الصور و اعلمك من وين الي يحط القاضي في ابط و الدريويش في الابط الثاني .

[saad8794]

اخوي ( عبدالرحمن ) أكيد عندك شي زين , لاتبخل علينا وعلمنا

[س م ح 999]

أنا معي فراش القاضي (الصمان) رووووووووووووعة في عز الشتاء والحرارة 2 درجة مئوية والله إني دفيان ....

[رقم9]

اخي رياض الصمان والاخوة الاعضاء تحية طيبة وبالنسبة لتجربتي اخذت فراش الدريويش تنزاني من الخارج والداخل احذركم من وجود الصوف او الفرو فهو يجمع عليك الرمل اذا كنت في نفود او عندما يكون بالجو غبار فذرات الرمل والغبار تتلتصق بالفرو والصوف وعندما تدخل الفراش للنوم تهل تلك الذرات على عيونك واذنيك وفمك ومهما (نفضت)الفراش تبقى ,لذلك اوصيكم باللي يكون داخلية مفرش مخيط على الشراع واحذر من اغلاق السحاب بالكامل مهما كانت برودة الجو فأولا قد يكتمك وثانيا قد تصبح صيدا سهلا لضعاف النفوس حمانا الله واياكم منهم حيث ان خروجك من الفراش سوف يستغرق وقت وجهد عندما يكون السحاب مغلق إضافة إلا انه قد يلفحك الهوا البارد بعد دفا الفراش ,وبالنسبة لبرودة الجو وغيره لقد مر على صقيع وبرد شديد ولم اذكر بحمد الله ومنته انني احتجت الى بطانية فوق الفراش حيث انه يكفي لوحده
دمتم بخير
اخوكم رقم 9

[ابو عادل1]

اخواني ومازال تساؤلي قائما ينتظر الفزعة فالله الله بالعلم الوكاد(اين نجد الفرش الامريكية التي ذكروها الاخوان)
كما اننا في شوق وانتظار لما ذكره اخونا وحبيبنا عبدالرحمن فعجل بالعلوم الغانمة

[خشف.]

خذلك السنيدي او الدرويش انا عندي السنيدي خمس سنوات ماجاه شي :good: :good: :good:

[الحوطي نت]

عليك بالدريويش وريح بالك ونوم العوافي

[الرذاذ]

التنزاني لا تاخذ إلا هذا النوع سواء السنيدي ولا غير بس أنه غالي حوالي 350 ريال و 400 ريال تحصل بالغرابي برياض

[نجد 2007]

ابشركم شريت فراش الدريويش مخمل تنزاني وبصرحه ممتاز ماتدري من وين هابه
شريت بـــــــسعر 285 ريال من برق الحيا على مخرج 15 الدائري الشرقي
نوم العوافي لي ولكم
تحــــــــــــــــــــــــــياتي

[رفيق النشاما]

بالنسبه للفراش إذا تقصد ما يسمى بكيس النوم
فأنا عندي واحد له ثلاث سنوات بثلاث مائه حشوته قطن والله أعلم وخفيف ودافي
بس ما أدري ايش صناعته

[رفيق النشاما]

بالنسبه للفراش إذا تقصد ما يسمى بكيس النوم
فأنا عندي واحد له ثلاث سنوات بثلاث مائه حشوته قطن والله أعلم وخفيف ودافي
بس ما أدري ايش صناعته

[محارش]

فصل على ذوقك في البطحا وأرخصلك وأجود منهم ؟؟؟؟؟؟؟؟؟؟؟؟؟؟؟؟؟؟؟

[ابـ معزي ـو]

اخوي : رياض الصمان
مبروك عليك وعلى الجميع حلول فصل الشتاء من جديد ..
واكيد الاخوان ماقصرو عليك بأختيار افضل فراش لآنهم والاكيد يبون لك وللجميع الافضل ..
وانا من مجربي فراش (( برق الحيا )) اللي اعتبره ابداع ..
وهو يوجد بالروابي مخرج 15 على الدائري الشرقي ..
واتمنى تلقاء الفراش اللي يناسبك ويريحك
وتقبل مروري وتحياتي

ابـ معزي ـو

[فتى احد]

السلام عليكم ...

دورت فراش الدرويش بالدمام مالقيت رحت للقناص بالدمام لقيت عنده نوعين السنيدي واحد تنزاني ثقيل من داخل بولستر ومقاس كبير وثقيل جدا بسعر 385 ريال ولقيت عنده السنيدي نفس المواصفات لكن تنزاني خفيف بسعر 280 ريال ولقيت عنده القاضي الربيع والقاضي الفصول الأربعة وش رايكم يامكشاتية الفراش لصديق لي بالدمام لو كان لي روحة قريب لحائل كان فصلتله أفضل والمحل اللي بحائل تقريبا أسمه الأختيار للي سئلو من فترة عنه . أرجو الإفادة عن المذكور أعلاه وهل محلات الرماية زينة الفرش اللي عندهم .

[فتى احد]

السلام عليكم ...


دورت فراش الدرويش بالدمام مالقيت رحت للقناص بالدمام لقيت عنده نوعين السنيدي واحد تنزاني ثقيل من داخل بولستر ومقاس كبير وثقيل جدا بسعر 385 ريال ولقيت عنده السنيدي نفس المواصفات لكن تنزاني خفيف بسعر 280 ريال ولقيت عنده القاضي الربيع والقاضي الفصول الأربعة وش رايكم يامكشاتية الفراش لصديق لي بالدمام لو كان لي روحة قريب لحائل كان فصلتله أفضل والمحل اللي بحائل تقريبا أسمه الأختيار للي سئلو من فترة عنه . أرجو الإفادة عن المذكور أعلاه وهل محلات الرماية زينة الفرش اللي عندهم .

[فتى احد]

السلام عليكم ...

أمس رحت لساكو بالخبر ولقيت عندهم فراش الدريويش مقاس وسط بسعر 360 ريال ومن برا القباب تنزاني وثقيل لكن من داخل بصراحة ماعجب صديقي لأنه هو اللي بيشتري ورحنا محل الرماية بالخبر ومالقينا عنده شىء ممتاز أغلى شىء عنده من داخل فرو بسعر 400 ريال مالقينا ألماني لا أمريكي اللي تكلموا عنه الأخوان سابقا دلونا تكفون .

[الفتكي]

بسم الله الرحمن الرحيم


السلام عليكم ورحمة الله وبركاته

وانا كذلك أويد فراش لأني جربت اغلب الفرش من السنيدي كل الانواع واشتريت فراش الدريويش وحصلته احسن فراش علما اني لي صديق عنده فراش الدريويش منذ اكثر من عشر سنوات ولا يزال معه من افضل مايكون لانه كثيره طلعاته وانا اقترح انك تاخذ من الدريويش البوليستر وتروح احسن واحد يفصل التنزاني وتقول له انه يجعل السحاب من اعلى على شكل حرف u على شان مايدخل عليك التراب وكذلك الخشاش لآني سوف اعمل هذه الطريقه انشأ الله ولكم تحيات

[الفتكي]

بسم الله الرحمن الرحيم


السلام عليكم ورحمة الله وبركاته

يا أخي فتى احد انتبه تاخذ الفراش الذي داخله فرو لانه يمسك عليك التراب كما قال اخونا روح للدريويش وخذلك واحد والله ماراح تندم وانا اقول كذلك للأخوان انتبهو جميعا تأخذون فراش قماش الداخلي مموه لانه بارد ويصقع سبق اني شريته من السنيدي ورميته والله وانا اشتريته بقيمة 240 ريال ورحت شريت من الدريويش قبل سنه وانا مرتاح له لأنه دافي جدا والله ولكم على تحياتي , , , ,,

[فتى احد]

بسم الله الرحمن الرحيم



السلام عليكم ورحمة الله وبركاته

يا أخي فتى احد انتبه تاخذ الفراش الذي داخله فرو لانه يمسك عليك التراب كما قال اخونا روح للدريويش وخذلك واحد والله ماراح تندم وانا اقول كذلك للأخوان انتبهو جميعا تأخذون فراش قماش الداخلي مموه لانه بارد ويصقع سبق اني شريته من السنيدي ورميته والله وانا اشتريته بقيمة 240 ريال ورحت شريت من الدريويش قبل سنه وانا مرتاح له لأنه دافي جدا والله ولكم على تحياتي , , , ,,



السلام عليكم ...

مشكور أخي على النصيحة لكن وين الدريويش بالرياض أو بالدمام لأن أخي يمكن يروح الرياض غدا أرجو الرد وشكرا وموقعه إن أمكن .

[الذيب المغترب]

افضل شيء تفصله كانك بالرياض عند الغرابي من الداخل الفرو تركي والخياط تنزاني وتقدر تفصله على كيفك يعني اذا ودك جيوب للجوال ومخده على حسب متصله بالفرش واهم شي السحاب يكون من النوع الكبير

[خشم الحيد]

فراش الدريويش مجرب وهو خويك في الربعانية وبعض الناس يقول ثقيل وكبير بس الأهم الدفا والوسع ويتقي عن الحيود

[حريميس]

السلام عليكم يالاجاويد

مابطولها عليكم نصيحة إسأل عن فراش الصمان او الفصول الاربعة من عند القاضي إبداااااااااااع. له شنطة وانيق وطبقات ماياخذ مكان بالسيارة وممكن ينفتح بالكامل وفي فراش نفرين حق الدفا!!!!!!!! وفراش ابو رغوة للبرد وراحة الظهر. وأسأل مجرب

[علي عليوه]

الدريويش بوليستر بلا منافس

بس عيبه الوحيد كبر الحجم بعد التسفيط أو اللف ويأخذ مساحة نوعا ما داخل السيارة

أنا شريته من فترة طويلة من محل الدريويش بسوق حجاب بالنسيم وبالتحديد في آخر السوق من جنوب

والمحل يفتح جنوب وكان فيه شايب من الدريويش رهيب جدا

[رعد النجدي]

خالد الدرويش
270 ريال
واذا ما صلح لك ان اشتريه منك
لعلمك هذا سعره من شريتة قبل 12 سنه

[الوافي99]

خذلك فراش درويش اصل وفصل واما بطانه درويش وخياطه السنيدي او القاضي ما انصحك وسعره اذكر اللي بطانته جيشيه بـ 270 ريال اما الان لا اعلم.

[عاشق الطبخ]

خل عنك البربسه والخربطه والمهايط ولا تقعد تشغل نفسك وتروح وتجي وتدور وتسائل


غير فراش خالد الدريويش لا تاخذ من جوه مخمل لو تصك على نفسك ويدفك خويك في مسبح وانت داخلة مادخل الماء ودفئ بعد يعني لا تدور واخلص اشتريه باسرع وقت وهو موجود في كل مكان لانه معروف بقوته ودفئ وزينه

[فتى احد]

السلام عليكم ...

لقيت في ساكو اليوم الصباح فراش خالد الدريويش بسعر 350 ريال لكن أحسه وسط مش كبير وواسع سألت عن مقاسات أكبر قال هذا اللي يجينا من المصنع بالرياض وهذا أفضل مقاس ماشي عندنا وش رأيكم ياشباب .

[جهام القصيم]

مر الفيصلية (الغالة) شف المستودعات وانت نازل من مخرج 17 الدائري الشرقي ثاني اشارة يسار يجيك محلات مفروشات يبيعون فراش الدريويش من 250 الى 300 ريال وانصحك لا تأخذ الفرو لأنة يمسك الرمل والغبار 0
ملاحظة : كانك تبي تطلع في المربعانية والبرد القارص او درجة الحرارة كما في الصورة

http://www.mekshat.com/pix/upload/images50/mk5908_-7.jpg
خذ الفراش الكندي من الرماية سعرة 500 يدفي حتى 40% تحت الصفر 0 وفق الله الجميع

[مشوت قواطي]

شف يالغالي كلام الخوان في محلة ولكن تذكر برد عيد الضحية الماضي ولله ماينفع معه اي أفراش كنا ظاهرين يم الصمان يوم قمنا نبي نصلي الفجر لقينا الجوالين ثالجه
ولكن انصحك بفراش ادرويش هو افضل ماجربت ولكن مثل ها البرد لازم تاخذ معك اغطاء زايد .,,,,,

والله الموفق

[طربق طربق]

السلام عليكم ورحمة الله وبركاته

والله حاب ابين نقطه مهمه عن فراش الدريويش

انا من عشاق فراش الدريويش والله لانه يمتاز من الحجم المعقول والتصفيط والشكل والتفصال

بس يا اخوان فراش الدرويش فيه ميزه اذا نمت فيه وجاء في عزه النوم تبي تلف يمين او يسار تبرد ارجولك لن البولستر بارد وفراش حق البرد لعادي مو البرد الى يذكر والى احلى من فراش الدريوش هو القاضي بشكل كبيرواحلى منه كبروراحه ودف بس فيه ميزه لازم تسويه وهي تفصال تنزاني عليه على شان المطر او الطلوووله واتمنى من الاخوان التجربه بين الفراش الدريويش والقاضي والحكم عليه واتمنى يوم تحكم لاتنام في خيمه خليه بره الخيمه وتعرف منهوو الافضل
وفي ملاحظه اخوي جهام القصيم #64 (http://www.mekshat.com/vb/showpost.php?p=1240790&postcount=64) http://www.mekshat.com/vb/images/buttons/report.gif (http://www.mekshat.com/vb/report.php?p=1240790)
http://www.mekshat.com/vb/images/statusicon/post_old.gif 14/11/2007, 12:12 AM
جهام القصيم (http://www.mekshat.com/vb/member.php?u=5908)

اتمنى منك صوره حق الفراش الكندي لو تكرمت

[عبرووود]

اخوي انا معي فراش الرماية والله انة زين ولايختلف علية اثنين

بس انة غويلي شوي سعرة 350 ريال وتحصلة عند الرماية ارخص من محلات لوازم الرحلات

وتقبل تحياتي

[مقلع الرمث]

درويش افضل شي

[دمعة حاشي]

والله القاضي عنده فراش ينقاله الصمان سعره بــ 300 ريال ودافي