اعــلوم الـحبــــــــــاري

[المري]

السلام عليكم ,,,اما بعد


تعلمون اخواني الاعزاء بأن وقت عبور الحبارى قرب واصبح على الابواب ولكن فيه بعض الحباري


تأتي قبل وقتها يعنى حالة شاذه .


ففي هذا الموضوع حبيت اي واحد من الاعضاء يسمع خبر عن عبور حبارى ان يكتبه في الموضوع


حتى نعلم متى تكون كثرة الحبارى..



اول خبر عن الحبارى

وجدت قبل ثلاث أيام حبارى غرب الدمام بحوالي 70 كلم ووجدوها عدة اشخاص وقصو جرتها حتى


طارت منهم وخلوها لان اطيورهم تو ماشلوها من المربط... وجزاهم الله خير لان بعض الصقاقير

في هذا الوقت لو لقاها وطيره مابعد جهز رماها بالبندق ...



هذا الخبر 99 % صحيح واي تغيير في الخبر سوف اخبركم به.


وتقبلو تحيات اخوكم / المري

[*الوافي*]

السلام عليك اخوي المري

طيري نقلته ورببته بس باقيله شوي وقبل يومين الفجر كلمني خوي لي
عنده صنادق فالبر وشاف كروان ورحت له العصر ولقيت جرته
بس الله ما كتب

[ميراج]

اخوى المرى السلام عليكم

احمدلله على السلامه وبيض الله وجهك على علوم الحبارى

بس وين الطير الى بى يهد فى ذا الحر انا طيورى مجدعه الامواس من عشرين يوم ولا انقلهن اللى فى

20/9 يعنى ما يجهز اللى فى 1/10 ولكن ذا السنه بنشوف لنا حل

تقبل تحيات اخوك ميراج

[المري]

هلا اخوي الوافي

تسلم يالغالي على الرد


*************

هلا اخوي ميراج


20/9 هو الوقت المناسب لشلة الطير المناسبة وعسى الله يوفقكم في العبور الجيد


لهذا العام.


اخوكم / المري

[مغــادر]

مشاركه جميله يا المري والله يعينا عليها ويعطينا الطيور الي فيها خير..ولاعليك امر لو اتفيدني كيف اقدر اطلع الصور على الكنبيوتر لان ماعندي خلفيه عنها ومشكور..



اخوك مغــادر

[المري]

مرحبا اخوي مغادر وحياك الله

بالنسبة للصور ماادري ويش تقصد بس ترى مافيدك في الكمبيوتر بشكل عام يعنى


تراني عليمي اشوي...


اخوك / المري

[الفهد]

اخوى الغالى
بيض اللة وجهك على علومك الطيبة وان شأللة قربت نقلة الطير
راح تجيك علوم الحبارى من اخوك الفهد بأذن اللة

[الرهاوي]

اخوي المري حسب معرفتي ان اول العبور من جهة الدبدبه من توالي النعيريه على السعيره و وراها شوي


تحياتي

[البروني]

السلام عليكم0
مشكور اخوي المري على هذي المعلومات الطيبه
بس طيورنا اغلبها شواهين ولهالحين ماصفت0
والله الموفق0

[ابو عايد]

الرسالة الأصلية كتبت بواسطة الفهد

اخوى الغالى

بيض اللة وجهك على علومك الطيبة

ومشكور وبارك الله فيك ويعطيك العافيه يا المري الغالي

وتقبل تحياتي // العاشق الولهان

[العـفــار]

اخــر أخــبـــــار الـحـــبـــــــارى
اخي العزيز المري ... أخواني الأعزاء .
ذكرلي واحد من الربع كان قانص القميري شمال الخط السريع ( الشرقيه - الرياض ) في يوم الخميس ( 18/09/2003 ) انه مر على شباب صايدين حبارى وقاعدين ينتفونها . الرجال ماتأكد مره. أنتظر حتى شالوا الشباب عزبتهم وروحوا . رجع الرجال على محلهم الي كانوا مغدين فيه وفعلاً وجد راس الحبارى وريشها وكان مستغرب من نزولها في هالوقت

[بن ذيب]

واللة ياخوان كل يوم نسمع عن

صيد حباري ، لكن الاكيد ماشفت شي

حتي الان ، والظاهر ان الحباري متاخرة

هذة السنة.............نسال اللة التوفيق

[عاشق الصفاري]

يعطيك العافية على العلوم عن الحباري
وجزاك الله خير

[امير الرفيعه]

اخوي المري .....
السلام عليكم ....
الله يعطيك العافيه بس مثلك عارف ان الحباري تنزل الشرقيه وبالتحديد قريب من شبك القاعده الجويه.
نبي علوم عن الدهنا . كم الهباس . نفود لينه. وان شاء الله نجيب الاخبار .

************
وتقبل تحياتي ......

**********
اخوك امير الرفيعه.

[صقر]

اخواني

السلام عليكم ورحمة الله وبركاته

ذكر لي احد الاخوان اليوم ان فيه ناس يصيدون طيور ماء في مشروع الاسياح بالقصيم وانهم وجدوا حبارى وصادوها بالبندق وهم ما يعرفونها وعرضوها على واحد من ربعهم وقال لهم هذي حبارى .وانتشر الخبر بين صقارين المنطقة وذهب واحد منهم للتأكد وعرضوا عليه راس الحبارى واجنحتها وأكد الخبر.

التاريخ الجمعة 2/10/1424هـ
هذا الخبر نسبة صحته 90%

[عاشق الصحراء]

السلام عليكم .
يالمري الله يرزقنا بالحباري .
كل سنة هذي سواتنا ..مراكض بالشرقية و تعب و خسارة
بنزين و غبرة من الصباخي و تغريز...و تاليتها حبارى وحدة بالموسم كله.
اكتشفت ان الحباري الي تجينا لا شيء بالنسبة للحباري الي تمر
النعيرية و انت رايح شمال.
في الشرقية اذا عينو الحبارى الوحدة تجمعت الصقاقير عليها تقل
يبون يعرضون عرضة .
لي خويا بالنعيرية عندما سمعت كثر صيدهم العام الفايت تفشلت و
انسحبت و لا قلت و لا كلمة , خفت يضحكون علينا....
لو الوقت يسمح ما اخلي الي حول حنيذ على الصرار و غرب هذي
تخلي الواحد يستانس :) خاصة انها هالسنة ذي ارمضان الله يشرفه
و الناس نومى .

[المري]

هلا اخوي صقر

تسلم على هذا الخبر وان شاء الله انه صحيح..


************

اخوي عاشق الصحراء

تركد في الشرقيه وانتبه انك من اللي اذا قنص مايلف يمين ولا يسار يبتل سيده


يعنى تحصله بعد ثلاث ساعات قطع له 100 كيلو هذا غلط عليك بالدواج الراكد

ولا تستعجل واذا احد نادى عليك من قريب عنده حبارى فبمكان تروح لهم اما اذا

كلمك واحد من مسافة بعيده فلا تتعنى اقنص ويرزقك الله ..


اما القاع اللي غرب حنيذ والصرار على ماقلت قيعان زينه بس بعض الحبارى تبي

لها طير طلع في القيعان اللي هناك...


اخوكم / المري

[المري]

اخواني الفهد والرهاوي والبروني وابو عايد والعفار وابن الذيب وامير الرفيعة

وعاشق الصفاري..


تسلمون على هذه الاخبار الزينة ولكم مني الشكر والعرفان...



اخوكم / المري

[حران]

السلام عليكم
اخواني ذكرلي واحد من الربع انه أمس قبل المغيب شف جره حباري شمال غرب الجبيل حوالي 54 كم وغابت عليه الشمس. انشاء الله يوفق اليوم التوفيق الطيب.
حران ::good:

[الباهي]

هلا بالاخوان

امس حصلت جره حبارى جرتها في ليل وقصيتها لكنها طايره مع الصبح

ودوجنالها ماحصلناها واليوم الفجر بطلع لها عسى الله يجيبها

اخوكم الباهي

[المري]

اللهم امين يالباهي

عطنا اعلومك اذا رجعت على خير.................


في انتظارك وفي انتظار العلوم الزينة ان شاء الله..


اخوكم / المري

[الباهي]

هلا والله باخوي المري

مارجعت اليوم الا بعد المغرب ما الله وفق يجيب الله خير

اخوك الباهي

[بــرق الشمال]

ياميت أهليييين وسهليييين بأعضاء ومشرفين مكشات المحترمين
باالنسبع للحبارى(عاشت أيامه)انا صدتها قبل 10 أيام في شعيـب
البسيتين وكنت رايح اصيد قميري وصفار وتفاجئت بها ولقينا برضه
جره واحده أخرى ولاكن للأسف ماكان فيه وقت تخبروووووووون
الدوامات....:(

[akhan]

يعطيك ألف عافيه اخي

[معشوق]

السلام عليكم ورحمة الله وبركاته
ياجماعة الخير واحد من الشباب يقول انهم صايدين خرب وحباره في السالمي يوم الخميس الماضي (وهذا الخبر صحيح 100%)


الله يرزقنا ويرزقكم

[المري]

الله يبارك لكم في صيدكم وفيدكم يارب العالمين..


اخوكم / المري

[عبكري]

بسم الله الرحمن الرحيم


شهر مبارك على الجميع أنشاء الله.

علوم الحباري هاليومين طيبه ولله الحمد والحركه واجد.

من يوم الأربعاء 3/9/1424 إلى اليوم 10/9 اللي سمعنا من ناس ثقات واللي شفت أنا والربع 13 حبارى ويالله لك الحمد والشكر وأغلبها طول الله بعماركم شمال شرق الشبك(القاعده) و3 حباري اللي ذبحت في النفود يم الدكاكه و1 بشعيب الفويلق شمال البعيثه وجانا علم واحد من الربع أنه هاد على 3 حباري يم شامة زرود لكن مالله كتبهن للطير وراحن عليه.


هذي آخر الأخباروأبشروا بالخير إنشاء الله.


أبومحمد

[abuwafi]

اخوي العبكري
السلام عليكم
نصيحه انتبه ان تقرب المحميات
ثم تشوف لك شوفه

[المري]

هلا اخوي عبكري

تسلم على هذه العلومة الطيبه وعسى الله يزيدكم من فضله...



اخوك / المري

[عبكري]

هلا بأخوي أبو وافي وأنا أخوك حنا مخلين المحميات لأهله والله يرزقنا بعيد عنه وأياكم أنشاء الله,


هلا والله بالغالي المري فيه علوم جديده لكن نخليه يوم الجمعه أو السبت بإذن الله.