"الوسم قرّّب يالصبيحي نصيفه ... والجو خبرك والمراميث يبّاس "

[خالد الوقيت]

هذي قصيدة هم ذكّّّروني كتبتها قبل سنوات لما انتصف الوسم ونزلت في شريط هبوب الشمال بصوت ابو عبد المجيد واليوم انقلها تفاؤلاً ولعلّها تعجبكم ..

الوسم قرّب يالصبيحي نصــــــيفه ...... والجو خبرك والمراميث يبّاس
وذنوبنا غطّت بياض الصحـــيفه ...... لو تنحسب ياصاحبي ماله قياس
يارب لاتجعل خـــــــطانا نكيفه ...... ياواحدٍ عدله للانــــسان نبراس
يا الله بمزنٍ هايلٍ في صــــــــفيفه ...... لاشافه الشايف تبـشّر بالاوناس
برقه يشوق المستخيل برفيــفه ...... ورواعده ترزم مثل صوت الاجراس
اسبوع ما ياقف علـــــينا وكيفه ...... يودع مساهيب الخلا كلها اوطاس
من عقبه الاوطان تصبح مريفه ......وتلبس من صنوف الحيا زين الالباس
غرضك خوّة كل نفسٍ شـــريفه ..... اهل الشكاله والجـــــماله من الناس
لاجوّا في دِعْـبٍ نظيفٍ غريــفه ...... والورد باطـــــرافه من الريح مِيّاس
ثم اضرموا بالرمث نارٍ كثــيفه ...... وداروا حواليـــها على الزل جِلاّس
وصفّوا بها صفر الدلال الهديفه ...... اللي مباهـــــــرها تعايط بالانفاس
فنجالها يبرد غليلك رهيـفه...... عقب الغثا ويصحْصحك عقب الاعماس
وسوالفٍ في كل فنٍّ طريـــــــفه ...... ماهي سوالف كل غـــــاوي وهلاّس
هم ذكروني في ليال النشيـــفه ...... واخذي بها من سجّة العمر مرواس
ايام ربعي للمـــطارد لهيفه ...... تضرب على التأخير باخماس واسداس
تال الشهر والجيب تسمع وحيفه ...... يم الحزيم ويـــم نزّاح الارماس
اديار لو هي يالصبيحي مخيفه ...... لاهل الولع خابر تباسيط واوناس
ذكرى لها عيني تهامل ذريفه ...... والقلب يسبح في بحر كل هوجاس

.

[القسامي511]

السلام عليكم ورحمة الله وبركاته
الشاعر _خالد الوقيت لي الشرف إني أرد عليك على هذا الموضوع وأقول لك صح لسانك على هذه القصيده والصراحه من القصائد اللتي أعجبتني في شريط هبوب الشمال وأنا معجب بها جدا"
أخوك _ محمد القسامي

[برق السما]

الله لايحرمنا منك يبو صالح , ولهذه القصيدة مكانه بنفسي لايعلمها إلا الله سبحانه !

تصدق 3ساعات , وأنا مغير أرجع وأعيد هالنشيده !, عز الله انها بوقتها ,وكل بيت يحكي عن نفسه في هاك الطلعه .. كانت بنصف الوسم تقريباً ,
و كنت بنفود والجو [ خبرك والمراميث يباس;) ] ,

وأنا اشهد أن معي اثنين من [أهل الشكالة والجمالة من الناس] ,

ثم حطبنا الأرطا من ذيك النفود و [ثم اضرموا بالرمث نارٍ كثــيفه] ..

ثم :

وصفّوا بها صفر الدلال الهديفه ...... اللي مباهـــــــرها تعايط بالانفاس
فنجالها يبرد غليلك رهيـفه...... عقب الغثا ويصحْصحك عقب الاعماس
وسوالفٍ في كل فنٍّ طريـــــــفه ...... ماهي سوالف كل غـــــاوي وهلاّس


تسنك معنا ولله يبو صالح ;) ,,

لاهنت , ويعلم الله ما ارتوينا من مثل هالقصايد !

[جرير]

جميلة هذه القصيده
والتوقيت والاختيار اجمل
بارك الله فيك

[barq]

صح لسانك اخوي

قصيدة رائعه وفي وقتها الله يرزقنا من واسع فضله ويغيث البلاد والعباد

اللهم انزل علينا الغيث ولا تجعلنا من القانطين

[دغيم1]

السلام عليكم ورحمة الله وبركاته


يعطيك العافية

شاعرنا المبدع

أبو صالح

قصيدة جميلة ورائعة تحكي واقع محب البر والكشتات

صح لسانك ولاهنت


لك شكري وتقديري


دمت بود

[ابو مشعل 1]

صح السانك

بارك الله فيك


وفي مكشات اللي عرفنا على هالوجيه الطيبة


تقبل تحياتي

[ثعل البرد]

يا الله بمزنٍ هايلٍ في صــــــــفيفه ...... لاشافه الشايف تبـشّر بالاوناس
برقه يشوق المستخيل برفيــفه ...... ورواعده ترزم مثل صوت الاجراس





صح لسانك

[ريف النشاما]

السلام عليكم ورحمة الله وبركاته


يعطيك العافية
شاعرنا المبدع
أبو صالح
قصيدة جميلة ورائعة تحكي واقع محب البر والكشتات


وهي من أجمل القصائد التي سمعتها حقا


نتشرف بانضمامك لصرح مكشات الطيب


صح لسانك ولاهنت







لك شكري وتقديري


دمت بود

[خالد الوقيت]

السلام عليكم ورحمة الله وبركاته
الشاعر _خالد الوقيت لي الشرف إني أرد عليك على هذا الموضوع وأقول لك صح لسانك على هذه القصيده والصراحه من القصائد اللتي أعجبتني في شريط هبوب الشمال وأنا معجب بها جدا"
أخوك _ محمد القسامي

.
اخوي محمد : أنا ممتن لك جداً على مرورك الكريم .


ومشاعرك الجياشة .


تقبل تحيتي .
.

[خالد الوقيت]

الله لايحرمنا منك يبو صالح , ولهذه القصيدة مكانه بنفسي لايعلمها إلا الله سبحانه !


تصدق 3ساعات , وأنا مغير أرجع وأعيد هالنشيده !, عز الله انها بوقتها ,وكل بيت يحكي عن نفسه في هاك الطلعه .. كانت بنصف الوسم تقريباً ,
و كنت بنفود والجو [ خبرك والمراميث يباس;) ] ,


وأنا اشهد أن معي اثنين من [أهل الشكالة والجمالة من الناس] ,


ثم حطبنا الأرطا من ذيك النفود و [ثم اضرموا بالرمث نارٍ كثــيفه] ..


ثم :




تسنك معنا ولله يبو صالح ;) ,,



لاهنت , ويعلم الله ما ارتوينا من مثل هالقصايد !

.

برق السما : ياجمّل الله حالك

يشرفني اعجابك يالغالي

وليتني معك انت وربعك

مثلك خوته تشرى

تحياتي لك ولربعك

[راع الصقلاويه]

صح لسانك يابعد حيي , وهذه الكلمة لاتوفيك حقك

إنما : لا أملك أكثر منها إلا الدعاء لك بالتوفيق

والسعادة في الدارين .

وابي أسألك : أنا أعرف شخصين اساميهم خالد الوقيت

واحد كان زميل لي في ثانوية القادسية بالرياض , والثاني

كان يدرس سنه تحضيريه للماجستير في اللغة العربية في

جامعة الإمام بالرياض أظن عام 1422هـ إن لم تخني

الذاكرة , فهل أنت أحدهما أم أنت ثالث من هذه الأسرة

الكريمة أتشرف بمعرفته ؟.

الله يحفظك .

[مطلاع]

صح لسانك
يا الشاعر {خالد الوقيت}
قصيده جزله من جزل
وتوقيت رائع
بيض الله وجهك

[ذيب الشامات]

صح لسانك , والقصيدة زي ماقالوا الأخوان جت في التوقيت المناسب :good:


دمت بود :)

[الفقيري]

صح لسانك قصيدة جزلة

[فتى الرابيه]

غرضك خوّة كل نفسٍ شـــريفه ..... اهل الشكاله والجـــــماله من الناس
صح لسانك

[مخاوي الذيابه]

صج لسانك ...