أفضل شوزن على الإطلاق أم حبة؟؟!!

[الهارف]

السلام عليكم

في مو ضوع من المواضيع

عن افضل الشوازن ام خمس

واليوم انا ابحط مو ضوع عن الشوازن الكاملة ام حبة

وياليت تتفاعلون مث ما تفاعلتوا مع أخوي ممتر البران

ونبدأ بسم الله

يالله ننتظر ردودكم

[الهارف]

معليش يا اخوان

نسيت أقول لا تنسون تكتبون

المميزات والعيوب

[المغترب]

تستاهل اكثر من رد .

انا اسمع ان ستيفنز الامريكيه هي الافضل ام ماصوره طويله.

هذا الي اعرفه .
ومنكم نستفيد.

[الهارف]

مشكووووور أخوي المغترب

الله يعافيك

بس غريبة يعني ما فيه أحد بالمنتدى الكبير الطويل العريض ماشاء الله

يستخدم أم حبة

والله غريبة

على العموم مشور وما قصرت

[الخبير]

السلام عليكم
انا أتفق مع المغترب إن ستيفنز الأمريكية ممتازة.

ولكن يا الهارف يمكن لقوة إرتداد البندق هو من أحد الأسباب إلي تخلي الشباب يعافون أم حبة، و أيضاً إنك لو تطرد لك أرنب صعبة إنك إذا طلقت الأولة وما أصبت، يبيلك تكسر البندق و تحط الثانية . وهذي عملية متعبة و يمكن يضيع عليك الصيد بسببها.

[طويل الخطام]

سمعت ان الشوزل ام حبه الكسر اللي تسمى( ام سبع ابر ) هي الافضل وصناعتها امريكيه

وهي الان نادره الوجود واصحابها محتفضين بها

وسبب تسميتها ام سبع ابر انه يوجد على الماصوره كتابات بالانجليزي وبين كل كلمه والثانيه شرطه مثل كذا
......... ـــــ ........ ـــــ ....... ـــــ ......... ــــــ ...... ــــ........ ــــ ......... ــــ ..........
ولو تعد الشرطات تجدها سبع

وعلى فكره التسميه مأخوذه من كبار السن فهي معروفه لديهم بهذا الاسم

وام سبع ابر والاستفنز تعتبر متساويه في الجوده.................

وبصراحه اعتقد ان الشوزل ام حبه اركد في الرمي وادق في التصويب من ام خمس بس يبقى عيبها الرجف يعني كل بعد عشر رميات شيك على كتفك:D :D :D

ومشكور اخوي على الموضوع

[العـفــار]

يعطيك العافيه اخوي ( الهارف ) على هالموضوع الطيب

في الحقيقه ام سبع أبر الأمريكيه مافيها كلام مجربه ومعروفه
كذلك السيلانيه القديمه وهي بالفعل نادره وصعبه تحصل عليها وماصورتها طويله وزينه
ومن مميزات ام حبه انها تتحمل جور الأستخدام . ولاهي حساسه مثل أم خمس
وأغلب قنوص الربع الخالي يفضلونها . واذا صار شي ولا شي لاقدر الله للقيمه هينه
ولا أوصيك عليك بالفكس تراها ( قشعاء ) :D

[al-nashmi]

الرسالة الأصلية كتبت بواسطة طويل الخطام
سمعت ان الشوزل ام حبه الكسر اللي تسمى( ام سبع ابر ) هي الافضل وصناعتها امريكيه

وهي الان نادره الوجود واصحابها محتفضين بها

وسبب تسميتها ام سبع ابر انه يوجد على الماصوره كتابات بالانجليزي وبين كل كلمه والثانيه شرطه مثل كذا
......... ـــــ ........ ـــــ ....... ـــــ ......... ــــــ ...... ــــ........ ــــ ......... ــــ ..........
ولو تعد الشرطات تجدها سبع

وعلى فكره التسميه مأخوذه من كبار السن فهي معروفه لديهم بهذا الاسم

وام سبع ابر والاستفنز تعتبر متساويه في الجوده.................

وبصراحه اعتقد ان الشوزل ام حبه اركد في الرمي وادق في التصويب من ام خمس بس يبقى عيبها الرجف يعني كل بعد عشر رميات شيك على كتفك:D :D :D

ومشكور اخوي على الموضوع



الاخوان الكرام صبحكم الله بالخير.....

البندق ام حبه اللي تكلم عنها اخونا طويل الخطام موجوده عندي ، وهي قديمه جدا كانت للوالد الله يرحمه
والبندق مافيه كلام من افضل البنادق لافي السوق ولا في الركاده والتحمل.

والعام في موسم القميري طلعت فيها ومعي خويي معه ام خمس افضل نوع على حسب كلامه ، ونرمي فيها

وياخساره ضيعت علينا الطيور والفشق، وام وحده بجرابها مع العزبه، ويوم شفت السالفه طولت والطيور راحت. قلت لخويي اطمر وجب بندق الشايب وخذ ماطورك معك ( بندقه ام خمس مسميها انا الماطور من كثرطربقتها) ونبدا نرمي بام وحده ونحصل خير ونوفر فشقنا....

لاكن هاك اليوم ماسويت شي ولا ساعدت خويي باسوات الغداء وتنتيف الطيور ؟؟؟؟؟؟؟ كل نهاري ونا اتسدح تحت شجره الكينه واسحب يدي اليمنا ما اقدر ارفعها:...... بس هذا عذروبها..............



وتقبلوا تحيات اخوكم النشمي

[الهارف]

مشكوووووووورين اخواني

الله يعطيكم العافية

بس أنا أقول انا الستيفنز الامريكة أحسن

لأنها أول شي تسوق أكثر من السيلانية وام سبع ابر

ثاني شي رجفته أخف لا بعد مع الكندرة ولا ترجف ولا شي

ثالث شي ان البندق قلييل خراباتها

لكن ام سبع ابر الله يخلف على الابرة كل شهر منكسرة

هذا من ناحية تجربتي

لكن اذا فيه يعارض كلامي يقوله

ومشكوووورين مرة ثانية

[معمرها]

......بسم الله الرحمن الرحيم........



السلام عليكم ورحمة الله وبركاته .............


ــــــــ:: يعطيكم ألف عافيه على الموضوع الحلو

اشارك فيه
عيب ام سبع ابر
الزرف مايطلع الابعد كل كلفه

وكذالك السيلان
يروح عليك الوقت وهوالزرف ماطلع لاكن البكور


شـــكـــراً:D ;)

[طالع جبل]

شكرا شكرا شكرا يالهرف على هذا الموضوع الي أنتظرته من زمان.

وأنا أقول أنه أفضل شوزن هي أم سبع أبر لأنها مشهورة عند أغلب صيادة القمري
وميزتها أنها تفرش فرش ماهو صاحي وبعدها السيلان.. وبالنسبه للسيلان كانت عندي وحده وبعتها
وماهي بطاله .. والحين أخذت لي برازيلي .

شكرا شكرا كثير قد الدنيا كلها............:D :D :D

[راعي الموزر]

يا عيال ولا تهون ام كلتش الأمريكيه فرش ...............
وسوق................
وكتف ازرق:mad:

[الهارف]

مشكوووورين اخواني

اخوي راعي الموزر

انا عارف ان الامريكية ام كلتش رهيبة وزينة

بس اذا انكسر الكلتش احلته بسيارة البلدية مع الزبايل (( تكرمون ))

يعني ما فيه أمل يصلح الكلتش

ومشكوووور

[رائد 852]

السلام عليكم وشرايكم أم سيلان الأمركيه أتوقع أنها أفضل بندقيت أم حبه ولنها تروح مسافه طويله في الرمي
ولنها متوفر قطع الغيار ويدل علا ذالك سعر المستعمله النضيفه يتراوح من 1300 الى 1400 اما الجديده
المخزنه من 1900 الى2000 لنها منقطعه هذا ألي أعرفه عنها 0000
بس وشرايكم بروسيه اليتحبل روحه عند كسر الماصوره الي ماصورتها 3.5 أنش وكم سعر الجديده والمستعمله النضيفه 00

[رائد 852]

شكلكم ماودكم تردون علا راحتكمممممممممممممممممممممممممممممم

[محب الرمنغتون]

بسم الله الرحمن الرحيم

السلام عليكم ورحمة الله وبركاته0

افضل شوزن ام حبه في رئيي هي ( هرنقتون اند رتشردسون) الأمريكيه0

[الهارف]

مشكوووور اخوي رائد

مشكوووور اخوي محب الرمنغتون

لو يحصل تحط صورة البندق الامريكيةلآني ما عمري شفتها

اخوي رائد ياليت تمسح الاسعار لأن ذكر الاسعار((((( ممنووووووووووووع)))))

[محب الرمنغتون]

http://www.hr1871.com/firearms/large/PardSPW10G.jpg

[الهارف]

مشكووور اخوي محب الرمنغتون

على الصورة

بس هذي اذا انكسر الكلتش ما اظن انه يصلح

ومشكوووووور

[محب الرمنغتون]

اخي الهارف 000 السلآم عليكم ورحمة الله وبركاته0

هل عذروب هذا النوع فقط هو انكسار الكلتش؟؟
وهل سبق وان انكسرت عليك ؟
وهل تشتري مثلها لوعرضة عليك ؟
وهل جربتها من قبل ؟

انا اتعامل معها من حوالي 3 سنوات وهي تبدو رائعه جدا
لك مني تحيه:;)

[الهارف]

السلام عليكم

اخوي محب الرمنغتون

انا اعرف واحد من اخوياي انكسر عليه الكلتش وما ادري وش اللي كسره

وعرض البندق على اكثر من محل بالقصيم ما فيه احد يصلحه

وهذا العذروب اللي انا اعرفه بس

اما من ناحية اشريه اذا كان السعر مناسب اكيد اباخذه

واخر ما جربته امس فاكينه من كرتونه انا وراعيه توه شاريه

وطلعنا به والله ما عليه زين رمية

بس مهب احسن من ((( ام سيلان )))

ومشكوووووور

[مداوي]

[]أخوي الهارف
السلام عليكم ورحمة الله وبركاته وبعد
هذا رأيي بام حبه وهو خطأ يحتمل الصواب
أم حبه دقه قديمه تصلح يحتفظ به الواحد للتراث وذلك للأمور التاليه :
1 / انها قديمه ولا تطلق الا حبه واحده 0
2 / يبيلك معه درزن فقس الجديد اوعامل خاص عنده خبره بالتدليك 0
3 / يقولون أن أم حبه أحياناً تكذب ( الأبره تضرب الفشقه ولا تثور ) 0
4 / كسر الأخشاب وارد كثيراً خاصه اذاكان ضغط( 36 )0
5 / مع وجود أم خمس لامقارنه بينهما اياً كانت أم خمس 0
6 / رأي لاتعد البنلي أم عشر ضغط 74 الى 72 بس السعر غالي


والسلام ختام

[الهارف]

غلطان اخوي مداوي

ترى ام حبة مهب كلهن يرجفن

انا عندي ام سيلان القديمة

والله لو تشوف جسمي ان تقول مهب بس كتفي ينكسر تقول الى رجيلني يتكسرن

ومع ذلك والله اني ما احس به

والخشب له فترة طويله معي ولا انكسر مع اني ارمي به كثييييير بظغط 36

ولا انشعرت ابد

واللي تنكسر معهم اكيييييييييد من سوء الاستخدام

تطيح منه ولا شي وتنكسر

لكن مشكووووور على رايك

[الشاقي]

بالنسبة لأم وحدة أنا سمعت بالسيلانية من أفضلهن

[قناص الجنوب]

الأخوة الكرام شكرا على طرح مثل هذه المواضيع عن الشوزن ام حبه

نحن في الجنوب معظم الشوازن التي معنا من ام حبة بس قد تختلف في الصناعة

قبل اكثر من سنه شريت شوزن من احد الشيبان بمبلغ 1800 ريال البندق قديمة والله بالواسطة وبكل المحاولات اكثر من مرة حتى تم البيع بيننا لان الشايب يعرف كم لها من جمايل عليه في الماضي
البندق صناعة (انجليزي) ماسورة طويلة عليها سبع إبر فوق الماسورة0
ومنها الروسي ولها امان عند الزناد لكنها خطيرة والله لاتستطيع إبقى الرصاصة داخلها لان مجرد وضع الرصاصة داخلها تعتبر جاهزة للرمي وّاذا طار الطير عليك بإخراج الطلقة بعكس الأنجليزي
الشيبان عندنا يسمون الشوزن ( بندق الليل)


والله يعطيكم العافية

[الهارف]

الف شكر لك اخوي قناص الجنوب

[نجمة سهيل]

موضوع رائع ، وشيق ، اخوي الهارف:heart:

بالنسبه لأم حبه ، جربت نوعين منها ،

النوع الأول : ام سيلان ( ستيفينز) ممتازه بالحيل ، من ناحية السوق والعمل ـ والتحمل ـ،

النوع الثاني : وينشستر: نفس مميزات لكنها تفوق ام سيلان بخفة الرجف ،

[الهارف]

مشكور اخوي نجمة سهيل

الله يعافيك

يعني انت ترجح الونشستر

ومشكور مرة ثانية

[مكشات]

بالنسبة للشوزل أم حبة جربت عدة أنواع ومانفع معي إلا وحدة لما جربتها ضميتها بالهوية :)
هذه الصور توضح إنتشار الحلبي ( الرصاص ) :
الفشق المستخدم هو بولندي 32 / 6
الصورة الأولى : إنتشار الرصاص على بعد 20 متر ..
http://www.mekshat.com/pix/upload/images2/stv01.jpg
الصورة الثانية : إنتشار الرصاص على بعد 30 متر ..
http://www.mekshat.com/pix/upload/images2/stv02.jpg
الشوزل من شركة ستيفنز ماسورة طويلة ( 91 سم ) موديلها 94F الشمبر 3 إنش
الرجف معقول بمقاس 32 / 6
لكن مقاس 36 / 0000 تفقدت صدري :D
تحياتي

[نجمة سهيل]

اخوي الهارف:heart:

في الحقيقه انا واعوذ بالله من قولة انا . ماارجح الوينشستر ـ

يمكن انه الوينشستر تجوز لي ولغيري ماتجوز له:)

مثل الفشق ، اضرب لك مثل ،

عندك فشق ابو غزال ، من كثر مايمدحونه الشباب في المنتدى ،

تشوقت لتجربته ـ لكن بعد التجربه:(

قلت الله لايعيده من فشق ،

كذلك التجربه مع الار سي الاسود ، قالوا لي ماهوب زين والله ان يدبل تسبدك:)

لكن بعد التجربه أضفته الار سي في الـ Favorites List :) .


مكشات:heart:

يسلمووو هالديييات على هالصورتين الحلوييين:D

[ابو مساعد]

وهذه مشاركتي عندي بندق أم حبه وعندي أم خمس
أفضل أم حبة على أم خمس والسبب الفشق أم حبه توفر الكثير من الفشق وعذروبها قوة الارتداد ولاكن كل شىء له حل يوجد الواقي عن الارتداد .

ودمتم سالمين

[akhan]

مشكوووووووووووووور

[desprado]

في حل مدري احد جربه ولا لا

الشوزن الامريكية ام خمس تعشيق (شت قن ) لها ثلاث سبطانات تقدر تغيير بينها على حسب رميك ( طويل - وسط - قصير )
بعدين البندق تسوق لان التلقيم مهو اتوماتيك
يعني زي ام حبة بس تشيل خمس

[سهيل واحد]

السلام عليكم و رحمة الله و بركاتة..

كل عام وانتم بخير و مبروك عليكم الشهر

معليش انا من زمان ما شاركت ولكن الان رجعت للمنتدى والله يعطيكم العافيه يا شباب و لا انسى الشيبان اللي ينقطون خبره و عرف.

الهارف .. حسب خبرتي المتواضعه إن مميزات ام وحده او الشوزن ام طلقه زي ما قالوا الخوان اركد با الرمي (اصوب) وتسوق ابعد (مميزات ام وحده عن ام خمس). لكن ادا إنت متعود على ام خمس تبي تلاحظ ان ام وحده ترجف و لا تبرد كبدك لاصار الدعوى فروق او اردفت البارود وبعد تخلي إدنك تصن له ساعه.

بالنسبه لانواع ام وحده.. اعتقد إن السيلانيه هي ستيفنز لكن الاولين سموها سيلانيه (ممكن احد من الشيبان يقولنا ليه؟) وانا اشهد انه تلحق وتعلي للخضيرى شوف عيني مره جابت غرنوق من اللبه تقول مرمي بكلاش(لاإلله إلا الله). ام سبع ما اعرفه اما النوع الجديد اللي تجي ماصورته مموهه ب أزق فلا تحوشك عليه رجف تخليك معتق كتفك ثلاثة ايام.

تحياتي للجميع بروح اصلي ولنا حديث لاحق.

[سهيل واحد]

با الخير يا زقرت (يا شباب) ومبروك عليكم الشهر الفضيل ..

الاخ الهارف
اول شي هو ان البارود اللي تسمى ستيفنز هي نفسها اللي تلقب با السيلانيه والله اعلم.

صراحه ماقد رميت با احسن من السيلانيه
المميزات:
ركاده
تسوق بعيد
قليلة الخراب (تتحمل جور الأستخدام)
ادق في التصويب
العيوب:
ترجف بقوه
حبه وحده ( يعني لو فيه فرق قميري او جول قطا .. إقعد .. به.. يضيع عليك الصيد )
بعض الاحيان ما تقفش (ما تطلع الفشقه)

على فكره تراي من زمااااااااااااااااااان مسجل با المنتدى لكن اسمحوا لي كنت مشغول شويتين

[الهارف]

مشكوووووووورين كلكم

والله يعطيكم العافية على المعلومات الطيبة

[نجم البحر]

ســــــــلام على الجميع توضيح لااكثر للاخوه الكراااااااام ام سبع ابر الاصلية هى انجليزية الصنع وليست امريكية

[دواس غدراء]

تحيه للجميع ..
بالنسبه للانواع المذكورة من الامريكيه وام سيلان مع كثرة الاستخدام تهفي شوي ناهيك عن الرجف . اما قولة انها احسن من ام خمس ما اعتقد .
بالنسبة لي ام حبة الروسيه الاوله خشايب لونها صفر لا يعلا عليها ما صوره طويله . حتى الجديده سوقها خيال .

[الرغيان]

عندي ام حبه الايطاليه القديمة ام مساميربيض ... ماني بمادحها علشان ميقلون يمدح حلاله فعلها معروف .. بعد اذا الادارة هذا رقمي اخت الجديدة مخزنه للي يرغب 0553210008

[الباثفايندر3]

ياجماعة معروضه علي وحده ام سبع ابر انجليري
طبعا ام وحده نضيفه كم تسوى

[الباثفايندر3]

ياجماعة معروضه علي وحده ام سبع ابر انجليري
طبعا ام وحده نضيفه كم تسوى

تكفون يااهل الشيم والشجااااعة

[مكشاتي 33]

انا احس ان ام سيلان احسن شئ

[ذيب السلمية]

السلام عليكم
يعجبني تفاعلكم ياشباب مع ان الموضووع من

2003 😂😂😂

[مكشاتي 33]

ابي الفايدة ام سيلان وشو الفشق الزين لها
وهي مكتوب فوق فتحة الماصورة مكتوب 16 مدري وش السالفة

[جهق//حايل]

ام سيلان والله والحلا والزين
بس رجفة كتف ويبيلك تجويدن زين
ممتازه شارينه قبل 15 سنه مستعمله بـ500ريال:D سعر 4 دستات فشق
ولا اللحين معي ولا نظفته ولا مرره :looney: وصابره ماشاء الله وماجاه الا الخشبه متكسره وابغيره ان شاء الله
بس عيوبه ندددددددف / ولا ترمي فوق 38
تحياتي جهق//حايل

[ابوهيلة]

افضل شي ام سيلان القديمه ام خطوط فوق الماصوره كانت.عندي وبعتها كنت اطلع انا وواحد من الشباب نصيد الحجل معه ام سبع ابر هو بطريق وانا بطريق نتقابل المغرب اصيد انا ضعفين ما يصيد بام سيلان ماشاء الله عليها ما تثور الا في شحم ولاكن راحت وكرهت البنادق من بعدها ماعاد قنصت نادر ماتخطي لدرجه انها ماشاء الله مره شريت شدة فشق صدت فيها ثلاثين حجله كل رميه بصيدة والا ثنتين ما اخطت وخويي كره بندقه يقولي ما تسوق زي اللي عندك لاكن بعتها من كثر مشاكلها مع.الناس ليه ترمي ليه.ترمي ومشاكل وقلة حيا بعدها قلت يازين ساديا من البقاله تشتريها وررا سك مرفوع بدون مشاكل ههههههه

[ابو محمد سعيد]

معي بيكال الرياضيه ام حبه بصراحه حلوة لكن يعيبها قصر الماصورة وكتفك يبي له تدليك بعد كل رميه لكن تسوق

[سابرالضلع]

أنا أفضل أم حبة على أم خمس وأفضل مامرت علي هي ستيفنز الاميركية وأم سيلان وأم سيلان وستيفنز شركتها وحدة وهي ستيفنز
ودمتم بخير

[راعي المطافيل]

اخوووووووي عندنا شوزن للوالد الله يطول عمرة
أأم حبـــة ــ روسيةـــ لها عندنا اكثر من اربعين سنه ــ اخر شيء نظفناها وحفظناهاا وهي ما شاء الله تسوق سوق ــــ لياما صدنا بها غزلان ــ قطااا نعبيه بخياش الشعير القديمه ـــ لياما صدنا بهااا حباري بالشمال ــ
عيبهاااااااااااااا واحد الا وهو انهااااااااااااا تندف ندف مهو بسيط

[شرق المغيب]

سيلان وبس لاصارت طويله

ام سبع ابر تخوف تزهف اغلب الي ماهي نضيفه

والندف كلهن يندفن بس الطويله اخف ندف

[عشه83]

عندي بيكال سبورت اللي لها تشكات ممتازه بالحيل مكب لها تشك 675 امريكي مخرق تسوق سوق لا يقل عن السيلانيه وام سبع ابر وتمتاز عليهم انها اخف رجف لان لها فتحات باول السبطانه تخفف من الندف والصوت تسام ب4600ريال ولا افكر افرط فيها ,, موفقين

[ابو ريفان]

تقيم رائع من اخوي رائد

[المشاور 555]

عندي بيكال سبورت اللي لها تشكات ممتازه بالحيل مكب لها تشك 675 امريكي مخرق تسوق سوق لا يقل عن السيلانيه وام سبع ابر وتمتاز عليهم انها اخف رجف لان لها فتحات باول السبطانه تخفف من الندف والصوت تسام ب4600ريال ولا افكر افرط فيها ,, موفقين


السلام عليكم
اخوي انا عندي نفس نوع حقتك الله يخليها لك ان شاء الله ويبعد عنها شر التفاتيش.انا استخدم حاليا التشك f -Lead
ماشية اموري بها ..ممتازه ماشفت منها اي مشاكل ..بس بعد ما شفت رايك بتشك 675
هيضتني اشتريه .
كم تتوقع احصل سعره ؟وكيف تجربتك معه ؟ قد جربته على مسافة 60 متر ؟وكيف نثره وصابته للهدف؟

[صقر الفاج]

السلام عليكم
موضوع جميل جدا الله يعطيكم العافيه

[المتلولس]

ام سبع ابر

[الضرغامي]

موضوع مميز وله حدود عشر سنيين.

[تربة الشمال]

الشوزل ام حبه الكسر اللي تسمى( ام سبع ابر ) هي الافضل وصناعتها امريكيه اذ كان الماسوره 32 تسوق وقليلة الاعطال لاكن العيب فيهاء تندف ( تشلع الكتف) وسلامتك

[ابومتعب111]

رميت بي ام سبعة ابر
ورميت بي ام سيلان

وبصراحة ام سيلان احسن بكثير من ام سبع ابر

[تميم2222]

افضل شوزن ام حبه هي الانقليزيه ..