( البزعه ) نحتاج ارائكم ومواقفكم

[شفايف نعجة]

(( البزعة ))هي الطبع البغيض الذي يتصف به بعض الناس وهذا التصرف بلوى على صاحبه وعلى اصحابه (1) . السؤال اللي يحتاج الى النقاش بكل واقعية ومنطقيه هو . لو بليت في رحلتك بواحد بزعة كيف تتصرف معه ؟
وعلشان نوضح لبعض الشباب وش معنى بزعة نقول ... تخيل لو طلعت للبر وانت ناوي تروح للصمان مثلا . وشلتو عدتكم واغراضكم المهمة بسيارة ( البزعة )وبعد مامشيتو لاحضت ان البزعة وجه بكم وجهه غير وجهتكم اللي متفقين عليه :confused:
ودقيت عليه بالجوال وصار مسكر (2). وناديته بالكنود ولا رد
وكبست له بالنور ولا وقف ... اخيرا
صقطت(3) عليه واوميت له بيدك وقلت له وين رايح . . قال لك فيه مكان حلو غير الصمان . خلكم وراي بس ويبي يعجبكم . وحط القير بالاول ومشى وانت ماكملت كلامك :eek: . وكل واحد منكم ناظر الثاني :( ومشيتو وراه طبعا لاتنسو اشياء مهمة . 1 اغراظكم الاساسة بسيارته 2 كلكم غير موافقين على رايه 3 اذا خالفتوه تبي توصل للزعل لان دايم الشخص البزعة اذا احد خالف رايه يزعل وبكذا تبي تصير الرحلة بدل ماهي افراح تنقلب لاتراح . والسؤال المهم تبي تطلع معه في رحلات قادمه الا لا


ماتم ذكره مجرد مثال ياليت الشباب يعطوننا مواقفهم مع البزعات

واخيرا ... اذا مالقيت الا بزعة يطلع معك فنصيحتي تطلع لحالك
-------------معاني الكلمات----------
1 . اي اصحاب البزعة ورفاقه
2 .اي مقفل
3 . يعني تجاوزته في السير

[مافيا الصحاري]

أنا من رأيي أنه في مثل هذه المواقف نعرف فائدة وضع أمير للرحلة كما أمر رسول الله صلى الله عليه وسلم
وهنا أيضا تخرج صفة القائد الفذ والذي يفرغ طاقات أصحابه كل في مجاله وكل ميسر لما خلق له

[محمد الشاوي]

والله مشكلة ...


طيب ممكن نفشش ( 1 ) كفراته إذا وقفنا عند المحطة نعبي بنزين وناخذ أغراضنا وبعدين بكيفه يبي يخاوينا ولا يطس ( 2 )
وبعدين ياشفيف نعجة ما أكثر البزعات في هذا الوقت وهذا الموضوع يحتاج فعلا لحل لأن المشكلة أصبحت ظاهرة .
وغالب البزعات تلقاو( 3 ) لزقه يعني يفرض نفسه عليك ويدبل ( 4 ) كبدك لين يروح معك غصب .


الحل من وجهة نظري : تاخذ معك أم خمس ... :(


أشكرك على طرحك المميز وأسلوبك الرائع يابعدي .



ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ



( 1 ) نفشش يعني ننسم وهي عكس نتفخ .:p
( 2 ) يطس يعني يفارتس ( وفسر الماء بعد الجهد بالماء )
( 3 ) يعني : تجده .

( 4 ) يعني : يقعد على قلبك .




:D

[خالد433]

الحل من وجهة نظري : تاخذ معك أم خمس ... :(


احسن حل علشان مره ثانيه مايفكر يروح

[شفايف نعجة]

اخوي مافيا الصحاري كلام جميل لكن البزعة بزعة معك امير ولا مامعك كله واحد .
محمد الشاوي اشكرك على اطرائك وعلى قولك البزعات هالوقت كثيرة . قبل كم يوم واحد يقول لي تهاوشنا علشان ( حليب وادي فاطمة ) اشغلنا واحد يبيه والمشكلة انه ( خرطم ) وطلع بوزه مترين ليش نقول له خله بعدين
اخوي خالد 433 الحل مكرر قاله قبلك الاخ محمد . :D :D شف لنا حل غيره :)

[ابومالك البري]

هذا من الاساس ما تأخذه معك لا في بر ولا في ديره الله يستر عليه ويخليه لأهله

[ابـ معزي ـو]

لاحول ولاقوة الا بالله
ذا ماينفع معه إلا تزبد له بوجهه (( يعني تكرشه ))..
لان اللي بيستحي هالايام ماهو عايش عشان كذا ..
لازم تزبدها له بوجهه سواء كنتم بالطلعه والا لا ..
واذا كان ماطلعتم للحين .. عطه الزبده على طول عشان مايشغلك ويخرب الطلعه ..

الله يعين الجميع

[ابو مشعل 1]

وش اللي يحدن او يودعن كلها بمعنى واحد وهو يجعلن او يخلين او بالاصح يضطرن احط عزبتي مع هالحقنه او البزعه على قولك وخليه يجرجرن وراوه تقل جالون ولا بعد مهب بعيده ياقف ويقول وش جابكم وراي وراه ماتصير معكم انتم يملا الغنيمه وخلوه هو اللي يطارد وراكم
ويازين بعد كل موتر يصير به عزبه يالله لك الحمد ماهنا كلافه وتراه تنفع لو سبحان الله يتعطل واحد ولا معه عزبه او يصير رفيقك ناقص شي من عزبته المهم عن الدنيا واحواله ولاهيب ضارة


واصل اطروحاتك الرائعه بارك الله فيك

[شفايف نعجة]

أحبتي أبو مالك البري شكرا على مرورك وعلى توقيعك الرائع
ابو معزي شكرا لك . واتخيلك قدام عيوني فاتح باب سيارته تنزل اغراضكم :good: :good:
(ابو مسأل ) شكرا على دعمك والمعذره ماقدرت اكتب المعرف بالانجليزي :D :D

[ابو سليمان101]

الكلام ذو شجون عن بالزعه !

الحبيب شفايف نعجة دائما مبدع في اختيارك المواضيع !

و انا اعرف ذوقك ( ارض على اربع شوارع ) مهب مثل بعض الناس ذوقه ارض تجيها بطياره من فوق!:p

على بالي شبهتك:D عموما نرجع للبزعه وما ادراك مالبرزعه ! وخذ هذه القصة باختصار !

فيه واحد يبي يحج مع ناس من طرف شخص آخر والاخ صاحب الرحلة ( المخرج البارع ) وصله كلام

عن اخينا في الله انه بزعه !! وما راح يحج معه !:confused: الاخ الثاني اسقط بيده ؟!:no:

ويحلف بالله ان الشخص صديق عزيز واعرفه وووو الخ المهم اتضح عكس ذلك ( القصه ربما غير

مفهومه الا ان صاحبنا شفايف نعجه يعرفها جيدا ولعله يكمل):D

عموما لي تعليق آخر لكن بعد أن تشاهدو مشهد قصير عن البزعه .... ارجو قصر الموسيقى ( نزل الصوت)

نشاهد البزعه ونرجع نكمل لكم موقفا وتعليقا لما مثل به اخونا شفايف ...!

تفضل http://www.srq3h.com/blue-164.html (http://www.srq3h.com/blue-164.html)

لاتنسى تقصر على صوت الموسيقى:cool:

[الرسن]

ولله الحمد ماقد مر علي بزعه تدرون ليش لأني دقيق في اختياراتي لمن اكشت معهم او بهم.
والحمدلله اننا لم نرى مثل هذه النوعيات واعتقد انها نادرة الحدوث وهي عادة تحدث بين بعض الغلمان لأن فيها تصرفات صبيانية ولا هي تصرفات اشخاص مدركين.
معالسلامة

[شفايف نعجة]

حبيبي ابو سليمان 101 تحياتي لك والظاهر ماشاء الله انك ماتنسى المواقف لكن خليها مستورة

عزيزي الرسن ماجعلني اكتب الموضوع هو ان البزعات تحصل بين ( شيبان ) وليسو صبيان كما ذكرت
والمواقف كثيرة

حماك الله من البزعات

[بخار الماء]

إن ماجات بالرضا تجي بالقوة حنا ناقصين هذا وأشكاله

[شفايف نعجة]

ِِِلا والله ماحنا ناقصين